Música

El próximu sábadu 29 de marzu la cantante asturiana de tonada Anabel Santiago, una de les figures que con más furcia tan renovando la cara de la música tradicional asturiana, va tar dando una clase maxistral de canción asturiana nel Ateneu La Calzada. Na clase va centrase nesl trabayu sobre de dos canciones, que los que quieran apuntase tiene qu’escoyer d’ente ciinco posibles: “Baxaben cuatro alleranos”, “Al pasar por el puertu”, “Ayer vite na fonte”, “Anque soi tan piquiñina” y “A la pipiona”.

El plazu pa inscribise ta abiertu dende esti llunes 10 de marzu y fina’l día 26 d’esti mesmu mes. El preciu pa los interesaos ye de 14 euros anque tamien hai accesu llibre pa la xente que quiera asistir como oyente.

La Pola L.lena recibe mañana sábadu al grupu rock Dixebra, que va actuar a les diez de la nueche nel mercáu astur de La Caleya. Un conciertu de baldre que va animar la nueche de L.lena colos sones de más de venti años de carrera musical del conxuntu llideráu por Xune Elipe.

Koniec, Afro Soul Toasting All Stars, The New Mastersounds y P-Theory van tocar esti sábadu nel campus universitariu de Viesques con motivu d’un minifestival de música funk col que la Universidá d’Uvieu vien a ampliar la so ufierta cultural nel añu que cellebra los 400 años del so nacimientu. Los actos entamen a les 18:00 hores nel cámpus xixones y los conciertos a les 20:00 hores cola actuación de la banda asturiana Koniec pa siguir una hora dempues con Afro Afro Soul Toasting All Stars, que van presentar el so primer discu, “Palestine in the shade/Manipulation”.

A les 22:00 hores va llegar el turnu de la banda de Liverpool, The New Mastersounds. Estos cinco musicos van poner nes tables una de les propuestes más conocíes n’Europa, por mor de les sos frecuentes xires pel continente. “Return to Gijón” ye un de los sos temes más representativos. El ramu al festival van ponelu P-Theory. Afincaos en Chester, na propuesta de los ingleses rescampla sobre manera la fuercia de la so vocalista y la solera de Gren Goins, antiguu comnponente de la P-Funk del llexendariu Geaorge Clinton.

Esti minifestival va recibir especial atención na programación de Radio Nacional d’España Radio 3 cola emisión de los conciertos a partir de les 24:00 hores nel espaciu “La cuarta parte”, que presenta’l raperu Frank-T y nel programa “La ciudad invisible” de Javier Díez.

Música bretona de la mano de dos interpretes del más altu nivel, Jean-Charles Guichen y Sylvain Barou, ye la propuesta de Cajastur pa esti xueves 27 de marzu, nun recital que va entamar a les 20:00 hores nel escenariu de la Colexata de San Xuan Bautista en Xixón. Guichen, un de los guitarristes más ponderaos del este d’Europa, fundó ” “Ar re yaouank”, banda señera del folk europeu. Barou, pela so parte, ye una de les figures que rescampla sobre manera nel folk d’anguaño gracies al so trabayu cola flauta al frente de bandes como “Comas” y “Olli & The Bollywood Orchestra”.

Merlín, la banda xixonesa de folk na que respcampla sobre manera l’espiritu folixeru de la música tradicional asturiana van tar amenizando la nueche a los clientes de la sidrería-restorán Tierra Astur de Cualloto, nuna nueva edición de los xueves musicales d’esti negociu hosteleru. Nel grupu militen: el gaieru Ruben Ardura, Daniel de la Cuesta al violín y les voces, Lluis Gómez de Benito a les xiblates, el giuitarrista Ricardo García Mesa, el baxista Javier González Lueje, l’acordeonista David Varela y Dudu García na percusión.

