Música

La IV edición del conciertu solidariu del 1º de mayu organizáu pol Fondu Xunitariu de Solidaridá Obrera d’Asturies, que se va cellebrar el prósimu 30 d’abril na Atalaya de Xixón, va traer a Xixón a los catalanes ‘Insershow’, primer grupu interactivu de la historia de la música. Animadores d’un conciertu ‘a la carta’, los catalanes van compartir escenarios con grupos asturianos tan conocíos como Mala Reputación, Stoned Atmosphere, Skontra y La Bandina del Matu Grosso.

L’apueste llamativu d’Insershow, grupu formáu por dellos músicos con experiencia na escena catalana, inclúi lo que se podría llamar un conciertu ‘a la carta’, porque la fomación reparte primero fueyes col conteníu del so repertoriu, formáu por 66 versiones de grupos tan estremaos como Banda Basotti yExtremoduro o los Clash y los Misfists, amás d’Estopa, Metallica o Triana, pa que sía’l públicu’l qu’escueya los 15 cantares que-y prestaría que tocare la banda en conciertu. Arriendes d’ello, les persones qu’arrespuendan van tener la opción de proponese ellos mesmos pa cantar col grupu, amás de poder encamenta-yos a deprender canciones nueves pa otros conciertos. Los miembros del grupu xúntense enantes de subir pal escenariu y ye entós cuando amañen el conciertu, garrando los temes más pidíos pol públicu.

El festival, nel que tamien van tocar grupos asturianos tan conocíos como Mala Reputación, Stoned Atmosphere, Skontra y La Bandina del Matu Grosso, va cellebrase a partir les 15:30 la tarde y va durar hasta les 23 hores. Mesmo qu’años anteriores, na Atalaya va haber tamien un mercáu de movimientos sociales, onde se van atopar productos de comerciu xustu, llibros, discos, artesanía o camisetes.

Esti xueves, día 20 d’abril a les ocho y media la tarde, Anabel Santiago va presentar nel Teatru Xovellanos de Xixón el so últimu discu, “Anabel Santiago canta a Diamantina Rodríguez”. Un trabayu nel que s’axunta la esploración na tonada tradicional cola incorporación de melodíes hasta agora inedites nel movimientu folk asturianu, y col qu’Anabel quier rendir homenaxe a la voz más representativa d’esti xeneru y que más la tien influyío na so forma de cantar.

Depues de participar n’abondes grabaciones colectives tradicionales, en discos d’otros músicos con estilos mui variaos, y d’editar dos grabaciones propies n’Asturies como fueron “Tierra de sueños” y “Al son de la lluna”, amás del homenaxe a Eduardo Martínez Torner, Anabel espubliza agora un discu destináu a un mercáu más ampliu.

Un públicu que’l prósimu 20 d’abril va poder escuchar nel escenariu del Teatru Xovellanos la evolución d’esta gran voz d’una moza de la tonada asturiana, qu’estos díes ta en Madrid grabando ún de los conciertos de Radio 3.

Los caminos de Nacho Vegas y de la so antigua banda Manta Ray vuelven a pasar cerca na ciudá que vio medrar a estos músicos de referencia internacional. El cantautor xixonés va tar el prósimu xueves 5 de mayu na Sala Albéniz presentando los temes del so últimu trabayu “Desaparezca aquí” y una selmana después, nel mesmu escenariu, los sos ex compañeros de Manta van presentar en conciertu el so discu “Torres de electrecidad”.

Vegas prosigue en Xixón la so xira per diverses ciudaes del estáu, interrumpida pela grabación nel estudiu de Paco Loco en Puerto de Santa María de una obra discográfica de colaboración col músicu Enrique Bunbury. La cita ye’l cincu de mayu a les 21,00 hores, acompañáu de la so banda avezada Las Esferas Invisibles.

Manta Ray va tocar na Sala Albéniz el 12 de mayu tres la estela dexada ende pel so antigu guitarrista Nacho Vegas. Una ocasión pa ver na ciudá orixinaria d’entrambos conxuntos el prestosu directu d’unos músicos que siempre son bienfayaos nos escenarios playos.

La Escuela de Música Tradicional La Quitana va entamar en Xixón, cola collaboración la Fundación Municipal de Cultura, Educación y Universidá Popular, del Ayuntamientu y la Oficina Municipal de la Llingua, unos alcuentros cola tradición oral que van tener llugar nos salones d’actos del Ateneu La Calzada y del Centru de Cultura del Antiguu Institutu ente los díes 21 y 22 d’abril.

