Música

Alfredo González tenía grabaos hasta agora dos discos en castellán, pero con “La nada y tu” da’l pasu musical a la so llingua natal, l’asturianu. Un pasu que da de la mano de la discográfica Ámbitu/L’Aguañaz, qu’asoleya “La nada y tu”. Un discu ente’l pop y la música de cantautor nel que cunta con testos propios y poemes d’Antón García, Pablo Texón y Xandru Fernández, ente otros.

Alfredo González ye pianista de títulu, guitarrista y compositor. En 2003 autoeditóse “La vida de alquiles” y esti mesmu añu sacó al mercáu “Dudas y precipicios”, pero amás tien collabarao en comopiendo los temes p’artistes como Tina Gutiérrez, pa la que compunxo 13 de les quince canciones que conformen el so discu “Mujeres” (Yumuri Records, 2006).

Esti sábadu 27 d’avientu la Xunta Moza, en collaboración col CSOA (Centru Social Okupáu Autoxestionáu) La ReFLEXón, va organizar un conciertu dientro de les actividaes qu’esti Centru Social ta faciendo dende qu’abriera. Esti conciertu ye una de les actividaes entamaes pola estaya de mocedá de la Xunta pola Defensa de la Llingua Asturiana col calter reivindicativu que caracteriza a l’asociación.

Los grupos que van actuar son FalaNonCaduca, qu’amiesten rock, folk y ska no qu’ellos llamen “mecigayu son”; y Sambre, que faen rock’n roll 100% fechu n’Asturies. El conciertu va empezar a les 20:00 la nueche. El Centru Social LA ReFLEXón ta na Avenida Príncipe d’Asturies, 19, en Xixón.

El próximu vienres 26 d’avientu a les 20 hores nel Teatru Prendes va llevase alantre la presentación y la proyeición del documental “Grupu de Baille San Félix. 25 años a la gueta la tradición” del direutor carreñín Pablo A. Quiroga Prendes.

La conceyalía de Cultura del AYunamientu xixonés ta preparando una gala que baxo’l títulu de “Xixón fala asturianu” ufrirá una amuesa’l prósimu 11 de Xineru de la música y el monologuismu modernu que se fai nel conceyu anguaño. Xunta monologuistes como Cellero, intervendrán grupos como Felpeyu o la Bandina’l Tombu y cantautores como Toli Morilla.

La compañía discográfica L’Aguañaz, integrada anguaño en Publicaciones Ámbitu, presenta un volume nuevu del Anuariu de la Música Asturiana, correspondiente a esti añu 2008. Esta publicación, de la que yá van editaos nueve númberos, nació cola finalidá de dotar a la escena musical asturiana d’un mediu de comunicación y difusión propiu y contribuir, con ello, a crear infraestructures que fixeren posible dir afitándolu.

L’AMA ta dedicáu a la música identitaria que se fai n’Asturies, entendiendo por tala aquella que ye tradicional o que se basa nella pa eellaborala, amás de toles que tienen al asturianu como llingua d’espresión (sían del estilu que sían).

Los conteníos d’esti exemplar son mui variaos, en correspondencia cola diversidá existente nel panorama musical asturianu. Apaecen entrevistes col cantautor turonés Alfredo González (autor del discu La nada y tu, un trabayu de rock emocional excelente con testos de dalgunos de los meyores escritores asturianos); La Bandina (qu’esti añu publicaba discu nuevu, tituláu 13); Lucas 15 (la banda formada por Xel Pereda y Nacho Vegas, qu’interpreten canciones tradicionales asturianes dende una óptica rockera); Felpeyu (con motivu de la so vuelta a l’actualidá musical col discu Canteros); y Skontra (banda xixonesa de punk-rock que poníen en circulación el so segundu álbum, Cantares pa dempués d’una guerra).

Ye interesante reseñar l’informe Management musical n’Asturies, del codirector d’El Cohete Internacional Carlos Barral; reportaxes como’l dedicáu al festival Liet-Lavlut celebráu en Laponia (onde participó’l grupu Dixebra), escritu pola periodista Beatriz R. Viado; artículos sobre la despidida de Nuberu o’l venticinco cabudañu de la muerte de Berto Turulla y El Presi. Destaquen tamién los reportaxes fotográficos, que cada añu tienen más importancia, sobre acontecimientos como’l Premiu al Meyor Cantar en Llingua Asturiana, el XX Conciertu pola Oficialidá o l’homenaxe a Dixebra nel Derrame Rock. Amás de too ello, como ye vezu, apaez un repasu a toles producciones discográfiques, bibliográfiques y audiovisuales que tienen a la música asturiana como protagonista.

Con un númberu de páxines que llega a les 112, un aumentu considerable de la proporción d’espaciu en color y una tirada de 4.000 exemplares, la publicación compleméntase con un discu qu’inclúi dos temes de caúna de les producciones discográfiques de L’Aguañaz d’esti añu (DRD, La Bandina, Hermanos Valle Roso, Banda de Gaites Llacín y Alfredo González).

Esti llunes día 15, a les 20 hores, entama la IX edición del Festival de Música Antigua «Eloy Zapico» que, organizáu pola Asociación «Aula de Música Antigua», va desendolcase a lo llargo la selmana nel Auditoriu del Conservatoriu del Nalón.

