Música

El vienres en Lorient ye casi siepre día llargu onde los haiga. Y nun pue ser dotramiente. Per un llau, entamen a acumulase los díes con poques hores de suañu. Y d’otru llau, esti vienres suel tar enllenu d’actividá pa la delegación asturiana. Y asina foi.

Los primeros en trabayar pela tarde foron los miembros de la Banda de Gaites de La Reina del Truébanu de Navia, que foron a ún de los centros comerciales que’l Festival emplega pa esparder el folklore de baldre ente los habitantes de la zona.

Y cásique a la mesma hora, los llavianeses de Deua Dubra participaben xunta DRD nel concursu pa promeses qu’hai tolos años nel Festival. Nin Deua Dubra nin el tríu qu’axunta a David, Rubén y Diego Pangua llograron pasar a una final na que namái taben presentes grupos que veníen contrataos pol festival pa desendolcar actuaciones fuera concursu, lo que dende llueu nun paez casualidá. Y nun lo debe ser sobremanera depués de ver l’actuación de los dos grupos asturianos y la de dalgunos escoceses ya irllandeses que se plantaron na final del concursu. Pero los certames como esti tienen eses coses. Hai que tar a les dures y a les madures. Y eso persaben facelo los nuesos músicos.

Depués, darréu de la cena, la cita yera nel Gran Teatru de Lorient, enllenu hasta la bandera pa ver al grupu de Dances Celme de Pontevedra y a Chus Pedro, que vinía a presentar el so caberu discu, ‘De ñublu y orpín’, a Lorient, onde yá tuviera l’añu pasáu col espectáculu del Día d’Asturies que’l Principáu traxo pa cellebrar l’añu d’Asturies.

Chus Pedro nun taba contentu cola so voz, pero sonó con fuercia abonda pa gustar a tolos presentes, tanto a los qu’entendíen les sos presentaciones n’asturianu como a los que nun yeren a pescanciar los sos monólogos. Chus Pedro, acompangáu por un grupu sólidu que se perconoz, ufiertó dalgunes de les sos interpretaciones más nomaes, como ‘Chalaneru’, xunta los temes del so caberu discu. Versiones como la que fai de ‘Nel campu nacen flores’ entusiasmaron a los bretones, que lu ficieron salir a base de palmes a facer un bis qu’agradecióse enforma.

Pa ver a Chus Pedro aportaron munchos asturianos que nun llevaben más díes en Lorient. Ellí tovieron José Suárez Arias Cachero (Felechosa), Chema’l del Tigre Xuan, tan veteranu como fiel a la cita de tolos años, Naciu Llope y dellos otros qu’esfrutaron depués de la nueche col cantante de Nuberu y el so grupu.

Y depués de sentir a Chus Pedro y de comprobar que tovía se merquen discos nestos tiempos d’Internet, a lo que se vía a la salida’l conciertu, tornamos otra vuelta pal Espace Festival, recintu onde Deua Dubra diba pesllar la nueche a les dos de la madrugada.

Con una hora por delante, los/les de Llaviana ufiertaron un conciertu con cásique tol repertoriu que’l grupu va incluyir nel so primer discu. El que va ser el primer discu de Deua Dubra y que lleva por títulu ‘El Soyáu de Mardana’ inclúi 12 temes que yá tienen títulu. ‘Vientu medievu’ ye’l qu’abre esti CD y que da pasu a ‘Lin’, ún de los meyores temes y de mayor comercialidá, cola voz de Lili y Leti penriba una melodía tan afayadiza como tradicional. ‘Dubra’, ‘Una d’amor o non’, ‘A lo cubero cuyá’ y ‘Mayestrina’ son los temes que se puen esfrutar hasta aportar a ‘Tormaleo’, que ye poco menos que la canción que más-yos presta a los miembros del grupu y qu’empleguen como final davezu nes sos actuaciones. ‘Tin del colláu’, una riesta de vaqueiraes con lletres de la Cuenca; la canción que-y da títulu al cd, ‘El soyáu de Mardana’, y ‘Verde’ completen esti trabayu xunta una canción en francés que valió en Lorient pa ganase los aplausos de los qu’asistieren a los dos conciertos que diera Deua Dubra: “Je viens d’un pays du nord”.

Una nueche que nun finó a les tres colos sones caberos de Deua Dubra, porque la nueche ye llarga en Lorient y allárgase más a poco que se plantegue. Y los asturianos plantéguenlo davezu.

