Patrimoniu

Esti miércoles 21 de xineru, a les 10, va celebrase nel Muséu del Pueblu d’Asturies de Xixón la xunta añal de la Rede de Museos Etnográficos d’Asturies pa facer balance de les actividaes realizaes en 2014 y propuestes pa 2015. Al mesmu tiempu, presentarase’l trabayu de la restauradora Natalia Díaz-Ordóñez Melgarejo: “Estáu de los museos de la Rede de Museos Etnográficos d’Asturies y propuesta de midíes de caltenimientu preventivu”.

Esta Rede de museos creada en 2001 ye la resultancia d’un conveniu de collaboración ente’l Conceyu de Xixón y la Conseyería d’Educación, Cultura y Deporte del Principáu d’Asturies.

Na xunta participaren responsables de los catorce museos qu’integren na actualidá la Rede, que son los siguientes: Muséu Etnográficu de Grandas de Salime, Muséu Casa Natal del Marqués de Sargadelos (Ferreirela de Baxo, Santalla d’Ozcos), Muséu Vaqueiru d’Asturies (Naraval, Tinéu), Ecomuséu de Somiedu, Muséu Etnográficu “Juan Pérez Villamil” (Puertu de Vega, Navia), Muséu Marítimu d’Asturies (Lluanco), Muséu Etnográficu de Grau, Muséu Etnográficu de Quirós, Muséu Etnográficu de la Llechería (La Foz, Morcín), Muséu de la Sidra d’Asturies (Nava), Muséu de la Escuela Rural d’Asturies (Viñón, Cabranes), Muséu de la Madera (Casu), Muséu Etnográficu del Oriente d’Asturies (Porrúa, Llanes) y el Muséu del Pueblu d’Asturies, que ye’l centru coordinador d’esta Rede de museos etnográficos.

El programa de la xunta ye’l siguiente:

10.00: Balance de les actividaes realizaes en 2014 y propuestes pa 2015. 11.30: Presentación del trabayu de la restauradora Natalia Díaz-Ordóñez Melgarejo: “Estáu de los museos de la Rede de Museos Etnográficos d’Asturies y propuesta de midíes de caltenimientu preventivu”. 13.00: Visita a la esposición “Máquines pa detener el tiempu. Cámares fotográfiques mecániques (1839-1985)”. 13.30: Visita a la esposición “Mundos de la fotografía nel sieglu XIX”.

Xulio Viejo Fernández, director de la Revista de Filoloxía Asturiana, ye l’autor del llibru Paremias populares asturianas (estudio, clasificación y glosa), publicáu pol Centro Virtual Cervantes, del Instituto Cervantes, dientro la so «Biblioteca Fraseológica y Paremiológica» y que vieno acabante d’asoleyase online nestos díes. Edítase en collaboración col Seminariu de Filoloxía Asturiana y la revista «Paremia».

Trátase del meyor catálogu de refranes asturianos iguáu hasta agora, qu’amás pue consultase en llinia o descargase na páxina del Centro Virtual Cervantes.

El llibru, de más de 579 páxines, recueye un total de 3.619 refranes asturianos.

Descarga del llibru online

Esti vienres, 12 d’avientu, a les 19.30h va presentase nel salón d’actos de la Casa de Cultura de Mieres el llibru “Aprendiendo de les cuenques”, de los arquiteutos Ignacio Ruiz Allén y Sara López Arraiza.

Como vais recordar, el programa Conociendo Mieres empecipióse anguaño con una visita al valle de Turón, na que participó como ponente Ignacio. Nesa ocasión solo pudo vese una parte del so trabayu y agora tenemos la oportunidá de conocer, na so totalidá, l’analís que dambos arquiteutos realizaron pa la esposición del Centru d’Arte Contemporaneo de la Llaboral.

Na charra van tar tamién presentes, pa un alderique, miembros de l’Asociación Cultural Santa Bárbara y de SOGEAS (Sociedá Xeolóxica Asturiana).

Nel Conceyo de Bual va facese a presentación pra este sábado 13 de Decembre, ás sete y media da tarde na Casa de cultura de Bual del llibro Parzamique en Brañavara / Conversación en Brañavara, de Fredo de Carbexe.

Nuna pregunta parlamentaria de la que se tenía güei noticia, Gaspar Llamazares, diputáu d’IX d’Asturies, entruga al Gobierno por qué sigue negándose a inscribir al so nome la ilesia de San Antolín de Bedón y a entamar la so rehabilitación, tres de les xestiones realizaes pola Conseyería de Cultura del Principáu.

