Patrimoniu

Andecha Astur vieno acabante de facer anuncia esta selmana del so amiéstamientu a la campaña pa salvar de la tala’l míticu Carbayón de Rozadas que pesia los 300 años d’edá y por mor del desenfotu del “Principado” y la Casa Conceyu de Bual, nun cunta con denguna midía de proteición. Andecha Astur presentó énte l’Ayuntamientu Bual y el “Principado” sendos escritos pa que’l carbayón de Rozadas gocie de la debía proteición pa torgar que puea llegar a ser cortáu sigún la voluntá espresada polos sos nueos dueños, nun dando llicencies nin permitiendo’l so corte mentes dure’l procesu de proteición.

El Carbayón de Rozadas, en rialidá un pradainu o sipreira Acer campestre. tien abondos motivos pa cuntar con proteición específica, tanto pola so edá (300 años) comu pol so calter emblemáticu pal pueblu, lo que-y permitiría ser declaráu Padrimoniu Natural, Bien d’Interés Cultural o Sitiu Hestóricu, figures toes elles que garantizaríen la so sobrovivencia a salvu de puntuales intereses particulares.

Con estes iniciatives Andecha Astur amiéstase a la campaña entamada en Bual, ente otros pola Asociación d’Amigos del Texu, y fai un llamamientu a participar na campaña que tienen entamada en Change.org col oxeticu de recoyer firmes pa intentar aparar la tala iminente d’esit arbol emblemáticu.

Campaña de peticiones en Change.org

Los cinco volumes del Atles Sonoru de la Llingua Asturiana”, editaos pol Muséu del Pueblu d’Asturies-Rede de Museos Etnográficos d’Asturies ente 2003 y 2010, tán yá accesibles on line na páxina web de la Rede de Museos Etnográficos d’Asturies (www.redmeda.com). Los 63 documentos sonoros editaos reproducen con calidá dixital les distintes modalidaes llingüístiques d’Asturies (oriental, central y occidental) por aciu relatos narraos de viva voz por falantes naturales de cada zona.

Pa facilitar l’audición y comprensión d’estos relatos, cada documentu sonoru va acompañáu de la so correspondiente trescripción testual. La so consulta ye llibre y gratuita nesti enllaz.

Esta serie de documentos sonoros entiende una área xeográfica que percuerre’l territoriu asturianu d’oriente a occidente por aciu grabaciones realizaes en 26 conceyos (Ibias, Degaña, Cangas, Ayande, Tinéu, Somiedu, Miranda, Grau, Yernes y Tameza, Teberga, Quirós, L.lena, Riosa, Morcín, Mieres, Ayeri, Llangréu, Samartín del Rei Aurelio, Llaviana, Sobrescobiu, Casu, Ponga, Amieva, Cangues d’Onís, Onís y Cabrales). Anguaño, dende l’Arquivu de la Tradición Oral del Muséu del Pueblu d’Asturies ta trabayándose na edición d’una serie nueva de documentos sonoros que va entender les distintes “falas” de los 17 conceyos que formen la contorna del Eo-Navia, y que se va incorporar llueu a la edición on line del Atles Sonoru de la Llingua Asturiana”. L’oxetivu del Atles Sonoru de la LLingua Asturiana” ye amosar les distintes variantes vives de la llingua asturiana por aciu l’audición de relatos orales, lleendes, cuentos populares, romances y cantares que, gracies a la so edición sonora, convertir nuna manifestación tanxible del patrimoniu cultural inmaterial d’Asturies.
Enllaz n’Internet

El Muséu del Pueblu d’Asturies acaba d’adquirir n’Uviéu la magnífica semeya fotográfica de don Julio Somoza (Xixón, 1848-1940), realizada pol fotógrafu xixonés Joaquín García Cuesta pa escontra 1925. Tratase d’un positivu de xelatinu-bromuru sobre papel de 34 x 24 cm que ye, amás, una de les poques semeyes conocíes d’esta personalidá xixonesa y asturianoa, y que probablemente se fixera por cuenta del so nomamientu en 1924 como Cronista Oficial d’Asturies, cargu que se sumaba al de Cronista de Xixón que tenía dende 1909.