El sábadu ye día de fuelgu y día de playa (siempre que faiga sol y asina lo fizo), namái qu’una actuación, bien preparada y desendolcada: la del grupu folklóricu Esbardu que nel Cabaret animó la tarde, mentantu los demás miembros de la delegación asturiana se preparaben pa la nueche del Puertu Pesqueru, onde esperaba una xornada mui tradicional de música con raigañu y, nesta ocasión, la actuación especial de Merzhin.

Y depués d’otra noche llarga como toa una selmana, apórtase al domingu (munches vegaes ensin malpenes dormir) pa entamar el camín de vuelta. Un camín llargu, pero non tan llargu como esta selmana de sentimientos fondos y orgullu de país. Un orgullu qu’a lo pior tien de tar arrequexáu otru añu más, hasta que l’añu que vien, un 5 d’agostu, nel añu d’Irllanda, tornemos otra vuelta a sacalu a pasear por Lorient.

La música asturiana parió más de mediu millar de nuevos temes en 2003. La Sociedá Xeneral d’Autores y Editores (SXAE) tramitó nesi periodu el rexistru de 546 nueves composiciones y afitó el predominiu de la música sobro’l teatru, estaya na que se rexistraron 36 obres, y el discretu sector audiovisual, que xeneró la tramitación de sólo 12 pieces a lo llargo de tol exerciciu correspondiente al añu pasáu.

Acordies colos datos que figuren na última edición publicada del anuariu que la Sociedá d’Autores ellabora cada añu coles principales cifres de la so actividá, los creadores asturianos pasaron en 2003 poles oficines de la entidá pa garantizar los drechos d’autor d’un total de 594 nueves obres, cifra que constitúi un indicador de la vitalidá’l sector pero que nun supón la totalidá de les nueves creaciones.

Si se tomen como representativos los datos d’afiliación a la delegación de la SXAE n’Asturies, que dirixe Javier Vidal, el Principáu cuenta anguaño con unos mil artistes n’activo -esi ye’l númberu de los asociaos a la Sociedá d’Autores- depués del ingresu de 85 nuevos socios a lo llargo del añu anterior, la práctica totalidá d’ellos compositores.

Siempre según l’anuariu de la SXAE correspondiente a 2003, la música asturiana o executada n’Asturies ta somorguiada nuna progresiva perda d’espectadores -de 882.000 rexistraos en 2000 en tolos xéneros sacante la música clásica, a poco más de 600.000 contabilizaos l’añu pasáu- y xenera unos ingresos d’al rodiu de 3 millones d’euros añales.

El mozu grupu de LLaviana, Deua Dubra, ufiertaba a les doce la nuechi d’esti vienres 6 d’agostu nel Espace Festival de Lorient un conciertu nel que presentaben dellos temes del discu que va apaecer na seronda col titulu de El Soyau de Mardana.

Nun directu que dexa a les clares la fuercia del grupu, los de LLaviana emocionaron a los asturianos presentes nel Festival y dioeron-yos a los bretones razones asgaya pala collecha d’aplausos qu’algamaron. Con un frances cenciellu y direutu Lili presentaba delles de les canciones que como “Verde” o “Lin”, que pue sentise en direutu nesti enllace van formar parte del so primer discu que tien de salir na seronda.

Deua Dubra son tres moces de LLaviana y una de L’Entregu que, xunta a un violinista y un bateria tamien de la cuenca, formen un grupu que va a ser ensin dubies la revelacion d’esti 2004 n’Asturies, gracies a les voces femenines de Lili y Leti y a la bona composicion de temes qu’amesten lo tradicional con un son modernu y direutu.

El que va ser el primer discu de Deua Dubra y que lleva por títulu “El Soyáu de Mardana” inclúi 12 temes que ya tienen títulu. “Vientu medievu” ye’l qu’abre esti CD y que da pasu a “Lin” un de los meyores temes y de mayor comercialidá, cola voz de Lili y leti penriba una melodía tan afayadiza como tradicional. Dubra, Una d’amor o non, A lo cubero cuyá y Mayestrina son los temes que se puen disfrutar hasta aportar a Tormaleo que ye poco menos que la canción que más-yos presta a los miembros del grupu y qu’empleguen como final davezu nes sos actuaciones. Tin del colláu, una riesta de “Vaqueires” con lletres de la Cuenca, la canción que dá títulu al CD “El soyáu de Mardana” y “Verde” completen esti trabayu xunta una canción en francés que sirvió en Lorient pa ganase los aplausos de los qu’asistieren a los dos conciertos que diera Deua Dubra: “Je viens d’un pays du nord”.

