Música

El grupu de rock avilesín Dixebra ta a puntu de cumplir el venti aniversariu de la so formación, con ocho trabayos discográficos a les sos espaldes, amás d’abondos conciertos, dientro y fuera de les llendes asturianes. Conscientes de que los directos son parte fundamental na so historia y identidá como grupu, Dixebra van celebrar la efemeride cola grabación d’un conciertu en directu’l prósimu sábadu día 3 de xunu na Plaza’l Parche d’Aviles, a partir de les 10.30 de la nueche.

El conciertu del venti aniversariu de Dixebra va facer un repasu de tola discografía de la mítica banda avilesina a lo llargo de dos hores enriba d’un escenariu pel que van pasar músicos amigos como Xose Antón ‘Ambás’. Dj Stilo y Dark la eMe.

De la parte sonora de la grabación del audio/dvd, que saldrá a la cai pa finales d’añu, van encargase Sergio Rodríguez y Kaki Arkarazo, productor musical vascu que tien trabayao con grupos como Kortatu, Negu Gorriak, Nación Reixa y Amparanoia. De la parte visual fadrase cargu l’autor de los últimos video-clips de Dixebra, el realizador mozu Guillermo Fernández.

Anabel Santiago col so discu “Anabel Santiago canta a Diamantina Rodríguez” ye la invitada del programa “Los Conciertos de Radio 3” que s’emiten güei a partir de les nueve y media de la nueche. El programa dirixíu por Paco Perez Brian ta pensáu como una alternativa musical mesmo a lo nuevo qu’a lo más clásico, con preferencia por too aquello que ta na periferia de lo comercial. “Los Conciertos de Radio 3 y La 2” tamien se puede ver pela televisión a partir de les tres y media la mañana.

Nos Conciertos de Radio 3 la cantante moza Anabel Santiago ta presentada como la renovadora de la tonada asturiana, llevantándola a la categoría de World Music. Con esti tercer discu de Santiago, l’artista rinde’l so particular tributu al xeneru tradicional y a una de les grandes, Diamantina Rodríguez.

El grupu de pop Tarik y la fábrica de colores va presentar el prósimu vienres, día 19 de mayu, a les 22 hores, na sala Albeniz de Xixón, ‘Sequentialee’, el so últimu trabayu y el primeru nos últimos siete años nel proyectu musical d’Álvaro Muñoz. Nel discu, Tarik fai homenaxe al Bowie d’ “I Forgot The Lyrics” y al “Cinnamon Girl” de Neil Young.

De la mano de Mushroom Pillow y producíu por Pedro Cantudo, el discu cunta con unos collaboradores d’escepción como los Limousine, Jubilee, o Eric Jimenez (batería de los Planetas).

Las localidaes pa esti conciertu tán yá a la venta nel Louie Louie Club y na Llibrería Paradiso de Xixón, Turly Discos n’Uvieu y Entama Bar Rock n’Aviles.

Tres de la cancelación del so conciertu’l pasáu mes d’abril, el grupu norteamericanu The Strugglers actúa güei a les ocho la tarde na Fnac de Parque Principáu pa presentar “You Win” (Acuarela Discos), un discu onde se perfilen los rasgos de Neil Young, Will Oldham, Richard Buckner y The Handsome Family.

Strugglers ta formáu pol compositor Brice Randall Bickford II y una banda rotante que tien la so ubicación en Carrboro, NC. El so tercer discu, You Win, col que’l grupu da la so particular vuelta de tuerca al folk-rock americanu, ta producíu por Jerry Kee (Superchunk, Polvo, o The Mendoza Line).

El duu madrilanu Humbert Humbert va ser el protagonista del conciertu que la sala Albeniz de Xixón organiza esta nueche a les diez dientro d’un ciclu de conciertos que lleva’l nome de ‘Pop la cara’. Los grupos ‘Tarik y la fábrica de colores’ (19 de mayu) y ‘Aviador Dro’ (26 de mayu) completen el cartel d’estos conciertos.

Humbert Humbert ta formáu por Paco Alcázar (programación y voces) y Miguel B. Núñez (guitarra). Autores del discu ‘Short Panic’, inclúi once temes que van dende canciones como “Strange Religion”, pasando pel art punk de “Following You” al electropunk inmediatu de “Sell-Out”.