El tipu de semeya, según l’estudiosu de la fotografía Francisco Crabiffosse, “alude a la so condición de ciudadanu notable, ya que la so figura y traces denoten nobleza d’espíritu, intelixencia, esperiencia y solidez de criteriu”. Ye un averamientu sincero y respetuoso, que tresmite l’amistá y la collaboración que calteníen el fotógrafu y el retratáu.

Somoza foi una personalidá fundamental en Xixón nel postreru terciu del sieglu XIX y el primeru del XX. A él debese la recuperación de la obra y la figura de Gaspar de Xovellanos, del que los sos escritos si nun ye por Somoza hubiérense perdío de xuru irremediablemente. Participó na escavación de les Termes de Campo Valdés en 1903; escribió una hestoria de Xixón en 1908; axuntó una numberosa y esplendida biblioteca dedicada a Asturies, que donó a la Universidá d’Uviéu, y formó parte del grupu de “La Quintana”, que realizó numberoses y decisives investigaciones sobre Asturies. Esti grupu d’estudiosos taba dafechu al día de lo que se taba faciendo n’Europa nel campu de la hestoria, l’arqueoloxía, la epigrafía, la bibliografía, l’antropoloxía, etc. y dalgunu de los sos miembros va tratar con dalgunos de los investigadores más prestixosos del momentu.

Julio Somoza, en 1911, va ser la primer persona que reclame n’Asturies un muséu nel que se caltengan “preseos de llabranza, traxes del país, preseos músicos, artes de pesca”, etc., esto ye, un muséu etnográficu similar a los que dende 1880 tábense fundando na mayor parte de los países europeos avanzaos.

El fotógrafu Joaquín García Cuesta (1885-1958) nació en Cangues d’Onís y dende bien mozu vivió en Xixón dedicáu a la fotografía, onde morrió. Foi un profesional bien activu ya innovador, especializáu en fotografíes de paisaxe destinaes a la promoción turística d’Asturies. Yera un fotógrafu rigorosu y concienzudu, que como munchos de la so dómina tuvo influyíu pol pictorialismo. El Muséu del Pueblu d’Asturies caltien un total de 275 fotografíes sos, ente les que s’inclúin numberosos negativos orixinales de placa de vidriu.

Esta semeya fotográfica de Julio Somoza perteneció a la colección de Paulino Vigón Cortés, alcalde de Xixón y presidente de la Diputación Provincial d’Uviéu, que foi un gran bibliófilu de llibros d’asuntu asturianu y otres materies. Dende 1986 a payares de 2013 tuvo depositada nel Muséu de Belles Artes d’Asturies. En 2000 espondríase nel Muséu Casa Natal de Xovellanos na esposición “Historia de la fotografía en Xixón, 1839 – 1936” y en 2011 tuvo espuesta nel Muséu de Belles Artes d’Asturies na amuesa “Xovellanos y la so redolada nes colecciones del Muséu de Belles Artes d’Asturies”. Agora, con esta alquisición del Muséu del Pueblu d’Asturies, torna definitivamente a Xixón.

Gaspar Llamazares, diputáu d’IX d’Asturies nel Congresu, denuncia que’l Gobiernu del Partíu Popular dexa de lláu la rehabilitación del Monesteriu de Cornellana, a pesar de les visites y compromisos de los sos diputaos y senadores al cenobiu. Asina s’esprende de la respuesta por escritu que’l Gobiernu unvió al diputáu asturianu en respuesta a les sos entrugues. El Ministeriu de Cultura sostien que’l conveniu de rehabilitación del monesteriu, que foi suscritu pol Ministeriu de Fomentu y el Principáu d’Asturies, “a día de güei ta escastáu, polo que nun ye posible dotalu”. Tampoco, sigue’l Gobiernu, recibióse solicitú pa realizar actuaciones nel inmueble con cargu al 1,5% cultural, nin esiste partida presupuestaria específica al respective”.

