Música

Vieya lleenda y promesa moza. veterana Chavela Vargas, mitu de la canción mexicana, y el xoven cantautor Quique González ponen n’escena dos polos musicales estremaos nos escenarios d’Asturies. La primera cantará en Xixón, nun Teatru Xovellanos que yá hai díes escosó les entraes disponibles, mientres que González actuará nel Teatru Nuevu de La Felguera acompañáu del asturianu Pablo Moro.

Llangréu acoyerá a partir de les 20,15 hores de güei y a un preciu de 6 euros p’acceder al recintu la presentación del cuartu trabayu’l cantautor, ‘Kamikazes enamorados’, un discu que va na mesma llinia que los anteriores, cenciellu ya intimista pero con fuerza, y qu’evidencia la evolución del cantautor como músicu y artista dende los sos tres primeros trabayos (‘Personal’, ‘Salitre 48’ y ‘Pájaros mojados’). Esti ye’l primer discu que González asoleya col so propiu sellu discográficu -Varsovia Records- depués d’algamar la carta de llibertá d’Universal.

Nun ye la primer vegada que Pablo Moro actúa como teloneru de Quique González, yá que’l públicu tuvo la ocasión de velos xuntos na sala Santa Sebe d’Uviéu. El cantautor asturianu actuará durante 30 minutos, y tocará les canciones del so esperáu primer trabayu publicáu por una discográfica.

Web oficial de Quique González

L’espolín producíu nel esterior del conciertu que Paul McCartney ufrió en Xixón, al que miles de persones nun pudieron acceder pesie a tener entraes reservaes al traviés de Movistar, engorda con un nuevu capítulu. La Unión de Consumidores d’España (UCE) anunció esta mañana que va interponer una querella contra la operadora telefónica, a la qu’acusa d’obtener un “beneficiu ilícitu” al cobrar los mensaxes que supuestamente garantizaben el regalu de dos entraes por cliente.

El casu, poro, llegará a los xulgaos depués que la UCE decidiera intervenir énte los cientos de denuncies ciudadanes que recibió nes hores siguientes al recital del pasáu martes, pal que Movistar ufrió nes hores previes al conciertu, vía SMS, miles d’entraes gratuites a usuarios de telefonía móvil a cambiu namás de responder al mensaxe nes que se-yos ufríen les llocalidaes.

De sutaque el cliente respondía afirmativamente a la operadora telefónica, ésta ingresaba 0,90 euros más IVA ya unviaba un segundu mensaxe de testu nel que-y confirmaba al usuariu que les sos entraes yá taben reservaes y sólo había recoyeles nuna taquilla d’El Molinón. Magar d’ello, miles de clientes qu’acudieron a retirar les sos llocalidaes vieron cómo Movistar pesllaba la so taquilla, habilitada na Grada Este, poco antes del aniciu’l recital y dexaba fuera a un gran númberu de persones ensin esplicación dala.

Según apuntó güei el presidente de la Unión de Consumidores n’Asturies, Dacio Alonso, too fai barruntar que Movistar unvió un númberu de mensaxes de confirmación superior a la cantidá d’entraes que mercara pa regalar a los sos clientes, conducta qu’en tou casu al responsable de la UCE abúltase-y inxustificable.

Poro, l’organismu de defensa’l consumidor centrará la so querella nel presuntu beneficiu ilícitu que la multinacional telefónica ingresó colos miles de mensaxes unviaos por usuarios que finalmente quedaron ensin entrada. Movistar sostién que la productora’l conciertu, Doctor Music, prometiera-y un númberu d’entraes mayor que’l que a la fin -y facilitó, estremu de niega dafechu la productora.

Estopa, Melendi, Extremoduro, Fito y Fitipaldis, Hamlet, Berrones, Chenoa y David Bisbal. Toos ellos pasarán per Xixón el prósimu veranu, acordies con una programación musical cola que l’Ayuntamientu evita recitales de repercusión mundial y quier facer llover a gustu de toos: Los escenarios de la ciudá acoyerán lo mesmo el pop ensin complicaciones d’Álex Ubago que’l hip-hop xuguetón de los sevillanos SFDK o el soníu comercial de David Civera.

