Música

Los tiempos tán camudando pa la industria discográfica y mientres haya artistes cola capacidá pa crear canciones va siguir habiendo música de más o menos difusión. Esa foi una de les idees recurrentes nes que coincidieron los músicos convocaos a reflexonar n’Intersecciones alrodiu de los retos a los que s’enfrenta’l negociu del discu y los propios artistes énte un presente anublayáu pola piratería y l’avidez infartucable de los remanadores del mercáu. Escontra esos nublayones les nueves formes d’accesu y consumu de música al traviés d’Internet escamplaben, pa los participantes na mesa redonda celebrada ayer en Xixón, l’horizón dica otros tiempos, que nun tienen por qué ser apocalípticos.

Miqui Puig, cantante y cabeza visible de “Los Sencillos” -un grupu de los ochenta-noventa que circuló énte les llendes del ésitu comercial y conoció tamién l’otru llau del negociu-, remembraba con catalana sensatez que “cuerre’l pánicu cada vez qu’hai camudaciones impredecibles, pasó cuando s’inventó’l tocadiscos y habíalos que sentenciaben el fin de la música en vivo, agora otros aguarones asemeyaos cuiden que la piratería y les descargues d’Internet son los nuevos xinetes del Apocalipsis, yo cuento que mentres haya xente quien a facer canciones, bones canciones va siguir habiendo quien les busque y les atope per una vía o otra, xente que siga diendo a conciertos, simplemente va cambiar la manera d’acceder a unos trabayos artísticos, que mesmo güei malpenes dexen nengún marxe de beneficiu al artista: ¿qué ganamos en cada discu, un euru?, nun creo que vaya dinos peor agora”. Genís, l’alma mater de “Astrud”, veteranu como Puig del negociu, coincidía nesta reflexón: “soi sigo siendo un románticu al que-y gusta sacar discos, nuestros o d’otros, sicasí nun creo que sea’l fin del mundu, güei la xente descarga les canciones d’Internet y igual ye esi el formatu al que vamos avezanos, ye como volver a los tiempos nos que la xente namás conocía la música poles canciones qu’emitía la radio, escuchaba una canción y disfrutaba d’ella, puede que volvamos a dalgo asemeyao, al consumu de canciones que baxamos, escuchamos y disfrutámosles, nin siquier va haber capacidá física p’almacenales toes y ¿pa qué?, descargamos canciones que nun vamos ser quien a escuchar en tola vida y igual eso ye lo que ta cambiando”. L’otru participante na mesa redonda d’Intersecciones, Big Toxic, atopaba nes nueves formes de difusión del trabayu creativu de los músicos “una ventana abierta, una salida fuera dica otros llugares onde la música independiente y non condicionada pol mercáu interesa más qu’equí, onde paez que namás interesa’l flamenco

o esa otra música que ponen embaxo’l marchamu de lo latino, como si una cumbia fuere más española qu’un fragmentu d’una ópera china”.

Tolos tres músicos, afalaos pol periodista Alex Z, coincidieron en que’l futuru negru auguráu polos cabezaleros de la industria discográfica énte un presente empobináu al futuru pola difusión masiva del formatu mp3 y les amenacies de la piratería, nun se correspondía col interés que la xente siguía a caltener pola música: “Mientres menguen les viendes de discos, l’asistencia a conciertos y a macroconciertos medra y naide nun lo puede negar”, afirmaba Miqui Puig p’añedir: “cómo puedo pensar nun futuru hostil nesi sen cuando güei cualquiera nesti mesmu estáu puede ver nel mesmu menú d’un conciertu a grupos o artistes que de la que yo empecé nesti negociu, nun va tantos años yera un auténticu luxu poder ver o había que dir bien llonxe a los sos conciertos, el problema nun ye esi sinón los cabezaleros del negociu que van xugar al golf y lleven vida d’auténticos pijos, los que topes nún d’esos conciertos non por interés de ver a nuevos artistes sinón porque te dicen: ‘ye que tengo tres grupos equí’, esos son l’auténticu peligru, los que namás creen nel negociu non na creatividá de los músicos”. Genís de “Astrud” diba más alló: “a mi sinceramente nun m’importa muncho que desapaeza el formatu CD, a fin de cuentes un meru soporte dixital, estéticamente bastante feu que recuerda a un ceniceru, les canciones van siguir circulando y amás vamos llibranos de dir a una compañía ufiertando un trabayu nuestru y nun tener d’escuchar esa fras maraviellosa: ‘ah, mui interesante, grabái el discu y después falamos, y mentantu, toma, esto pa que merquéis un ecualizador y los gastos’, inda asina yo voi siguir editando discos, porque me presta, soi ún d’esos retrógrados a los que-yos presta editar el trabayu de dalguién que-y interesa”. Big Toxic dio una vuelta al debate nel sentíu más prácticu: “a mi eses camudaciones tan horroroses pa dalgunos válenme pa facer un trabayu que puedo controlar en tou momentu, puede facelo ún mesmu, dende la masterización hasta’l clip, la manera de dalo a conocer, igual ye esa llibertá del músicu la que temen los popes del negociu”.

