Música

El programa diseñáu pal decimu aniversariu del Derrame Rock, que se va cellebrar nos ente los díes 1 y 3 de xunetu, cuenta con charles, debates y esposiciones alrodiu de la persona del fugáu y del guerrilleru, xunta coles víctimes del holocaustu nazi. Na parte musical, más de cuarenta grupos ente los que destaca Dixebra, El Mago de Oz, Los Berrones y Ñu, ente otros, pasarán pel recintu d’Agones, en Pravia.

Una de les muestres más importantes, enseñanos a travies del trabayu fotográficu de Cesar Lucas la única visita del Che Guevara a España, a los pocos meses del trunfu de la revolución cubana.

El día 1 de xunetu va haber una mesa reonda col tema: “Heroes del siglo XX: los guerrilleros españoles”, cola participación de dalgunos de los maquis antifranquiscas, asina como la proyección del documental “Maquis”. Ún de los testimonios colos que va contar esti coloquiu ye’l de Francisco Martínez, Quico.

Nel segundu día del festival, el conocíu superviviente Jose Manuel Peruyera participará n’otru debate denomináu “Supervivientes del siglo XX: 60 años del fin de los campos de exterminio nazis”, tres del que se va proyectar rel documental “Esclavos vascos del Tercer Reich”.

Xunta estos actos, el festival tamien cuenta con una exposición que fai percorríu pelos diez años de la so historia.

La tercera mesa reonda ta dirixida a que públicu y autores puean discutir sobre ún de los temes de mayor actualidá: la piratería musical.

Al marxe d’estos actos y como complementu indispensable, el Derrame mantien y supera nesta decima edición el llistón que punxere nos caberos años con un programa pel que desfilen más de cuarenta grupos. Nel so cartel d’actuaciones apaecen conocíos grupos como Dixebra, Fe de Ratas, O’funk’illo, Los Berrones, El Mago de Oz, Reincidentes, Rage, Ñu y Toys Dolls, ente otros.

L’ayuntamientu de Pravia, previendo l’esitu d’esti festival, va destinar tol terrenu del añu pasáu namás qu’a los conciertos, habilitando dalgunos terrenos d’alredor pal área d’acampada.

La compañía asturiana de teatru Margen fadrá un alegatu contra’l belicismu cola so obra “War!”.

El festival será ente’l 1 y 3 de xunetu, nel ampliáu recintu deportivu d’Agones, en Pravia. L’abonu cuesta 35 euros (hasta’l 31 de mayu) y 45 en taquilla.

Derrame Rock

El Vez, la estrella del rock’n’roll mexicanu, al que se tien casi por una reencarnación latina y postmoderna del Rei, va tar tocando nel Crossroad Festival de Xixón que va celebrase ente los díes 21 y 24 de xunetu nos xardines de la Universidá Llaboral. L’Elvis chicanu tará acompañáu nel escenariu pol está acompañado polos Spiders From Memphis y de les Elvettes, la so banda habitual y el so coru. Robert López xúntase asina al cume d’otros nomes estelares que van tar presentes nel macrofestival xixonés.

La última incorporación al Crossroad promete repetir la sorpresa que supunxo la so anterior visita a Asturies va seis años y que munchos de los que tovía nun lu conocen de cerca se decaten de que llonxe de ser una mera imitación del Elvis orixinal, el mexicanu ye un músicu versátil capaz de volcar nun escenariu asemeyaes dosis de desenfadu como de talentu. Ensin refugar les sos dotes histrióniques y la so capacidá pa rise d’él mesmu como esterotipu de lo latino ye quien tamién a amosar el so compromisu social colos suyos talo amuesen canciones con vocación d’himnu de la hispanidá na xungla anglosaxona: “Say It Loud, I’m Brown and I’m Proud” (Dilo al altu la lleva, Soi morenacu y arguyosu. La presencia xunta a los sos Spiders from Menphis de les revoltoses Elvettes:Priscilita, Gladysita, Lisa María y Qué Linda Thompson,barrunten un conciertu gustosu nel Crossroad. El Vez y la so banda tamién van tar na folixa final del macrofestival xixonés.

