Patrimoniu

L’asociación Cultural Faceira, en collaboración col Conceyu de Carrizu de La Ribera (Lleón), celebra esti sábadu, 26 de payares a partir de les 18:00 hores en Carrizu la “II Bardoniana. Filandón de música tradicional llionesa n’alcordanza de Caitanu A. Bardón”, dedicada a la música tradicional lleonesa. Nella van intervenir músicos ya investigadores de la tradición oral lleonesa.

Nel actu va cuntase cola participación del músicu y luthier Fran Alegre Pozuelo, el dúo de folk lleonés Tarna, que va interpretar temes nueves del so repertoriu, y el grupu de folk l.lacianiegu Tsuniegu.

Coles mesmes, va tener llugar una llectura de poemes en lleonés coordinada pol poeta Abel Aparicio, con audiovisuales del compositor zamoranu de música coral Rubén García, y una mesa redonda sobre la música tradicional lleonesa moderada pol folclorista David A. Cárcamo.

La II Bardoniana va concluyir con un filandón y amagüestu con preba de baldre de castañes asaes, entamaos pol escritor y cuentacuentos Manuel Ferrero, y que va tar amenizado polos músicos participantes nel eventu.

L’espaciu escoyíu ye la Casa de Cultura de Carrizu de la Ribera, asitiada na cai Doctor González Álvarez, e/n.

El Conseyeru de Cultura y Deporte anunció estos díes una fonda revisión de la política de caltenimientu de los horros y paneres qu’hai n’Asturies. De magar esti momentu la so Conseyería va encargase directamente de restaurar y reparar horros del sieglu XVI y paneres del sieglu XVII d’especial relevancia histórica, artística y patrimonial, acabando con un política de sovenciones que dexaba en manes de los propietarios la conservación o non d’un patrimoniu fráxil y d’importantísimu valor.

El Conseyeru recordó que “l’anterior Alministración nun apurrió nin un solu euru de los presupuestos autonómicos al arreglu d’horros en 2011” y abogó por una “seria reflexón sobre la política de sovenciones a particulares que se vieno desenvolviendo nes últimes trés décades” yá que recordó que “Llamentablemente, la política de sovenciones nun detuvo la desapaición d’horros y paneres d’enforma interés, de construcciones de los sieglos XVI y XVII, delles profusamente decoraes; nós podemos restaurar los elementos más destacaos, pero precisamos tamién un compromisu de los propietarios por qu’autoricen el desenvolvimientu de los llabores de caltenimientu”.

La Conseyería va empezar a aplicar esta política en 2012 nuna serie d’horros del conceyu de Quirós: “Vamos Ser selectivos porque caltener ye escoyer”. Les restauraciones van tar venceyaes al ámbitu d’actuación del Muséu Etnográficu de Quirós, encargáu de la divulgación y espardimientu d’estes construcciones.

La Dirección Xeneral de Patrimoniu Cultural prepara, coles mesmes, un estudiu de los primeros horros y paneres que se caltienen na rexón pa integralo nuna base de datos del inventariu únicu del patrimoniu cultural asturianu. Tamién va promover un mayor espardimientu de los horros y paneres que se caltienen n’Asturies “porque”, según sorrayó Marcos Vallaure, “una gran mayoría d’asturianos desconoz la so esistencia y la so importancia pal nuesu patrimoniu cultural; anque paeza mentira, equí nun esiste nin un solu folletu turísticu alrodiu de los horros asturianos”.

Esti día 18 de setiembre la Tertulia Cultural El Garrapiellu va a percorrer la villaviciosina Ruta de los Molinos del Ríu Profundu. Esta ruta de calter etnográficu foi descubierta pol etnógrafu maliayu y miembru d’El Garrapiellu Rafa Balbín y ñaz Valbucar, rematando en Buslaz. Pel mediu percuerre’l fondingon formáu pol Ríu Profundu con paisaxes de plasmu, va tomando distintos nomes según los pueblos pelos que pasa, en 9 quilómetros de percorríu atópense 22 molinos en bastante mal estáu, pero que dan idea de lo importante que foi en toa Asturies la “cultura’l pan” como elementu de comunicación ente los pueblos porque fueron bastantes los caminos y siendes que s’abríen pa dir a moler, a la vez tamién desendolcaron la cultura inmaterial, son munchos los cantares, lleendes y tradiciones qu’inda tán na memoria de los pueblos.

Rafa Balbín espublizó un llibru -guía andariega sobre esta ruta: “Los molinos del Profundu”, editáu por VTP en mayu del 1997. El llibru ye imprescindible pa facer el percorríu y entender la importancia patrimonial que ta a puntu de despaecer.