Nosoträsh vuelve con discu nuevu tres años después del so celebráu “Popemas” y cuando cumplen una década de trabayu a común nel panorama pop independiente. “Cierra la puerta al salir”(Elefant, 2005)ufierta un conxuntu de trece canciones nes que’l soníu frescu y llimpiu de les xixoneses algama sabiduría y la personalidá del grupu encaxa afayadiza nuna producción y arreglos de Pedro Vigil y Xel Pereda. “El discu nun da nengún portazu al pasáu nin a nada otro que nun sea’l día a día, por eso ta dedicáu a tolos que faen nuevos planes”, afirma Montse, baxista y voz de Nosoträsh. Los sos planes más inmediatos pasen pel conciertu que’l prósimu sábadu 28 dan en Mieres dientro’l ciclu Intesecciones.

En conversa con Asturnews, Montse confiesa que “quisimos facer un discu distintu a “Popemas” tanto en cuantes al planteamientu como al resultáu en conxuntu de les canciones y a la vez supongo que nun debe ser mui estremáu, porque a fin de cuentes facemos lo que sabemos facer”. Tocante al títulu, la baxista -qu’exerce como les sos compañeres de portavoz rotativa- confiesa la so sorpresa “énte les interpretaciones qu’escuchamos hasta agora y que lleguen más alló de lo que nós pretendíamos, pa nada se trata d’un guiñu a cerrar la puerta al pasáu o a nada tan serio, non falamos d’esa puerta que se cierra cada día al salir de casa y na vida mesma, que no personal esperimentó ciertos cambios en delles de nós y queríamos reflexalo, por eso’l discu ta dedicáu a tolos que faen nuevos planes”.

Les lletres siguen teniendo un protagonismu esencial nes canciones del nuevu trabayu discográficu de Nosoträsh: “tienen abonda importancia pa nós, si bien no musical podemos partir d’unes formes cencielles, les propies del pop, nel terrén de les lletres préstanos cuidales y que tengan bien de sentíu, un sentíu qu’alcuando puede ser doble o complexu, sicasí per enriba d’esos sentíos, queremos que les palabres

caltengan el significáu precisu en cada canción”. Un ciertu desenfadu y l’humor que tien caracterizao les canciones del grupu, amás del curiáu de les lletres, paez cobrar en “Cierra la puerta al salir” un tonu más sarcásticu que reconocen: “Sí, puede que tendamos hacia’l sarcasmu, nun sé si a la ironía amarga o amable, el casu ye qu’ente determinaes realidaes de la vida nun nos queda otru recursu, ye lo que tentamos espeyar en canciones como ‘Rancherita’, un dramón si lo consideramos en frío y na que quisimos imprimir un aire sarcásticu o desenfadáu que la solliviara con un final como’l que tien”.

La producción de Pedro Vigil y Xel Pereda, qu’apurren tamién dellos arreglos y les sos guitarres “aportónos abondo”, diz Montse, “entrambos colaboraran ya enantes con nós y Pedro foi de fechu’l que produció el nuestru primer discu, cuntábamos con esa ventaya de que nos conocen bien como grupu y nós a ellos como músicos y técnicos, sabíamos lo que queríamos y prestábanos cuntar col gabitu de quien podía entender lo que queríamos, yo creo qu’ellos son los responsables finales d’un trabayu qu’ensin la so aportación probablemente diba ser menos curiosu, peor rematáu, tanto Pedro como Xel son amás bonos instrumentistes, tamién aportaron bastante nel terrén propiamente musical colos sos acompañamientos”.El discu cuenta con otres colaboraciones habituales nos trabayos de Nosoträsh: Mar (Pauline en la playa”, Manu o Íker (Las Esferas Invisibles) y l’acasu más soprendente ya inesperada, la del cantante vascu Javier Muguruza, que canta en “Funambulista” y axunta’l so curdión en “Rancherita”, una colaboración qu’arriquez el discu con esti músicu, n’apariencia poco emparentable col pop desenvueltu de Nosoträsh: “Conocímoslu personalmente’l veranu pasáu cuando tocó en Xixón y d’ehí salió la posibilidá de colaborar, nun sabíamos mui bien en qué canción, agora al escuchar ‘Funambulista’ ye un tema que paez nun quedaría ya completu ensin l’aportación de Muguruza, de fechu nel conciertu de sábadu en Mieres, va ser la única canción del discu que nun toquemos porque ensin la voz de Muguruza fáisenos que nun tendría sentíu”, la otra colaboración que fai en “Rancherita”, foi dalgo “que salió sobre la marcha, aprovechando que lu teníamos nel estudiu convencímoslu o enrredámoslu pa que punxera l’acordeón, en xeneral la esperiencia de colaborar con él foi bien prestosa, un auténticu placer”.