Humbert Humbert compartieron escenariu con grupos como Chicks on Speed, Cycle, Ginferno, Lineas Albies o Aviador Dro.

La compañía Arolínees Xaponenses escoyó una versión del tema ‘N’alcordanza’ de los hermanos Tejedor pa, a partir de los meses de xunetu y agostu, amenizar los vuelos de los sos pasaxeros. La versión, titulada ‘Midnight in Aviles’, ta incluyida nel últimu trabayu de los irlandeses Lúnasa.

Sicasí, Lúnasa nun son los únicos que repararon nos temes de Tejedor pa versionalu, yá que tamien lo tienen fecho cantantes como Sharon Shannon, Mike McGoldrick, Duncan Chisholm, Tannahill Wavers o Phil Cunningham.

Mentestanto, Tejedor tien previsto viaxar cola so xira de Llunáticos al festival Piping Live, en Glasgow.

La banda de Tolivia, Los Berrones, foron los ganadores esta fin de selmana na categoría de la meyor canción n’asturianu nos premios de l’Academia de la Música, col tema ‘Fai deporte’, grabáu en collaboración con un grupu de deportistes asturianos pa una gala benefica a inciativa d’Oviedo TV. Los otros grupos qu’optaben a esti premiu yeren Dixebra, cola canción ‘Somos’; y Vicente Díaz, con ‘El pescado’.

Los Berrones, precursores del estilu conocíu como l’Agro-rock, tan de moda nestos últimos meses, ven reconocida d’esta manera una trayectoria qu’empezó a mediaos de los años 80. Nel añu 2003 sacaben el discu ‘República Independiente de Tolivia’.

Manta Ray presenten esti vienres, día 12 de mayu, na Sala Albeniz de Xixón el so últimu trabayu, ‘Torres de electricidad’. El conciertu, qu’empezará a les nueve la nueche, va repasar los nuevos temes d’esti cuartetu xixones. Canciones como “No tropieces”, “El despertar”, “Todo puede cambiar”, “Mi Dios mentira” o “Añada para Celia”.

‘Torres de electricidad’ presentase como la continuación natural al so anterior trabayu, ‘Estratexa’ (2003), si bien amuesa una versión evolucionada de les sos coordenaes musicales, aplicando más ‘les coraes y el corazón que la cabeza’. El discu fue grabáu nos Estudios Gárate col so productor habitual Kaki Arkarazo y foi masterizáu por Roger Seibel, que trabayare anteriormente con xente como Calexico, Sun Ra, Come, Yo La Tengo, Pussy Galore o Tortoise.

Güei a les nueve la nueche, na Sala Albeniz de Xixón, el cantante Nacho Vegas, ex componente de Manta Ray, va dar un conciertu acompañáu pola so banda ‘Las Esferas Invisibles’. Pela so parte, Manta Ray, l’antigua formación de la que Vegas foi vocalista, va tocar nel mesmu escenariu’l prósimu día 12 de mayu.

Nacho Vegas trabaya n’actualidá nun discu de romances asturianos, tanto n’asturianu como en castellanu, al tiempu qu’andecha con Enrique Bunbury, el zaragozanu que se fixere famosu como cantante d’Heroes del silencio y qu’agora ye productor d’una bona riestra de grupos d’esitu, n’otru trabayu nel qu’entrambos fusionen los sos gustos y los sos estilos na busca d’un soníu mui personal.

El grupu Skontra ta acabante d’editar el so últimu discu que lleva por títulu ‘Semeya de la rabia’. Diez nueves canciones d’esta formación xixonesa nacida nel añu 2002 que foron grabaes nos estudios Tutu de Corvera y autoproducíes polos sos miembros, y que pel momentu sólo va poder mercase nos conciertos de la banda o al travies de la internet.

‘Semeya de la rabia’ ta formáu por diez temes que, nel estilu del grupu, se decanten pol punk/hardcore y el ska/reggae, anque ensin escaecer el folklore tradicional asturianu. ‘Son tus puños’, ‘Y agora!’, ‘Llucha!’, ‘Oi! en las calles’, ‘Nun se pue’, ‘Y sigo en pie’, ‘En tu honor’, ‘Gaiteru rude-boy’, ‘Güey ni ayeri’ y ‘Asturies va bien!’ son los títulos de los temes d’esti primer discu de llarga duración editáu por Skontra.

Web de Skontra