Según la planificación que güei asoleyó el Teatru Xovellanos, responsable de la organización de los festexos municipales, Estopa y El Canto del Loco sedrán les primeres bandes en visitar el veranu xixonés, el 4 y el 6 de xunetu, respectivamente. Esi mesmu mes llevará a Xixón al asturianu Melendi (día 15) y pesllaráse con un conciertu de Víctor Manuel y Ana Belén, el día 31.

No que cinca a agostu, el pesu de los recitales previstos van llevalu Fito y Fitipaldis, qu’actúen el miércoles 4, David Bisbal (día 5), Álex Ubago (20) y Extremoduro, que fará sonar el so rock and roll transgresivu al otru día, 21 d’agostu.

Eso si s’escluyen les actuaciones previstes pa la Selmana Grande, nes qu’esti añu l’Ayuntamientu apuesta pol eclecticismu y desdobla los recitales en dos escenarios casi paralelos: ún na Plaza Mayor, onde les actuaciones empezarán a les 21 hores, y otru en Poniente, nel que van cellebrase los recitales más nocherniegos.

Per dambos van pasar, ente otros artistes, la intérprete de gospel Rebecca Malope, el compositor brasileñu Marcos Valle, la banda de hardcore Hamlet, los veteranos del rock n’asturianu Berrones, el grupu de fusión El Bicho y la cantante Chenoa, productu’l programa televisivu ‘Operación Triunfo’.

Anque’l programa d’actividaes ta yá peslláu, inda tien que superar el formalismu de ser aprobáu pol conseyu d’alministración del Teatru Xovellanos na xuntanza qu’esti organismu va cellebrar el prósimu llunes en Xixón.

Bunbury regresa a Uviéu. El que fora cabezaleru de la banda zaragozana Héroes del Silencio presenta esta nueche nel Auditoriu Príncipe Felipe los temes del so últimu discu, ‘El viaje a ninguna parte’, nun recital que supondrá l’apertura d’una llarga xira que llevará al músicu mañu por más de 80 ciudaes d’Europa y América Llatina.

Enrique Bunbury aportó ayeri a Asturies pa mantener un alcuentru na Fnac Parque Principado con siguidores que mercaren exemplares del so últimu discu, grabáu hasta’l pasáu mes de marzu nos estudios Music Lan, na llocalidá catalana de Figueres, y a la venta dende hai diez díes.

Nel so realcuentru col públicu asturianu, que se materializará a partir de les 20,30 hores de güei, l’artista aragonés fará’l primer rodaxe en directu de los venti temes qu’integren el so quintu discu como solista, la mayoría d’ellos compuestos a lo llargo d’un viaxe a Nicaragua tan prolíficu en composiciones que obligó a Bunbury a facer una esbilla de les 90 canciones qu’atopó enriba la mesa cuando se puso a remanar ‘El viaje a ninguna parte’ de regresu a Zaragoza.

El primer cenciellu d’esi corte, ‘Que tengas suertecita’, acaba d’algamar el númberu ún na llista d’ésitos asoleyada pola Asociación Fonográfica y Videográfica Española (Afyve), que xerarquiza los temes musicales nel mercáu acordies con un criteriu de ventes.

Web oficial d’Enrique Bunbury

Dientro hebio espectáculu, pero fuera tamién. L’atípica situación qu’arrodió el conciertu col que Paul McCartney abrió en Xixón la so xira europea, con miles de persones apetiguñaes a les puertes d’El Molinón ensin accesu al estadiu pesie a tener entraes reservaes al traviés de Movistar, desencadena una fola de denuncies ciudadanes énte los órganos de defesa’l consumidor, mientres la empresa telefónica y la productora Doctor Music cúlpense mutuamente de la falta de llocalidaes.

