Música

La Colexata San Xuan Bautista de Xixón va acoyer, de la mano de Cajastur, l’actuación del grupu La Chiclana que va ufrir un particular averamientu al tangu. Dolores Solá, Acho Estol y Juan Valverde axunta’l tangu con rock o jazz nuna propuesta que queda bien a les clares nes canciones de “Lejos”, el so últimu trabayu discográficu. El conciertu va entamar a les 20:00 hores del miercoles.

“El conciertu ye una de les meyores muestres de la música n’asturianu que se fai anguaño”. Xune Elipe, cantante de Dixebra, quiso anunciar con estes pallabres el venti Conciertu pola Oficialidá del asturianu, qu’organiza la Xunta pola Defensa de la Llingua Asturiana. Los actos de promoción del eventu, que va tener llugar los próximos díes 25 y 26 d’abril nel Pabellón de les Naciones de la Feria Muestras de Xixón, entamaron esti martes nel local de Conceyu Abiertu n’Uvieu con un actu nel que tamien participaron Ernesto Avelino, del CAO, Xune Elipe, Santi de La Bandina y Tori, de K-Nalón.

El conciertu va cuntar esti añu cola presencia d’una montonera de grupos de tolos estilos pa un total de 14 bandes. El vienres 25 van ser Nuberu, Llan de Cubel, Skama la Rede, Skanda, K-Nalón, Xera y Gomeru. El sábadu 26 van ser Dixebra, Los Berrones, Tejedor, La Bandina, La Col.la Propinde, DRD y Chalaneru Sound van pesllar la cita musical reivindicativa.

El preciu de la entrada pa un día ye d’8 euros anticipada y 10 na puerta. Y el bonu pa los dos díes sacóse a la venta a 14 euros y va vendese na puerta a 16 euros.

Les entraes pueden atopase n’Uviéu: La Casa Posafuelles, Isla de Cuba, La Deva; Avilés: El Cafetón; Xixón: Café Trisquel, El Barucu, Llibrería Alborá; Candás: La Gueta; Grau: L’Ablugo; Salas: El Cobertizo; Tinéu: Mesón Cervantes; Cangas del Narcea: Bar Azul; La Puela Allande: Café Centro; Mieres: La Buraka; La Pola L.lena: La Xarrina; La Felguera: Llar de Keko; Llaviana: El Riscar; L’Entregu: Tom Mallory; La Pola Siero: El Diañu; Nava: La Posta y en L.luarca: Panadería Aldín, Estancu la Cachona. Asturnews collabora cola edición d’esti XX Conciertu pola Oficialidá.

Esta fin de selmana diéronse los premios que cada añu concede l’Academia de la Música y que dende va dellos años reconoz el llabor de los músicos y lletristes qu’usen l’asturianu nes sos composiciones. Nesta edición númberu doce, l’Academia otorgó’l premiu al meyor cantar n’asturianu al grupu formáu polos hermanos Tejedor, pol cantar “Seique non”.

El premiu entrégase a toles llingües del estáu, siendo l’asturianu la única non oficial que tien una categoría propia y que dende l’entamu yá ganaron Rosaleda Jazz Quartet, Manolo Morán o Los Berrones.

Los díes 4, 5 y 6 d’esti mes d’abril entrante va tener llugar en Xixón el festival “Palabra y música”, dedicáu a presentar a los meyores artistes de la escena internacional de spoken word, quiciabes el xeneru musical que meyor ye capaz d’axuntar poesía y música. Los conciertos programaos pa Xixón, el festival tamien se cellebra en Sevilla y en Mallorca, van dar la oportunidá al públicu asturianu de ver nes tables a Henry Rollins, un de los pionerosdel xeneru y artista de referencia na escena hardcore americana, Willie Vlautin, Marlango o l’escritor asturianu Alessandro Baricco, ente otros. De parte asturiana van participar los poetes Pablo Texón y Sofía Castañon.

Esti sábadu y nel Nuevu Teatru de La Felguyera van tar tocando Blima, un cuartetu que practica lo que vien a denominase “folk de cámara” y que fae de la experimentación musical una de les sos señes d’identidá cimeres. El conciertu, nel que los asturianos van tocar a buen seguru dellos de los temes que formen el so primer discu, “Entamu”, tien previstu l’entamu a les 20:00 hores. La entrada al recital ye llibre y de baldre, como davezu nos conciertos qu’organiza Cajastur.

Blima cunta col trabayu musical de Fernando Oyagüez, al bouzouki y los coros; Marcos G. Alonso, a l’acordión diatónicu y les percusiones; Xurde Fernández, cola flauta travesera, el whistle ya’l violín
y Silvia Quesada que ye la encargada de pone-y voz al proyectu.

Siente les canciones de Blima

Trashtornados van ser los encargaos de pone-y el ramu, esti vienres 4 d’abril,al festival Mieresblues, que ta cellebrándose dende haz unes selmanes na Casa la Cultura de Mieres. El conciertu tiene prevista la hora d’entamu pa les 20:00 hores y la entrada al recintu va ser llibre y de baldre, como davezu durante tol festival.

La banda, que cuenta con un discu nel mercáu, ta formada pol guitarrista Bobby Gonzales, el batería de La Ruta y Doctor Explosion, Pibli, el contrabaxista Pablo Souto, y una sección de vientu na que participen Kiko Flores (saxofón), Miguel Herrero (trompeta), Dani Herrero y Aitor Herrero.

Los xueves son día d’espicha y música na sidrería Tierra Astur de Cualloto y nesta ocasión la velada va tar amenizada pol grupu Harrison Folk, una na que participen músicos de Lliberdón, La Bandina o Merlín. La propuesta, como rescampla col nome la banda, ye bien folixera y perfeita pa disfrutar en direutu.

Mañana, xueves 3 d’abril, na sidrería Tierra Astur de Cualloto, va celebrase una espicha conciertu, que como toles selmanes organiza esti establecimientu. N’ella va actuar el grupu Harrison Folk.

El grupu Harrison Folk ta conformáu por músiques de bandes como Merlín, La Bandina o Lliberdón y el so repertoriu acústicu básase en melodíes de la tradición asturiana, gallega y d’otros países.

La célebre formación xixonesa “Felpeyu” torna a asoleyar un discu dempués de más de seis años ensin facelo y tres la traxedia qu’acabó cola vida de dos de los sos componentes, Ígor Medio y Carlos Redondo. La formación, con un nuevu componente al baxu y a les voces torna con nueves fuercies y dempués d’un tiempu nel que los homenaxes y l’alcordanza vinieron marcando la so axenda.

El discu titúlase «Canteros» y lleven preparándolu meses pa que’l próximu sábadu 12 d’abril, a les 20:00 hores, nel Teatru Filarmónica d’Uviéu, suene tan bien como siempres.

La banda moza formada por rapazos de L.lena, Uviéu y Xixón ta acabante d’asoleyar un single col nome de “Medrana n’Asturies” y el sotítuluv “mecigayu son”, col definen la so música. Ésta ye la so carta de presentación y n’ella podemos atopar ritmos ska ensin escaecer los raigaños de la música tradicional asturiana.

El cantar grabóse nos Miller de Mieres baxo la producción de Marco Castañón, del grupu Skanda, y ta distribúyendose dende va díes llibremente pela rede, nos chigres y radios “col enfotu de que’l soníu y el mensaxe de FalaNoNcaduca aporte al mayor númberu de xente posible”.

Descarga’l cantar de baldre