Música

Segunda oportunidá pa ver n’escena a la banda británica Flook!. Darréu de la so participación na nueche de San Xuan de Llugones, el grupu folk ramatará güei col so vertixinosu directu un conciertu n’Uviéu por cuyu escenariu tamién pasarán los asturianos Tuenda y Gatos del Fornu. El recital, gratuitu, abrirá nel parque l’Oeste un fin de selmana musical enmarcáu nos Alcuentros Tradicionales Trebolgu, qu’algamen la quinta edición.

El conciertu d’esta nueche, qu’entamará a les 22,30 hores, dará pasu a una segunda nueche celta que, col mesmu horariu d’aniciu, agrupará mañana, sábadu, a les bandes asturianes Llangres y Dixebra y al gaiteru escocés Fred Morrison, de minixira per Asturies en compaña del intérprete de bouzouki Jamie McMenemy.

La xornada’l sábadu, tamién con centru de toles actividaes nel uvieín parque l’Oeste y día caberu de les actividaes, acoyerá amás un mercáu d’antaño a partir del mediudía, amueses de xuegos malabares, competiciones de deporte tradicional y animación musical continua a cargu’l grupu ‘Los Campones’, de la llocalidá d’Hevia, en Siero.

Festival de Xácara

Nel otru estremu de la ciudá, l’Auditoriu ‘Príncipe Felipe’ convertiráse na tarde’l sábadu nel segundu referente de los soníos tradicionales, con un festival entamáu pola Asociación Cultural Xácara cuyu empiezu ta previstu pa les 19,30 hores y que va contar cola participación de la bandina tradicional La Guareña, d’Uviéu; y les bandes de gaites El Gaiteru (La Villa), Noega (Xixón), O Barqueiro (A Coruña) y la propia Xácara, d’Uviéu.

Dancia Prima por San Xuan, pero con innovación. El Teatru Xovellanos de Xixón acueye esta nueche baxo esi nome la representación d’una obra sinfónica y coral del compositor Juan Carlos Casimiro que pretende somorguiar al espectador nel embruxu del país y qu’evoca centru, oriente y occidente d’Asturies al traviés de tres movimientos musicales distintos.

La franxa más al este del territoriu’l Principáu tará representada nel escenariu pol fragmentu ‘Saedia’, que según l’autor de la obra cacipla na mística’l pueblu asturianu emplegando’l cursu del ríu Sella como metáfora del trescurrir de la propia vida.

Al occidente correspuénde-y ‘Somiéu’, un movimientu “líricu y social”, en pallabres de Casimiro, mientres que la zona central pon el títulu xenéricu de la obra -‘Dancia Prima’- nun pretendíu ensalzamientu de l’armonía ente los pueblos del mundu.

A un preciu únicu de 9 euros pa los espectadores, el montaxe pondrá n’escena a 170 persones, col tenor alemán Achim Schulz y la soprano Beatriz Díaz al frente d’un repartu musical cuyu soporte correrá a cargu de la Orquesta Sinfónica’l Conservatoriu de Xixón y el coru Capilla Polifónica ‘Ciudad de Oviedo’.

Jacky Trap, Vaudí, Alfredo González, Royal Crown Revue y Marco Martínez & Xaime Arias Jazz Dúu. La multinacional del ociu Fnac entama, con esa llista de nomes, una serie de conciertos nes sos instalaciones de Parque Principáu pa siguir la estela del Día Européu de la Música, qu’ayeri se cellebró cola baxada del 16 por ciento d’IVA que grava los discos como una de les reivindicaciones centrales d’artistes y consumidores.

Nesa sienda de petición de rebaxa, la gran superficie de venta de música y lliteratura programa una selmana d’actuaciones que güei protagonizarán los avilesinos Jacky Trap, con un adelantu n’acústico de los temes del so nuevu discu, y que mañana, miércoles, tendrá continuidá con un conciertu’l cantautor Alfredo González, que presentará pieces del so primer trabayu, ‘La vida de alquiler’.

Tamién nel espaciu que la Fnac rexenta nel centru comercial Parque Principáu, allugáu nel conceyu de Siero, el xueves asoleyaráse’l cartel definitivu’l festival Crossroad, qu’axuntará en Xixón a primeres figures del rock a finales de xunetu. Rematará l’actu una actuación de Royal Crown Revue, que-y pasará’l relevu al otru día, vienres, al músicu brasileñu afincáu n’Asturies Vaudí.

Los encargaos de pesllar la selmana de cellebraciones musicales na Fnac sedrán Marco Martínez y Xaime Arias, integrantes del dúu homónimu de jazz, qu’ufrirán un conciertu na tarde’l sábadu 26 con un amiestu de sones llatinos, swing y música tradicional.

El ska vallecanu y el rock fechu n’Asturies realcuéntrense enriba d’un escenariu. Les bandes SKA-P y Dixebra ufren güei un conciertu en La Felguera que-y dará continuidá a la collaboración entamada hai tres años por dambos grupos nel trescursu d’un recital en solidaridá col fíu d’un trabayador del astilleru priváu Naval Xixón cellebráu nel recintu de la Feria Internacional de Muestres d’Asturies.

