Música

Dende’l 31 d’ochobre al 2 de payares, Llanes acoyerá una nueva edición de Llanes al Cubo n aque van participar La Banda de Gaites Llacín, la orques Baobab, Cantaca de Macao y Lam el vienres y Pignoise, Lila Downs, Peret y Kíla nel sábadu. Amás, conciertos, esposiciones, teatru y presentaciones de llibros enllenarán los tres díes d’actividaes.

La Escuela de Música Tradicional de Llangréu, qu’esti añu cumple 10 años, entamó esta selmana les clases con delles especialidaes. Los primeros foron los alumnos de Canción Asturiana con Anabel Santiago qu’allugense nel martes a partir de les 19 hores.

Les clases de flauta de Pepin de Muñalén entamaron de xueves col horariu dende les 16 hores y na clas los alumnos ya disfrutaron del serviciu d’ alquiler de flautes que-y ufierta Marcos Llope a la escuela, pudiendo escoyer una flauta qu’usarán dende l’aniciu.

El vienres toquen les asignatures de Curdión de botones con Xose R. Navia y Ensame folk con Alberto Ablanedo a les 18 y les 20 hores respeutívamente, el sabadu la gaita con Chus Solís ya tien horarios dende les 9 la mañana fasta les 19 hores, siendo necesariu ampliar también na selmana pola demanda, pal martes y xueves dende les 19 hores. Y el sábadu también entamaba tambor de 10 a 14h con Chema Fombona, mecánica y mantenimientu de la gaita dende les 16 hores con Pelayo Fernández, zanfoña dende les 11 hores y bandurria dende les 12 con Héctor Braga.

El Grupu de Baille San Félix de Candás entama un Cursu de baille asturianu p’adultos que va desendolcase na capital de Carreño los xueves de 19:30 a 21 hores (dende’l 16 d’ochobre).

La matrícula pue confirmase’l xueves 16 d’ochobre a les 19:30 hores nel antiguu local de SOFECA (La Baragaña), onde van impartise tamién les clases y el preciu del cursu ye de 15 euros.

La Escuela de Música Tradicional La Quintana abre en Xixón, a lo llargo d’esta selmana, el periodu de matrícula pal cursu 2008/09, calteniendo la so ufierta educativa depués de cumplir diez años de vida.

El periodu 08/09 supon el undécimu cursu de la Escuela de Música Tradicional La Quintana, qu’echó a andar allá pel añu 1998. Asina, vuelve un añu más a ufiertar un Sitiu donde deprender y vivir la música tradicional nel conceyu de Xixón. Pa esti cursu la escuela vuelve a ufiertar 14 asignatures ente les que tán gaita, tambor, percusión, baille, vigulín, bandurria curdión diatónicu, guitarra, asturianada, clarinete, zanfona, xiblata travesera, harpa y formación en conxuntu.

Los mayestros d’estes asignatures son persones conocíes pola so vinculación a la música tradicional y folk, munchos d’ellos pertenecientes a grupos conocíos de la escena musical asturiana, como Felpeyu, Lliberdón, La Bandina o Llangres. Ye’l casu de Diego Pangua, Daniel García, Lisardo Prieto, Horacio Huerta, Toli Morilla, Borja Baragaño, Merce Santos, Pedro Pérez, Rubén Bada, José Ángel Llaneza o David Varela.

Les clases, como nos años anteriores, van impartise na Escuela Pública Rei Pelayo, utilizando les aules de la escuela pa desarrollar l’actividá peles tardes. La matrícula ta abierta tol añu al ser una enseñanza individual y adaptada al nivel de conocimientos de cada alumnu, ensin qu’haya llimitación d’edá p’apuntase, y pue cumplimentase nos sos locales de la Escuela Pública Rey Pelayo na avd. Constitución nº 57 de Xixón, o navegando pela so páxina web.

La sesta edición del festival Pueyes Rock,que se celebra nel prau de la fiesta d’esti pueblu maliayu va tener como novedá la presencia de Circle J, un grupu de ‘punkfolk’ holandés que va actuar en sestu llugar (a les 2,45 de la madrugada). Les actuaciones van abrise col grupu de la comarca d’El Bierzu Aira da Pedra a les 22 hores, y La Bandina la Curuxa, los dos de música tradicional.

Como cabezaleros de cartel un añu más van tar los grupos asturianos Skama La rede y Skontra, que van tocar xunta Desorden y pa pesllar l’eventu A Fesoriazos, cuando nos averemos a les cinco la mañana.

Esti vienres 19 de setiembre na estación central d’autobuses de Llangréu Dixebra y Los Redentores van ufrir a partir de les 22 hores un conciertu de baldre enmarcáu dientro la celebración del segundu aniversariu del MUSI.