Mentantu el nuevu discu empieza a difundise y aprucen les primeres reseñes, los planes de Nosoträsh pasen pol conciertu que’l prósimu sábadu van ufiertar nel centru de Caxastur en Mieres dientro’l ciclu d’Intersecciones y nel que van compartir el escenariu con Tachenko. Después del veranu y de cumplir coles cites que tienen pendientes en dellos festivales como Contemporánea, les xixoneses piensen n’entamar una xira que podía aniciase entrada la seronda.

Chus Pedro Suárez cumple cincuenta años el prósimu xueves y quier celebralo con un conciertu nel mesmu escenariu onde debutaron en 1978 Nuberu: el Teatru de L’Entregu, el so llugar natal. El cantante cumple tamién tres décades dedicáu a la música, como la otra parte del popular tándem con Manolo Peñayos y en solitariu, la so remembranza va tener poro un significáu xeneracional que va facela estensible a lo que se dio en nomar Nueu Canciu Astur. Por una d’eses coincidencies caprichoses del tiempu a la doble remembranza va xuntase-y otra cincuentena, amás de la vital de Chus Pedro, la del aniversariu de la muerte d’Eduardo Martínez Torner, el compositor y recopilador de la música popular asturiana del que’l cantante entreguín tien pañao bien de pieces pal so repertoriu. La cita ye esti miércoles 25 a les ocho la tarde nel Teatru Municipal de San Martín del Rei Aurelio.

Chus Pedro Suárez presentó ayer énte los medios arropielláu pol director xeneral de Promoción Cultural y Política Llingüística Carlos Madera el conciertu nel que va celebrar cincuenta años cola vida y trenta de carrera musical. Na presentación del eventu el cantante afirmó que “Nin haber cantao en Glasgow nin en Nueva York lo cambiaba yo pol conciertu de L’Entregu”, el so llugar natal y el primeru onde s’estrenó Nuberu nel mesmu escenariu onde mañana va presentar l’últimu premiáu a la meyor canción n’asturianu nos galardones de la SGAE el so discu “De ñublu y orpín”.

Mientres presentaba énte los medios el so conciertu de remembranza Chus Pedro alcordóse d’aquella primer actuación de Nuberu en 1978 nel antigu cine Vital Aza y agora remozáu como Teatru Municipal del conceyu de San

Martín del Rei Aurelio: “tuvímos qu’alquilar nós mesmos el local por cuatro mil pesetes, agora faime ilusión volver cantar equí pa presenta-yos a los míos, a la xente del mio pueblu esti discu”. Daquella Chus Pedro Suárez y Manolo Peñayos yeren malpenes los dos rapazos que l’entós presidente de Conceyu Bable Xosé Lluis García Arias saludaba na carátula del so primer discu: “Asturies ayeri y güei”. Cantares como “Aida”, “A los fugaos”, “El chamiceru” inda nun yeren clásicos populares, temes que’l propiu pueblu fexo suyos y que trenta años después inda siguen pidiendo nos conciertos de Nuberu o nos de Chus Pedro, en solitario. De xuro más d’ún d’estos clásicos, patrimoniu sentimental y cultural de l’Asturies contemporánea, van sonar nel conciertu col que’l cantante entreguín quier celebrar que va cincuenta años nació nun llugar de la cuenca’l Nalón, onde malpenes trenta años enantes “pasaben coses que fueron realidá” y güei, gracies al llabor de refrescu de la memoria colectiva entamáu por Nuberu, la xente sigue cuntando.