N’aquella ocasión, Dixebra precedió n’escena a la banda madrilana, cuyos integrantes eloxaron la capacidá musical y el soníu en directu de los sos colegues asturianos. Agora les dos bandes van participar nun recital qu’empezará a les 21 hores nel colexu ‘Eulalia Álvarez’, nel que los llangreanos The Lirium asumirán el ‘calentamientu’ del ambiente colos temes del so acabante asoleyar segundu discu, ‘To burn the candle at both ends’.

Les llocalidaes pal conciertu tán a la venta nes tiendes discográfiques Tipo d’Uviéu, Xixón y Avilés, y en Discos LP y Memphis, de Llangréu. La organización fixó un preciu de 10 euros pa la entrada anticipada, tarifa que xubirá a 13 euros si la llocalidá se merca na taquilla.

Pa facilitar l’asistencia al recital, qu’obligará a cortar dende les 14 hores de güei les cais Eustaquio Lecue y Joaquín Valdés, l’Ayuntamientu de Llangréu entama un serviciu estraordinariu d’autobuses con Riañu y Llaviana, con parada en tolos núcleos urbanos de dambos trayectos.

La fecha prevista pal recital de La Felguera supondrá-y a Dixebra facer doblete, yá que la banda avilesina viaxará darréu de la so actuación a Caravia pa participar nuna nueche celta .

Doctor Explosion toca pa Quentin Tarantino. La banda xixonesa, qu’acaba sacar al mercáu un doble recopilatoriu col títulu ‘Totus tuus’, actuará el prósimu llunes na fiesta privada cola que’l director norteamericanu cellebrará la presentación en Madrid de la so última película, ‘Kill Bill 2’, folixa a la que tamién asistirá l’actor David Carradine, protagonista’l llagumetraxe.

Según una nota pública asoleyada pola productora del grupu xixonés, los integrantes de Doctor Explosion viaxarán a Madrid pa pone-y música a la fiesta ‘vip’ de Tarantino, como continuación d’una rellación de la banda col mundu’l cine fraguada nes bandes sonores de películes como ‘Gente Pez’, ‘Krámpack’ y ‘Torremolinos 73’.

Con una reciente y esitosa xira per Italia al llombu, Doctor Explosion afronta yá la so xira de veranu, que va llevalos a escenarios de toa España y a festivales de sonadía internacional como’l Primitive! de Rotterdam, nos Países Baxos.

Formada en Xixón hai agora quince años, la banda acabada d’asoleyar el recopilatoriu ‘Totus tuus’, un repasu a la trayectoria’l grupu al traviés d’un mecigayu d’estilos musicales que van dende’l punk más salvaxe hasta’l pop más melódicu, con rexistros contundentes y una vocación de diversión especialmente tanxible nes actuaciones en directu.

Los usuarios de telefonía móvil que nun pudieron entrar al conciertu de Paul McCartney en Xixón pesie a tener entraes reservaes al traviés de Movistar recibirán a partir de güei 25 euros de compensación polos perxuicios causaos. La multinacional telefónica activa un númberu de teléfonu gratuitu pa que los usuarios afectaos puean reclamar el pagu compensatoriu nos prósimos 30 díes.

Pa solicitar los 25 euros, los usuarios habrán llamar al númberu 900321322 dende’l mesmu teléfonu móvil col qu’unviaron na viéspora’l conciertu el mensaxe SMS que Movistar pedía pa reservar dos entraes por cliente. Magar de la promoción de la compañía telefónica, que nes hores previes al recital fizo un unvíu masivu de mensaxes de testu ufriendo llocalidaes a cambiu namás de responder a esi mensaxe -lo que tenía un preciu de 0,9 euros más IVA-, miles de persones nun pudieron entrar al estadiu d’El Molinón porque nun se-yos entregaron les entraes prometíes.

La mayoría d’usuarios afectaos son clientes de Movistar, qu’al facer la reclamación recibirán una recarga de 25 euros, nel casu de los usuarios de tarxetes prepagu, y un descuentu pola mesma cantidá nel pagu mensual nel casu de los usuarios de contratu. A los clientes d’otres compañíes, Telefónica Movistar va entrega-yos una tarxeta con un saldu de 25 euros válida pa esa compañía.

La compensación, frutu d’un pactu ente la operadora telefónica y la Unión de Consumidores, pieslla dos selmanes de tensión, depués qu’abondos ciudadanos que quedaron ensin entrada a les puertes del conciertu de McCartney, cellebráu en Xixón el pasáu 25 de mayu, denunciaren a Movistar y l’organismu de defensa’l consumidor anunciara una querella collectiva contra la multinacional.