De la mesma forma, entruga sobre si piensa’l Gobiernu reabrir l’espediente de titularidá, a la lluz de l’acta de compraventa de 1870 na que s’afirma que la titularidá correspuende al Estáu.

A xuiciu del diputáu, la decisión del Ministeriu de Facienda de cerrar la investigación sobre la titularidá de San Antolín de Bedón, ye un xarru d’agua frío “pa quien confiare nes declaraciones de les autoridaes de la Conseyería de Cultura del Principáu abarruntando que l’Estáu inscribiría la Ilesia al so nome y que, dempués de facer la so rehabilitación, cederíala a la comunidá autónoma.

El diputáu tamién pregunta si piensa desenvolvese en collaboración col Principáu d’Asturies y el Conceyu de Llanes un proyectu de restauración d’esta ilesia románica, construyida nel sieglu XIII y reconocida polos espertos como xoya arquitectónica del nuesu patrimoniu cultural y hestóricu, y si tien previstu lliberar dalguna partida económica pa esta obra de restauración.

El grupu parlamentariu d’IX na Xunta Xeneral, en concretu Emilia Vázquez, va defender una moción subsiguiente nel plenu d’esta selmana que propón ameyorar los mecanismos d’información continua a la ciudadanía sobre la calidá del aire n’Asturies, estableciendo un protocolu específicu d’alerta temprano informativa, cuando se produzan situaciones que sían susceptibles de provocar alarma o molición na población; l’impulsu a un programa de revisión del cumplimientu de les Autorizaciones Ambientales Integraes de toles actividaes industriales susceptibles de provocar contaminación atmosférica, amás de faer públiques les inspecciones que se realicen mientres el periodu de vixencia del Plan incluyendo siquier los sos destinatarios, les sos resultancies y, nel so casu, los espedientes subsiguientes a que dieren llugar.

Per otru llau, na sesión del xueves, la diputada Marta Pulgar, va realizar dos preguntes sobre los bomberos d’Asturies. Una d’elles fai referencia a cuál ye la razón pola que’l Conseyu de Gobiernu modificó’l procedimientu d’axudicación de los contratos de los servicios de vixilancia y seguridá n’edificios de l’alministración del Principáu y la segunda entruga al executivu si tien previstu camudar la denominación de la categoría auxiliar de bomberu nel senu del Organismu Autónomu SEPA.

Siguiendo coles actividaes previstes dientro del mes de la toponimia qu’entama la Oficina de Normalización Llingüística de Samartín del Rei Aurelio col enfotu de potenciar l’emplegu de los nomes oficiales de los sos pueblos, a partir d’esti vienres 12 de setiembre pue visitase na Casona del Bravial una esposición qu’inclúi toos estos nomes, asina como información rellacionada col procesu de recuperación toponímica y materiales didáuticos. La principal novedá que presenta esta muestra ye qu’en pocu espaciu pue accedese a una información virtual qu’enancha la información física yá presente nos cartelos y la complementa con enllaces web que s’activen al ser escaniaos cola aplicación Layar, que se pue instalar en tabletes o móviles d’última xeneración.

Los paneles que incluyen más de 150 puntos de realidá enanchada pudieron vese ta a lo llargo del pasáu fin de selmana na FEMEX, onde tuvo mui bona acoyida, polo que s’ufierta agora la posibilidá de facelo durante tol mes na Casona del Bravial de llunes a vienres n’horariu de 9 a 13 hores.

La Oficina de Normalización Llingüística de Samartín del Rei Aurelio, col enfotu de potenciar l’usu de la so toponimia oficial, aprobada por decretu nel añu 2008, va desendolcar a lo llargo d’esti mes de setiembre una iniciativa cola que se pretende informar a la población, l’alministración y los medios de comunicación de los nomes de los pueblos que deben usase. Pa ello durante tol mes van llevase a cabu distintes actividaes encaminaes a esi oxetivu.

La primera d’elles entama’l día 5 de setiembre coincidiendo cola Feria de Muestres y Esposiciones FEMEX que se celebra nel Parque El Florán. Ehí va poder visitase un puestu que va incluyir información rellacionada cola toponimia oficial del conceyu. Nos distintos paneles informativos van tar espuestos tolos topónimos oficiales, y va poder conocese l’orixe de dalgunos d’ellos y más información rellacionada col procesu de recuperación toponímica.

