Música

Redacción.

Dientro de los actos de la Selmana Cultural del Conservatoriu Profesional de Música de Xixón, que va celabrase ente güei y el 16 de xunu, va celebrase un conciertu a cargu del grupu de Música Antigua ‘La Moresca’. Va ser güei llunes a les 20:00 hores nel Salón d’Actos del Conservatoriu Profesional de Música de Xixón.

El conciertu va tar conformáu por pieces del ‘Estilu italianu nel barrocu europeu’. D’Italia van interpretar ‘Ciaccona’ de Benedetto Marcello y ‘Sonata IV en Fa M’ d’Arcangelo Corelli ente otres, d’España, ‘Canzona II’ de Bartolome de Selma y Salaverde y ‘Fandango’, de Santiago de Murcia. Inglaterra va tar representada poles obres ‘Sonata IX en Si m’ y ‘Scots airs’ de Francesco Germiniani. Francia con ‘Prelude en Re Mineur’ de Louis Couperi. Y Alemaña va tar representada con ‘Variaciones sobre la Ciacona’ de Gottlieb Muffat.

El grupu de música antigua ‘La Moresca’ ta formáu por Alejandro Villar nes xiblates de picu, Pablo Zapico cola guitarra barroca, Daniel Zapico a la tiorba y Aarón Zapico cola clave. Toos ellos con una llarga esperiencia na interpretación de la música antigua.

Redacción.

La cantante de tonada, Anabel Santiago, va dar un conciertu esta nueche nel auditoriu del Centru Comercial Los Canapes d’Aviles. La entrada ye llibre y de baldre y l’artista va interpretar dalgunos de los sos esitos y clásicos de la música asturiana.

Anabel Santiago ñaz en Buenos Aires nel añu 1981, entamando a cantar tonada asturiana a la edá de trece años. Ye na actualidá, pa dalgunos, la cantante de tonada con mayor proyeición d’Asturies. Foi nomada Meyor Voz Asturiana del Memorial “Silvino Argüelles” nes ediciones 2003, 2004, 2005 y 2006.

Nel barriu de La Corredoria d’Uvieu hai una urbanización de cais dedicaes a les grandes estrelles del folclor y la música tradicional asturiana de tolos tiempos. La mayoría de los nomes son d’artistes yá fallecíos o bien avanzaos d’años. La escepción ye Anabel Santiago, que con namás 19 años contó cola so propia cai, por mor d’una llarga retafila de galardones, premios, collaboraciones, xires y grabaciones que vien realizando dende los 12 años.

Redacción.

Esta fin de selmana que vien, la Banda de Gaites La Raitana, formada con alumnos de les Escueles Municipales de Música de Nava y Piloña, va participar na cuarta edición del festival ‘Nuit Celte’ de la llocalidá francesa de Caussade/Monteils, asitiada a unos 80 quilómetros al norte de la ciudá de Toulouse.

La formación asturiana, que va compartir escenariu con dalgunos de los más destacaos grupos folk de la escena europea, como Lunasa, va presentar el repertoriu que forma parte del so discu nuevu “Moh.ito”, publicáu apocayá pola compañía Fonoastur.

La Raitana yá percorrió los festivales internacionales más afamaos d’Europa. Ente otros, los festivales franceses de Lorient, Guingamp, Chemin de crabas, el portugues de Marinha Grande y l’italianu d’Agrigento.

Redacción.

Esti vienres 8 de xunu a les siete y media la tarde, nel Palaciu de Valdecarzana, l’Asociación ‘Escontra´l Raigañu’ d’Aviles, va facer un conciertu didáuticu en collaboración cola Estaya de la Llingua del Ayuntamientu d’Aviles. Nel conciertu van intervenir les voces y pandereteres del grupu, cuntarán con Fonsu Fernández, direutor del Museu de la Gaita del Ayuntamientu de Xixón y antiguu componente de Lliberdón, col conocíu músicu David Varela, de La Bandina y Los Llanzones y, con una de les meyores solistes de tonada, Mª Luz Cristóbal Caunedo.