El V Festival Intercélticu Alcuentros Tradicionales Trebolgu, ún de los referentes nel panorama de la música celta n’Asturies, calienta motores: Tres díes de conciertos (24, 25 y 26 de Xunu) y un mercáu d’antaño centrán la ufierta del certame col Parque l’Oeste d’Uviéu como allugamientu central.

Pal primer día’l festival ta prevista la inaguración a les ocho de la tarde, nun llugar inda por confirmar y con La Bandina’l Tombo como protagonista, yá que va presentar el so nuevu discu. De secute habrá un conciertu-presentación con tolos grupos participantes nos alcuentros.

El vienres 25 de xunu, a partir de les 22 hores, subirá al escenariu el grupu asturianu Tuenda, siguíu de los uvieínos Gatos del Fornu y más tarde, de Flook!, conxuntu inglés con raigones irlandeses.

Durante tol sábadu va tener llugar el mercáu tradicional, con artesanía, grupos de baille, malabaristes, deportes rurales, bandines de gaites y cuentacuentos como propuestes previes al empiezu de los conciertos. Llangres será l’encargaú d’abrir la nueche, que protagonizarán darréu el gaiteru escocés Fred Morrison acompañáu por Jamie McMenemy col bouzouki y, como remate de la folixa, los avilesinos Dixebra.

L’Ayuntamientu d’Uviéu tien yá a la venta les llocalidaes pal conciertu que’l solista Alejandro Sanz ufrirá el prósimu 31 d’agostu nel estadiu de San Lázaro, dientro de la so xira de veranu ‘No es lo mismo 2004’.

Les entraes puen mercase, a un preciu únicu de 26 euros, en tres puntos de venta habilitaos directamente pol Ayuntamientu: na oficina de turismu de L’Escorialín, allugada nel Campu San Franciscu; nes dependencies de la Sociedá Uvieína de Festexos, asitiada na cai Ildefonso Sánchez del Río; y nel puestu oficial qu’Uviéu tendrá na Feria Internacional de Muestres d’Asturies, que se cellebrará n’agostu en Xixón.

Amás, los organizadores del conciertu d’Alejandro Sanz tienen entraes a la venta pa la so actuación d’Uviéu nos centros d’El Corte Inglés, nos cines Yelmo Cineplex y nos caxeros automáticos de Caxastur.

Melodíes agridulces construyíes a partes iguales por soníos elléctricos y acústicos. La banda británica Tex La Homa, lliderada por Matt Shaw, presenta n’Uviéu les sos credenciales acabante amosales nel Primavera Sound de Barcelona y col envís de pasiales en xira per España.

Descubiertos pal públicu español pol sellu discográficu Moonplace Records, los integrantes del grupu afincáu nel Reinu Xuníu interpretarán los temes del so segundu trabayu asoleyáu, ‘If just today were to be my entire life’, definíu pola so productora como un discu empapáu de la “suavidá’l burbús constante y adornáu con brillantes destellos”.

El conciertu de Tex La Homa n’Uviéu cellebraráse nel Tatsu Bar, allugáu na cai Asturias, a partir de les 22 hores y a un preciu únicu de 6 euros. La parte llocal del recital pondrála’l dúu Botella, integráu por Javier Otero (Los Mancos, Lansbury) y Noel Álvarez (Herbert, Klaus and the happy amish), que subirán al escenariu guitarres acústiques en mano pa repasar temes propios y versiones.

Web oficial del grupu

El folk asturianu tendrá representación en Polonia a primeros de xunetu. El grupu Felpeyu participará nel VII Festival de Cultura Celta de Dowspuda como única banda procedente del tramu del arcu atlánticu al sur de Bretaña, dientro d’un programa que va desarrollase a lo llargo de tres xornaes y qu’inclúi les actuaciones d’otres trece formaciones musicales polaques, estones, lituanes y bretones.

La intervención de Felpeyu nel festival ta fixada pal sábadu 3 de xunetu, nun escenariu compartíu colos grupos polacos Elphin y The Reelium, los lituanos Kulgrinda y los bretones Hudel. El conciertu nel Festival de Dowspuda abrirá-y a la banda folk asturiana una serie de tres recitales en territoriu polacu, que va completase con un conciertu nel Ethnosfera Festival de Skierniewice el domingu 4 de xunetu y una tercer actuación en Varsovia al día siguiente, llunes 5.

La incursión polaca ye la única salida al estranxeru que Felpeyu tien prevista pa esta temporada de veranu, na que’l grupu mantién confirmaos conciertos en Llugones (23 de xunu), Castiello Bernueces (27 de xunu), Les Arriondes, Baíña, Cantabria y nes fiestes uvieínes de San Matéu.

Felpeyu formóse nel añu 1991 en Salamanca, onde Ígor Medio (bouzouki) y Ruma Barbero (percusión) cursaben estudios de Belles Artes. N’años sucesivos incorporáronse al grupu Xuan Nel Expósito (curdión), Elías García (vigulín), Fernando Oyágüez (vigulín), Diego Pangua (gaita), Lisardo Prieto (vigulín) y Carlos Redondo (guitarra).

Web oficial de Felpeyu