El primeru de los tres conciertos programaos va ufrilu la mezzosoprano Marta Infante y l’arpista Manuel Vilas que presenten un conciertu entituláu «Cantos d’amor divinos y humanos», compuestu por tonos humanos y divinos de finales del XVII y principios del XVIII.

El programa del Festival d’esti añu completase’l miércoles 17 con Qvinta Essençia y y el xueves 18 cola actuación de More Hispano.

El grupu asturianu Bacotexo, que vieno acabante espublizar el discu “A máquina del tempo”, una novedá nel panorama musical asturianu, al ser el primer discu de música rock na fala del Eo-Navia, va ser el protagonista de la emisión del programa “Nós” de la TPA esti sábadu 13 a partir de les 12 la mañana.

El grupu ta formáu por Marcos Nogueiro, Daniel García y Ricardo Saavedra (estos dos últimos, ex-Babilon Chat), los dos primeros son de Tapia y l’últimu de Bual, que coles sos lletres tán convecíos de que’l gallego-asturianu pue ser un “vehículo normal de comunicación llingüística, pode usarse pral llinguaxe del rock con total naturalidá y axudar a atopar resonancias, evocacióis y connotacióis inéditas”.

El programa recueye un momentu de la grabación del discu, nel vranu pasáu, y amuesa l’interés “d’atopar novas sonoridades al xénero del rock col uso esclusivo da fala eonaviega”.

La sesta entrega d’esta temporada, qu’entamó’l primer sábadu de Payares n’Ibias, componse de 30 capítulos de 10 minutos de duración caún realizaos íntegramente n’asturiano. L’espaciu vien superando’l 10 por cientu d’audiencia en dellos programes d’esti añu y algamó na primer temporada una cuota media del 8,2%, que superaba en cásique un puntu al promediu actual de la cadena, un 7,4%, según datos facilitaos por Taylor Nelson Sofres (TNS).

Nos emítese tamién pol satélite Hispasat pal restu d’España, Europa y América y por Internet para tol mundiu al traviés de la web de la RTPA.

El gaiteru de Sotrondio, Norino, presentó’l so discu, inxertáu na coleición “Fontes Sonores de la Música Tradicional Asturiana” na Casa Conceyu de Xixón nun actu presidíu por Jesús Montes Estrada “Churruca”, Conceyal de Cultura Tradicional y Llingua Asturiana y responsable del Pueblu d’Asturies y onde tamién tuvieron Fernando Ornosa Fernández, Responsable del Archivu de la Música Tradicional del Muséu del Pueblu d’Asturies y María Enriqueta García, fía del gaiteru y gaitera.

El gaiteru, de 91 años, cuntó a los asistentes al actu dellos fechos asocedíos demientres la so reclusión nun campu de trabayu tres la ocupación d’Asturies nel 37.

“Norino´l gaiteru” ye’l títulu del nuevu trabayu presentáu ayeri na Casa Conceyu, con él llégase númberu 11 de la colección.

Blas Honorino García Fernández “Norino” ye un gaiteru ñacíu nel añu 1917 n’El Carbu, na parte alta de Sotrondio (Samartín del Rei Aurelio) que con 91 años yá cumplíos, acaba de grabar nun discu’l so repertoriu de gaita y tovía en 2008 sigue tocándola.

Norino, ye ún de los gaiteros más importantes d’Asturies dende los años 40 del sieglu XX y gaiteru de tradición. Yá’l so padre tocaba y construyía gaites. Según los responsables de la colección “pue dicise que ye unu de los gaiteros más importantes d’Asturies de la segunda metá del sieglu XX y amás con un repertoriu de pieces mui interesante”.

Nel discu ta tamién la so fía María Enriqueta García, que sigue cola tradición familiar como gaitera, siendo nel so día una de les primeres muyeres en tocar la gaita n’Asturies, a finales de los años sesenta. Anguaño ye la gaitera más veterana del país y tien como tamboriteru al so maríu, Eliseo Canga, discípulu del célebre Machacón. Hai tamién dos temes de la Bandina Valle del Nalón.

Pa finar l’actu Norino amosó la so bona calidá como gaiteru como se pue ver nesti vidiu qu’ufre Asturnews a los sos llectores:

Per primera vegada dende la so creación, el concursu de Gaita que sirve pa escoyer los representantes asturianos nel Festival de Lorient, el Memorial Remis Ovalle, nun va celebrase de forma independiente. Inxertaráse nel concursu de folklor Ciudá d’Uviéu que se desenvuelve los domingos nel Campoamor y qu’entama a tresmitir en direutu la TPA.

La fecha llímite pa incribise nel Memorial Remis Ovalle d’esti añu ye’l 14 d’Avietu de 2008 y seguirá siendo’l concursu pa poer acceder a les cuatro places del troféu McCrimmon de Lorient.

El Certame Ciudá d’Uviéu presenta esti añu tamién delles novedaes, entamando porque va escomencipiar a ser emitíu’l próximu domingu pola TPA. El programa tará en antena poles tardes, xusto ebantes de la emisión del informativu. Amás el Concursu va cuntar con una nueva presentadora, Esther Fonseca, pa face-y compaña nel escenariu al director del Certame, Carlos Jeannot.