Movistar sostién que nun recibió toles entraes pactaes y Doctor Music asegura que dio más cantidá de la que taba contratada. Y ente’l fuéu cruzáu, los alredor de 3.000 usuarios de telefonía que vieron cómo la taquilla reservada n’El Molinón pola empresa telefónica pa entregar les sos entraes, previamente regalaes a los ciudadanos a cambiu d’un mensaxe de testu SMS, pesllaba en tornu a les diez de la nueche, media hora antes que Paul McCartney saliera a escena.

Según fontes de la organización del eventu, esiste una esplicación ‘off the record’ pa xustificar el fiascu nel que se vio envuelta Movistar: La firma de telefonía móvil habría mercao unes 2.500 entraes pa regalar a los sos clientes, pero nun esperaba una respuesta afirmativa tan masiva por parte de los usuarios a los que-yos unvió un mensaxe ufriéndo-yos la posibilidá d’algamar dos llocalidaes a cambiu namás de responder al SMS.

El considerable espolín montáu na Grada Este d’El Molinón na mesma nueche’l conciertu -qu’acabó con acordonamientu policial, llanzamientu d’oxetos y glayíos a favor d’otres compañíes telefóniques distintes a Movistar- tien agora continuidá na Oficinal Municipal del Consumidor de Xixón, cuyu teléfonu yá atendió decenes de consultes de ciudadanos que quedaron ensin entrada, mientres la Unión de Consumidores fala de posible estafa y aconseya nun borrar el mensaxe SMS de confirmación que recibieron quienes reservaron entraes al traviés de Movistar, como preba escrita útil na denuncia.

Pal colmu de l’anomalía, el recital del ex Beatle, qu’aconceyó a más de 25.000 persones n’El Molinón, dexa nes arques del Ayuntamientu unes perdes reconocíes de 300.000 euros y pon enriba la mesa el replanteamientu de la programación d’eventos asemeyaos, que requieren altos costes de producción y promoción.

Si a too ello-y axuntamos que na tarde previa al conciertu dábase por fecha l’asistencia de los Príncipes d’Asturies al conciertu -la Delegación del Gobiernu y la Policía Llocal de Xixón teníen yá en marcha los preparativos-, el cuadru cercanu al surrealismu complétase con escenes como la qu’ayeri vivió el responsable de prensa del Teatru Xovellanos, cuando tres paisanes acudieron al equipamientu cultural xixonés pa reclama-y la devolución de les perres de la entrada, qu’elles alquirieren esclusivamente “pa ver a los Príncipes”.

Los Beatles revivieron en Xixón énte más de 25.000 persones. L’únicu de los componentes de la mítica banda de Liverpool que sigue n’activo, Paul McCartney, enllenó anueche d’enerxía ‘retro’ l’estadiu d’El Molinón con un completu repasu al catálogu d’éxitos del grupu col que tocara’l cielu de la fama nos años sesenta, nuna apertura de xira europea con gran respuesta’l públicu y poblada de collor, potencia na escenografía y nel soníu y guiños a Asturies.

McCartney féxose esperar más de media hora. Los acordes de ‘Jet’, ún de los temes rodáu pol ex Beatle na so dómina al frente de la banda ‘The Wings’, presaxaron la so salida al gran escenariu allugáu nel Fondu Norte d’El Molinón. A les 22,36, ataviáu d’encarnao y pletóricu de vitalidá, l’artista británicu recibió una ovación del públicu al salir a escena y correpondió con una inevitable cortesía: “Hola, Gijón; hola, Asturies; viva España”.

Empezaben dos hores y media d’espectáculu que trescurrió casi dafechu poles siendes musicales trazaes por Los Beatles y qu’algamó altes cotes de complicidá colos espectadores al evocar a los dos componentes de la banda yá fallecíos: McCartney dedicó ‘Here Today’ al so ex compañeru John Lennon espurriendo el déu índiz p’hacia el cielu, y de sutaque recordó a George Harrison col tema “All the things must pass”.

Nun faltaron “Yellow Submarine”, tarareáu ‘a capella’, nin la traca musical final con “Hey Jude” y “Yesterday”, ésta cabera ensertada dientro d’un garrapiellu final de cinco bises colos que McCartney y los sos músicos acompañantes quixeron facer el so primer gran final de conciertu nel estrenu de la so xira europea, que va llevalos por otres doce ciudaes del continente.

