Patrimoniu

El Grupu de Desenrrollu Rural Altu Narcea-Muniel.los presenta esti proyectu de cooperación que tien por principales oxetivos sensibilizar sobre los valores del patrimoniu arquitectónicu tradicional del mediu rural, promover bones práctiques de construcción y remocique, amás de dotar de soluciones técniques a los distintos axentes qu’intervinen nos procesos de rehabilitación del patrimoniu.

L’actu va tener llugar nel Auditoriu de la Casa Cultura “Palaciu d’Oumaña” esti miércoles 16 de marzu a les siete y media la tarde.

La cuarta edición de Les Mazcaraes d’Iviernu de Valdesoto que convoca la asociación El Cencerru, va cuntar esti 2011 cola participación de s Boteiros y el Folión, llegaos dende la población ourensana de Viana do Bolo del ‘entroido’, el ‘antroxu’ gallegu.

Esti vienres 25 de febreru, a partir de les 19.30 hores entamen nel Centru Cultural de Leceñes les charres y coloquios quie tienen a les mázcares como protagonistes. y el sábadu, 26 de febreru, a partir de les 17.00 hores y ente’l Palaciu de Valdesoto y la Ilesia, va celebrase’l tercer desfile de mázcares de Valdesoto nel que van participar los Sidros y Les Comedies de Valdesoto, amás d’otros grupos asturianos. En Carbayín va repetise amás esi desfile na mañana del domingu, 27 de febreru.

La Tertulia Pachín de Melás, que’l pasáu 16 d’avientu cumplía’l so segundu añu de vida cola conmemoración de los venti años de la ocupación per parte de les trabayadores de la fábrica testil d’IKE en Xixón, entama’l nuevu añu con una nueva tertulia “Los pilares d’Asturies: investigación y caltenimientu del nuestru patrimoniu”.

Na mesma van participar Pilar García Cuetos, profesora d’Hestoria del Arte de la Universidá d’Uviéu; y Fernando Ornosa, musicólogu responsable del Muséu del Pueblu d’Asturies.

Dende l’agrupación d’Unidá Nacionalista Asturiana (UNA) nel conceyu de Xixón mantienen que “ye esti un tema que ta de plena actualidá nel conceyu, nun hai más que pensar na xestión de los restos de la Campa Torres o na estroza patrimonial que supunxo, y ta suponiendo, proyectos como la ZALIA”. Por esta razón “consideramos que ye un bon momentu pa ponelu enriba la mesa nesti foru abiertu a los temes que nun son quienes a topar calces d’espresión, foru que representa dende l’entamu la Tertulia Pachín de Melás”.

La tertulia va tener llugar nel Bar Cantábrico (Cai Muelle d’Oriente, 3. Xardinos de la Reina, Xixón), a les 20.00 hores d’esti xueves 3 de febreru.

El Conseyeru de Mediu Rural y Pesca señaló na so intervención nel 7u Congresu Ibéricu sobre Recursos Xenéticos Animales, que la Conseyería tien un “fuerte compromisu” na conservación de la biodiversidá ganadera y qu’esi compromisu concrétase en diverses midíes de sofitu, “tanto a los ganaderos que caltienen animales de races autóctones, como a les asociaciones de criadores responsables de desendolcar los programes de conservación d’estes races”. “Les nueses races autóctones asturianes constitúin un patrimoniu d’una riqueza incalculable tanto dende’l puntu de vista económicu, como social, medioambiental o de recursos xenéticos”, añadió Martín.

El Conseyeru tamién apuntó que’l Serviciu Rexonal d’Investigación y Desarrollu Agroalimentariu (SERIDA) ta desendolcando un programa de conservación “ex situ” col establecimientu d’un bancu de recursos zooxenéticos. Martín participó nel actu inaugural del 7u Congresu Ibéricu sobre Recursos Xenéticos Animales que se celbró la selmana pasada nel recintu de Feries y Esposiciones d’Asturies “Luis Adaro” en Xixón.