Nuberu foron los primeros pero non foron los únicos que nos primeros años de la transición, afalaos polos aires de llibertá y enfotu na diversidá cultural del estáu soplaben tres la muerte del dictador: otros dalgunos, como ellos, quixeron facer oyer les sos voces cantando en llingua asturiana. El conciertu quier recordar tamién a esa xeneración de cantautores y músicos. La coincidencia col cincuentenariu de la muerte d’Eduardo Martínez Torner va sumar a la fiesta de remembranza un nome, ensin el que nun sería entendese l’interés d’aquellos rapazos del Surdimientu pola música popular asturiana. Chus Pedro anunció na presentación del conciertu que “va haber más d’una sorpresa nél” y por si nun hai asientos bastantes pa los munchos paisanos y paisanes suyos que van tar énde festeyando’l so aniversariu, bromeó afirmando que “fago doblete si ye preciso”.

El músicu Xabel Vegas presenta esti sábadu 21 en Xixón y dientro los conciertos del ciclu Intersecciones el so proyectu musical en solitariu acompañáu de la banda Las Uvas de la Ira. La cita ye a les 20,30 na Colexata de San Xuan Bautista y inclúi una partida doble cola actuación darréu de Viva las Vegas, la otra aventura alternativa entamada por músicos de Manta Ray. Vegas, afirma, sicasí que’l so llabor con Las Uvas de la Ira “nun ye un proyectu paralelu a Manta, considérolu lo bastante importante y aporfiáu como pa nun vivilu como dalgo autónomo, un retu personal que nesti conciertu voi sentir como si fuere’l mio primer conciertu”.

La segunda actuación en públicu de Xabel Vegas como solista, tres una estrena acústica había apocayá nel bar Cool de Xixón, ye pal músicu de Manta Ray “un retu poles canciones que presento y por ver cómo soi quien a manexame nel escenariu con esta banda na que me toca facer, pa bien o pa mal, el papel de comandante de campu o capitán de barcu”. Les canciones que Vegas va tocar con Las Uvas de la Ira son el resultáu d’un trabayu de varios meses nos que confiesa “andaba a buscar un camín o foi el camín el que m’andaba a buscar a min hacia una música mui distinta de la que facemos en Manta, dame dalgo de pudor y tampoco lo creo muncho qu’esti proyectu surda d’una necesidá por escribir canciones, más bien pienso que ye consecuencia d’una voluntá de querer facelo”.

Nuna conversa informal nel café Cool, onde entamó la so estrena acústica apocayá y hores enantes del últimu ensayu con Las Uvas pa tocar na Colexata, Xabel Vegas afirma que “por necesidá o voluntá, lo que fueron saliendo son unes canciones nes qu’hai hestories verdaderes qu’a lo meyor falen de min y otres aparentemente ficcionalizaes qu’igual falen más de min que les otres, en cualquier casu son hestories que fui atopando nesa busca”. Alrodiu de los elementos comunes que puedan tener eses canciones Vegas afaya “que sicasí, hai un tema xeneral impregnándoles o raspiándoles que ye’l tema del mal, non del mal del mundu o los males divinos, sinón el mal cotidianu y de naturaleza individual que toos guañamos en dalgún requexu de nós, d’esi fíu de puta que toos llevamos dientro”. Una forma espresiva qu’adopta esi mal con carné d’identidá ye l’humor o el sarcasmu en munches d’eses canciones. Xabel Vegas desplícalo asina: “yo asocio l’humor al mal, cuido que l’humor, mesmo nes sos formes más civilizaes, como pueden ser la ironía o el cinismu, bebe nel velenu del mal, ye siempre perversu y esa ye una idea que m’atrai bastante, si hai humor nes mios canciones ye d’esi calter escuru y cruel”.

Na so aventura en solitariu el músicu ye consciente de tener que responder a menudu a dos entrugues irrefugables: una, la de desplicar el so proyectu personal en relación al so llabor como integrante de Manta Ray y otra, quiciabes non tan inevitable,la comparanza col trabayu del so hermanu Nacho Vegas. A lo primero, Xabel, respuende claru: “el mio proyectu con Las Uvas de la Ira nun puedo consideralu un proyectu paralelu a Manta Ray, porque esto siempre se entiende como dalgo menor, una especie d’entretenimientu pa los ratos llibres, non, pa mi ye lo bastante importante y enforma autónomo como pa nun consideralo un retu propiu, un trabayu que quiero facer y con tol procuru posible, ensin qu’ello signifique nada en relación a Manta, la banda na que llogro de sobra que me cunda’l mio llabor como músicu y que me proporciona lo suficiente como pa siguir aportando na mio midida l’esfuerzu y l’enfotu por calteneme nesi proyectu nel que toi dende va años”. Respective a si nun siente dalgo asemeyao al vértigu ente contribuir a los soníos abstractos y a la contundente muria granítica de los temes de Manta y lo concreto de les canciones que fai con las Uvas de la Ira, el so enverede pelos sones clásicos del rock’n’roll y el blues americanos, Vegas considera que “nun hai contradición, non namás como músicu, los mios gustos son pervariaos y fáiseme igual de placentero enguedeyame na complexidá de la música de Manta Ray como facer canciones del mesmu tiez de les que siempre me conmovieron, nun sé de Dylan o de Leonard Cohen, de los folk singers o bluesmen