El tema va ser ‘Canción asturiana, los sos contextos y los instrumentos musicales con que s’acompañan’. La idea central, espliquen los organizadores, “ye dar a conocer la función social de la canción asturiana como una forma d’espresión y sentimientu qu’engloba munches más manifestaciones que la tonada. Falaránnos de los momentos de la vida o contextos nos que se daba”. Amás nel conciertu van “mostrar la bayura d’instrumentos con que s’acompañaben, descubriendonos qu’amás de la gaita, esisten nel folclore musical n’Asturies, munchos otros como la pandereta, el pandoiro, el panderu cuadráu, la “pallel.la” o sarten…”.

Enantes del entamu d’esta activudá, hacia les 18:30 hores, van entregase los premios del 2u Concursu Infantil ‘Cuentos de Seronda’, que se convoca nel mes de payares dientro del marcu de la ‘Seronda n´Aviles” y qu’esti añu va cumplir la so V edición. El xuráu del mesmu tuvo formáu por Dolfu Camilo Díaz, Montse Machicado, Xose Nel Riesgo y Susana Sela.

Redacción.

La Xunta pola Defensa de la Llingua Asturiana lleva tres años editando un discu a comuña col coleutivu ‘Músicos pola Oficialidá’ con un cantar como reivindicación de la oficialidá de la llingua asturiana. En 2005 foi ‘Fala’ y en 2006 ‘Un pasu alantre’, que terminó siendo finalista de los ‘Premios de la Música’ dientro de la categoría de ‘Meyor Cantar en Llingua Asturiana’.

Un añu más, otra vegada en collaboración con Discos Ámbitu-L’Aguañaz, presentóse un nuevu cantar, ‘Arguyosu’. La presentación foi esti vienres 1 de xunu, cola presencia de militantes de la XDLLA xunto con Xune Elipe, ún de los interpretes y responsable de la casa Ámbitu-L’Aguañaz. La iniciativa ye, según los propios organizadores “una propuesta na que s’axunten dellos músicos pa facer un cantar vindicativu sobre la situación de la llingua asturiana”.

Na ellaboración del cantar d’esti añu, ‘Arguyosu’, participen los músicos Sergio Rodríguez, Ruben Bada, Borja Baragaño, Burilo, Vito y el yá citáu Xune Elipe.

Redacción.

El grupu ‘Skama la Rede’, que ñaciere va seis años na zona del Cabu Peñes saca a la cai un discu nuevu ‘Echaos a la mar’. Esti grupu rock influenciáu pol estilu ‘ska’, que provien de xamaica, convirtióse col so primer discu nuna de les principales referencies de la música rockera asturiana.

Nesti segundu álbum afonden na propuesta del primer discu y xuben el nivel de soníu. Doce cantares son los qu’inclúi esti segundu discu y nellos amuesen con ironía y reflexón la situación social y política d’Asturies. Ayeri tuvieron en Planeta Tipo d’Uvieu faciendo una firma de discos y dende’l llunes ta a la venta nes tiendes del país.

Redacción.

El Museu Etnográficu del oriente d’Asturies entama un nuevu ciclu de conciertos pa esti añu 2007. El títulu del ciclu ye ‘Nuevos sones, vieyos instrumentos’ y va presentar a músicos de tola xeografía penínsular xuníos pola reellaboración de la música tradicional. El primer conciertu va ser esti sábadu 9 de xunu na Sala d’Esposiciones del Museu, a les 20:30 hores, cola participación del zanfonista Rafael Martín y el grupu ‘Umbria’.

Rafa Martín entamar a tocar en 1988 y xunto a Jose Mª Climent y Enrique Almendros fundó’l grupu de folk ‘La Musgaña’, onde permanez hasta qu’en 1995 entra a formar parte del elencu artísticu del ‘Teatro de la Abadía de la Comunidad de Madrid’, como músicu n’escena. Tien grabaes canciones con Kepa Junkera o Luis Delgado y anguaño forma parte del grupu de folk contemporáneu ‘La Bruja Gata’.

El grupu ‘Umbría’ ñació col envís de trabayar reinterpretando’l folclore tradicional castellanu al travies d’una estetica ensin intereses que nun seyan los criterios puramente artísticos. Nel so repertoriu, añaes, aguilandos, canciones d’antroxu, xotes, cantos de trabayu fundíos nuna estetica que fuxe de lo habitual al travies de la utilización d’instrumentos como’l rabel o la gaita de la sierra.

