Música

Nava acueye a partir d’esti vienres, día 14, la IX edición de les xornaes de la música ‘Villa de la Sidra’, entamaes pola Escuela Municipal de Música, que va siguir nos siguientes fines de selmana del mes d’ochobre. Dixebra, la Orquesta d’Escueles de Música del Principáu d’Asturies y la Compañía Asturiana d’Espectáculos completen el programa d’actuaciones previstes pa estes xornaes.

La Compañía Asturiana d’Espectáculos ye la encargada d’abrir les xornaes de la música ‘Villa de la Sidra’ d’esti añu, con una actuación que ta prevista pa esti vienres, día 14, a les ocho y media la tarde. Dixebra, el míticu grupu de rock, va actuar nel campu de Grandiella, el sábadu día 22 a partir de les diez de la nueche. Mentes que l’últimu conciertu programáu llega de la mano de la Xoven Orquesta d’Escueles de Música del Principáu d’Asturies, creada recientemente, el viernes 28, na casa cultura Marta Portal, a les ocho y media la tarde.

El Forum de FNAC ye’l sitiu escoyíu pa la presentación del festival October in Rain que va celebrase nos prósimos díes n’Uvièu. L’actu de presentación ye esti martes 11 a les 20.00 hores y va cuntar cola actuación del grupu asturianu So What?.

El IV October in Rain va celebrase n’Uviéu los díes 14 y 15 d’ochobre en tres escenarios: el MacAdam R&B Bar, qu’acueye una Warm Up con DJ’s de colectivos estatales, la Sala Piripi, onde se van entamar les Allnighter colos 8 Top DJ’s, y L’ Antigua Estación onde se va celebra l’actuación del grupu bilbaín The Ep’s y una Warm Up darréu. La entrada ye llibre, a nun ser pal conciertu, y l’aforu limitáu. concierto de presentación con el grupo asturiano So What?, formación de la Cuenca del Nalón que practica un adictivo acid-jazz & funk!

“Circo Prize” ye l’últimu proyectu musical del compositor, productor y guitarrista Luis Rico y del so hermanu, l’escritor, Javier Rico. Dos asturianos que viven dende hai años en Madrid, qu’acaben de sacar esti discu n’homenaxe al famosu circu español. Nel, l’armonicista Antonio Serrano, miembru del septetu de Paco de Lucía, interpreta una versión del ‘Asturias Patria Querida, con ritmos de la bossa nova.

Depues de collaborar con artistes de la talla d’Alejandro Sanz, Enrique Morente, Nacho García Vega, Juan Carlos Calderón o Niña Pastori, Luis Rico decidió desarrollar una llínia musical personal en collaboración coles lletres del so hermanu, dando como resultáu ‘Circo Prize, un álbum de diez canciones con diez histories diferentes, nes que s’entemecen estilos como’l pop, la new age, el jazz y el rock.

Nesti discu, amás, participen dalgunos de los músicos más importantes del momentu, como Igor Tukalo –baxista de Rosana-; Bob Sands –ún de los meyores saxofonistes del país- y n’especial l’armonicista Antonio Serrano, última incorporación a la última formación del Septetu de Paco de Lucía, qu’interpreta una versión, en clave bossa nova, del himnu oficial d’Asturies, l’“Asturias Patria Querida”, que lleva como títulu “El Indiano”.

Circo Prize

Depues de presentar el so primer discu, ‘Namái’, nel 7th Open House Traditional Arts Festival 2005 de Belfast a finales de setiembre, DRD vuelve facelo, esta vez na se de la SGAE, el prósimu xueves a les doce la mañana. Ellí el grupu, que yá tuvo tocando n’otres dos ocasiones n’Irlanda, falará d’esta última experiencia, onde tocó en directu pa la BBC Ridió Uladh (BBC Radio Ulster), creando tovía más espectación ente los sos conciertos nun país que ta descubriendo la música asturiano.

El nome DRD vien de les iniciales de los sos componentes, Dolfu R. Fernández, Ruben Bada y Diego Pangua, músicos de munchu prestixu na escena musical asturiana. Esti primer discu de la formación tituláu ‘Namái’ ta editáu por Fonoastur y fue grabáu en Los Campos (Corvera) en febreru de 2005, participando na grabación como collaboradores Jarlath Henderson, cola gaita irlandesa, y Sergio Rodríguez col baxu.