Glayíos de protesta, güelpes nes taquilles, avalanches énte les puertes y coles p’acusbiar un cachín d’escenariu al traviés d’un requexu abiertu na Tribuna Sur. Miles de persones quedaron ensin accesu anueche al conciertu de Paul McCartney en Xixón depués que la empresa Movistar, que comprometiera entraes gratis a cambiu del unvíu d’un mensaxe, pesllara en tornu a les 22 hores la taquilla habilitada n’El Molinón pa entregar les llocalidaes.

Tal determín dexó a más de 3.000 persones a les puertes de la Grada Este ensin posibilidá d’acceder al interior del estadiu, prohibición que motivó secundaos glayíos en contra de la multinacional telefónica, pidimientos d’una apertura indiscriminada de les puertes del recintu, emburriones y algún llanzamientu d’oxetos.

A la fin, miembros de la Unidá d’Intervención Policial (UIP) del Cuerpu Nacional de Policía acordonaron la taquilla cuando parte de los asistentes yá abandonaren la zona y mantuvieron tenses discusiones con ciudadanos que quedaren ensin la llocalidá que-yos garantizaba l’accesu al conciertu.

La situación provocó escenes como l’apetiguñamientu de públicu na Grada Sur p’acusbiar dende l’esterior un cachín d’escenariu al traviés d’un requexu abiertu pa una eventual entrada de los servicios d’emerxencia nel estadiu, amás de bailles y coros nos aparcamientos aledaños de la cancha xixonesa.

Grupos d’asistentes ensin llocalidá anunciaron nel mesmu recintu d’El Molinón futures midíes de protesta contra la empresa telefónica qu’ufrió les entraes gratuites a cambiu d’un mensaxe de testu tipo SMS y depués nun fexo la entrega correspondiente na taquilla del estadiu.

Los Príncipes d’Asturies, Felipe de Borbón y Letizia Ortiz, tienen intención d’asistir al conciertu qu’esta nueche va ufrir Paul McCartney nel estadiu xixonés d’El Molinón, que rexistrará más de media entrada gracies al repartu gratuitu d’entraes que grandes empreses distribuyen ente clientes y emplegaos. Fontes de la organización del recital confirmaron a Asturnews que recibieron yá la comunicación de l’asistencia de los Príncipes, casaos el pasáu sábadu en Madrid, no que va suponer la so primer visita a Asturies tres del enllace.

El vocalista, baxista y compositor de Los Beatles, qu’actuará énte más de 20.000 persones na que sedrá l’apertura de la so xira europea, ensayó ayeri nel mesmu llugar del conciertu tolos detáis del recital d’esta nueche y saludó fugazmente a los siguidores que lu esperaben nel aeropuertu y a les puertes del estadiu.

La llamada de socorru del Ayuntamientu dio resultáu, anque non nos términos convencionales. Envede suscitar una venta masiva en taquilla, Banesto, Movistar, Caxastur, Coca-Cola y Antena 3 TV, ente otres grandes firmes comerciales, ‘colarán’ nel conciertu de Xixón a unes 5.000 persones coles entraes que previamente mercaron -al únicu preciu de 45 euros, aseguren los responsables municipales- y qu’entá tán repartiendo ente clientes y trabayadores de forma gratuita.

Esi repartu inflará l’aforu de públicu al recital de McCartney, qu’ayeri aportó a Asturies en vuelu priváu y quixo ensayar los pormenores del conciertu n’El Molinón, énte un auditoriu vacíu. D’esa prueba xeneral dedúxose que los siguidores del músicu británicu podrán escuchar güei en Xixón el tan anunciáu repertoriu ‘Beatle’, incluyíes versiones de temes de la mítica banda que McCartney nunca nun interpretara antes en solitario. Por exemplu, ‘Helter Skelter’.

Según asegura la productora del artista, Doctor Music, na so páxina web, tres cuartes partes del conciertu d’esta nueche integraránles canciones de Los Beatles, once d’elles non interpretaes por McCartney na so anterior xira.