El vienres día 21 d’abril a les siete y media la tarde, el Salón d’actos del Ateneu La Calzada va inaugurar los alcuentros cola intervención de Jesús López Suárez, investigador y responsable del Archivu de la Tradición Oral del Museu del Pueblu d’Asturies, que presentará parte del so trabayu al travies de vidios y audiciones. Darreu, Manolo Santiago López, col grupu de teatru de solombres El Turnebís del Tribilín, va representar los romances entitulaos “L’enamoráu y la muerte”, “El mozo arriero” y “Albaniña”. Pela so parte, un grupu de neños del grupu de folclor Blimea va escenificar el romance “Rico Franco”.

El sábadu día 22 d’abril a la mesma hora, va ser el Salón d’actos del Centru de Cultura Antiguu Institutu’l qu’acueya la intervención de Fonsu Fernández, director del Museu de la Gaita de Xión, interpretando dellos romances cola zanfonia, mentes que Dani García de la Cuesta, de la Escuela de Música Tradicional La Quintana, va facer lo propio a la bandurria, participando tamien los alumnos de la escuela.

Los alcuentros van vese tamien arriquecíes pola participación de persones rellacionaes coles tradiciones d’otros llugares, como ye’l casu del músicu cántabru Chema Puenta, que va interpretar cantares y romances de la so tierra, echando asina’l pieslle a estes xornaes de recuperación de la tradición oral.

El grupu de folk llavianes Deua Dubra va empezar el prósimu 26 d’abril una xira que los va llevar a lo llargo de dos selmanes per toa centroeuropa, pasando pel Festival Internacional de la Música de Viv (Ucrania) como los primeros españoles qu’asisten al encuentru musical más relevante de tol este d’Europa.

La xira, qu’empieza’l día 26 d’abril en Frankfurt y qu’echa’l pieslle’l prósimu 6 de mayu en Bruseles, ciudá na que’l grupu llavianes yá ye bien conocíu, tien previsto pasar peles ciudaes ucranianes de Viv y Kiev, amás de per Cracovia (Polonia).

El cantante y compositor Martin Stephenson, va tocar esti xueves 20 d’abril nel Centru Cultural Cajastur de Xixón, na Colexata San Xuan Bautista, a les ocho de la tarde, dientro del programa de conciertos del ciclu “Música del sieglu XX”. El veteranu interprete ingles, que percuerre diferentes estilos musicales que van dende’l rockabilly hasta’l rock o’l punk, va presentar el so últimu trabayu “The Liliac Tree”.

Martin Stephenson comenzó a finales de los setenta a tocar nuna banda, formando más tarde, yá nos años ochenta, The Daintees, colos qu’editare varios trabayos independientes de la mano de la discográfica Kitchenware, algamando una gran reputación como músicu.

Nel añu 1993 Stephenson treslládase a Londes, onde firma con Demon Records, llegando equí a consagrase y fusionando diferentes estilos que van dende’l punk hasta’l rockabilly, pasando pel folk, y que s’espeyen más maduros que nunca nel últimu trabayu de so, “The Liliac Tree”, que va presentar esti xueves en Xixón.

El realizador mozu Jorge Rivero, nomináu nos últimos premios Goya pol so documental “Nenyure”, fue l’encargáu de dirixir el videuclip del famosu cantar del mierense Dark la eMe, “Un asturianu en Madrid”. El videu reflexa los sentimientos de los mozos que, obligaos a emigrar, atopen la soledá de vese allonxaos de la so tierra y la so cultura, conviviendo con xente cola que nun tienen nada que ver.

El clip, rodáu en blanco y negro, y grabáu en diferentes localizaciones madrilanes, representa en palabres de Mario Fueyo (Dark la eMe), “a eses lleendes urbanes que se ven obligaes a marchar”.

«Un asturiano en Madrid», el exitoso single del asturiano Dark la eMe ya tiene videoclip. El trabajo fue rodado en diversas localizaciones madrileñas y contó con la dirección de Jorge Rivero.

La Col.la Propinde protagoniza la estrena de los xueves musicales nesta Selmana Santa nel llagar de Tierra Astur en Cualloto. Nes prósimes selmanes van desfilar pel escenariu de la sidrería-restaurán grupos como Merlín y Rossaleda Jazz Quartet.

El grupu de folk La Col.lá Propinde va presentar esti día los temes del so discu “Güeria” que se poresentare nel mes de Xineru en dellos conciertos en Xixón y Siero.

La Col.lá Propinde va interpretar en directu les pieces conteníes nel so segundu trabayu discográficu, editáu pol sellu L’Aguañaz, ente elles les que valen de banda sonora al documental “Suena’l camín”. El grupu lideráu por Cai y Cano ye un de los conxuntos más anovadores y frescos del panorama folk asturianu, combinando sones tradicionales colos ritmos básicos del rock de la Cuenca.