La Ruta de los Molinos del Ríu Profundu ye ruta habitual de la T.C. El Garrapiellu qu’en collaboración con Balbín, editó un folletu y realizó delles presentaciones, charres, proyeición de diapositives, etc. La ruta yera curiada por esta asociación. Fináu Rafa, auténticu guardián de la ruta, ésta tá cayendo nel escaezu, polo que ye importante revitalizala y pidir al ayuntamientu de Villaviciosa que la cuide.

El puntu d’entamu va ser el Café de Vicente en Villaviciosa al rodiu les 10:30 de la mañana del domingu día 18 de setiembre, n’almorzando los andariegos tirarán al entamu la ruta.

Dientro de la colección “Toponimia”, l’Academia de la Llingua Asturiana, asoleya’l númberu 135 correspondiente al Conceyu de Santu Adrianu, parroquies de Llavares y Villanueva, del que ye autor Jesús Fernández Fernández.

Con esti númberu entamen los cartafueyos de toponimia dedicaos al conceyu de Santu Adrianu. Llavares asitiase nel estremu noroeste de conceyu , en llende con Palombar (La Ribera), Puertu (Uviéu), Tuñón (Santu Adrianu), Pedroveya (Quirós) y Peñerúes morcín). Villanueva ta na ta nel estremu sur del coneyu y llenda con Llinares, Proaza y Villamexín (Proaza), Pedroveya (Quirós) y Tuñón y Castañeu’l Monte (Santu Adrianu).

La revista La Sidra, en collaboración cola Fundación Asturies XXI y el Muséu del Pueblu d’Asturies va celebrar el segundu cursu de Fotografía Etnográfico-Museística que se celebrará los prósimos 11 y 12 de xunu.

El cursu va facese nes instalaciones del Muséu del Pueblu d’Asturies de Xixón y sedrá impartíu por dos conocíos fotógrafos, collaboradores de la revista La Sidra, César Fernández y Luis José Vigil-Escalera, y pretende dotar a los aficionaos a les semeyes de los conocimientos precisos pa realizar trabayos fotográficos etnográfico-museísticos qu’arriendes del propiu valir artísticu, contengan la información preciso -na mesma semeya y na información complementaria- que les faiga válides nos campos etnográficos y museísticos.

Con esta nueav iniciativa, LA SIDRA entama un nuevu llabor de recuperanza y xeneración d’una base datos fotográfica qu’afite y esparda’l patrimoniu etnográficu sidreru asturianu.

Pa más información ya inscripciones pue escribise a lucefotografí a@gmail.com o llamar al teléfonu 696 31 51 89.

El colectivu Anonymous Ast acaba xubir a la rede un vidiu nel que da voz a los falantes de les parroquies carreñines de Quimarán, Prevera, Llorgozana, Priendes o El Pieloro, dempués de que los sos topónimos se punxeren en dulda a lo llargo de munchos mesos, tres la oficialización de los nomes tradicionales d’estos llugares nel BOPA de 6 de mayu de 2005. Con esti documentu, onde se pueden ver delles entrevistes feches a falantes de la zona pol Profesor Álvarez-Balbuena xunto con Ramsés Ilesies Fernández y Xosé Antón Fernández “Ambás”, ente finales del añu 2010 y principios de 2011, quier demostrase “d’una manera nítida, atayante ya incuestionable que los topónimos recoyíos pol equipu asesor y oficializada, son los topónimos tradicionales”.

Nel vidiu puede sentise a los habitantes de la zona esplicando como los nomes oficializaos son los tradicionales y como entá se caltién el so usu, polo que tán reconocíos polos vecinos como “tradicionales, populares y cotidianos”. El colectivu Anonymous Ast quier “al traviés de les sos acciones, y al traviés d’esti vidiu en particular, llantar cara, d’una forma atayante, a aquellos elementos distorsionadores que pretenden callar la voz del pueblu, la voz de la xente, la voz popular”, en referencia a dellos medios de comunicación qu’atacaron la oficialización d’estos topónimos y sobre los que tamién se fai repás nel audiovisual.

Audiovisual en Youtube

L’Asociación San Tirso del Eo organiza un “Encontro de Portadores de Tradición Oral”, dientro del so Plan de Recuperación de la Cultura Tradicional. Esta iniciativa, qu’algama yá la so sétima edición, ye una amuesa de cultura tradicional tresmitida de forma oral y que se representa en cinco árees: oficios, costumes, música tresmitida d’oyíu, xuegos populares y lliteratura oral.