Ramón Prada estrenó na nueche’l xueves 5 d’agostu en Lorient la primer “cantata pa celtes y orquesta” que se compón n’Asturies, exemplu vivu del alitar de la música tradicional de raigañu célticu en xuntanza con instrumentos clásicos. Prada, cola calidá qu’amuesa davezu, llogró ufiertar esti xueves pela nuechi en Lorient una composición que brilló na interpretación, nun Gran Teatru enllenu hasta la bandera.

Podía decise más alto, pero non más nidio. La cultura céltica tradicional, de la qu’Asturies ye exemplu constante colos sos músicos y les sos músiques, tien la meyor de les amestaúres posibles col mundu de la música clásico, significación de cultura d’altor y rebufu elitista. Y el productu tien más altor cultural entá que los instrumentos presentes nel escenariu onde s’interpreta, como pue sentise nesta pequeña parte d’un de los seis movimientos que componen la obra.

Sigún desplicó Ramon Prada esta mesma selmana na rueda de prensa previa al estrenu absolutu de ‘Keltikhé’, “la conesión cola nueva obra ye esi sentimientu celta que tenemos y que nos fai guardar les tradiciones, por eso escoyí la voz femenina que ye la representación de quien guardare hasta agora eses tradiciones, daqué que coincide con tol aarcu atlánticu”. Prada dixo tener nidio tamién que “cada vegada que vengo equí veo esa conesión ente les cultures d’esti territoriu”, n’alusión al Intercélticu de Lorient. Y na nuechi del xueves sintiéronla tolos que tuvieron la suerte d’alcontrase ente’l millar llargu d’espectadores que disfrutaron d’una interpretación midía y perbién ensayada.

Pesie a les dificultaes que presentaba l’escenariu, pequeñu pal trasiegu de xente que pide la obra, les evoluciones del grupu Muyeres per esi escenariu quedaron dafechu ensertaes na cadarma clásica na que s’alcontraben colocaos los músicos. Y la voz de Mari Luz Cristóbal y de les componentes del grupu Muyeres sonaron con fuerza y calidá entemecíes coles gaites, l’arpa, los whistles, los oboes y violines, y la percusión.

“El conceutu de la obra ye mui difícil porque quier axuntar los cantos tradicionales colo sinfónico, y ye una obra mui densa, 75 minutos”. Asina de nidiu dexó’l calter de la obra’l compositor asturianu, qu’afitó amás nes sos declaraciones que “lo más dificil, lo más interesante ye ver como s’amesten los instrumentos tradicionales col mundu sinfónicu… esa ye la parte más dificil”. Nesi sen, l’autor yá recalcara antes del conciertu d’anueche que la mayor dificultá “alcuéntrase n’adaptar los músicos tradicionales a la música sinfónica”.

Ramón Prada tamién desplicó que “hai de tener la suficiente capacidá p’abrir les oreyes y entender cómo tien d’encaxar l’instrumentu tradicional nun conxuntu que ye estremáu, como’l de los instrumentos clásicos, pero eso nun ye una llimitación en sí mesma”.

“Una cantata pa celtes”

‘Keltikhé’ ta definida pol mesmu autor como una “cantata pa celtes y orquesta”, lo que pue ser enforma significativo pa desplicar lo que quier algamar esta composición sinfónica: “convertir la tradición al mundu sinfónicu teniendo como entamu la fuercia de la voz tradicional de les muyeres asturianes. Voces de muyer améstense nesti sen coles bombardes, les gaites, el binioù, el bouzouki o los whistles pa formar una estaya tradicional que se va meciendo na cantata de Ramón Prada colos instrumentos clásicos.

La obra preséntase estremada en seis movimientos qu’entamen con ‘Avalon’, una obertura de la que surde la voz nel segundu movimientu; ‘Muyeres’, nel que s’interpreten cancios tradicionales como ‘La Danza de les Vieyes’ (una danza prima arrecoyida en Mieres del Camín y qu’entama col romance de San Xuan Verde), ‘Cantar bien neña’ (una tonada del más fondu estilu ayerán) y dos dances vaqueires (La Gallegada y La Media Vuelta), y darréu ‘Carnac’, un movimientu inspiráu dafechu nel misteriu qu’arrodia a les piedres bretones que se caltienen nesa rexón y que de lo más arraigonao va treslladando l’ambiente a un adagio melancólicu pa gaita irlandesa y low whhistle.

