Música

El gaiteru llaniscu Xuacu Amieva va tar participando, el vienres 25, nuna xornada, a mediu camín ente conciertu al usu y taller didáuticu, sobre la música tradicional asturiana en Colunga. Esta actividá va tener llugar na sala Loreto d’esta llocalidá en dos sesiones, a les 11:30 y a les 13:30, y forma parte de la 9º campaña de Música y Teatru pa Escolares qu’organiza l’ayuntamientu de Colunga.

Xuacu Amieva ye un de los artistes mas reconocíos dientro del panorama musical asturianu tanto como gaiteru, mayestru de gaiteros y multinstrumentista en dellos grupos d’investigación folk como como “Raigañu”, “Urogallos” y “Andecha Folklor d’Uvieu”. Tien espublizao 11 trabayos discográficos de los que la última referencia ye “Seis”, na cai dende 2006.

El sábadu 26 de xineru, cellebrose nel pueblu d’Arangas la fiesta de San Pablo, que se recupera esti añu dempués d’un tiempu nel que nun se celebraba. Pero la fiesta nun vien sola esti añu, la fecha va aprovechase p’axuntar nel pueblu’l I Alcuentru de Músicos Tradicionales.

Pa entamar el día hubo un pasacáis tradicional de gaites a cargu de los alumnos de la escuela de gaites que lleva n’Arangas el músicu Héctor Braga. Yá de tarde, y dempués d’una misa, cellebrose un taller de baille abiertu a tolos que quieran participar. Encargáronse del taller los grupos Xeitu, d’Uviéu, y Principáu, de Llugones.

Darréu cellebrose una espicha que cuntó cola bandina del grupu Principáu y con músicos bien conocíos del panorama folk asturianu, como Héctor Braga, Xosé “Ambás”, Xuan Nel Expósito, Rubén Arias ya Indalecio Santos, ente otros. Una bona oportunidá pa sentir nel mesmu llugar a munchos de los meyores músicos del país.

Jaume Sisa, cantautor y figura icónica de la música catalana dende’l so debú en 1967, va tar actuando esti sábadu nel Casinu d’Asturies de Xixón a les 20:30 hores. El músicu, como davezu durante esta estaya que lu lleva de vuelta a los escenarios, va ufrir en Xixón un repertoriu basáu nun de los sos discos más conocíos, “Qualsevolt nit per sortir el sol”, grabáu en 1975. El recital va tener llugar na sala Acapulco del casinu y les entraes al mesmu cuesten 12 euros.

Tamiñen conocíu como Ricardo Solfa, Sisa foi un de los integrantes más señalaos de lo que se dio en nomar “Nova canço” catalana. Formo parte del Grup de Folk, xunto a artistes como Pau Riba y Jaume Arnella ente otros, del grupu Música Dispersa y cunta con una amplia carrera en solitariu con 25 referencies discográfiques nel mercáu.

La sala Savoy de Xixón va ser l’escenariu qu’acueya esti sábadu la estrena nos escenarios asturianos de la banda australiana The Black Pony Express, nueva propuesta a mediu camín ente’l rock y la música popular con Nick Cave na retina. El conciertu va entamar a les 22:00 hores y sunpodrá la vuelta a los escenarios españoles de les canciones del discu de debú, “Love in a cold place”, de la banda lliderada pola voz de Justin Cusack.

La Patriband Folk Orl.lestra, presentando una propuesta a mediu camín ente grupu y bandina tradicional, actuen esti xueves 24 de xineru nel restorán-sidrería Tierra Astur en Cualloto, llugar que ya visitaron el pasáu 15 de payares dientro del programa de conciertos folk colos que la sidrería suel amenizar la nueche tolos xueves.

La música de la Patriband Folk Orl.lestra bebe sobre manera de la tradición asturiana pero tamien d’otres músiques tradicionales d’America Latina o del mediterráneu. El grupo ta formáu por Pablo Pujades, a la guitarra y la voz; Pablo Álvarez “Güelu”, na gaita y les xiblates; Diego Álvarez “Kiku”, al acurdión; Adrián Fernández “Peruano”, al baxu; David Yáñez, nes percusiones y Hector Díez na batería.