Estos díes sal al mercáu’l primer discu del grupu uvieín ‘Los Bourbon’. ‘Reserva del 81’ ta producíu por Juan Martínez, y cuenta coles collaboraciones especiales de Carlos Segarra, llíder de la formación Los Rebeldes, y Álvaro Bárcena, cantante de Los Bruscos.

Les influencies d’esta banda siguen estilos mui estremaos. Seguidores del rock americanu y del blues, sieten debilidá por bandes como los Rolling Stones o The Faces. Dientro del panorama musical español, reparen nel rock que se facía na decada de los 80, especialmente en grupos como Burning, 091 o Los Enemigos.

Les lletres de ‘Reserva del 81’ percorren escenes de viaxes y les esperiencies vitales de los sos componentes.

La banda, nestos momentos, encuentrase nuna xira promocional d’esti primer discu que los va llevar per diferentes locales en toa España.

Andecha Astur y la organización moza Darréu van alcordase de la Revolución d’Ochobre del 34 con un conciertu de rock el prósimu viernes 7. Los asturianos Mala Reputación y Skama la Rede más los vascos Betagarri formen el cartelu del festival que va acoyer dende les 22.00 hores la Sala Quatro d’Avilés.

Los organizadores del conciertu quieren facer homenaxe a los revolucionarios del 34 embaxo la llienda ‘Asturies nun escaez’ cuntando con un actu especialmente empobináu a la xente mozo. Les entraes pa ver a Mala Reputación, Skama la Rede t Betagarri ya tan a la vienda en diversos puntos del paía a un preciu de 10 euros en venta anticipada y 12 na sala onde va celebrase l’actuación.

La Escuela de Música Tradicional La Quintana abre’l cursu 2005/2006 esti miercoles 5 d´ochobre na so se de la Escuela Pública Rei Pelayo de l’Avda. Constitución. La Quintana cumple con esti l´octavu añu dando clases de varios instrumentos, amás d’enseñar folclor y llinguaxe musical. Les especialidaes qu’ufierta esta escuela son: gaita, tambor, zanfona, vigulín, bandurria, xiblata travesera, curdión y asturianada.

Les clases práctiques impartense individualmente y l´alumnáu integrase nel nivel que-y correspuenda, dándose dalgunes clases xunto con alumnos y alumnes d´otros instrumentos pa empobinar a la formación en conxuntu.

Los profesores encargaos de dar estos cursos son músicos perconocíos na escena musical asturiana, formando parte de grupos con una llarga trayectoria. Como ye’l casu de Xuan Nel Esposito (curdión) y Diego Pangua (gaiteru), de Felpeyu; Daniel García de la Cuesta (vigulín y bandurria) de LLiberdón; o David Varela (percusión) y Merce Santos (zanfona) de La Bandina.

Los horarios de la Escuela son les tardes de los martes, miercoles y xueves a partir de les seis de la tarde nel Rei Pelayo.

La Fundación de la Tonada de Mieres va empezar a funcionar a primeros d’añu, cola intención de ser un referente cultural pa la música asturiana. Pa ello, lo primero que se va facer ye recoyer tol material biográficu, discos y tola fonoteca posible, pa lo que l’Ayuntamientu Mieres yá cuenta cola ayuda del director xeneral de Promoción Cultural.

Diana González, conceyala de cultura, anunció que la fundación tien pensao facer una páxina web dende la que puean consultase tolos archivos recopilaos pol Museu.

Dende l’ayuntamientu yá tienen pidío al Principáu que forme parte del patronatu de xestión d’esti museu de la tonada, pal que yá se ta pensando na ellaboración de los estatutos.

Como lleva faciendo dende hai unos meses, la sidrería Tierra Astur de Cualloto entama’l mes d’ochobre cola programación de conciertos de los sos xueves musicales. A lo llargu d’esti mes, los encargaos de poner música nel llagar van ser los grupos Dulcamara, Los Llanzones, La Bandina’l Tombo y Celia González.