Alberto Ablanedo, nel so blog Folk na rede, ta acabante de poner a disposición del públicu un adelantu de lo que va ser el nuevu discu del tríu DRD. El corte ye una premezcla na que puen sintise un villancicu de Miranda y dos composiciones del guitarrista Ruben Bada. DRD, ye una banda compuesta pol propiu Bada, pol violinista Dolfu R. Fernández ya’l flautista Borja Baragaño. N’actuvu dende 2003, esti va ser la so segunda esperiencia d’estudiu tres aquel “Nama”, qu’asoleyaren nel añu 2005.

Les fiestes del bollu, que se vienen festeyando n’Aviles durante tol fin de selmana, van echar el pieslle esti llunes coles actuaciones de Los Gatos del Fornu y de Dulcamara. La última cita de les populares fiestes de la villa avilesina va entamar a les 20:00 hores na Plaza’l Parche.

Les pandereteres “Dulcamara” tan algamando un exitu notable col so primer trabayu discográficu, un ¡Sali, l.luna! nel que recuperen y remociquen 12 temes tradicionales dando-y especial importancia a la voz femenina y al soníu de les panderetes. Amás, la banda ta d’actualidá recientemente por algamar el premiu al Meyor Cantar del Principáu pola canción “Nosh”.

Los Gatos del fornu, pela so parte, entamaron a tocar xuntos en xineru de 1996 con resultáu, amás d’una gran actividá de direutu, d’un discu homónimu y delles collaboraciones en trabayos como “Xeneración Folk” nel que compartíen espacios con bandes como Corquieru.

Delagua, banda ovetense de fusión con querencia polos soníos latinos, van tar actuando esti xueves n’una nueva entrega de les nueches musicales na sidrería-restorán Tierra Astur de Cualloto. Con un discu nel mercáu y otru en camín, la banda ye una de les habituales nel circuitu musical asturianu. La banda ta formada pola cantante y poeta Gema Fernández, los guitarristes Silvia Fernández y Julio Fernández, ya’l pianista Xaime Arias. Oscar Santos (baxu), Nacho García (percisión) y Vaudí (batería) son los encargaos de la seición rítmica.

28 artistes del panorama internacional, ente los que tan nueve asturianos, van participar nel FAMA, el festival asturianu de música avanzada, qu’esti añu cellebra la so segunba edición. Con dos escenarios principales, el recintu de la Feria de Muestres de Xixón y Sala Albeniz de la mesma localidá, el festival va axuntar a xente como Oscar Mulero, Dave Clark, Alex Under, David Mallada, Silversurfer o Dj Preach ente otros. Los conciertos van tener llugar los días 20, 21 y 22.

Xunto coles actuaciones, FAMA va llevar a Xixón delles actividaes diurnes que van complementar la ufierta puramente musical. D’esti mou ta programáu l’espectáculu audioivisual Iluminia, que tan teniendo llugar n’estos dies previos al festival nel Teatru Xovellanos, l’antiguu edificiu de la Pescadería Municipal y l’edificiu del Antiguu Institutu Xovellanos. Esti mesmu edificiu tuvo acoyendo una amuesa de cartelería rellacionado colos artistes del cartel.

Por últimu, esti miercoles 19 de marzu el festival va acoyer la conferencia de Karl Bartos, antiguu componente de los seminales Kraftwerk, na que va facer un repás a la so llarga carrera na escena ellectrónica. Esti actu va tener llugar nel local Art &Gallery (Carretera de la costa, 118) a les 19:00 hores.

Más información

El músicu Xabel Vegas, qu’apocayá anunció la fin del grupu Manta Ray. El so primer discu llámse “El óxido” y ta editáu por Mushroom Pillow. Ta compuestu por nueve temes inspiraos en delles experiencias vivíes en primer persona pol autor, Vegas vuelve a cuntar con “Las Uvas de la Ira”, la banda que formara nel momentu nel que principió la so carrera en solitariu, mientres que la producción cuerre al cargu de Kaki Arkarazo, que yá asumiera esa mesma xera nel trabayu anterior del artista.