El Molinón abrirá les sos puertes a les 19 hores, anque’l conciertu nun empezará hasta les 22. Darréu fine’l recital, Paul McCartney tien previsto viaxar esta mesma nueche de vuelta a Londres pa descansar nel so domiciliu, abandonando l’hotel uvieín de La Reconquista, onde pasó la so única nueche agospiáu n’Asturies.

Web de la productora de McCartney

Dalgo diferente, atractivo y popular. Eses son, en pallabres de Carlos Madera, director xeneral de Promoción Cultural y Política Llingüística, les llinies mayestres de la ufierta cultural que’l Principáu plantega pa pelegrinos del Camín de Santiagu nos sos 511 quilómetros que discurren per Asturies, y que quier afitar los tramos asturianos de la ruta xacobea como alternativa al masificáu Camín Francés.

P’algamar esi oxetivu, la Conseyería de Cultura, Comunicación Social y Turismu esparde per más de venti conceyos un programa de conciertos, representaciones teatrales, conferencies y esposiciones que van prollongase hasta’l mes d’avientu d’esti Añu Santu Compostelán de 2004 y que van implicar a 16 artistes musicales y siete compañíes teatrales.

Isaac Turienzo, Chus Pedro Suárez, Gatos del Fornu, Gueta na Fonte, Tina Gutiérrez, Tejedor, Xuacu Amieva y El Farolito de Buenos Aires, ente otros, espardirán los sos sones d’oriente a occidente y pondrán-y el contrapuntu a la tranquilidá y el sosiegu que, según la titular de Cultura, Ana Rosa Migoya, faen de los tramos asturianos del Camín de Santiago una “referencia ineludible” pa los pelegrinos que transiten p’hacia Compostela vía Asturies, una tierra, destacó Migoya, “protagonista indiscutible” na hestoria de la ruta xacobea.

Magar que’l programa d’espectáculos empobinaos a pelegrinos yá ta en marcha dende primeros de mayo, el Principáu presentó esta mañana na sé uvieína del Real Institutu d’Estudios Asturianos la guía editada p’avera-y al pelegrín les feches y llugares de los eventos. Anque les partes musical y teatral son sustantives, el programa alitáu por Cultura tamién inclúi otres actividaes, como una Selmana Xacobea qu’arrancaráel prósimu xueves 27 n’Avilés, un congresu académicu en tornu al Camín n’ochobre y un ciclu de conferencies xacobees na seronda col títulu “Caminos y pelegrinos”.

Seis grupos asturianos abrieron el Festival de música folk que se cellebró per primer vegada con motivu de la feria de L’Ascensión n’Uviéu. Tolos conciertos ficierónse na llábana de la estación de tren, y al horariu tan poco común pa esti tipu de fiestes, el públicu respondió con una acoyida que bien pue calificase como bastante bona, si se toma en cuenta que los conciertos entamaben al rodiu de les 20,30 y acababen a les 23,30, hora más propia pa un comienzu les en cites asemeyaes.

Los encargaos d’abrir el festival el vienres fueron Los Gatos del Fornu, d’Uviéu, y Llan de Cubel, qu’amosó a les clares por qué ye’l grupu asturianu con más renome internacional. El sábadu entamó el grupu rioseyanu Corquiéu y acabó la nueche Tejedor, con un final perguapu, tocando xunto con dellos componentes de la Banda de gaites ‘Tabladar’ el tema ‘Gaites del infiernu’. Referencies a la boda ente Letizia Ortiz y el Príncipe Felipe nun faltaron nengún de los dos díes.

Los encargaos de zarrar el festival fueron Llangres y Xuacu Amieva. El grupu de Llangréu sabe cómo gustar: L’arpa nos sos temes seliquinos y la fuerza que tien nel restu de les pieces dan-y un toque únicu na música folk asturiano. Llueu tocó-y a Xuacu Amieva, que depués de tantos años enriba nun escenariu yá sabe como ganase al públicu.