Música

La Escuela de Música de Llanera foi esti sábadu la protagonista del programa “Nós” na TPA. Los neños de la escuela de Gaita y dellos músicos qu’ensayen ellí desplicaron el so trabayu nos ensayos selmanales de la man de Pedro Pangua.

Redacción.

Lafu & Rebeca Velasco firmen un trabayu nel que los cantares tradicionales apaecen actualizaos con ritmos nuevos, ye «Amor amante». Un recopilatoriu de cantares d’amor asturianos en versiones innovadores, col envís d’averase a un públicu ámpliu.

Ente los cantares atopamos clásicos como «Vas por agua», «Coyí d’un artu una flor», «Carretera d’Aviles», «Dime xilguerín parleru» o «Como la flor». En total, diez pieces que pretenden ser “una antoloxía de lo meyor que dio de sí la música asturiana en temes amorosiegos”.

El discu cuenta cola voz de Rebeca Velasco y coles igües de Lafu (Alejandro Lafuente), que yá participaren na grabación d’«¡Ea, ea, ea! Añaes tradicionales asturianes» y, xunto con Rodrigo Sturm, Lafu ye tamien autor del discu «Dir ya tornar», de temes instrumentales. Xunto a Lafu y Rebeca participen n’«amor amante» más de trece músicos.

Redacción.

Coordináu por Xicu Ariza sal a la cai un nuevu fancín n’asturianu, ‘Fechu n’Asturies’. El fancín recueye l’actualidá de la música asturiana más independiente, “fuxendo de los productos prefabricaos que mos lleguen de les grandes discográfiques multinacionales”.

El primer númberu inclúi una seición de noticies, onde se recueyen les novedaes musicales, les grabaciones de discos y maquetes y los conciertos de los próximos meses. Amás, una entrevista a Miguel Rodríguez, miembru nel so día del grupu de Rock Radical Astur ‘Puxarra’.

La edición d’esti númberu piesllase con un reportaxe sobre la música xamaicana n’Asturies, calendariu de conciertos y reseñes de discos salíos nos últimos tiempos, como ‘N’acción’ de Dixebra o ‘Qlt’ de La Tarrancha.

Redacción

Dende l’añu 2001 entregase en Mieres el Distintivu Fini Suárez col envís de facer alcordanza de la figura de la investigadora de la música tradicional y panderetera despaecida va dellos años.

Na edición d’esti añu, que s’entrega dientro del primer día de la ‘Folixa na primavera’, va facese homenaxe al grupu ‘Felpeyu’, que l’añu pasáu perdió tráxicamente a dos de los sos componentes.

D’esta manera quier facese un reconocimientu a ún de los grupos asturianos que más esitu tienen dientro y fuera del país y al mesmu tiempu a la figura de los fallecíos Ígor Medio y Carlos Redondo.

El responsable de la Oficina de Política Llingüística d’Asturies, Ramón de Andrés,el director xeneral de Promoción Cultural y política Llingüística, Carlos Madera, y la conceyala encargada de la xestión del Museu del Pueblu d’Asturies Carmen Rua presentaron esti día les “I Xornaes d’estudiu de Baille y Danza tradicional n’Asturies” que van desendolcase dende’l 20 al 22 d’abril en Xixón y depués van siguir n’Avilés los díes 26 y 27 de xunetu.

Les Xornaes van entamar el vienres 20 en Xixón con dos ponencies de Fe Santoveña y Fernando de La Puente sobre la función social del baille na Asturies tradicional y la enseñnaza y deprensidimientu del baille tradicional.

Na presentación de les Xornaes, Ramón d’Andrés encamento a les instituciones y la sociedá asturiana a que se conoza y sofite al folclor asturianu como “espresión alta de cultura” talamente como asocede nel restu d’Europa “onde’l folclor tiense por cultura con mayúscules y sirve d’elementu de creación y de nueves espresiones”.

El programa de les xornaes incluye charres sobre patrimoniu coreográficu o la investigación sobre la danza y el baille tradicionales n’Asturies cola participación d’espertos y investigadores del altor de Batriz Martínez del Fresno, Jose Antonio Gómez, Estrella García González, Maribel López Parrondo, Xurde Fernandez, Yolanda Cerra, Fernando Ornosa, Manuel Durán y una llarga llista d’especialistes.

Les xornaes que cuenten col sofitu de la Universidá y les instituciones locales y autonómiques.

El XI Festival Intercélticu d’Avilés y Comarca cuntará cola Islla de Man como delegación nueva na edición de 2007,que va celebrase del 20 al 29 de xunetu de 2007.

La Islla de Man (Ellan Vannin en manés),allugase nel Mar d’Irlanda ente Inglaterra, Escocia ya Irlanda, y ye una dependencia de la Corona Británica, pero en términos formales, nun pertenez al Reinu Xuníu nin a la Xunión Europea. Esti pequeñu país, con menos población qu’el Conceyu d’Avilés (75.049 habitantes en xunetu de 2005), caltién mui vives les sos tradiciones d’orixen célticu. Nel 2007 cuntará per primer vegada con representación nel Festival Intercélticu d’Avilés que ta finando yá la so programación.