Na respuesta escrita del Gobiernu del PP indica que “el correctu caltenimientu del patrimoniu históricu artísticu correspuende al titular de los bienes, y ye l’alministración autonómica la que tien les competencies en materia de caltenimientu del mesmu”.

El diputáu asturianu considera que la respuesta del Gobiernu del PP sobre’l monesteriu “nun puede ser más hipócrita porque per un sitiu el PP visita l’edificiu y comprométese colos vecinos que quieren la so rehabilitación y per otru llau el Gobiernu central da per escastáu’l conveniu, diz nun tener nengún compromisu na materia y nun piensa nin siquier n’incluyilu nel 1,5% cultural”. Esto oldea con que diputaos y senadores del PP d’Asturies van al Monesteriu a faese la semeya y a comprometese col so arreglu, conclúi’l diputáu.

El senador Mariscal acusa al gobiernu de dexar a la Ilesia facese irregularmente con 4.500 edificios, incluyida la mezquita de Córdoba, y entruga a Gallardón si piensa “evitar esti robu”

El senador d’Izquierda Xunida per Andalucía, José Manuel Mariscal, acusa al gobiernu de dexar a la Ilesia facese irregularmente con 4.500 edificios, incluyida la mezquita de Córdoba, y entruga a Gallardón si piensa “evitar esti robu” y alzó esti día al Plenu del Senáu la polémica sobre la titularidá de la Mezquita de Córdoba nuna entruga empobinada al ministru de Xusticia, Alberto Ruiz- Gallardón na que cuestionó al Gobiernu sobre la política que sigue pa favorecer el rexistru de bienes inmuebles per parte de la Ilesia.

Mariscal apeló a Ruiz-Gallardón sobre si plantegóse revisar la lexislación hipotecaria pa suprimir el privilexu que s’otorga a los obispos de la Ilesia católica d’actuar como fedatarios públicos pa emitir certificaciones de dominiu sobre bienes inmuebles p’apoderase d’ellos por aciu la so inmatriculación nel Rexistru de la Propiedá.

El senador d’IX destacó que con una llei “pa dellos preconstitucional, pa otros anticonstitucional” la Ilesia percancióse yá de 4.500 edificios inmatriculados. Nel casu de la Mezquita de Córdoba fízolo pagando tan solo cerca de 30 euros en tases, polo qu’esixó la retroactividá nes inmatriculaciones realizaes dende 2008 “por inconstitucionales”.

Incidió en que “30 euros cuesta faese cola propiedá de la xoya arquitectónica del mundu” y esbilló una serie de datos relativos a la xestión d’estes instalaciones per parte del Cabildru Catedraliciu de Córdoba, ente ellos la multiplicación que tien de faese de los 8 euros que cobra per cada entrada poles más de 1,2 millones de visites al añu que recibe, tou ello llibre d’impuestos.

Énte la convocatoria pola Conseyería d’Agroganadería y Recursos Autóctonos del Principado de concursu públicu pa llicitar, con calter urxente, la xestión del Muséu La Casa del Agua en Rusecu (Sobrescobiu), ensin otru canon de llicitación que “el qu’ufierten los llicitadores”, Andecha Astur manifiesta la so refuga a lo que ye una privatización de la xestión pública d’esti muséu y que podríe ser un pelligrosu precedente pal futuru sistema de xestión de los demás museos y cientros d’interpretación ya información ambiental del país.

Los caballos gallegos de monte exercen un papel fundamental p’asegurar el caltenimientu del llobu y caltener l’equilibriu de esti depredadores col home y el ganáu, según un estudiu que vieno acabante espublizar hai poco’l Conseyu Superior d’Investigaciones Científiques (CSIC).