‘Lancelot’ ye’l cuartu movimientu de la obra y apurre l’únicu romance de temática artúrica que se conoz n’Asturies y que val, sigún se recueye nel programa, “pa da-y vida, agora cola voz solista, a la lleenda”. El quintu movimientu, ‘Lugnasad’ amuesa l’ambiente de la fiesta cola que los celtes festexaben el veranu, emplegando pa ello un binioù-koz, una bombarda tenor y una gaita asturiana, cubriendo d’esta mena una gama de más de cuatro octaves

‘Ástura’ ye’l movimientu final, y xermen de tola obra, que surde dende la ñeblina pa finar con un canciu tradicional a coru que xune otra vuelta la orquesta cola tradición de mayor raigañu.

Suplementu d’Asturnews sobro’l Festival de Lorient 2004

Xixón abre una selmana de música en sesión continua. Con Raimundo Amador como incorporación d’última hora pa suplir la cayida’l cartel, el 13 d’agostu, d’Isaac Delgado, l’arxentín Kevin Johansen inagura esta nueche nueve díes de conciertos desdoblaos na Plaza Mayor y la playa de Poniente, escenarios polos que pasarán Hamlet, Marina Heredia, El Bicho, Chenoa, SFDK, Los Berrones y David Civera.

Clasificáu a sigo mesmu como ‘desxeneráu’ pola imposibilidá d’adscribilu a un xéneru musical concretu, Kevin Johansen espardirá güei na Plaza Mayor de Xixón los temes de los sos dos trabayos editaos ‘The Nada’ y ‘Sur o no Sur’, éxitos n’Arxentina pola so mecigaya d’idiomes, testos y sentíu l’humor.

Mañana, sábadu, ‘Gospel sans frontieres’ estrenarán l’escenariu de la playa de Poniente y dexarán el más tradicional allugamientu énte l’Ayuntamientu pal Festival Nacional de Gaites ‘Villa de Xixón’. El fin de selmana completaráse coles actuaciones, el domingu, de Laura Simo, creadora d’un espectáculu musical que rinde tributu al cine, y Marcos Valle, compositor brasileñu enfotáu en redefinir la bossanova.

El llunes sedrá’l turnu pa la intérprete flamenca Marina Heredia, mientres la banda Hamlet s’adueña del escenariu de Poniente. A él xubiránse el martes 10 los integrantes del grupu Los Berrones, que grabarán el so conciertu pa editar na seronda un discu-dvd recopilatoriu. Antibalas Afrobeat Orchestra pondrá’l contrapuntu étnicu na Plaza Mayor.

El miércoles actuarán Chenoa -Poniente- y la fadista Joana Amendoeira -plaza l’Ayuntamientu-, mientres que’l xueves garrarán el relevu la banda de fusión El Bicho y los raperos SFDK. Pal vienres 13 fíxase’l conciertu del guitarrista andaluz Raimundo Amador, pioneru na modernización del flamencu hacia’l rock y últimu intérprete en pasar pola Selmana Grande antes de la nueche de los fuegos artificiales.

El pieslle de les fiestes, depués del baille de la dancia prima y del ‘restallón’, pondrálu na playa de Poniente el cantante David Civera.

El xueves ye un día ensin muncho que facer pa la delegación asturiana en Lorient. A lo menos davezu. Pero esti añu había un acontecimientu que nun se mos podía escaecer. Pola so importancia cultural, escénica ya identitaria. Estrenábase ‘Keltikhé’, definida pol mesmu autor como una “cantata pa celtes y orquesta”, lo que pue ser enforma significativo pa desplicar lo que quier algamar esta composición sinfónica: “convertir la tradición al mundu sinfónicu teniendo como entamu la fuercia de la voz tradicional de les muyeres asturianes”. Voces de muyer améstense nesti sen coles bombardes, les gaites, el binioù, el bouzouki o los whistles pa formar una estaya tradicional que se va meciendo na cantata de Ramón Prada colos instrumentos clásicos. Y eso fizo Ramón, y eso llograron la orquesta lorientesa y los músicos asturianos que xunta Fred Morrison y el grupu Muyeres, ente otros artistes y coleutivos musicales participaron d’un estrenu tan esperáu como significativu. Un estrenu del que dimos cuenta nestes mesmes páxines d’Asturnews y del que nun vamos repetinos.

Namás que tenemos de recordar cómo ye la obra, que de xuru podremos ver bien pronto n’Asturies y que merez ser escuchada muncho más que descrita.