Los abonos de tres y cuatro díes p’acudir a esta cita colos sones del rock’n’roll más xenuín y diversu, van ponese a la venta el prósimu 1 de mayu. Les persones que merquen el so abonu a lo llargo d’esi mes va beneficiase d’un descuentu especial (63 euros pal de tres díes y 76 pal de cuatro). Por contra, en xunu van subir los precios de los abonos y en xunetu un poco vez más. Les entraes p’acceder al recintu un únicu día nun se ponen a la venta pol momentu.

Más información

Babylon Chat remanez de la escena musical con un un nuevu trabayu discográficu: “Baile de disfraces”, nel que quieren romper col llastre de dómines pasaes y presentar el nuevu facer del grupu al través d’unes canciones que busquen perenriba de too la intensidá. Artistes como Aurora Beltrán (Tahúres Zurdos), Leyva (Pereza), Tuly (Le Punk) o José Ignacio Lapido (091) colaboren nesti discu que va tener la so presentación n’Asturies en forma d’entrambos conciertos acústicos n’Uviéu y en Xixón el prósimu mes de mayu.

La salida del grupu del anterior cantante Igor Pascual va pa dos años dexó a la banda na tesitura d’entamar una nueva etapa: “foi un tiempu nel que nos dedicamos a componer y a definir la identidá del grupu, el resultáu d’esa busca son los temes del nuevu discu”, deplica Ricardo, baxista de la banda. “Baile de disfraces” quier ser una amuesa significativa de lo que representa la etapa entamada por Babylon Chat y na que’l curiáu de los directos “ye dalgo importante a la hora d’ufiertar un soníu que defina al grupu ensin prexuicios hacia’l pasáu”.

Títulos como “Lolita”, “Dos al Diablo”, compuestu por José Ignacio Lapido (091), “Buen Ruido”, “Baile de Disfraces”, que da títulu al álbum, “Ninfómana Suicida” “Paraíso Blanco” ( Partes I y II ) “Mi Niña”, “La Fiesta”, “La Ciudad de la Furia” o ” Habitaciones Alquiladas”, dan forma a un discu que cuenta amás de les colaboraciones citaes d’Aurora Beltrán Y Leyva, de Pereza o l’ex d’esti grupu y actual componente de Le Punk, Tuly, cola presencia de Roberto Collado (Ilegales) y Rubén Mol.

Enantes d’entamar la xira de promoción del discu Babylon Chat van presentar los temes de “Baile de disfraces” n’entrambos conciertos acústicos el 11 y el 12 de mayu, n’Uviéu y en Xixón, respectivamente, dientro’l ciclu “Música del sieglu XX” de Cajastur.

Más información

L’asociación cultural y recreativa Asturianos en Madrid (ASMA) entamen pa esti xueves 14 y el viernes 15 un festival de grupos asturianos de rock na capital que va facese na Sala Sol. Cuatro bandes van participar nesta amuesa de la escena musical astur: The Punishers, Amon Ra, Los Bruscos y Kie 13. Col festival l’asociación qu’axunta a los asturianos emigraos en Madrid tenta ufiertar una amuesa del panorama rock na nuestra tierra ente los sos socios y el públicu interesáu de la ciudá del osu y el madrueñu.

Dientro les actividaes que l’asociación ASMA entama col enfotu de caltener los vínculos culturales y sentimentales de los asturianos emigraos en Madrid ufierta estos díes la posibilidá d’asistir en directu a les actuaciones de cuatro bandes de rock asturianes nel sitiu más céntricu de la villa y corte, la Sala Sol.

La cita con esta amuesa de la música rock asturiana empieza’l xueves 14 a les 22,30 cola actuación de The Punishers, a los que siguirán nel escenariu Amon Ra. El viernes serán Los Bruscos y los Kie 13, los que salten a la escena de la Sala Sol.