Esti Congresu aconceyó a científicos, profesionales, estudiantes y a les persones que trabayen o tán interesaes nos recursos zooxenéticos, tratándose aspeutos de la so carauterización xenética y demográfica, morfolóxica y productiva; programes de conservación (teunoloxíes reproductives y esquemes de seleición) y el so desendolcu sostenible pente medies de los productos certificaos, ente otros. Al empar, búscase que seya un foru que contribuya al espardimientu de les novedaes nes téuniques de conservación y carauterización de los recursos zooxenéticos, que puean ayudar al caltenimientu de la mayor diversidá xenética posible y de les nueves formes d’aprovechamientu de los recursos zooxenéticos, posibilitando l’averamientu de grupos de trabayu.Paralelamente a los acontecimientos científicos del Congresu d’ámbitu internacional desendolcóse la feria agroganadera AGROPEC, onde aconceyaron cerca de 500 espositores, procedentes de sectores como la ganadería, l’agricultura, la pesca, la industria alimentaria, los bienes d’equipu pa la esplotación agroganadera y pa les industries tresformadores, l’artesanía y otres alternatives a les actividaes agraries y ganaderes.

Los embalses del Cantábricu tán a dos tercios la so capacidá, mentantu la reserva hidráulica del Estáu alcuéntrase al 70 por cientu, según los datos qu’acaba ufrir el Ministeriu de Mediu Ambiente y Mediu Rural y Marín.

Anguaño hai 38.991 hectómetros cúbicos d’agua embalsao, con una baxada de 776 hectómetros cúbicos no respective a la selmana anterior y con variaciones qu’afecten a la cuenca del Ebro que perdió 236 hectómetros cúbicos.

Nestos díes dalgunos medios de comunicación daben l’anuncia de que la Conseyería Cultura pretendía camudar l’equipu d’arqueólogos que tan trabayando, dende va más de diez años, nel xacimientu castreñu del Chao Samartín. Pruebes d’ello son, según Andecha Astur, “que’l nuevu direutor del Muséu Etnográficu de Grandas de Salime, Francisco Cuesta, y el xeólogu Jesús Jordá tan buscando arqueólogos en Galicia pa desendolcar les nueves escavaciones nel xacimientu y que se camudaren les peslleres del muséu y del llaboratoriu arqueolóxicu del castru pa torgar l’accesu al actual equipu d’arqueólogos, coordináu por Ángel Villa”.

N’Andecha Astur queden “ablucaos énte la forma d’actuar de la Conseyería Cultura y creyemos que los sos responsables lleven tiempu apuntando na direición enquivocada”. Fechos que nun-yos sorprenden “Vímoslo apocayá coles 20.000 pieces arqueolóxiques de la Campa Torres qu’apaecieren abandonaes y vémoslo agora con esti nuevu disparate, polo que dende esta organización política acabamos de pidí-y por escrito a la titular de la conseyería, Mercedes Fernández, que desplique públicamente qué ye lo que pretende facer col Chao Samartín”.

Andecha Astur camienta que’l trabayu d’Ángel Villa y el so equipu “foi seriu y rigurosu a lo llargo de tou esti tiempu y que tienen de siguir al frente de les escavaciones nel castru”.

P’AA, la Conseyería Cultura “nun sólo los quier echar, enriba pretenden contratar arqueólogos gallegos, lo que yá constitúi una tomadura de pelo teniendo en cuenta los escelentes profesionales qu’hai n’Asturies, anque, eso sí, quiciaes pocu “obedientes”, polo que califiquen a la Conseyería Cultura “más al d’una comisaría política al serviciu esclusivu del PSOE qu’al d’un organismu que tien de mirar pol patrimoniu asturianu”.

La viceconseyera de Mediu Ambiente, Belén Fernández fizo anncia esti día e Segovia de que’l Parque Nacional de Picos d’Europa ye’l segundu más visitáu d’España, depués d’El Teide.La Conseyera participa na xunta del Conseyu de la Rede de Parques Nacionales en Valsaín (Segovia).