La investigación destaca qu’esta raza autóctona contribúi al caltenimientu de los gorbizales, y permite la presencia de llobos inclusive en zones con actividá ganadera onde ahai poques preses monteses

La Coordinadora Ecoloxista denuncia ante’l Conceyu d’Uviéu, la Conseyería de Fomentu, y la Dirección d’Enerxía y Mines la contaminación acústica que xenera de madrugada la esplotación de la cantera de Latores allugada na proximidá de la localidá de Cellagu nel conceyu d’Uviéu. Dende’l pasáu 1 febreru l’actividá de la cantera empieza a les 5 de la mañana sacante sábados qu’empieza a les 8 hores y el domingu que nun trabayen, cola consiguiente contaminación acústica que resulta bien fadia a los vecinos.

El coleutivu vecinal ta fondamente esmolecíu pol impactu de l’actividá a eses hores porque torga’l so normal descansu.

Izquierda Xunida de Llanes propón la urxente adopción de midíes pa protexer los bufones de Pría. La formación llanisca critica, amás, la pasividá del gobiernu local y rexonal nel caltenimientu d’unu de los mayores espectáculos de la mariña Europea. El grupu municipal d’Izquierda Xunida denuncia, una vegada más, l’abandonu nel que s’atopa esti monumentu xeolóxicu, daqué que, en repitíes ocasiones, treslladó al gobiernu socialista ensin llograr respuesta dalguna.

Coles mires de protexer los bufones, IX reclama la prohibición de la entrada rodada, habilitando a tal fin un aparcamientu público y gratuitu en terrén municipal. Amás, considérase necesaria la meyora del accesu a la parte de vehículos d’usu ganaderu, una afayadiza señalización del tráficu dende l’autovía, evitando coles mesmes el pasu pol pueblu, y l’allugamientu y caltenimientu de paneles informativos sobre los bufones.

Pa IX ye indispensable que’l Gobiernu d’Asturies declare Monumentu Natural tantu’l campu de bufones, como los cantiles y la sablera de Guadamía.

Los exoloxistes asturianos vienen acabante denunciar lo qu’atalanten ye un precedente inadmisible na xestión del llobu: la Dirección Xeneral refuga la obligación de motivar les actuaciones de control ya incumple el mandatu del plan d’evaluar les condiciones que motiven cualquier actuación.

Los grupos ambientales asturianos fain la crítica una vegada conocíu’l Resolvimientu de la Directora Xeneral de Recursos Naturales, de la Conseyería de Agroganaderia y Recursos Autóctonos del Principáu d’Asturies, p’ampliar la del 29 d’ochobre de 2012 pola que s’aprobó’l programa añal d’actuaciones de control del llobu 2012-2013, programa que remató’l 31 d’avientu de 2013.

El nuevu resolvimientu foi informada pol Xefe de Serviciu’l 27 de xineru como “fayadiza y conveniente la prórroga” en tantu rematar la revisión del plan de xestión. L’actual resolvimientu ta, por tanto, plantegáu y xustificáu lliteralmente como una prórroga” del resolvimientu del 29 d’ochobre de 2012. L’actual resolvimientu plantega’l control de 33 exemplares hasta’l 15 de marzu de 2014.

Sicasí, el testu del plan a valir, y el testu que se revisa y que se sometió a información pública, Nun se plantega la posibilidá de prórrogues de los programes añales de control, lo que tien sentíu, ya que los programes añales establécense y aprueben, una vegada informáu’l Comité Consultivu, en base a los criterios de población de llobos, de los daños al ganáu y de la evaluación del grau de conflictividá social.

El testu del plan establez la posibilidá d’actuaciones escepcionales fora de programa motivaes por variaciones importantes nes condiciones de la población y de los daños producíos, que rican una intervención urxente en razón de la so gravedá”. Esto ye, cualquier actuación hai de tar motivada. Al plantegar, y camuflar, el resolvimientu actual como prórroga, la Dirección Xeneral refuga la obligación de motivar les actuaciones de control ya incumple el mandatu del plan d’evaluar les condiciones que motiven cualquier actuación, qu’hai d’informar amás al Comité Consultivu. Sentaríase amás un precedente inadmitible na xestión del llobu.