americanos, nun creo que la música seya una pexera zarrada, pa mi polo menos nun ye asina”. En cuantes a la inevitable o evitable comparanza col trabayu desenvueltu pol so hermanu Nacho Vegas, Xabel sonríe, ente resignáu y serenu: “A lo primero preocupábame daqué el que me pudieren comparar con Nacho, agora tómolo con más naturalidá, respeto y admiro lo que fai, creo qu’abrió una brecha digna de tener en cuenta tocante a un tipu de música que nun s’estilaba muncho nel panorama del estáu, pero por dicir, el so últimu discu, nun lu escuché inda enteru, malpenes un par de temes qu’oyí na radio y en dalgún bar, supongo que ye inevitable la referencia y que se faga observar que tenemos un timbre de voz asemeyáu, que facemos canciones con munchos puntos en común, tampoco m’obsesiono por ello, cuido que caún tien el so camín y que si dalgo tenemos en común, amás de los xenes y eses coses, habrá ser tamién igual porque compartimos ciertes referencies, nun sé si hai más o non, y tampoco quería sentime como l’hermanu de Schumacker(rises), nun sé, la verdá ye que nun allorio porque me vayan asociar a Nacho Vegas”.

La banda que va acompañar a Xabel Vegas nel escenariu de la Colexata, Las Uvas de la Ira, ye una formación clásica de banda rockera: Iker, teclaos y guitarres, Juan, a la batería, Jonhnny,guitarra y Eras, baxu. De los sos compañeros d’aventura, Vegas diz que “procuré buscar a xente como ellos, músicos mozos y con ganes de facer coses nueves, abiertos a cualquier suxerencia, cuido que lo que puedan acostinar d’inesperiencia aprovéchenlo en frescura y espontaneidá, toos a nun ser Íker, son músicos qu’entamen en Las Uvas el so trabayu más ambiciosu y afróntenlu con un enfotu que me fai tamién a min deprender d’ellos, sentime más seguru nesta aventura na que me toca, pa bien o pa mal, facer de capitán del barcu”.

De les canciones que fueron saliendo a lo llargo d’estos meses y que van sonar nel conciertu d’esti sábadu, Xabel Vegas ve barruntando un discu “que tampoco quiero seya dalgo apresurao, prestábame siguir trabayando en nueves canciones y qu’a la hora de la verdá hubiere onde escoyer pa facer un álbum curiosu”. Finales d’esti añu o empiezos del prósimu podíen ser les feches nes qu’esi trabayu discográficu se materializare. Entrín y non, dalgo ansiosu por ver cómo se desenvuelve’l conciertu d’esti sábadu, Xabel Vegas, apura’l so café nel bar Cool, convida a una rapacina rumana que viende mecheros y coses a otru café, saluda a los conocíos y sigue la so ronda cotidiana de la tarde nueche dica otru bar colos bolsos de l’americana negra enllenos, como los de Rimbaud, de velenu afalador, vientu y canciones que ruquen na cabeza como cartes por llegar. Esti sábadu na Colexata de Xixón Xabel Vegas va tocar un riestru de les que ya tienen forma y fame de sonar arropiellaes pol cobertor cómpliz de Las Uvas de la Ira. Enantes de colar, el que lu observa, adica qu’esa llienda, el títulu de la so novela prefería, ye lo que reza el tatú que Xabel Vegas lleva grabáu nel antebrazu drechu. Un guiñu de lo que ye la so nueva aventura musical y va ufiertar nel conciertu d’esti sábadu.

Glamour to Kill, la última aventura musical de Luis Miguélez llega a Avilés esta tarde dientro’l ciclu Intersecciones de Caxastur. L’antigu compañeru de viaxe d’Alaska en Dinarama y Fangoria, y del incalificable Fabio MacNamara, presenta mano a mano col so nuevu sociu Antonio Glamour los temes del so trabayu “Musik pour the ratas”, un discu sescudíu d’electropunk, parodia y pluma corrosiva non aptu pa tolos públicos, que dende’l so llanzamientu dende Alemania tien algamao un gran ésitu internacional.