L’actu va celebrase na área recreativa del ríu Eo, n’O Chao, a partir de les 12 hores del sábadu 7 de mayu, cuntando cola participación de Rosa Roces, coordinadora del Foru d’Asociaciones d’Asturies; Laura L. Santamarina, del Centru de Voluntariáu de Noroccidente; y Luis Felipe Fernández .

Acaba d’espublizase, en formatu llibru, un estudiu etnográficu sobre les construcciones qu’esistieron nos márxenes del ríu Carrilón, calce que ñaz na redolada’l pueblu de La Curciada (Cabranes) y escurre peles parroquies de Coya (Piloña) y Cecea (Nava) hasta la so desembocadura nel ríu Punegru, afluente del Piloña, cerca del pueblu navetu de Carancos.

El trabayu recueye información sobre la esistencia de trés molinos fariñeros, yá desapaecíos; la ponte medieval del Camín Real o d’El Caneyu, qu’inda esiste; y sobre la ilesia, tamién medieval, qu’esistió nel denomáu prau Cristo y qu’apaez citada na Carta Puebla de Nava.

El llibru, escritu n’asturianu, inclúi un bon garrapiellu de semeyes de los resclavos de les construcciones citaes, ta prologáu pol etnógrafu Inaciu Hevia Llavona y el so autor ye’l piloñés, afincáu en Nava, Daniel Cueli Canto. Aquelles persones interesaes en mercalu pueden facelo nes llibreríes Paraxuga (Uviéu), La Escolar (Nava) y Rima (L’Infiestu) o pidiéndolu al traviés del corréu lletrónicu coya92@hotmail.com

Los díes 20, 21, 22, 23 y 24 d’abril, la Peña Bolística La Vienta los Probes entama un Tornéu de Bolos na Cai en plenu centru de la Villa de Llanes. Pal Tornéu va asitiase una bolera portátil al llau de l’antigua rula, na cai Marqués de Canillejas.

El día 20, la pb Les Riosellanas va midir cola pb Muyeres de Nueva. El día 21 y 22, van tener llugar les tiraes de clasificación del tornéu ente los meyores xugadores asturianos.

El día 23, un combináu de xugadores de la pb Vienta los Probes va enfrentar a un combináu de xugadores d’otres peñes d’Asturies nuna partida d’exhibición. El día 24, va xugase la final (tresmitida en directu per TPA) a les 12h de la mañana.

Los premios xuben a 1500€. Patrocináu pol Excmo. Ayto. de Llanes.

El Conseyeru de Mediu Rural y Pesca, Aurelio Martín, acompañáu pol Director Xeneral de Ganadería y Agroalimentación, Luis Miguel Álvarez, y pol Director Xeneral de Pesca, Marcelino Menéndez, presentó esta mañana’l stand institucional del Principáu d’Asturies na XXV edición del Salón de Gourmets, en Madrid.

El Conseyeru aseguró que la industria agroalimentaria del Principáu ta nésta edición fuertemente representada nel Salón Internacional con 25 empreses, 31 referencies de sidra y 12 denominaciones, amás de pol Túnel de la Sidra qu’ayeri visitó la Ministra de Mediu Ambiente y Mediu Rural y Marín, Rosa Aguilar. Ésta importante presencia d’Asturies “constitúi un gran arguyu pa mi y una amuesa de la pujanza creciente del nuesu sector agroalimentario y de los grandes estándares calidable qu’atesora”, matizó’l titular de Mediu Rural.

Martín quixo destacar la presentación nésta cita de la recién creada marca de calidá ‘Pescáu del Pinchu-Confradía de Cuideiru’, “qu’espresa la determinación de los representantes del nuesu sector pesqueru pola puesta en valor de les sos producciones”.

Coles mesmes, aprovechó la so intervención nel actu de presentación oficial pa destacar la importancia de la industria agroalimentaria n’Asturies y l’apueste que dende’l Gobiernu del Principáu fíxose por esti sector. Martín indicó que nos últimos trés años, la Conseyería de Mediu Rural destinó casi 40 millones d’euros a la modernización del les industries agroalimentarias, más de 2 millones euros a la promoción de los nuesos productos y 1,5 millón d’euros en sofitar a los Conseyos Reguladores de les nueses marques calidable. “Y tou ello, hai que recordalo, nuna situación de restricciones presupuestaries de resultes de les dificultaes económiques poles que tamos travesando”, aseguró.

El Conseyeru desplicó que, nel Principáu, más de 9.000 persones trabayen nesti sector, lo que representa más del 14% del total del emplegu industrial d’Asturies. Coles mesmes, informó de que’l valor total de les vientes de la producción agroindustrial averense a los 2.000 millones d’euros, lo que supon más del 15% del valor total de les vientes del conxuntu del sector industrial asturianu.