Los prósimos conciertos de Tierra Astur van protagonizalos Merlín, el día 20 d’abril y La Rossaleda Jazz Quartet, na nueche del 27 d’abril.

La Xunta Pola Defensa de la Llingua entama pal sábado 29 d’bril el Conciertu Pola Oficialidá d’esti añu que va cuntar con un cartelu nel que s’alcuentren Dixebra, Skama la Rede, Oi! N’Ast, K-Nalón, DRD, Corquiéu, Toli Morilla y La Col.la Propinde. El conciertu va tener llugar esi sábadu 29 a partir de les siete la tardi nel Campus d’Humanidaes d’Uviéu y les entraes puen mercase a 4 euros na venta anticipada y a 5 na puerta.

Un total de dos escenarios y una carpa componen la ufierta del Conciertu Pola Oficialidá 2006 qu’entama la Xunta Pola Defensa de la Llingua, cola collaboración d’Asturnews.com, Asturies.com, Radio Sele, Les Noticies, el Conseyu la Mocedá del Principáu y el Conseyu la Mocedá d’Uviúe, xunta l’Asociación de Criadores d’Oveya Xalda y Cajastur.

Les entraes puen mercase anticipadamente n’Uviéu (La Casa Posafuelles, Isala de Cuba y Chigre La Deva), Avilés (El Cafetón), Xuixón (Café Trisquel, el Baruku y Sestaferia), Candás (La Gueta), Grau (L’Ablugo), Salas (Bar Abel), Tinéu (Mesón Cervantes), Cangas del narcea (El Moreno), La Puela Allande (Café Centro), Llaviana (El Riscar), La Fuelguera (Llar de keko), Mieres (La Buraka), La Pola L.lena (La Xarrina), L’Entregu (Reciella Mallory), La Pola Siero (El Diañu) y Nava (La Posta).

La Banda de Gaites de Villaviciosa-Sidra El Gaitero consiguió la másima puntuación na segunda fase eliminatoria de la “Liga Galega de Bandas de Gaitas”. El conxuntu maliayés algama por segundu añu consecutivu esta posición del prestixosu concursu de música tradicional.

La Banda de La Villa llogró sacar 95,75 puntos sobre un total de 100 nesta segunda fase de la Liga Galega, un campeonatu al qu’acuden conxuntos musicales de toa Galicia y d’otros países, ente ellos Asturies. La eliminatoria celebróse esti domingu Parque del Temple de Ponferrada nun certame nel que participaron más de cinco mil gaiteros y nel que Xácara algamó los 90 puntos y Candás los 93.

La Banda de La Villa llogró sacar 95,75 puntos sobre un total de 100 nesta sefunda fase de la Liga Galega, un campeonatu al qu’acuden conxuntos musicales de toa Galicia y d’otros países, ente ellos Asturies. La eliminatoria celebróse esti domingu Parque del Temple de Ponferrada nun certame nel que participaron más de cinco mil gaiteros.

La fase cellebrose nel Parque del Temple, al llau de la estacion de trenes, de manera qu’habia aparcamientu palos casi 120 autobuses qu’elli se xuntaron.

La Liga entamó a les 10:00 col izar de les banderes, gallega, asturiana, castellano-leonesa y española y darréu, a les 10:40, entamó a tocar la primer banda que foi “Castro Bergisdum”, l’anfitriona que tocó en primer llugar a mou d’exhibicion, ya que lleven dellos años ensin competir na Liga por desavanencies cola organizacion. Depués entamaron les bandes participantes.

Al final Villaviciosa algamó los 95,75 puntos y convirtióse na ganadora d’esta fase que ye la segunda que gana esti añu, A Carballeira llogró 95,50 puntos, como segunda clasificada, Ledicia con 94,75 foi la tercera clasificada, y les otres dos bandes asturianes participantes algamaron tamién bonos resultaos: Candas con 93 puntos y Xacara con 90,75 puntos. Toes les tres ficieron un perbon papel, ya que nesta competición tolo que seya pasar de 90 puntos tien de considerase un ésitu. Los asturianos consiguieron quedar per delantre de bandes como Xinzo de Llimia, banda ganadora de la Liga nes anteriores ediciones.

Yera la segunda vegada que se celebraba una fase en Ponferrada, na anterior ocasión nel añu 2000. La Lliga namái que tuvo hasta agora fases fuera de Galicia en Valladolid y Ponferrada y l’añu que vien ta previsto qu’haya una en Madrid y otra en Villaviciosa.