La obra preséntase estremada en seis movimientos qu’entamen con ‘Avalon’, una obertura de la que surde la voz nel segundu movimientu, ‘Muyeres’, nel que s’interpreten cancios tradicionales como ‘La Danza de les Vieyes’ (una danza prima arrecoyida en Mieres del Camín y qu’entama col romance de San Juan Verde), ‘Cantar bien neña’ (una tonada del más fondu estilu ayerán) y dos dances vaqueires (La Gallegada y La Media Vuelta), y darréu ‘Carnac’, un movimientu inspiráu dafechu nel misteriu qu’arrodia a les piedres bretones que se caltienen nesa rexón y que de lo más arraigonao va treslladando l’ambiente a un adagio melancólicu pa gaita irlandesa y low whhistle.

‘Lancelot” ye’l cuartu movimientu de la obra y apurre l’únicu romance de temática artúrica que se conoz n’Asturies y que val, sigún se recueye nel programa, “pa da-y vida, agora cola voz solista, a la lleenda”. El quintu movimientu, ‘Lugnasad’, amuesa l’ambiente de la fiesta cola que los celtes festexaben el veranu, emplegando pa ello un binioù-koz, una bombarda tenor y una faita asturiana, cubriendo d’esta mena una gama de más de cuatro octaves.

‘Ástura’ ye’l movimientu final, y xermen de tola obra, que surde dende la ñeblina pa finar con un canciu tradicional a coru que xune otra vuelta la orquesta cola tradición de mayor raigañu.

Primero disfrutamos d’una tarde d’ensayu xeneral como poques. A les nueve y media tremamos pol desendolcu del estrenu. Y a les once, na recepción que’l patrocinador del conciertu, el míticu diariu Le Monde, ufiertó nel Mercáu de Lorient, pudimos felicitar con gran ciñu a Ramón Prada y los demás llogradores d’un eventu que dexó Asturies al altor que se merez n’Europa, por muncho que n’Asturies sigamos ensin viaxar lo suficiente. O polo menos, siguen ensin viaxar los suficiente los que nos alministren, colo que davezu nun tienen perspeutiva denguna de que’l mundu hai tiempu ya que nun ye planu, sinón más bien asemeyáu a una pelota.

L’aportar de Chus Pedro

Pero tamién foi esti xueves xornada de recepción. Recepción de veteranos de la música astur como Chus Pedro, qu’aportaba colos sos músicos yá bien entrada la tarde y que mos cuntaba lo que venía a presentar equí na nueche del vienres, na primer conversación que caltenía con un asturianu en Lorient. Cuntaba p’Asturnews lo que venía a facer equí, a presentar el so discu pero tamién a seguir disfrutando con una presencia qu’entamó l’añu pasáu cuando vino pa participar nel Día d’Asturies. Pero Chus Pedro ye crónica de vienres, como otres celebraciones tradicionales de la delegación d’Asturies en Lorient de les que ye pronto pa falar.

Suplementu d’Asturnews sobro’l Festival de Lorient 2004

Los díes que tán en metanes de la selmana son díes ensin apuru en Lorient y en cualaquier programación que se vaiga allargando más de siete díes. El miércoles ye un día ensin munchu trasiegu, pero cuando hai asturianos pol mediu nunca nun se sabe. En tou casu, esti miércoles 4 d’agostu de 2004, los asturianos pudieron descansar un pocu depués de dellos díes de muncha xera. Descansaron toos hasta la nueche, menos les bandes de gaites y el grupu Esbardu, que tovieron de dedica-y un pocu de tiempu a preparar la nueche máxica que nun perdona.

Y en cuantes qu’aportó la nueche entamó la romería. A les nueve y media la cita yera na Ilesia San Lluis, onde’l grupu Muyeres ufiertaba una actuación enforma estremada de la que dieren nesti mesmu escenariu l’añu pasáu coincidiendo col añu d’Asturies nel Festival. Pa entamar ficieron un ensayu de lo que sedría a la nueche siguiente la so apaición nel escenariu del Gran Teatru pal primer movimientu de la cantata compuesta por Ramón Prada, ‘Keltikhé’. Y l’entamar nun pudo ser meyor. Depués de dellos cancios tradicionales, dalgún ramu y la voz poderosa de Mari Luz Cristóbal Caunedo, acompangada pol sentimientu que-y pon a la gaita Emilio Martínez, foron abondo pa que nel desfilar final del grupu los aplausos enllenaran la Ilesia.

Malpenes unos minutos pa felicitar a les muyeres que siguen ufriendo’l sentir tradicional del nuesu país allá per onde anden (y caleyen enforma pel mundu) y tenemos d’axuntanos nel Espace Festival en metá de la villa lorientesa, al entamar del parque. Ye l’espaciu que sustitúi al Espace Bisson d’otros años, onde lo alternativo tenía’l so llugar. Ye l’allugamientu onde se fadrá na fin de selmana’l concursu de nuevos grupos que se facía nel Bisson y tamién sustitúi al tradicional Pub onde acababen los más nocheniergos enantes d’aportar al míticu Le Saloon, un chigre cuasi clandestinu qu’esti añu pesllara. Ellí tán yá entamando la so cabera actuación nel Festival (y van tres) Los Gatos del Fornu.