Intersecciones, el ciclu de música en vivo, cine y teatru, qu’entama la Obra Social y Cultural de Caxastur, empieza güei n’Uviéu con un conciertu de la banda británica Hood. El grupu lideráu polos hermanos Adams presentará los sos últimos trabayos cola buelga del pop independiente de los noventa de onde provienen hasta los sos actuales coqueteos cola música electrónica minimalista. Hood abre un ciclu qu’a lo llargo de dos meses va llevar pelos centros culturales de Caxastur una variada gama de propuestes repartíes en venti conciertos, siete películes y una obra de teatro. Nos conciertos destaca la presencia del míticu Donovan, de Matt Elliot y d’una significativa amuesa de bandes asturianes, ente elles la estrena de Xabel Vegas & Las Uvas de la Ira.

La posibilidá de ver en vivo a un mitu de la hestoria musical del sieglu XX como Donovan o el debut en solitariu del batería de Manta Ray cola so banda, son dos guiños atractivos de la presente edición de Intersecciones que cuenta con un programa onde nun escaseen les propuestes estimulantes. Amás de la estrena en solitariu de Xabel Vegas, van tar presentes delles de les bandes más inquietes y con mayor proyección esterior del panorama asturianu, como Nosotrash, Koniek, Viva las Vegas, Los Bruscos y Herbert Klaus & The Happy Amish.

El menú de conciertos espárdese con dos grupos fundamentales de lo que ye la realidá del pop independiente del estáu: Tachenko, la nueva andanza de los músicos de El Niño Gusano que nun desembarcaron en La Costa Brava, y The Sunday Drivers, una banda toleda que bebi nes fontes bayuroses del rock californianu de los sesenta. La ufierta internacional d’estes nueves Intersecciones cuenta nos conciertos más prósimos colos nomes de Einsturzende Neubaten, hestóricos axitadores del pop industrial xermanu de los ochenta qu’actúen mañana nel Pabellón de la Feria de Muestres de Xixón y de los canadienses The Russian Futuristes, la banda de Matthew Adam, a la que va poder vese esti xueves 14 nel centru cultural de Caxastur n’Uviéu. Les otres cites con músicos y grupos del panorama internacional complétense cola presencia el prósimu 28 d’abril n’Uviéu del americanu Mike Watt, componente de los Stooges; Donovan Astrelia Celeste, van tar nel Teatru Filarmónica d’Uviéu el 6 de mayu; el británicu Matt Elliot, una referencia imprescindible de la música electrónica europea y los tamién británicos The Clientele, col so pop señaldosu, van compartir escenariu el 9 de mayu na Colexata de Xixón. Glamour to Kill, banda d’electropunk alemana, actúa el 10 de mayu nel Centru Municipal de Cultura d’Avilés; los escoceses The Boogaloo Investigators, toquen na Colexata de Xixón el 11 de mayu y nel mesmu sitiu van tar el día 14 los irlandeses Andy White & Alisson Russell. Los últimos conciertos d’artistes internacionales ofreceránlos el cantautor americanu Micah P. Hinson, el 21 de mayu n’Uviéu y tamién nel centru uvieín de Caxastur el martes 26, va tar el bluesman Entrance.

Nel apartáu cinematográficu son siete los filmes que van proyectase nos centros culturales de Caxastur: “Old boy”(2003) del coreanu Park Chan-Wook; “Domiciliu priváu”(2004), del italianu Saverio Constanzo; “CSA”(2004,EEXX), de Kevin Wilmott; “5×2″(2004, Francia), de Francis Ozon; “La hestoria del camellu que llora”(2003), producción xermano-mongola de Falomi y Davaa; “Naide sabe”(2004) del xaponés Hirozaku Kore-eda; “American Splendor”(2003) de los norteamericanos Berman y Pulcini.

La representación del espectáculu de títeres p’adultos “Apariciones” a cargu de la compañía El Espejo y una mesa redonda titulada “Mutaciones” con Alaska, Alex Z., Fenis de Astrud y Big Toxic, rematen el programa d’Intersecciones ’05.

Más información

Radio 3 emite esta nueche a les 10,00 el conciertu que grabó va un mes Michael Lee Wolfe nos estudios de Prado del Rey en Madrid. L’actuación del músicu americanu afincáu n’Asturies de cuantayá va poder vese na Segunda Cadena de Televisión Española a la una de la madrugada dientro’l programa “Los conciertos de Radio 3”. Lee Wolfe presenta nel conciertu los temes del so últimu discu publicáu: “Corners of the world” y un adelantru del nuevu álbum nel que trabaya “Asturias Bluegrass Sessions”. y va tar acompañáu nel escenariu polos sos compañeros habituales na so banda de bluegrass: Ángel Ruíz -recién premiu internacional Songwriter- al banxu y Dani Casielles al contrabaxo.