Gueta na Fonte, el grupu del compositor, productor y músicu asturianu Mento Hevia, tuvieron tocando el xueves 24 a les 19:30 hores nel Centru Municipal Integráu de La Arena en Xixón. Esti grupu amesta a los soníos propios del folk antiguu y tradicional asturgalaicu dellos elementos de tastu contemporáneu ya instrumentos modernos. Nel conciertu presentaron pieces de “Como agua de mayo”, el l so últimu trabayu discográficu espublizáu en 2005.

La banda ta formada por Dani Álvarez Mora, na gaita, la flauta y les percusiones; Luis García, al violín; Juan Povedano, cola flauta; Vanesa Vez Caraduje, na voz, los teclados y la percusión; Mento Hevia, nel violonchelu, percusión, arpa celtica y los teclaos; Jose Frances, a la guitarra, el bouzuki ya’l baxo pedal y Nancy Quintáns de la Pridam, nel violín.

Continuen les actividaes venceyaes a la cellebración del 400 aniversariu de la Universidá d’Uvieu. Nesta ocasión, y dientro de la políticia de collaboración de la instituciñon educativa asturiana con dellos locales de la rexón con motivu del aniversariu, el Cafe Dam de Xixón va acoyer un conciertu de jazz al cargu del cuartetu de Isabel Muñiz esti xueves 24 a les 22:00 hores.

L’Isabel Muñiz Quartet ta compuestu pola propia Isabel Muñiz, que se fai cargu de la parte vocal; el guitarrista Carlos Pizarro; y Alejandro Gallego y Horacio García, baterista y contratabaxista, na seición rítmica.

El cine Felgueroso de Sama continua esti martes 22 de xineru, cola esibición del film”El difunto protesta” d’Alexander Hall, el programa del ciclu “El cine contra las cuerdas”., que dende’l 8 d’esti mesmu mes vien repasando les películes más representantives col boxeu como tema central. La cita, como davezu nesti ciclu, ye a les 19:30 hores.

Les prósimes cintes que van pasar pol Felgueroso son “Nadie puede vencerme”, “El ídolo de barro” con Kirk Douglas, “Marcado por el odio” con Paul Newman encarnando a Rocky Graziano, “Más dura será la caída” con Humphrey Bogart, “Requiem por un boxeador”, “Rocky”, “Toro Salvaje” con Robert De Niro y “The boxer” aprosimación al eneru del irlandes Jim Sheridan con Daniel Day-Lewis

El gaiteru asturianu más internacional comentaba apocayá a un mediu rellacionáu col festival Eurovisión la so intención de presentase a la preselección qu’organiza cada añu TVE pa buscar al representante español pa Eurovisión. En nueves declaraciones a esti mediu avanzaba “confieso que tengo una idea clara sobre un tema nel que toi trabayando”, amás avanzó tamién qu’“habrá lletra y yá sé quién llevaría pa eses voces”. Amás, aseguró que “sedrá una propuesta mui mui impactante” y afirma que si va a Eurovisión “fáigolo pa ganar”.

En plena promoción del so últimu trabayu discográfich “Obsessión”, Hevia paez cada vegada más convencíu de querer representar a España en Belgrado, onde va celebrase Eurovisión en 2008.

Preguntáu l’artista asturianu pola escoyeta llingüística del tema diz que “el castellán ye una de les llingües coles que crecí como artista” anque “l’asturianu ye la llingua na que pienso y na que me comunico cola mio familia”. “Na mio carrera dambes tuvieron presentes y compartiendo espaciu n’ocasiones”. Pa Eurovisión Hevia cree que “más que la querencia idiomática ye necesario poner la llingua al serviciu de la música, al fin y al cabu, el públicu receptor ye una comunidá multillingüe”.

Nos próximos díes TVE va anunciar la forma na que va escoyer esti añu al representantes d’España pa Eurovisión 2008, va ser entós cuando podamos conocer si Hevia decide finalmente presentar el tema que paez que tien yá perfiláu.

Hevia quier dir a Eurovisión y “tien mui bones idees sobre cómo facelo”

El cantautor asturianu Toli Morilla foi l’encargáu d’echar el pieslle al actu d’entrega de los premios Andrés Solar 2007, celebráu esti sábadu pasáu nel Antiguu Insitutu Xovellanos de Xixón. Cola guitarra y l’armónica enllenó’l Salón d’actos del centru cultural con dellos temes, ente ellos “Azul y gris”, col que ganó’l Premiu al Meyor Cantar Asturianu 2006, otorgáu pol Gobiernu d’Asturies.