Y ficiéronlo entá meyor.

Y ye que la tercer actuación de Los Gatos del Fornu en Lorient mereció enforma la pena. Ye bien difícil atopar un ameyoramientu nel escenariu como’l qu’amosaron los rapazos d’Uviéu. Meyor colocaos, muncho más animaos, y enforma convencíos del munchu potencial que tienen. El primer día faltó-yos como a tou bon grupu asturianu convencimientu y puesta en escena. Y a la tercera foi la vencida. Una actuación muncho más calculada que la segunda y nun digamos yá la primera, dexando a les clares el calter seriu y bien encadarmáu d’un grupu que-y dedica un mínimu procuru al direutu musical y qu’agora tamién lo fizo col direutu escénicu. Raúl llevantándose coles panderetes y llevantando al públicu, baillando con Ana a lo suelto como fadríen los más veteranos. Lorena ensin parar un minutu nel escenariu y tolos demás miembros del grupu perfectamente situaos, nun espaciu más pequeñu que los anteriores, pero enforma meyor aprovecháu.

Afitándose otra vuelta nes voces llimpies y tradicionales de Rosa y Ana, Los Gatos dexaron bien a les clares el so enfotu por facer un direutu plausible, entamando poles presentaciones en francés, que ye la primer vegada qu’un grupu de folk asturianu trai tan bien preparaes.Y otra vuelta resolvieron la parte postrera del conciertu perbien con esi pequeñu concursu nel qu’ufierten un CD al d’ente’l públicu que s’anime a subir al escenariu y acompangar a Rosa y Ana con un estribillu a lo “la,la,la” en versión tradicional del Occidente que resulta graciosu y apañáu y ye dende llueu un final curiosu pa un conciertu bien camentáu. Esta vegada foi una neña asturiana, qu’a poco la dexaron xubíase penriba les voces de Rosa y Ana.

Viendo los tres conciertos de Los Gatos del Fornu, ún faise a la esperanza de que los nuesos grupos acaben de creese les sos posibilidaes. Tantes qu’ún nun ye nin a camentales. Fadrá falta tiempu, pero hai fundamentu. Y eso ye lo importante. Y como la nueche enxamás nun pue finar meyor que disfrutando del espíritu de Lorient, allá foron los de La Reina del Truébanu a dexar bien a les clares quien manda aquí cuando quier.

Davezu los escoceses dominen les cais y los desfiles nocherniegos de Lorient porque tán tolos díes a pie d’obra trabayándose al públicu, con bon humor y ganes de protagonismu. Los asturianos somos más serios o facemos como que lo somos. Pero cuando nos ponemos nun tenemos rival. Y eso dexáronlo bien claro los del Occidente. La Banda de Gaites La Reina del Truébano salió a metá de camín del Estadiu de fútbol del que venía de participar na Nueche Máxica y llanzóse a marcar el pasu peles cais entá enllenes de Lorient. Yeren casi les dos. Una bona hora pa qu’entá se pudiere estremar la calidá del ruxíu. Y estremóse.

Los más nocherniegos del Festival rindiéronse a los pies de La Reina. Y los nuesos gaiteros occidentales marcharon satisfechos a suañar. Nun hai como venir a Lorient pa que l’autoestima xorreza. Probablemente faigan falta munches escursiones a esti país bretón.

Suplementu d’Asturnews sobro’l Festival de Lorient 2004

Los Gatos del Fornu abrieron na nuechi’l vienres les actuaciones na carpa nomada como Cabaret y brillaron xunta los gallegos Os Enxebres, amuesando’l pergrande altor de la nueva musica folk d’Asturies que tien nesta numberosa y equilibrada banda a ún de los sos meyores representantes.

Al dia siguiente, a les tres de la tardi, nel auditoriu’l Palaciu de Congresos, tornaron otra vuelta con mayor afitamientu a encandilar a un públicu que persabe de música y sabe afalagar a los músicos con calidá y procuru, tanto na execucion de los conciertos como na puesta n’escena.