Belén Fernández aprovechó pa informar colos sos homólogos de Cantabria y Castiella-Lleón sobre l’acuerdu que les trés Comunidaes Autónomes algamaron la selmana pasada en Cuadonga col fin d’asumir la xestión del Parque Nacional del Picos d’Europa.

El xulgáu de lo Social númberu 2 d’Avilés afitó esti martes como “improcedente” el despidu del ex director del Muséu de Grandas de Salime, José María Naveiras Escanlar, conocíu como Pepe ‘El Ferreiro’, anque desestimó declaralu “nulu” polo que Naveiras pue ser indemnizáu pero non repuestu al frente del Muséu si asina lo quier la Conseyería de Cultura.

La sentencia ordena la realmisión de ‘El Ferreiro’ o l’abonu de les indemnizaciones previstes, que nesti casu sedríen les correspondientes a un xornal d’un añu, un total de 25.529,28 euros.

Con esta sentencia, el Xuez estima la demanda de Naveiras y da como fechu probáu que llevaba trabayando como director del muséu dende 1989.

Delles agrupaciones ecoloxistes atalanten que’l gallu montés alcuéntrase cuasi desaniciáu n’Asturies na zona Centro-Oriental (Somiedu, Teberga, Quirós, L.lena, Ayer, Casu, Ponga, Amieva) sigún amuesa’l censu actual.

Los ecoloxistes asturianos camienten que se pasó na zona Centro-Oriental d’Asturies de los 229 machos en 1983 a los 50 nel 2001-2003. Y nel censu caberu pasóse a namái que trés machos vistos y otros dos posibles, lo que supón una reducción de más del 90 por cientu.

El Garrapiellu cumple en 2010, venti años d’actividá, y Otru añu más, l’asociación cultural xixonesa Tertulia Cultural “El Garrapiellu” prepárase pa facer la perconocida ruta andariega ente Xixón y Cuadonga, una travesía que nesta asociación vien faciéndose dende’l so empiezu. Son al rodiu quince mil los andariegos que tolos años, camín de Cuadonga, pasen pelos ablucantes paisaxes que-y dan forma a esta sienda que percorre los conceyos asturianos de Xixón, Villaviciosa, Piloña, Parres y Cangues d’Onís.

La ruta Xixón a Cuadonga tien al rodiu de 75 quilómetros. La marcha entama en Xixón, más concretamente en Deva pa dempués d’unes poques xornaes, polo xeneral faise en dos díes de camín, llégase al santuariu de Cuadonga. Pa ello, hai que siguir les marques que punxo l’Asociación Cultural El Garrapiellu. Éses marques son trisqueles (tamién llamaes garrapiellos), hai dellos llugares onde se punxeron cartelos de madera.

La Tertulia Cultural El Garrapiellu convida a tolos interesaos n’acompañar a los socios a apuntase a la hestórica ruta. La Marcha a Cuadonga va tener llugar esti añu los díes 9-11 de xunetu. Saldráse’l vienres 9 de xunetu a les 8:30 la mañana dende la ponte de piedra de Deva, xunto’l llavaderu, y ta abierta a xente de toa triba al preciu de 70 € pa socios y 75 € pa non socios, incluyendo nueches en Sietes/Anayu y Llames de Parres, cena del sábadu en Llames de Parres, almuerzu del domingu en Llames de Parres y autobús de vuelta dende Cuadonga hasta Xixón. Pa la xente que s’incorpore a la marcha’l sábadu, el preciu ye de 50 € pa socios y 55 pa non socios.

Los interesaos han ponese en contautu con Vicente nel teléfonu 629.17.69.35 o col presidente de la Tertulia, Tino Lozano, nel 606.39.03.44. El plau ye hasta’l 16 de xunu, pero les places tán mui llimitaes, namás 32 persones van poder agospiase nos llugares previstos.

Imáxenes del Camín de Xixón a Cuadonga en 1990