Pocos díes después de la emisión d’un conciertu de Los Berrones “Los conciertos de Radio 3” vuelven acoyer una nueva amuesa de música fecha dende Asturies. Nesta ocasión va ser Michael Lee Wolfe, el vetaranu músicu estadounidense afincáu dende fai años nel nuestru país, l’encargáu de presentar una esbilla de los temes del so repertoriu bluesgrasseru. Malpenes va un mes, mientres se preparaba pa grabar el conciertu nos estudios de la radiotelevisión española en Madrid Wolfe declaraba a Asturnews que l’eventu formaba parte del trabayu habitual “de los músicos con poco accesu al mediu comercial” y que significaba “una oportunidá pa consiguir acasu cierta difusión d’un trabayu que non siempre llega al públicu”.

Michael Lee Wolfe trabaya anguaño n’ultimar un nuevu trabayu discográficu: “Asturias Bluegrass Sessions” colos músicos que lu acompañen nel conciertu de Madrid: Dani Casielles, contrabaxista habitual na formación del astur-americanu y el recientemente premiáu col Songwriter a la meyor obra de blues acústicu, el banxista Ángel Ruíz. Talo adelantraba ayer a Asturnews la cantadora Annabel Santiago, Wolfe prepara xunta l’artista xixonesa, otru discu d’homenaxe al compositor y folklorista Eduardo Martínez Torner colos temes del espectáculu que percuerre Asturies recreando una treintena de melodíes populares recoyíes nel cancioneru de Torner. Michael Lee Wolfe forma parte de l’actual formación qu’arropa a Annabel Santiago na so aventura de renovación de la tonada y ye un músicu que tien colaborao con sinfinidá d’artistes asturianos de los más diversos xéneros musicales, amás de tocar cola so propia formación: l’Asturiana Mining Company. Nesta ocasión el públicu de Radio 3 y la 2 de TVE van poder ver al astur-americanu nuna de les facetes na que más-y presta desenvolvese la de los ritmos trepidantes del más clásicu y vivu bluegrass.

La organización del Crossroad Festival dtien confirmao a dos bandes más pa la so tercera edición, que va celebrase ente’l 21 y el 24 de xunetu en Xixón. Trátase de Los Lobos y de Jon Spencer Blues Explosion. Los primeros, que se ficieron mundialmente conocíos a cuentu de la so participación nes películes ‘La Bamba’ y ‘Desperado’, van actuar el viernes 22, mientres que la Blues Explosion, formación renovadora del blues y el soul toca un día enantes, nun conciertu d’estrena que ye una de las novedades de este año. Los Lobos y la Blues, xúntense al elencu de bandes que van tar nel festival, al llau d’estrelles como Little Richard y Willie DeVile.

Los Lobos son una bona amuesa de la marcada apuesta pol eclecticismu nel Crossroad Festival 05. Dende los sos oríxenes, a finales de la década de los 70, adientráranse nel pop, na música tradicional mexicana, nel rock and roll, nel mundu de les bandes sonores y hasta na música pa rapacinos. Dos llargometraxes marcaron l’ésitui comercial de la banda de Los Ánxeles: ‘La Bamba’, na que recuperaben temes vieyos de Ritchie Valens, y ‘Desperado’, onde grabaron ‘La canción del mariachi’ xunto a Antonio Banderas. El so últimu discu, ‘The Ride’, cuenta cola colaboración d’artistes como Elvis Costello, Tom Waits, Richard Thompson y Mavis Staples.

El tríu Blues Explosion

, ta formáu por Jon Spencer, Russell Smith y Judah Bauer, y ye capaz de pañar influencies de xéneros tan dispares como el punk, el rythm and blues o el hip hop sobrepasándolos a toos al través d’un soníu propiu qu’encargaron de redefinir nos sos últimos siete discos. Con dos guitarres y ensin baxu, los directos d’esti grupu pasan por ser de los más potentes de les formaciones que se caltienen n’activo. En Xixón van presentar ‘Damage’, el so primer discu cola compañía Sanctuary nel qu’inclúin colaboraciones como la Chuck D. de Public Enemy.