Redacción.

El gaiteru Jose Ángel Hevia va tocar güei a les 20.30 hores nel Teatru Xovellanos de Xixón acompañáu de la Orquesta Sinfónica del Principáu y de los coros del Conservatoriu Profesional de Música de Xixón. La obra escoyida pa la interpretación ye ‘El vientu que mos lleva’ de Juan Carlos Casimiro

Según los organizadores la obra “introduz al espeutador nun viaxe oníricu d’un personaxe asturianu peles cultures del Arcu Atlánticu, al travies d’Irlanda, Escocia, Inglaterra, País Vascu, Asturies y Galicia”. El gaiteru va interpretar xunto a la orques los distintos estilos tradicionales de música de cada territoriu.

‘El vientu que mos lleva’ ta compuesta por Juan Carlos Casimiro y los testos son de Carlos Espina. Na direición va tar Antonio Ribera. Les entraes pueden mercase tovía nel Teatru o nos caxeros de Caxastur con precios d’ente 10 y 15 euros. Xixón recibe güei al nuesu gaiteru más internacional colos brazos abiertos y los organizadores esperen “un esitu notable d’esti speutáculu”.

Redacción.

L’Asociación Cultural Llacín en collaboración cola Caxa Rural y l’Ayuntamientu d’Uvieu, organiza esti vienres un festival baxo’l títulu “Andecha musical con La Cogolla”. L’oxetivu d’esti alcuentru nel que desinteresadamente actúen: La Bandina, Xuacu Amieva, Tuenda, Felpeyu, la Banda Gaites Llacín, L´Adecha Folclor, y el Grupu de Baille de Porrúa, nun ye otru que’l de solidarizase coles hermanes Consuelo y Casilda Ríu.

Y ye que’l 15 de payares del añu pasáu un incendiu na so casa de Nava, conocida como la Llechería de la Cogolla, arrasó la vivienda dafechu, llevando consigo oxetos de gran valor hestórico ya incalculable valor personal. A esta traxedia familiar xúntase la de tener la desgracia de perder el so mediu de vida, al quemase dientro del conxuntu, el so taller artesanal.

Tanto l’Asociación Cultural Llacín como tolos grupos y persones que participen nel alcuentru «quieren poner en valor l’amistá que los xune a esta familia asina como l’importante trabayu que per munchos años estes hermanes ficieron pola difusión y ayuda a la cultura asturiana. L’actu va celebrarase a les 20:30 nel Teatru Filarmónica d’Uvieu. Toa persona interesada n’apoyar esta causa va ha dirixise a les taquielles del teatru, onde van vendese les entraes a la preciu de 10 euros. Tolo que se recaude va ser ingresao a les afeutaes

Redacción.

El discu ‘Música na maleta’ va percorrer los escenarios de tol mundiu a lo llargo d’esti branu. El grupu folk ‘Tejedor’ va llevar la música compuesta polos hermanos Jose Manuel y Javier Tejedor a tolos requexos del mundiu. El discu ta dedicáu a la memoria d’Ígor Medio y Carlos Redondo, los miembros del grupu ‘Felpeyu’ fallecíos el branu pasáu.

El primer conciertu va ser esti vienres 18 na Feria de L’Ascensión d’Uvieu, pa llegar el sábadu a ‘Tolo d’Asturies’, festival que se celebra en Llangreu. Nel mes de xunu, el día 9, van tocar na fiesta de Santa Olaya, en Morcín. El 22 van participar nel homenaxe na Playa Poniente n’alcordanza d’Ígor Medio y Carlos Redondo. Pa terminar el mes na Nueche de San Xuan, nel Antiguu Estadiu Grandiella, en Nava y el sábadu 30 na Nueche Folk de Fitoria.

Los meses braniegos de xunetu, agostu y setiembre van siguir con conciertos nel Festival de Lorient en Francia, Llanes, Tapia de Casariego, Cantabria, Huesca, Madrid, Chicago y munchos otros llugares.