Más de venti años falen de la trayectoria profesional de Dixebra, venti años d’historia p’afitar un soníu mui personal y de gran compromisu social. Dixebra presenta un estilu fuerte que contempla un ampliu mestizax musical, rock potente con múltiples influencies: ska, punk, folk, reggae, rap… too ello influenciao pola música tradicional, con testos en llingua asturiana y comprometíos cola realidá d’Asturies. DIXEBRA ye un grupu de directu, nesi contactu col públicu ye onde meyor se desenvuelven. Les sos actuaciones carauterícense pola participación espontánea de toos, buscando la mayor comunicación posible ente músicos y espectadores. Con dellos cambios na so hestoria, anguaño la formación de DIXEBRA ta formada por: Primi Abella (guitarra), Javi Rodríguez (baxu), Jorge Cambareli (batería), Fernando Rubio (gaita), Xune Elipe (voz), Agustín Lara (trompeta), Eladio Díaz (saxo) y Sergio Rodríguez (soníu y samplers).

La folixa musical d’esti vienres 19 van abrila Los Redentores, el soul torna a l’actualidá con esta banda asturiana, asistir a los sos conciertos supón pega-yos un repasu a los más clásicos, los más grandes (Aretha Franklin, Tina Turner, Wilson Picket….). Los Redentores, banda músicos que pertenecieron a grupos llexendarios de la rexón (Stukas, La Banda del Tren, Los Almirantes……), surden como una alternativa de baille y diversión nel panorama musical asturianu. Baxo esti nome axúntense un garapiellu músicos históricos del panorama del rock asturianu incorporando tamién a mozos de gran proyección, qu’aporten la so dosis de vitalidá. Tete Bonilla lidera la banda qu’anguaño formen: Maria Pérez, voz; Alejandro Gallego, batería; Suso Rivera, guitarra; Miguel Uría, baxu; Santi Novoa, pianu y hammond; Sección de vientu, Gimi Álvarez; Joaquin García; Toño Gómez; Tomás Azpiri y David López.

El San Llázaru acueye güei’l Festival Music Ovi, onde van participar, dende les seis de la tarde a les dos de la mañana: Sonido Alfredo, Mc Coyson, The Punishers, Alto Volto, Los Ruidos, Trastornados, Hector Tuya, Pablo Moro, Nacho Vegas & Christina Rosenvinge, Dr. Explosion, Uno, Las Nurses, Verde Cannaia, Amon Ra y Los Ministros, la banda de la TPA.

Pero, amás, na Plaza la Catedral y de magar les 21:30 hores va celebrase una Nueche Afro-llatina, con Afro Natumayini, Pablo Milanés y el grupu cubanu La Habana de noche.

Les fiestes de San Mateo reciben güei a les nueve y media la nueche a los grupos Amaparanoia, Melocos y El Columpio Asesino. Los grupos van acompañanar al mozu raperu catalán Porta, abondo polémicu poles lletres de los sos cantares.

El dúu Solenzara fórmenlu Felipe Franco Álvarez (Fran) y Guillermo Llana y van tocar a les ocho la tarde dientro del espaciu de l’Arribada, en Xixón.

Fran escomenzó a estudiar col baxista y director de música José Félix Castilla, nos años 60. Entamó la so andadura formando parte de la Rondalla de L’Entregu, tocando llaúd, bandurria y mandolina, ganando campeonatos d’España dellos años. Nos 70 ye baxista de les orquestes Silver Star ya Impacto. Treslládase a Madrid ondo forma parte del grupu Azahar. De vuelta n’Asturies tocará con Asturcón, Fervinchu de cáñamo, Acelga y Nuberu, y acompañará a solistes como Elena Sánchez y Manolo Quirós, ente otros. Tará en formaciones como Bloque, grupu representativu del rock sinfónicu. Tres tocar col grupu de jazz Trajes de 20$ acompaña, como baxista, a músicos de renome como Berto Turulla, Oliver Díaz, Antonio de la Fuente, Isaac Turienzo, José Ramón Feito y Jorge San Julián. Nos años 90 ye miembru fundador de la prestixosa orquesta Assia, na que permanez como baxista 11 años.

Guillermo Llana combinó’l so aprendizaxe cola asistencia a clases y talleres de guitarra nel Taller de Músicos de Xixón. Formó parte de bandes como Insania, Nasciturus o Fabba. A partir de 2000 dedícase per entero a la música, compaxinando trabayu n’orquestes profesionales con otros proyectos, materializaos en grupos como Zipi Zape top, Falkatrúa, Electric alligators, ente otros. Introducióse tamién nel tarrén de la producción musical per computador, dende’l puntu de vista de la creación como de la producción.

La Plaza la Catedral acueye güei martes una nueche flamenca a partir de les 21:30 hores. Falete, Capullo de Jerez y El Cabreo van protagonizar una nueche na que los sones del folk andaluz van ser los protagonistes.