Música

Güei llunes, a la una la tarde, na plaza’l Conceyo de Tapia va ponese’l ramu al XII FIDO, un festival qu’entamare va cinco díes y que tien yá convocada la so edición pa 2009. Sicasí, y enantes de terminar, a les 11:30, nel aula del Institutu Marqués de Casariego, va clausurase oficialmente la esposición “Tapia na alcordanza” y a les 12 hores, la organización del FIDO va entamar una charra alderique sobre’l festival tapiegu.

Pel escenariu del FIDO 2008 pasaron grupos como la Bandina El Koku la Mazana, los catalanes Keympa, l’escocés Fred Morrison, los irlandeses Craobh Rua, los ingleses Flook y los gallegos Xerfa, tando Asturies representada por, ente otros, Darbuka, Gomeru y el maestru gaiteru Xuacu Amieva.

“Las balconadas Porruanas” son un concursu de pintures sobre teles que van tar colgaes de los balcones de les casas del pueblu durante tol mes de septiembre. Estes teles tienen de ser entregaes a l’asociacion Cultural Llacin enantes del 21 d’agostu.

El concursu ta dotáu de dellos premios: unu de 1000€, dos accesits de 500€ caún y unu de votacion popular de 700€.

La Delegación asturiana en Lorient torna esti llunes al meudía depués de salir na madrugada de la ciudá bretona onde despidieron la nueche baillando y cantando na carpa asturiana. La bandina La Curuxa foi la protagonista d’esta animación tola selmana y despidió la cabera nueche que pasaron los asturianos en Lorient.

Los conciertos de la Selmana Grande de Xixón traen esta nueche al escenariu instaláu na Playa de Pando la música del gaiteru asturianu más internaciona, José Ángel Hevia. Nel conciertu, que va entamar a les once la nueche, Hevia va presentar el so discu últimu “Obsession”, un trabayu que supón el so regresu a les tiendes de discos cuatro años dempués de la so última compilación.

Esti trabayu sal nueve años años depués de “Tierra de Nadie”, el so primer discu en solitariu, y col qu’algamó’l reconocimientu mundial. L’últimu discu del gaiteru José Angel Hevia foi “Etnico ma non troppo”.

Una pieza musical del compositor asturianu Raón Prada ye la encargada en cada Nueche Máxica de facer compaña a los fueos artificiales nel momentu final d’esti espectáculu con tolos músicos y participantes de los países celtes formaos nel Estadiu de Lorient.

La cabera Nueche Máxica, la sesta celebrada’l vienres pela nueche, brilló como denguna de les otres col bon trabayu de les bandes y grupos participantes que ya foron afinando los pequeños errores que pudieren tener na execución del programa nes primeres Nueches, cuando la lluvia fizo inclusu que nun saliera dalguna d’elles al escenariu. La música que fai compaña a los fueos artificiales y que compuso Ramón Prada pal Festival, depués de qu’estrenare equí Keltikhé con unchu ésitu de públicu y crítica, axunta ritmos y referencies de los distintos países celtes con una eficacia que sorprende inclusu al que yá conoz la obra de Prada.

La Reina del Truébano algamó’l segundu puestu nel concursu percusión que se celebró esti sabádu y que se-yos resiste a les bandes asturianes qu’entá siguen a abonda distancia de les formaciones bretones, escoceses ya irlandeses nesta fastera, darréu de la tardía introducción de les bandes de gaites na escena asturiana.

Nesti sen ye enforma meritoriu esti segudu puestu que fala bien a les clares de la evolución que vienen siguiendo nestos caberos años les bandes asturianes na percusión col abandonu de la percusión tradicional y l’empegu de caxes como les de los demás países.

La reina del Truébano, con una competicion mui medida fizo nesti casu honor al so nome y amosó una intervención que dexa’l llistón enforma altu palos años venideros.

Más de mil personas llenaron anueche’l recintu al aire llibre del Xardín de la Isla onde les xixoneses “Pauline en la Playa” y “Nosotrash” ufrieron el so conciertu en comuña “Cascayu” col que finó’l ciclu de “Música con raígañu”.

Con esti ciclu entamen les actividaes de Branu nel Xardín Botánicu Atlánticu que vuelve a celebrar a partir d’esti sábadu los paseos nocturnos guiaos por personaxes de la mitoloxía asturiana, dende les 22 hores a les 1,30 de la madrugada.

L’acordionista bretón Alain Pennec entamó na madrugada d’esti sábadu una jamsession na carpa asturiana que permitió a los presentes baillar delles pieces al compás del maestru qu’hai tiempu que nun pasaba pol Festival tan rexuvenecíu.

El Gran Teatru de Lorient foi l’escenariu de presentación en Lorient hai dellos díes del últimu espectáculu del acordionista bretón Alain Pennec.

Marcos G. Alonso algamó otra vuelta’l segundo puestu del añu pasáu nel Concursu de acurdión diatónicu del Festival de Lorient del FIL quedando penrriba d’ocho intérpretes de Bretaña, Cornualles, Irlanda y Galicia. El concursante asturianu ufrió nuna completa actuación de doce minutos pieces mui estremaes que diben de la tradicional añada añada “Agora non” al vals de la banda sonora del film francés “Amélie”, pasando por dellos sones bretones.

El concursu celebróse esti añu tamién nel Palaciu de Congresos de Lorient con una bona entrada, afitñandose como una de les novedaes más aplaudíes del Festival nestos caberos años.

Güei, vienres 8 d’agostu, a les 22:30 hores, escomienza na esplanada d’A Granxa, en Navia, el IV Festival Navia Rock cola presencia, ente otros grupos, de Helltrip, Nothink y Skunk DF.

El IV Festival Navia Rock ta organizáu por AJUNA, una asociación xuvenil de Navia, y va cuntar, amás de colos grupos de güei, cola presencia de Toundra, Helltrip, Legacy Of Brutality y Edoneh.