Los Lobos y Jon Spencer Blues Explosion xúnense a les otres 10 bandas que ya confirmaron la so participación nel Crossroad: Little Richard, Willy DeVille, Lee Rocker, Colin James, Lucky Peterson, Eero Raittinen & The Noisy Kinda Men, The Stepbrothers, The A-Bones, The Redondos y Super Ratones.

Un cartel colo más representativo del nuevu folk asturianu y los ritmos más actuales de la música del país ye’l ganchu col que la Xunta pola Defensa la Llingua espera que’l conciertu pola oficialidá d’esti añu repite o duplique l’esitu d’años anteriores. Dos escenarios y una gran parca van agospiar esta cita añal cola reivindicación y la folixa nel aparcaderu del Campus d’Humanidaes n’Uviéu. La Bandina, N’Arba, Felpeyu, Skontra, Skama la Rede, D’Escarpinos, K-Nalón, Xera y Dulcamara son los grupos que van tocar n’entrambos escenarios el prósimu 23 d’abril.

Xulio Casado, voceru de la Xunta, confirmó a Asturnews el remate del cartel de bandes que van actuar nel Conciertu pola Oficialidá y espresó l’enfotu de la organización por superar l’ésitu de públicu que tuvieron los conciertos de los últimos años: “paeznos que’l cartel ye lo bastante atractivu como pa qu’esti nuevu conciertu repita o supere l’acoyida de los dos últimos, que foi perbona”, afirmó Casado. Col oxetivu de favorecer l’esparcimientu y el ritmu del directu nel festival la Xunta va cuntar esti añu con dos escenarios, onde dirán alternándose les actuaciones y nel desarrollu del conciertu van ofrecese proyecciones de videos y holografíes p’ambientar con imáxenes esta folixa reivindicativa.

Nel Escenariu 1 van tocar les bandes más propiamente folkies: La Bandina, N’Arba, Skontra, Skama la Rede y Felpeyu; el segundu escenariu va recibir los ritmos diversos de les pandereteres de Dulcamara, el hip-hop de la cuenca de K-Nalón, o el son arriesgáu de Xera y D’Escarpinos. Les entraes ya tan a la venta a un preciu de dos euros enantes del conciertu y tres na entrada del aparcaderu del Campus d’Humanidaes.

El Conciertu pola Oficialidá ye una referencia nel calendariu reivindicativu del movimientu pola defensa de la llingua asturiana y fai de banderín d’enganche pa la manifestación pola reconocencia oficial del nuestru idioma que s’entama coincidiendo col Día de les Lletres. Uviéu va ser tamién l’escenariu d’esta nueva movilización ciudadana pola oficialidá que la Xunta, convocante d’entrambos eventos, per boca’l so voceru Xulio Casado espera “que tanto nel conciertu como na manifestación la respuesta seya masiva nun momentu nel que fai falta amosar el compromisu col futuru de la llingua”.

Diamantina Rodríguez, la mítica cantante d’asturianada, va recibir el tributu d’una de les voces más personales ya innovadores de les últimes xeneraciones de la tonada, la d’Annabel Santiago. L’artista xixonesa cantará por Diamantina nun discu d’homenaxe que va cuntar con delles collaboraciones d’otros músicos y cantadores asturianos. Otru homenaxe, nesti casu al compositor y folkorista Eduardo Martínez Torner, ye’l más inminente trabayu discográficu que prepara Santiago enantes de ponese a trabayar nun prósimu discu, más personal, na estela de “Al son de la lluna”.

L’homenaxe a Torner tien feches casi segures de plasmación nun cedé que va publicase en Mayu. Esti trabayu recueye’l repertoriu de trenta temes estraíos del cancioneru del recopilador de la música tradicional asturiana qu’Annabel Santiago recrea nun espectáculu itinerante xunta músicos de l’Asturiana Mining Company y que tien algamao una gran acoyida de públicu. En declaraciones a Asturnews, la cantante xixonesa afirmó que “trátase d’un espectáculu nel que preservando’l raigañu tradicional y musical de los temes de Torner, eses canciones ábrense a la innovación d’arreglos y sones de los nuestros tiempos, ensin considerar poro que Torner nun fuera modernu nel so tiempu y va siguir siéndolo siempre”.

