Música

El ciclu “Los conciertos del Taller” continua esti miercoles 20 de febreru con un recital de música sarda al cargu del guitarrista Paolo Angeli. Esta nueva propuesta del Taller de Músicos de la Fundación Municipal de Cultura, Educación y Universidá Popular del Conceyu de Xixón va entamar a les 20:00 hores nel Centru de Cultura Antiguu Institutu de Xixón. La entrada ye llibre y de baldre.

Paolo Angeli, nacíu en Cerdeña, entamó en 1997 la so esperiencia cola guitarra sarda de manera autodidacta y con un instrumenti iguáu por elli mesmu. Toca en varios festivales de músiques improvisaes y música contemporánea per toa Europa, ente ellos, el “Die lange nacht der gitarre” de Berlín, el “Clusone Jazz” o nel “RAI radio 3”.

El públicu xixones amante de la música lírica ya’l blues tien, esti miercoles 20 de febreru, una cita cola diva norteamericana Barbara Hendricks, que xunto col cuartetu de Magnus Lindgren van rendir homenaxe a la obra de la cantante Billie Holiday. El conciertu va tener llugar nel Teatru Xovellanos de Xixón a les 20:30 hores.

La Ópera de París, el Metropolitan Opera, el Covent Garden y La Scala son dellos de los escenarios que disfrutaron en dalguna ocasión de la voz de Barbara Hendricks, una de les recitalistes más ponderaes de lña so xenaración. Nesta ocasión, la cantante va contar col sofitu músical del saxofonista suecu Magnus Lindgren ya’l so cuartetu de jazz.

The Marzipan Man va actuar esti martes nel Fórum de la Fnac. Y tres d’esti home de mazapán escuendese Jordi Herrera, cantante de la banda mallorquina Satellites, que entama agora un nuevu proyectu en solitariu. El conciertu va entamar a les 19:00 hores nel espaciu cultural que la tienda tien nel centru comercial Parque Principado de Siero. La entrada, como davezu, ye llibre y de baldre hasta completar l’aforu.

Producíu pol sellu Primeros Pasitos, el discu ta grabáu, interpretáu y mezcláu pol propiu Jordi Herrera nos estudios Silver Transporterraum de Londres, casa del productor de bandes como The Strokes Gordon Raphael. Según el propiu músicu, esti proyectu bebe tantu de les hestories de Lewis Carrol como de la música d’artistes como Nick Drake.

El grupu d’opinión Algamar va cellebrar una charra sobre la realidá de la música que se ta faciendo anguaño n’Asturies con cuatro artistes d’estilos estremaos, la cantante de tonada Anabel Santiago; Chus Pedro de Nuberu; el mayestru y fundador de “Xentiquina”, Nacho Fonseca ya’l cantante de Dixebra Xune Elipe. L’eventu va tener llugar esti martes 19 de febreru na Casa la Cultura de La Pola (Siero) de magar les 19:30 hores.

Fred Bougouin-Kramer, perstixusu músicu d’harpa celtica frances, va tar dando un recital esti martes 19 de febreru en El Baruku de Xixón (Cai Almacenes) de magar les 22:00 hores y con entrada llibre y de baldre. Esta xera cultural ta organizada pola Escuela de Música Tradicional “La Quintana” ya’l propiu establecimientu hosteleru xixones.

Bougouin-Kramer ye un de los músicos tradicionales más poderaos d’Europa con más de 1000 conciertos nel so haber. Ye’l creador d’una tecnica na que interpreta l’instrumentu tocando con uñas curties na mano izquierda y llargues na mandrecha. Amás de concertista ye profesor d’harpa.

Dulcamara, Anabel Santiago, Esther Fonseca, Soncai System y Skanda son los artistes que opten al premiu al meyor cantar en llibgua asturiana. Asina lo comunicó la Conseyería de Cultura y Turismu del Principáu d’Asturies na Casa la Cultura de Mieres na mañána d’esti llunes 18 de febreru. La entrega de premios va tener llugar el prósimu xueves 21, na mesma Casa de Cultura Teodoro Cuesta de Mieres a les 20:30 hores.

Nesti actu, los seleccionaos van tocar los temes ganadores: “Nosh” nel casu de Dulcamara, Anabel Santiago con “Poema inacabáu”, Esther Fonseca, con “Negra”, Soncai System, con “Soncai”, y Skanda, con “Na mio barca”. Durante l’actu tamien tocaran Nuberu, no que va ser un de les últimes apaiciones en directu enantes de la so retirada, prevista pa esti añu.

The Crazy Cavan & the Rhythm Rockers, una de les bandes señeres del revival rockabilly de los años 70, van actuar esti sábadu a les 20:00 hores na Sala Albeniz de Xixón (C/San Bernardo. 62). Les entraes pa ver a los británicos, Cavan Grogan a la cabeza bien secundáu por Terry Walley, na guitarra, Don Kinsella, al baxu, y Mike Coffey na batería, tan disponibles les taquilles de la sala y nos puntos de venta habituales al preciu únicu de 20 euros.

Tejedor, Carlos Rubiera y Skanda son los nominaos na XII edición de los Premios de la Música na categoría de meyor cantar n´asturianu. Los premios tan organizaos pola Academia de la música española y dende haz unos años tamien reconocen el trabayu musical de los artistes que componen y canten n’asturianu con una categoría propia. La gala d’entrega de premios va cellebrase’l prósimu 3 de abril nel Auditoriu Miguel Delibes de Valladolid.

Los avilesinos Tejedor van optar al premiu cola canción “Seique non”, orixinal de Javier Tejedor y Ruma Barbero; el xixones Carlos Rubiera va participar con “Marinerina de Caldones” y la banda mierense Skanda con “Sr Humanu”. N’otres ediciones algamaron el premiu Los Berrones y Manolo Morán.

La banda mierense de rock duru Helltrip, ganadores del últimu concursu de maquetes de la emisora 40 Principales, van presentar un vidíu nuevu esti vienres en Mieres. L’actu va dir acompañáu d’un conciertu y va entamar a les 20:00 hores nel Auditoriu Municipal de la Casa de Cultura de Mieres. Helltrip tan nominaos a los premios AMAS na categoría de meyor album rock.

La sidrería-restorán Tierra Astur de Cualloto va recibir esti xueves la visita de Delagua, banda asturiana de pop, coincidiendo cola cellebración del día los namoraos. Delagua tan grabando lo que va ser el so segundu discu tres un par de contautos col estudiu, un discu y una maqueta, y un buen númberu d’actueciones por toa Asturies.

La banda ta formada pola cantante y poeta Gema Fernández, Silvia Fernández na guitarra, Julio Fernández, productor y guitarrista, Oscar Santos al baxu, el percusionista Nacho García el baterista brasileñu Vaudí ya’l pianista Xaime Arias. La esperiencia d’estos músicos en musiques como’l jazz, nel casu de Oscar y Xaime, o de los soníos latinos, Vaudí o Nacho García faen de Delagua un grupo de marcada personalidá.