En pocu espaciu va poder accedese a una información virtual qu’enancha la información física yá presente nos cartelos y la complementa con enllaces web que s’activen al ser escaniaos cola aplicación Layar, que se pue instalar en tablets o móviles d’última xeneración. Tamién va haber xuegos rellacionaos cola toponimia destinaos a distintes edaes y regalos pa les persones participantes. Esti espaciu na FEMEX va poder visitase dende’l vienres 5 hasta’l llunes 8 n’horariu de mañana y tarde.

Dempués, a partir del vienres 12 y hasta’l día 30 de setiembre esta muestra va tar a disposición del públicu na Casona del Bravial de Blimea n’horariu de 9 a 13 h. de llunes a vienres.

Per otru llau’l l día 24 de setiembre a les 19 h., y tamién na Casona del Bravial, va tener llugar una charra na que se va esplicar el procesu de trabayu que ta llevando a cabu la Xunta Asesora de Toponimia pa recuperar los nomes tradicionales de los pueblos d’Asturies. La encargada de dar la charra va ser Ana María Fueyo Llaneza, Direutora de Política Llingüística del Principáu d’Asturies.

Amás d’estes actividaes, a lo llargo de tol mes dende la Oficina de Normalización Llingüística va facese un siguimientu especial del usu de la toponimia oficial n’alministración, nos medios de comunicación o na cartelería de les distintes actividaes que lleven a cabu organismos o asociaciones del conceyu. Amás, tamién se pide la collaboración de la población, que puen dexar les sos observaciones y suxerencies telefónicamente, nel corréu llinguasra@gmail.com o nes respeutives páxines de facebook y twitter coles que cuenta’l serviciu.

Manuel González Orviz, Coordinador d’IX d’Asturies, caltuvo esti xueves caberu d’agostu un alcuentru con representantes de l’Asociación de Profesionales Independientes d’Arqueoloxía d’Asturies, na que dambos coincidieron en sorrayar la esmolición pola cayida d’obra pública y l’amenorgamientu de los sos ingresos, yá que gran parte d’estes obres riquíen d’un siguimientu arqueolóxicu. Acompañáu pol voceru parlamentariu de la formación, Aurelio Martín, comprometióse tamién a preguntar na Xunta a la Conseyería de Cultura sobre cuálos son los criterios colos que s’otorguen les subvenciones y cuálos los criterios polos que se prioricen unos yacimientos y non otros.

Nuna nota de prensa asoleyada ayeri depués del aconceyamientu Orviz asegura que “entendemos que son criterios técnicos y d’importancia los que primen a unos yacimientos sobre otros pero, entendemos que ye importante conocer los criterios más allá de la casuística”.

Izquierda Xunida tamién entiende necesariu un Plan Director de Patrimoniu onde se defina’l papel de les instituciones y tamién el de los arqueólogos de xestión y patrimoniu, porque l’arqueoloxía ye tamién riqueza p’Asturies. De la mesma, IX coincide colos arqueólogos na necesidá de que s’apruebe’l reglamentu de la Llei de Patrimoniu asturianu, una y bones la llei ye de 2001 y ta ensin desenvolver. Manuel González Orviz esplicó qu’otru de los asuntos que demanden estos profesionales ye que los arqueólogos de xestión puedan aportar a los proyectos d’investigación yá que anguaño namá pueden ser solicitaos por personal universitario, esto ye, reivindiquen l’accesu per parte de los profesionales del ámbitu arqueolóxicu tamién a estos proyectos.

La Estaya de la Llingua del Conceyu d’Avilés en collaboración cola Asociación MAVEA, organiza esti branu tres visites guiaes al parque Ferrera, que van desenvolviese dafechu en llingua asturiana. El puntu d’alcuentru y salida ye’l quioscu la música que ta dientro’l parque en caúna d’elles, entamando pela qu’esti miércoles, 16 de xunetu, abrió’l programa desde les 11,30 hores, que sedará l’horariu de toles demás visites. El martes, 19 d’agostu y el xueves, 18 de setiembre, a les 11,30 hores completarase’l programa.

Pa participar ye necesario apuntase enantes bien nel corréu electrónicu estayallingua@ayto-aviles.es o nel teléfonu 985 54 55 08.

El númberu de persones que pueden apuntase en cada grupu ye namái que de 15.