Música

La Oficina Municipal de la Llingua del Conceyu de Xixón presentó estos díes una inciativa de normalización llingüística venceyada a la música fecha n’Asturies: Un karaoke en llingua asturiana. Los Alcuentros de Mocedá «Saca la Llingua» cuntaron con un karaoke con dellos de los cantares más conocíos de la música fecha n’asturianu nos últimos años.

Los temes esbillaos pa l’activdá son “Tengo de rondar to valle” y “So vaqueiru”, pieces tradicionales popularizaes pol dúu Nuberu; “Chacho” y “Nun yes tu” del grupu de Tolivia (Llaviana) Los Berrones; la versión de “Chalaneru” fecha a comuña ente los hermanos Tejedor y el cantante Chus Pedro; “Rapaza nacionaliega” y “Canciu d’amor” de Dixebra; “Mexé na caleya”, “La capitana”, ún de los cantares más populares del músicu xixonés Carlos Rubiera; “Sonia” y “Los suaños, suaños son” de la formación de ska-punk de Candás Skama la Rede; y el tema de l’agrupación infantil Xentiquina “Bocadillu rock”.

Les pieces volvieron a grabase, esta vegada ensin voz, col bon facer de los músicos Sergio Rodríguez (guitarres y baxu –Dixebra-), Israel Sánchez (batería –El Sueño de Morfeo-), Rubén Bada (guitarres –DRD, Dixebra-), Diego Pangua (flauta y gaita –Felpeyu-), Rubén Álvarez (guitarres –Herbamora-), Ramón Morán (teclaos –Herbamora-) y Miguel Herrero (trompeta –Los Redentores, Los Tashtornados-).

Pocos díes dempués de la celebración del XXI Conciertu pola Oficialidá, los organizadores faen balance del resultáu d’asistencia al mesmu, que pese a “que la lluvia nun dio tregua” tuvo “riaes de xente enllenando la carpa”, conviertiendo la convocatoria nun ”ésitu de convocatoria y una amuesa mui bona de la calidá y vitalidá de la música n’asturianu”.

El conciertu foi, según los voceros de la Xunta pola Defensa de la Llingua Asturiana “un bon escaparate pa les campañes y materiales de la Xunta, y fundamentalmente pa la convocatoria de la manifestación pola oficialidá del Día de les Lletres Asturianes”.

Los Xunta contabiliza en ”más de dos mil persones” los asistentes al conciertu nel que se pudo esfrutar de los sones tradiconales de los veteranos del tríu Tuenda y de los Gatos del Fornu.

La Xunta pola Defensa de la Llingua Asturiana quixo agradecer “el compromisu y la solidaridá demostraos por tolos grupos y artistes. El so apoyu ha valir pa poder siguir lluchando por algamar l’oxetivu de la oficialidá”.

Los organizadores de la muestra cultural Tolo d’Asturies anunciaron estos díes el programa d’actos de la tercer edición d’esti festival qu’amiesta la música col llibru y los productos del país y qu’esti añu va celebrase ente’l 14 y 17 de mayu en Llangréu.

El xueves 14 mayu van entamar los actos cola presentación oficial de la III Muestra Cultural Tolo d’Asturies a les siete la tarde y con un conciertu nel que van participar Ignacio Alfayate, Filippo Gambeta, Xuan Nel Expósito y los Alumnos de la Escuela Acurdión de la Escuela de Música Tradicional Reija de Llangréu. Va inaugurase amás al Esposición Acurdión Tradicional y los cursos de curdión diatónicu de la Escuela de Música Tradicional Reija de Llangréu. Estes actividaes van celebrase nel Centru la Cultura y la Llingua Asturiana Casa los Alberti, asitiada en Ciañu

La segunda xornada va cuntar cola participación de Los Ciquitrinos y Los gatos del Fornu, amás del grupu italianu I Liguriani, nun conciertu-espectáculu que va facese a partir de les diez de la nueche.

El sábadu 16 a les doce la mañana va abrise l’amuesa oficialmente cola Banda de Gaites Conceyu Llangréu, y a la una, el conciertu de los Hermanos Valle Roso. Pesllando la xornada un conciertu con Xideces, David Munnelly Band y Herbamora, amás de la participación de más de 100 músicos nel escenariu, con un espectáculu qu’inclúi un pasucais previu dende El Parque Vieyu La Felguera hasta la Estación Central d’Autobuses de Llangréu.

La última xornada, la del domingu, va entamar a les 12:30 hores con un Conciertu de la Banda Música de Llangréu. Una hora más tarde va celebrase un rectial de tonada y a les seis, un conciertu d’Héctor Braga.

A les siete la tarde, celébrase “Carta blanca a Tomás Zapico”, un espectáculu onde va presentar el so discu y reinterpretar escoyeta de temes del repertoriu d’esti músicu de La Güeria Urbiés a cargu d’acurdionistes modernos del altor de Marga Lorences, Nel Ordóñez, David Varela, Jose Manuel Tejedor y Marcos Alonso, xunto con un homenaxe a la tradición del curdión, cola dirección de Xuan Nel Expósito y la collaboración y presentación de Xosé Antón Fernández “Ambás”.