La Xunta pola Defensa de la Llingua ta acabante de presentar el cartel del XIX Conciertu pola Oficialidá. El conciertu va facese’l sábadu 28 d’abril nel aparcaderu del Carlos Tartiere, ellí va instalase una carpa xigante y dos escenarios independientes nos que van dir alternándose les actuaciones de: Tuenda, Llangres, Dulcamara, Lafu y Rebeca Velasco, Toli Morilla, Chalaneru Soundsystem, K-Nalón y Skama la Rede.

Sigún pue lleese na páxina web de la Xunta pola, un total d’ocho hores de música n’asturianu n’estilos que van dende la canción tradicional al Hip-Hop, pasando pel Rock, Reggae, autor, etc..

El conciertu va entamar a les 19:30 y el preciu de la entrada ye de 5€ anticipada y 6€ na puerta.

Más información

La Banda de Gaites de Villaviciosa-El Gaitero algamó esta fin de selmana’l primer puestu na segunda fase de la “Liga Galega de Bandas de Gaitas” que se celebró’l sábadu en La Villa. El mal tiempu fizo cancelar los conciertos de los meyores gaiteros del sieglu, que s’axuntaron estos díes nel conceyu maliayés y que vieron a la Banda anfitriona ganar esta segunda fase y averase a la primer clasificada na llucha pol títulu.

Más de 3.000 gaiteros y 89 bandes d’España y Portugal participaron nesta segunda fase de la “Liga Galega de Bandas de Gaitas” a les 11,30 la mañana del domingu nel Parking El Pelambre. La competición finó cola Banda de La Villa, col maestru Martín Poladura domo direutor, algamando un primer puestu que la dexa colocada en segunda posición, tres de la Banda “A Carballeira”, na tercera y última fase de la Liga, cola que va tener que decidir el campeonatu na tercer fase que se tien de celebrar na estación d’esquí de Cabeza de Manzaneda, en Galicia.

Conciertos clausuraos

Los meyores gaiteros del sieglu nun pudieron ser los protagonistes principales de la Final de la Lliga Galega de Bandes de Gaites que se desendolcara esti domingu 1 d’abril en La Villa, nel conceyu maliayés. José Manuel Tejedor ( Asturies) Gaita Asturiana, Whistles Anxo Lorenzo ( Galicia) Gaita Gallega, Fred Morrison ( Escocia) Highland Pipes y Border Pipes, Jarlath Henderson ( Irlanda) Uillean Pipes y Patrick Molard ( Bretaña) Biniou Kozh y Bibiou Braz diben ser los protagonistes d’un conciertu na nueche del 31 de marzu nel Parking El Pelambre, nel que tamién participaben como músicos convidaos Ruben Bada (Bouzouki, guitarra acústica), Javier Tejedor (Curdión de botonera, percusiones) y Oracio García (Contrabaxu) xunta’l grupu Corquiéu, pero’l mal tiempu fizo clausurar el conciertu.

La programación tampoco nun pudo entamar el vienres 30 de Marzu con un conciertu nel mesmu Parque, a partir de les 9 la nueche, con La Bandina Tradicional La Curuxa, Los Gatos del Fornu y Skama la Rede, tamién por mor del mal tiempu.

Los meyores gaiteros del sieglu van ser los protagonistes principales de la Final de la Lliga Galega de Bandes de Gaites que va desendolcase esti domingu 1 d’abril en La Villa, nel conceyu maliayés. José Manuel Tejedor ( Asturies) Gaita Asturiana, Whistles Anxo Lorenzo ( Galicia) Gaita Gallega, Fred Morrison ( Escocia) Highland Pipes y Border Pipes, Jarlath Henderson ( Irlanda) Uillean Pipes y Patrick Molard ( Bretaña) Biniou Kozh y Bibiou Braz van ser los protagonistes d’un conciertu na nueche del 31 de marzu nel Parking El Pelambre, nel que tamién participarán como músicos convidaos Ruben Bada (Bouzouki, guitarra acústica) Javier Tejedor (Curdión de botonera, percusiones) y Oracio García (Contrabaxu) xunta’l grupu Corquiéu.

La programación entamará ya güei vienres 30 de Marzu con un conciertu nel mesmu Parque, a partir de les 9 la nueche, con La Bandina Tradicional La Curuxa, Los Gatos del Fornu y Skama la Rede. Y la convocatoria pesllaráse cola final de la II Fase “Liga Galega de Bandas de Gaitas” a les 11,30 la mañana nel Parking El Pelambre, na que van participar 83 bandes de gaites de tola península y na que la Banda de La Villa, ganadora nes caberes ediciones, ye una de les que más posibilidaes pue tener.