La xornada d’un llunes en Lorient siempre entama de la mesma forma: Surde de los efluvios de la nueche intercéltica, que tien l’estadiu de fútbol del Lorient F.C. como abellugu y que nesta vegada cuntaba amás col fechu de que la encargada d’abrir la nuechi yera la voz maravillosa y afalagadora de Mari Luz Cristóbal. ‘A capella’, sola nel centru de la cancha, Mari Luz fizo perbién, de forma inmeyorable, l’apertura de la nuechi del domingu que ye casi llunes.

Corriendo, alpenes acabante sentise’l vigulín de la estrella’l festival d’esti añu, l’arcadiana, o canadiense si se prefier, Dominique Dupuis, hai que treslladase a les oficines del Palaciu de Congresos pa poder asistir a la entrega premios del Macallan, qu’amás de cuntar col son de les gaites ganadores nos concursos y la presencia de los meyores gaiteros d’Europa, ye actu regáu col güisqui de la nomada marca escocesa.

Esti añu yera’l gaiteru d’Avilés Ángel Domingo’l que recibía na madrugada’l llunes primeru d’agostu la que ye la mayor cualificación que pue algamar un gaiteru asturianu: el Troféu Macallan, güei nomáu Mac Crimmon, col que’l Festival de Lorient premia al meyor intérprete de gaita asturiana y gallega. Y facíalo a la vera’l ganador, otra vuelta esti añu, del concursu de gaita escocesa, l’inmeyorable Fred Morrison, nun actu nel que tolos gaiteros presentes quixeron rendir homenaxe a Jairo Garcia, el gaiteru que mos dexara nel mes de payares y que como facía alcordanza Marco Antonio Guardado, “l’añu pasáu taba equí con nós disfrutando con gayola del añu d’Asturies”.

Marco Antonio Guardado nun podía reprimir l’alcordanza a Jairo nel minutu de silenciu que’l Festival-y dedicó a un gran gaiteru que mos dexó mui pronto y al qu’entá recordamos tolos que coincidimos con elli nes nueches de Lorient y nes xornaes intenses que se pasen equí d’escenariu n’escenariu.

Fred Morrison tamién s’alcordó de Jairo nes curties declaraciones que fizo a Asturnews acabante de finar l’actu d’entrega de premios, nes que nun dexó pasar el so gran cariñu por Asturies, “una tierra con unes xentes y una cultura que me presten muncho”, acertó a dicir el mayestru gaiteru nun asturianu entemecíu col castellán que dexa bien a les clares el so interés por Asturies y lo asturiano que pudo amuesar na so reciente visita al Principáu.

Darréu se-y ufiertó esti homenaxe a Jairo, Ángel Domingo amosó nidiamente por qué algama esti añu el reconocimientu en Lorient, con una interpretación con munchu ciñu y meyor sentíu rítmicu y unos floreaos colos que dexó plasmaos a otros compañeros gaiteros que persaben lo que ye templar l’instrumentu.

La nuechi sigue y nun se pue dexar de llau porque nel momentu menos pensáu pasa que se pue atopar a dos de Gatos del Fornu que van a la gueta d’El Saloon (el más nomáu de tolos bares de Lorient, el caberu en pesllar, qu’esti añu ta peslláu dafechu y amuesa un cartel d’alquiler que lo dexa bien a les clares). O pue atopase a los rapazos de Deua Dubra que tan acabantes d’aportar a Lorient darréu de dar unes cuantes vueltes perdies pela ciudá.

Acostase bien tarde y llevantase bien ceo, esi ye’l bon facer en Lorient. Y a les 11 hai que tar nel Ayuntamientu. Como cada llunes de Festival. Los sones y los bailles del Grupu avilesín Esbardu son los protagonistes esta vegada de la recepción oficial que fai l’Ayuntamientu de la ciudá de Lorient a toles delegaciones artístiques y musicales de los países celtes que participen nel Festival. Músicos gallegos, galeses, irllandeses, escoceses, de Cornualles y de la Islla de Man ufrieron una amuesa de lo que son les sos músiques tradicionales y tamién más modernes nun actu protocolariu col que se suel arrancar los díes más culturales y menos comerciales del Festival de Lorient.

Tres d’esta recepción del Ayuntamientu entamen les actividaes de la selmana, más empobinaes al mundu dafechu cultural que al popular, que suel recoyer nel fin de selmana muncha mayor participación de públicu. Agora entá queda a metanes de selmana otru actu protocolariu asemeyáu al del Ayuntamientu na casa’l prefectu francés, daqué asemeyao al Delegáu del Gobiernu n’Asturies. Tolo demás van ser actos culturales, d’espresión musical y artística céltica.