La cita pa ver en directo la nueva apuesta musical del duo Miguélez-Glamour ye esta tarde a les 20.30 na Casa Municipal de Cultura d’Avilés, dientro la programación d’actividaes del ciclu Intersecciones de la Obra Social y Cultural de Caxastur. Va ser la ocasión d’oyer sonar y asistir a la puesta n’escena de los temes conteníos en “Musik pour the ratas”, un discu cantáu n’español, alemán, inglés, francés, alcuando nun amestáu d’estes llingües y qu’ufierta títulos como “Clone fashion”, “Diskontrol” o “Shake”, nada desconocíos pola plural comunidá electropunk internacional.

Luis Miguélez ye una de les personalidaes más singulares del parorama musical hispánicu de les últimes décades. Compositor por encargu de temes p’artistes como la mesma Lola Flores, formó parte d’Alaska y Dinarama. Con Olvido Gara siguió trabayando nel so siguiente proyectu: Fangoria, y tamién lo fizo colaborando y acompañando a Fabio MacNamara, del que produxo’l discu “Rock Station”. A finales de 2001 treslládase a Berlín y ellí funda xunta’l modelu y bailarín Antonio Glamour el grupu qu’esta tarde vamos poder ver na Casa la Cultura d’Avilés. El so únicu trabayu discográficu hasta la fecha: “Musik pour the ratas”, editáu pol sellu berlinés Pale Music, tien saltao dende les estaciones musicales d’Alemania a un esitosu camín de proyección internacional.

El cantante británicu Matt Elliot actúa esta tarde a les 20.00 hores na Colexata de San Xuan Bautista de Xixón dientro de la programación del ciclu Intersecciones de la Obra Social y Cultural de Caxastur. El pop electrónicu y radical del músicu de Bristol va compartir escenariu col rock d’esencia californiana de los tamién británicos The Clientele.

Orfebre del ruiu, Matt Elliott brindó al mundu nos noventa una esplosión de noise axitáu con drum’n’bass que ocultó embaxo’l nome artísticu de “The Third Eye Foundation”. Asina pasó unos cuantos años y trabayos como “Ghost” o “You Guys Kill Me” nos que pesaba la señaldá, el sentimientou triste, tamién la llocura, espresada a base d’electrónica pesada y programación frenética. Pero llegó “The mess we made” en 2003, “The Third Eye Foundation” quitó la mázcara y Matt Elliott apaeció firmando un discu nel que’l rastru del orfebre podía seguise pero alpenes. Facía ya dos años que se instalara en Francia y el partu salió-y enforma humanu. Elliot nun perdió nel camín la so atmósfera pesada y torturada nin ciertu toque de la casa. Nun yera un trabayu fácil pero la crítica aprobó la camudación y vio que yera bonu l’esfuerzu d’ Elliott hacia la humanización de la máquina. Agora, con “Drinking songs” sigue por el camino de la desnudez.

Pela so parte The Clientele

dedíquense a un pop basáu na señaldá y la tristeza, intimista y d’estrema belleza. Empezaron en 1997 combinando baxa intensidad, barniz psicodélicu y dinámica de fuertes contrastes y por esi camín siguieron al través d’una serie de singles y ep qu’agora tán recopilaos en “Suburban Light”. Col so siguiente Ep, “Ariadne”, dieron un pasu hacia simes más profundes. Cuatro canciones instrumentales y una cantada sirven a la banda londinense pa recrear n’atmósferes insondables la serie de pintures que Giorgio Chirico escomenzó en 1912 en tornu a la princesa de la mitoloxía griega.

Lhasa, una de les voces más personales de la nueva música americana, va tar esti sábadu 30 en Xixón presentando los temes del so últimu discu: “The Living Road”. Considerada una anovadora fiel a tradiciones musicales bien diverses, la cantante canadiense va tar acompañada en directo por una banda acústica de piano, violonchelo, contrabaxo, batería y steel guitar nuna cuidada y sobria puesta en escena. Heriede d’Edith Piaff, Chavela Vargas y Tom Waits, Lhasa preséntase nel escenariu del Teatru Xovellanos con una suxestiva llienda de cantante singular y el so segundu trabayu discográficu, premiáu apocayá pola BBC como’l meyor discu d’artistes americanos.

Fía d’un escritor mexicanu y una madre fotógrafa americana, l’autora de “The Living Road” crióse en Canadá envuelta nos sones familiares de tres llingües: español, inglés y francés. Les sos canciones parten d’esi trillingüe rexistru y de les tradiciones musicales arreyaes a esti mestizaxe cultural:la canción popular mexicana, la chanson francesa, el jazz, el blues,el countrym los ritmos del cabaré européu y de les folixes xitanes.