Xueves, 6 d’ochobre: Dulcamara. Dientro de la cita habitual de tolos xueves cola música asturiana, na primer selmana d’ochobre va actuar el grupu de pandereteres y cantantes Dulcamara. Establecíes de forma estable como banda dende nun hai muncho, les sos integrantes nun son precisamente novates nesto de la música tradicional. Toes elles pertenecieron o pertenecen a grupos d’investigación folklórica, lo que-yos permite conocer de primer mano les fontes de la música que depues interpreten. Espertes pandereteres, conocen mui bien los sones y ritmos peculiares interpretaos con esi instrumentu.

Xueves, 13 d’ochobre: Los Llanzones. Dende hai unos años hai n’Asturies un renacer de les bandines. Pequeñes formaciones en formatu cuartetu o quintetu normalmente qu’interpretaban pieces dirixíes principalmente a animar el baille nes romeríes. Una de les agrupaciones qu’ayudó a fomentar esi festival ye la de Los Llanzones, que va tocar el xueves 13 d’ochobre. Los Llanzones yá lleven varios años percorriendo la xeografía asturiana ufiertando los sos “sones” en múltiples eventos (fiestes, romeríes, alcuentros, festivales…)

Xueves, 20 d’ochobre: La Bandina’l Tombo. Esta formación ye yá una de les más conocíes y apreciaes de la música tradicional asturiana. La so propuesta, totalmente acústica, nun ye otra que la de recrear les músiques qu’interpretaben les bandines o orquestines qu’a finales del sieglu XIX y principios del XX percorríen les romeríes asturianes colos sos “baillables”, onde entemecíen los ritmos más tradicionales (xotes, muñeires, saltones…) coles nueves incorporaciones que veníen de fuera (vals, mazurca, polca…). La Bandina’l Tombo ta formada por: Carlos Tejerina (contrabaxu), Dolfu Fernández (violín), Marga Lorences (curdión) y Pepín de Muñalen (flauta). Van tar el xueves venti d’ochobre dando un conciertu nel que van interpretar pieces del so primer discu y otres inedites.

Xueves, 27 d’ochobre: Celia González. Celia González ye una interesante zanfonista asturiana que vien del mundu de la investigación etnográfica, fundamentalmente en tolo que tenga que ver colo musical. Escoyó pa la interpretación esti ancestral y dificil instrumentu con un timbre y una sonoridá mui especial. El so repertoriu básase principalmente nes coples y romances que diben ofreciendo pelos pueblos los antiguos zanfonistes,pero amás incorpora otres pieces del acervu tradicional asturianu. Too ello vien nel so primer discu tituláu “Coloradina la guinda”, que tien dieciocho pieces interpretaes cola zanfona o “gaita rabil”, siendo’l primeru que publica una tañedora d’esti instrumentu n’Asturies.

Toos estos grupos van tocar na sidrería Tierra Astur de Cualloto na tarde/nueche de los xueves.

Nacho Vegas acaba de rematar un minielepé con cinco canciones inédites y una sesta ya incluída nel so últimu trabayu “Desaparezca aquí”. El nuevu discu tituláu “Esto no es una salida” (Limbostarr) va ponese a la venta’l prósimu 10 d’ochobre y pa presentalu en directu el músicu xixonés va ufiertar dellos conciertos por diverses ciudaes del estáu.

La primera de les actuaciones va ser el día 6 d’ochobre na Sala Loco Club de Valencia y al día siguiente Vegas va tocar acompañáu pola so banda habitual de Las Esferas Invisibles nel Teatru Calderón de Madrid. Los prósimos conciertos de presentación de “Esto no es una salida” van ser n’Alicante, el 14 d’ochobre, na Sala Stereo; el 28 vuelve a Valencia p’actuar con Jet Lag & Friends nel Heineken Green Space y el 29 toca en Guadalajara nel Festival Panorámico Musical.

La xira de Nacho Vegas y Las Esferas Invisibles sigue en payares con una actuación en Castellón el día 3 nel Tanned Tin; el 4 de payares en Córdoba na sala Musitek; el 18 en Cartagena y el 19 en Murcia.