Nel Ayuntamientu, amás de la música y los bailles del grupu Esbardu pudieron vese les dances tradicionales d’un cuartetu de muyeres escoceses, colos sos blincos rituales, y sintiéronse la canción tradicional averada a la tonada que se cancia na Islla de Man, los cantares enllenos de señaldá de Cornualles y la nueva música que col curdión tán creando los mozos irlandeses, ensin escaecer la más tradicional arpa qu’aportaba dende’l País de Gales.

Suplementu d’Asturnews sobro’l Festival de Lorient 2004

Ramón Prada presentó na mañana d’esti miércoles 4 d’agostu na sala prensa del Festival de Lorient l’estrenu mundial de ‘Keltikhé’, la so nueva composición sinfónica “pa Celtes y orquesta”, que va interpretase’l xueves pela nuechi nel Gran Teatru de Lorient. Una obra de difícil interpretación que desplicó a Asturnews n’esclusiva y que xune’l mundu la música tradicional celta col mundu sinfónicu y que lo fai cola voz de la muyer como elementu d’amestaúra nuna representación del calter matriarcal que tradicionalmente tuviera la nuesa cultura.

Sigún desplicó Ramon Prada na rueda de prensa, que se pue sentir completa nesta grabación, “la conesión cola nueva obra ye esi sentimientu celta que tenemos y que nos fai guardar les tradiciones, por eso escoyí la voz femenina, que ye la representación de quien guardare hasta agora eses tradiciones, daqué que coincide con tol arcu atlánticu”. Prada dixo tener nidio tamién que “cada vegada que vengo equí veo esa conesión ente les cultures d’esti territoriu”.

“El conceutu de la obra ye mui difícil porque quier axuntar los cantos tradicionales colo sinfónico, y ye una obra mui densa, 75 minutos”. Asina de nidio dexó’l calter de la obra’l compositor asturianu qu’afitó amás nes sos declaraciones que “lo más dificil, lo más interesante ye ver como s’amiesten los instrumentos tradicionales col mundu sinfónicu… esa ye la parte más dificil”. Nesi sen, l’autor recalcó que la mayor dificultá “alcuéntrase n’adaptar a los músicos tradicionales a la música sinfónica”.

Ramón Prada tamién desplicó que “hai de tener la suficiente capacidá pa abrir les oreyes y entender como tien d’encaxar l’instrumentu tradicional nun conxuntu que ye estremáu, como’l de los instrumentos clásicos, pero eso nun ye una llimitación en sí mesma”.

“Una cantata pa celtes”

‘Keltikhé’ ta definida pol mesmu autor como una “cantata pa celtes y orquesta”, lo que pue ser enforma significativo pa desplicar lo que quier algamar esta composición sinfónica: “convertir la tradición al mundu sinfónicu teniendo como entamu la fuercia de la voz tradicional de les muyeres asturianes. Voces de muyer améstense nesti sen coles bombardes, les gaites, el binioù, el bouzouki o los whistles pa formar una estaya tradicional que se va meciendo na cantata de Ramón Prada colos instrumentos clásicos.

La obra preséntase estremada en seis movimientos qu’entamen con ‘Avalon’, una obertura de la que surde la voz nel segundu movimientu, ‘Muyeres’, nel que s’interpreten cancios tradicionales como ‘La Danza de les Vieyes’ (una danza prima arrecoyida en Mieres del Camín y qu’entama col romance de San Juan Verde), ‘Cantar bien neña’ (una tonada del más fondu estilu ayerán) y dos dances vaqueires (La Gallegada y La Media Vuelta), y darréu, ‘Carnac’, un movimientu inspiráu dafechu nel misteriu qu’arrodia a les piedres bretones que se caltienen nesa rexón y que de lo más arraigonao va treslladando l’ambiente a un adagio melancólicu pa gaita irlandesa y low whhistle.

‘Lancelot’ ye’l cuartu movimientu de la obra y apurre l’únicu romance de temática artúrica que se conoz n’Asturies y que sirve, sigún se recoye nel programa “pa da-y vida, agora con la voz solista, a la leyenda”. El quintu movimientu, “Lugnasad” amuesa l’ambiente de la fiesta cola que los celtes festexaben el veranu, emplegando pa ello un binioù-koz, una bombarda tenor y una faita asturiana, cubriendo d’esta mena una gama de más de cuatro octaves.

‘Ástura’ ye’l movimientu final, y xermen de tola obra, que surde dende la ñeblina pa finar con un canciu tradicional a coru que xune otra vuelta la orquesta cola tradición de mayor raigañu.

Suplementu d’Asturnews sobro’l Festival de Lorient 2004