Depués de la publicación del so primer discu “La Llorona”, cantáu íntegramente n’español, con “The Living Road” presenta doce nuevos temes n’inglés, español y francés, nos que la voz de la canadiense cobra un nuevu protagonismu envolvente y conmovedor arropiellada pol soníu limpiu d’una banda poco dada a les estridencies. El discu grabóse en Montreal con François Lalonde a la percusión y Jean Massicotte al piano xunto a Yves Desrosiers como guitarrista y productor, y dende la so publicación tien algamao un sitiu importante nes llistes d’ésitos de la llamada “World Music”, hasta algamar el premiu al meyor discu americanu de la BBC.

La Escuela de Música Tradicional de la Mancomunidá Comarca de la Sidra participa dende esti miércoles 27 y hasta’l domingu 1 de mayu nos alcuentros del proyectu européu ENTRAMUS que se tán celebrando na ciudá italiana de Prato col oxetu de poner en común el trabayu de les siete instituciones de diversos estaos europeos que xunta la mancomunidá asturiana puxen por esta iniciativa. El proyectu ENTRAMUS ta avaláu pola Unión Européa y busca compartir conocimientos y esperiencies alrodiu la música tradicional del continente.

Prato, un llugar asitiáu en plena Toscana y a pocos kilómetros de Florencia, ye la sé escoyía pa celebrar el tercer alcuentru de les instituciones promotores del proyectu européu ENTRAMUS, ente elles la Mancomunidá Comarca de la Sidra xunto con otros siete socios de 6 estaos europeos: España, Portugal, Italia, Francia, Holanda y Finlandia. Nestos alcuentros tenta ponese en común el trabayu y les propuestes desenvuelves peles escueles de música tradicional participantes na iniciativa d’ ENTRAMUS, un proyectú sofitáu pola UE al través del Programa Sócrates y dientro de la Acción GRUNDTVIG 2.

La Mancomunidá Comarca de la Sidra foi cabezalera d’esti proyectu cola participación de les escueles de música tradicional que tán funcionando nos conceyos mancomunaos: La Escuela de Música municipal de Nava y la Escuela de Música Tradicional de l’a Asociación Los Yerbatos de Bimenes.

Después de les dos primeres reuniones celebraes en Nava y Bimenes el pasáu mes de payares y darréu, nel mes de febreru en Finlandia, el grupu de trabayu que reún a tolos socios del proyectu tán agora en Prato a continuar coles propuestes que tán elaborándose pa materializar la iniciativa, dende materiales didácticos conxuntos hasta estudios comparativos de los estremaos sistemes de xestión de les escueles de música tradicional. Flavio Benito como director de la Escuela de Nava y miembros de la Escuela de los Yerbatos de Bimenes son los integrantes de la delegación que representa n’Italia a los conceyos de la Mancomunidá de la Sidra.

Amás de los socios asturianos formen parte del proyectu ENTRAMUS l’Associaçao Tocandar, de Marinha Grande(Portugal);l’Assotiation Tera de Saint Groux ( Francia); la Scuola Comunales di Musica “Giusseppe Verdi”, de Prato (Italia); CNV-KUndstenloond, de Rotterdam (Holanda);Loimaan Seudun Musiikkiopisto, de Loima (Filandia); y l’Associazione Musicale Spazi Sonori, de Cosenza (Italia).

El cantante Chus Pedro, a pocos díes de recibir en Madrid el premiu a la meyor canción en llingua asturiana de l’Academia de la Música, afirma que pa él “ya foi un premiu importante el que se creare esta categonía pola que lluchamos abondos años” y refugando méritos propios pa algamar la distinción de la SGAE entiéndela como “una reconocencia a la música en llingua asturiana, a la mesma llingua, dende fuera d’Asturies”. L’intérprete entreguín considera’l premiu “una muestra más de que la sociedá civil va per delantre de los dirixentes políticos asturianos, los más parrulos del estáu, según ellos yo llevo trenta años cantando nuna llingua que nun esiste”.

Chus Pedro Suárez que compartió’l premiu de la SGAE col músicu Gabino Antuña pola canción “Agora sal a bailar” dixo a Asturnews que “la calidá de la música que se fai n’Asturies y en llingua asturiana ye dalgo qu’empieza a reconocese de cuantayá más alló del Payares” y inxerta dientro d’esi contestu xeneral la distinción algamada gracies a los votos de los miembros de la sociedá que xestiona los derechos d’autor en tol estáu: “presta un premiu que vien de xente como tu, músicos y intérpretes, artistes que conocen el nuestru trabayu y lu aprecien”, sicasí pa Chus Pedro: “ya foi un premiu ver creada esta categoría pa la nuestra llingua y pa mi tien un significáu especial qu’instituciones como l’Academia de les Artes Musicales traten a la nuestra llingua n’igualdá de condiciones que les otres llingües del estáu, ye una reconocencia importante, sobremanera cuando se tien en cuenta que los políticos d’equí nun son quien a ver la necesidá d’esa reconocencia oficial al asturianu”.

