Música

Un perguapu proyectu de la Bagad Ronsed Mor de Locoal-Mendon y una bandina y dos cantantes asturianes ficieron respingase al públicu qu’enllenaba na nuechi del vienres el Teatru de Lorient. Sentir una tonada en bretón, arropada por una bagad y una bandina, faciendo tremar un Teatru, bien val una misa.

O Breizh, ma Bro, me ‘gar ma Bro…  L’himnu de Bretaña punxo la emoción y el puntu final a la cabera nueche intercéltica de Lorient, la máxica nueche que sirvió pa homenaxear a Philippe Renard que dexa la Bagad de Lann-Bihoué depués de ocho años de memorable direición, arguyu de Lorient. Y los grupos asturianos tuvieron al altor de la celebración.

La Banda de Gaites “Villaviciosa-El Gaitero” ufrió esti xueves un conciertu nel Esapce Marine, dientro de les sesiones folk del Festival de Lorient, colo que se ponía puntu y final a la participación asturiana nesti espaciu, dempués de l’ésitu de les participaciones de la Banda El Gumial y el grupu San Félix.

El meyor son d’una de les meyores gaites moces del país, Xesús Fernández, foi l’homenax que la delegación asturiana ufrió en Lorient a les autoridaes na recepción de la Subprefectura que se cellebra cada xueves primeru d’agostu en Lorient. Y esti añu con sorpresa incluyía al interpretar a la gaita dende lo cimero d’un árbol del Xardín de la Suprefactura.