A lo llargo de tola fin de selmana va celebrase, amás, un mercáu tradicional d’artesanía y gastronomía, una feria del discu y el llibru n’asturianu y cursinos de folixa y baille de baldre con bandines tradicionales y grupos de baille y música tradicional, ensin escaecer los talleres d’animación, xuegos, deportes tradicionales, artesanía…

La escocesa Alie Robertson va ufrir un conciertu d’arpa céltica nos centros culturales Caxastur d’Uviéu y Xixón, dientro del ciclu Caxastur ‘Música del Sieglu XX’.

Caxastur va llevar a Uviéu mañana’l conciertu d’arpa céltica interpretáu por Alie Robertson, con una actuación nel Centru Cultural de la entidá financiera, allugáu na cai San Francisco, cola entrada al llau de la puerta principal del Teatru Filarmónica.

El segundu conciertu de l’artista va tener llugar el xueves 30 d’abril nel Centru Cultural Caxastur de la Colexata San Xuan Bautista de Xixón. Dambes actuaciones van entamar a les ocho de la tarde, con entrada de baldre hasta completar l’aforu.

Alie Robertson ye una moza arpista escocesa, gran virtuosa de la interpetación, composición y improvisación. A lo lllargo de la so trayectoria recibió abondos galardones poles sos actuaciones col arpa tradicional escocesa, conocíu como ‘clarsarch’.

La cantante xerezana Mala Rodriguez va cantar esta nueche, a partir de les diez, na Sala Acapulco de Xixón. Nel conciertu va cantar los temes del so últimu discu publicáu, Malamarismo, qu’inclúi collaboraciones de Julieta Venegas, Tego Calderón y Raimundo Amador.

La Xunta pola Defensa de Llingua Asturiana celebra mañana’l XXI Conciertu pola Oficialidá, que va celebrase nes instalaciones de la Universidá d’Uviéu, dientro del Campus d’Humanidaes, onde va instalase una carpa con dos escenarios pelos que van pasar Tuenda, Los Gatos del Fornu, Felpeyu y La Bandina, amás de los grupos rock Skama la Rede, Dixebra y Skontra. La cita va tener llugar a partir de les siete la tarde.

El conciertu, con una duración de siete y hores tien un preciu d’8 euros anticipada y 10 na puerta, pudiendo mercase güei y mañana n’Uviéu: La Casa Posafuelles. Xixón: El Trisquel, El Barucu y Llibrería Alborá. Avilés: El Cafetón. Candás: La Gueta. Tinéu: Mesón Cervantes. Cangas: Bar Azul. La Puela Allande: Café Centro. Mieres: L’Abellugu. La Pola L.lena: La Xarrina. La Felguera: El Llar de Keko. L’Entregu: Tom Mallory. Llaviana: El Riscar. La Pola Siero: Abre César. Nava: La Posta y L.luarca: Panadería Andrín, Estancu Cachona.

El grupu de música folk La Bandina, xunto cola cantante de tonada Anabel Santiago y l’estudiosu de la música tradicional y cantante Xosé Ambás, planteguen facer una exposición sola música tradicional asturiana, desplicando de manera didáctica tanto la bayura d’instrumentos como los diferentes repertorios y temátiques, amás de facer un percorríu xeográficu per Asturies. Va ser nel Teatru Xovellanos, el domingu a les 12 la mañana y el llunes a les 10.30 pa grupos escolares.

El preciu de la entrada ye de 4 euros, mientres que pa los neños que vaigan con padres (2 padres y dos neños), el preciu va ser de 12 en total.

El grupu Llangres va presentar el so trabayu discográficu últimu, “Entá”, güei vienres, a partir de les ocho y media la tarde, nel Teatru Filarmónica d’Uviéu. La voz d’Esther Fonseca va poder sentise xunto cola musica nun recital que promete enllenar el célebre teatru uviedín.

Llangres entamó la so trayectoria en 1998 nun aula del Conservatoriu de Sama y dende entós espublizó trés álbumes: “Stura”, “Esnalar” y el que va presentase esta nueche “Entá”.

“Ye lo que nos pasa” ye’l nuevu cd de la Xunta pola Defensa de la Llingua Asturiana y va presentase nel Conciertu pola Oficialidá del próximu sábadu 25 d’abril. Nel mesmu va apaecer, coo vien siendo vezu, el cantar fechu pol colectivu Músicos pola Oficialidá pa les movilizaciones d’esti añu 2009, amás d’otros temes interpretaos por quince grupos asturianos.

Los Berrones, La Tarrancha, Skama la Rede, Sambre, Skontra, Gomeru, Misiva, Desakato, Fe de Ratas, Adizión Etílika, Mala Reputación, Fala Non Caduca, Bacotexo, Dixebra y Escuela de Odio complenten un discu que según los responsables de la Xunta ye “otra prueba más, sólida y tanxible del compromisu de los músicos col movimientu de reivindicación llingüística n’Asturies”.

El músicu asturianu Ernesto Paredano, qu’asoleyaba en 2008, el discu n’asturianu “Alebrix”, con poemes d’Esther García musicaos, trunfa cola so música en México, onde reside dende va meses.

El gaiteru y pianista ta acabante estrenar la película “Oveja Negra”, a la que l’asturianu punxo la banda sonora. La mesma vien recibiendo dellos premios en festivales del país, ente los que destaca’l de la crítica internacional.

http://www.ovejanegralapelicula.com/