L’intérprete de la canción premiada tien palabres bien dures contra “ciertos dirixentes políticos d’Asturies, dalgunos auténticos parrulos y paletos, colos que va años compartimos llucha detrás de les mesmes barricaes y güei namás amuesen que se quedaron empantanaos na so miseria y víctimes de los sos propios complexos, nun hai otros igual en tol estáu”. Pa Chus Pedro la esistencia de premios como’l de la SGAE o la reconocencia social que tán teniendo otres espresiones creatives en llingua asturiana como la lliteratura “pueden ayudar a cambiar mentalidaes” pero tampoco ta especialmente enfotáu en que vaya suceder “un cambiu real na mentalidá de la nuestra clase política, pa munchos d’ellos yo llevo trenta años cantando nuna llingua que nun esiste y inda creo que va ser la hestoria la que los xulgue nun podemos escaecer que tán puestos ende polos votos, mientres los asturianos los sigan votando poco va cambiar la realidá”.

El tema “Agora sale a bailar” compuestu a medies por Gabino Antuña y Chus Pedro Suárez ye’l meyor cantar n’asturianu del añu pasáu según el criteriu de los miembros de la Sociedad General de Autores y Editores (SGAE). La noticia nun se fexo esperar esti añu y el resultáu de les votaciones referíes a esta categoría dedicada a la música fecha na nuestra llingua conocíase al principiu d’una gala retresmitía por TVE y a la qu’asistió’l conseyeru de Xusticia y Esteriores Francisco Javier García Valledor. Los tamién asturianos Ramón Prada y Mala Reputación tamién taben nominaos n’otres categoríes musicales de los premios.

A la fin nin l’autor de “La Noche Celta” nin los contundentes rockeros de “A por ellos”, consiguieron el so premiu: na categoría “Nueves músiques”, a la que concurría Prada, el ganador foi José Luis Encinas y na de “Rock alternativu”, Def Con Dos, desabancó a Mala Reputación.

Con esti premiu, Chus Pedro pon la guinda a una trayectoria llena d’ésitos, tanto dientro como fuera d’Asturies. “Agora sal a bailar” ye una de les canciones qu’apaecen nel discu “Ñublu y orpín”, el primeru en solitariu de tola so carrera , agora que tán a puntu de cumplise los venti años de la fundación, xunta Manolo Blanco Peñayos, del míticu grupu “Nuberu”.

Tres la polémica del añu pasáu pol premiu a Pepín Robles toles espectatives taben puestes en que nesta ocasión se reconociere la calidá musical y la correción llingüística de los artistes nominaos, como al final sucedió cola escoyeta de la pieza nomidada de Chus Pedro, ún de los cantantes más reconocíos del panorama musical d’Asturies.

Los finalistes a la categoría de meyor cantar n’asturianu escoyéronse ente’l 17 de xineru y el 13 de febreru nuna primer ronda de votaciones de los más de cinco mil socios de la SGAE; el ganador de los tres finalistes entós escoyíos votábase ente’l 7 de marzu y el 3 d’abril. Güei, enantes d’entamar la gala de los Premios de la Música, namás un notariu del colexu de Madrid y unos pocos directivos de la Sociedá d’Autores conocíen el nome del artista o artistes asturianos que diben llevar esti añu la distinción a la meyor composición na nuestra llingua. Hasta’l momentu nel que s’abrió’l sobre col nome del ganador naide s’atreviera a barruntar un pronósticu, inda toles miraes taben puestes en qu’esti añu nun se repitiera la concesión d’un premiu a un artista, como Pepín Robles,veteranu na so carrera como músicu profesional,inda cásique un desconocíu nel panorama musical asturianu y ganador con un tema escritu n’amestao.

A la gala retresmitía por TVE asistió en representación del gobiernu del Principáu el conseyeru Francisco Javier García Valledor, qu’enantes de la gala caltuvo un alcuentru colos artistes asturianos nominaos y presentes na ceremonia del Palaciu de Congresos de la Casa de Campo de Madrid.

Los otros finalistes a la meyor canción n’asturianu fueron Skama la rede con “Sangre d’ochobre” y Pepín Robles con “La Pola de Siero” interpretada pol candasín Vicente Díaz.