Otru proyectu nel que l’artista xixonesa trabaya bien enfotada ye la grabación d’un discu de tributu a Diamantina Rodríguez: “un de los proyectos que pa mi tienen un significáu más personal”, diz Annabel, pa la que: “Diamantina y la so figura representen abondo, ella foi una innovadora tamién nel so tiempu y el so maxisteriu ye indudables nes xeneraciones que la siguieron”. El discu nel que se van xuntar al través de les mesmes canciones la voz nueva d’Annabel Santiago y la buelga dexada nella pola mítica cantadora del Caudal, va cuntar coles collaboraciones de músicos y intérpretes de tonada como la Banda de Gaites de Quirós o Sergio Agüeros, ente otros. Esti nuevu trabayu podía tar editáu hacia’l veranu, después de l’apaición del discu homenaxe a Torner.

El prósimu añu ye la fecha na que podía materializase un proyectu más personal d’Annabel Santiago, la grabación d’un álbum con temes propios basaos en testos de poetes asturianos contemporáneos como Xuan Bello, Lourdes Álvarez y otros. Sicasí la cantante prefier “de momento centrame no más inmediato y dir trabayando el discu pocoñín a poco, preparando y cuidando estos temes distintos a los de los homenaxes a Diamantina y Torner, en cuantes a les formes nueves que tento buscar pa la tonada”.

Respective al momentu actual que vive l’asturianadada Annabel califícalu de “bonu, prestosu, sobretoo si tenemos en cuenta que va unos pocos años prácticamente nun había cantantes nuevos y agora son ya unos cuantos de les xeneraciones más moces, ente elles unes cuantes voces de muyer”. Pa consiguir un futuru nel que la nuestra canción sobreviva adaptándose a los tiempos de la modernidá necesítase según Annabel: “ganes d’anovar, idees nueves y un apoyu institucional ensin el cualu de xuro nun se diba consiguir muncho”.

El Crossroad de Xixón busca’l so propiu aldu duraderu de festival nun decidíu apueste por medrar y consolidase como cita imprescindible del calandariu d’atopaes musicales en formatu macro. El triple de presupuestu, un espaciu abiertu y afayadizu onde desenvolvese y el reclamu de dos nomes mayúsculos de la hestoria del rock’n’roll: Little Richard y Willie DeVille, son les cartes coles que los organizadores d’esti encruz de caminos deciden dexar atrás les dos primeres ediciones como tanteos afortunaos de mayores empreses como la que se presenta esti añu.

Los promotores del Crossroad Festival dan un nuevu puxu a la so iniciativa con una tercera edición cola que se pretende l’afitamientu d’esta ecléctica folixa pa los amantes de los soníos más xenuínos del rock’n’roll. Pa consiguilo tienen optao, como los bones xugadores de póker, por una mayor ambición nes sos apuestes, nel so casu una triplicación del presupuestu de les anteriores ediciones, una nueva ubicación lo bastante desenvuelta pa la espansión del públicu y de les actividaes del festival. Les sos cartes más ambicioses lleven el nome de dos grandes ‘freaks’ sagraos de la música de la segundá mitá del sieglu XX: el mitu viviente de Little Richard y el glamour desenfadáu del inclasificable Willie DeVille. Lee Rocker, ex componente de Stray Cats, vuelve depués de la so ésita participación nos primeros Crossroad, dispuestu a formar parte d’esa notable nómina de padrinos ilustres que llogren col solu soníu del so nome conxurar el futuru del festival.

La cita va ser los díes 21, 22, 23 y 24 de xunu y l’espaciu, los praos de la Universidá Llaboral de Xixón. Cuatro xornaes intenses nes que xunta al creador de clásicos como ‘Tutti-fruti’ y ‘Lucille’, y al versátil DeVille, van desfilar pelos escenarios de Cagüeñes artistes non menos soprendentes y atractivos.