Música

Chus Pedro Suárez y Manolo Peñayos retirábense l’añu pasáu de la so carrera musical nel grupu Nuberu. Col nome del dúu entamen agora una fundación presidida por Pablo Xuan Manzano y colos oxetivos fundamentales de da-y puxu a la cultura y la llingua asturiana al traviés de la música.

La fundación va espublizar llibros rellacionaos cola llucha obrera y social y l’asturianu. Amás, van organizar festival musical intercultural y van apoyar el llabor de la discográfica “La mula torda”.

Entovía nun se sabe ónde va asitiase’l llar de la Fundación, pero ye posible que seya un edificiu averáu al Muséu de la Minería, a la vera de L’Entregu, d’onde son orixinarios Chus Pedro y Manolo.

.

Güei miércoles 10 de xunu, a partir de les ocho la tarde, el Centru Cultura Vieyu Institutu Xovellanos de Xixón, va ser el llugar escoyíu pa la presentación del que ye’l primer discu en solitario de la cantante l.leniza Mapi Quintana, “El sonar de les semeyes”. Un álbum con pieces a mediu camín ente’l jazz y la tradición asturiana.

Quintana amiesta a la xota, l’añada, la vaqueirada o la tonada, instrumentos tocaos del xeitu del jazz, como’l pianu, el saxofón, o los de tradición, la pandereta, gaita o xiblata. El discu grabóse con músicos asturianos y foriatos ente Ámsterdam y Piedrasblancas.

Mapi Quintana, cantate y percusionista, entamó la so carrera en bandes llocales de La Pola L.lena, como Tela y tien collaborao con grupos como Dixebra. Formóse musicalmente n’Asturies y nos Países Baxos, onde tuvo dellos años tocando con bandes d’aquel país.

Güei, martes 9 de xunu, a partir de les siete la tarde, el puestu que’l periódicu La Nueva España tien na Feria de Muestres de la Industria y la Minería de Mieres, va acoeyer la presentación del discu tituláu “La nada y tu”, del cantautor de Turón Alfredo González.

L’actu va cuntar tamién cola presencia d’Ismael González Arias, director de la Casa de la Cultura Teodoro Cuesta del Conceyu de Mieres, que va falar sobre esti trabayu discográficu. Depués, el cantautor turonés va interpretar delles de les canciones contenies nel discu.

El grupu cántabru de Reinosa llega al Estadiu Suárez Puerta d’Avilés esti sábadu 6 de xunu y a partir de les diez y media la nueche. Nel conciertu van presentar el so nuevu trabayu, “Asuntos pendientes”.

Esti xueves 4 de xunu a les siete la tarde’l Teatru Municipal de Samartín del Rei Aurelio en L’Entregu acueye l’actu d’entrega de la Medalla d’Oru del conceyu a Chus Pedro y Manolo Peñayos, “Nuberu”. La medalla concedio-yosla l’Ayuntamientu nuna xunta plenaria’ 25 de setiembre pasáu por mor de la so “trayectoria artística y musical y la so contribución a la cultura asturiana”.

Esti día va inaugurase tamién la esposición “Yá llovió.Nuberu Treinta Años” entamada por La Mula Torda y patrocinada pol conceyu de Samartín del Rei Aurelio, CajAstur y la Conseyería de Cultura. La esposición allúgase na sala d’esposiciones del teatru municipal, dende’l 4 de xunu al 20 de xunetu.

El musical “Hoy no me puedo levantar”, que tresllada al públicu a la movida de los ochenta en Madrir al son de los cantares del grupu Mecano, va llegar a Xixón el próximu 9 de xunetu pa quedase n’Asturies hasta’l domingu 19 del mesmu mes, con precios ente los 35 y los 60 euros.

Nel musical, creáu pol ex componente del grupu Mecano, Nacho Cano, apaecen temes como “En tu fiesta me colé”, “Maquillaje”, “Entre el cielo y la tierra” o “Perdido en mi habitación”, ente otres munches.

Los horarios y precios d’esti musical que yá vieron cuasi un millón y mediu de persones, pueden consultase na páxina web del Teatru Xovellanos, qu’organiza esta producción.

Páxina del musical “Hoy no me puedo levantar”

Esti sábadu 30 de Mayu nel Xardín Botánicu de Xixón prepsentaráse’l nuevu discu coles diez adautaciones de temes de Bob Dylan que Toli Morilla fixo n’asturianu pal so próximu discu, dedicáu dafechu al cantautor norteamericanu.

Ente les adautaciones, cantares emblemáticos y conocíos como ‘Hurricane’, dedicáu al boxeador Huracán Carter, condenáu a cadena perpetua por unos asesinatos de los que, depués d’una rocambolesca y difícil campaña a so favor, demostró ser inocente; otru como ‘It ain’t me babe’, cantada tamién con ésitu pol desapaecíu Johny Cash, grabada nel álbum intimista “Another side of Bob Dylan” (1964).

Ente la seleición de Morilla figuren títulos como ‘Don’t think twice, it’s all right’ grabáu en “The freewheelin'” (1963) álbum col que Dylan abrió les puertes del gran públicu y algamó’l reconocimientu internacional. Vamos poder oyer tamién ‘One more cup of coffee’ y ‘Sara’, éstes dos xunto con ‘Huracán’ taben incluyíes nun de los álbumes que mayor reconocimientu algamara n’España: ‘Desire’ (1976).

‘The man in me’, del LP “New morning” (1970) cantar que foi’l tema central de la película ‘El gran Lebowski’, protagonizada por Jeff Bridges y dirixía polos hermanos Joel y Ethan Coen.

Dos clásicos del repertoriu dylanianu, ‘She belongs to me’ y ‘Maggie’s farm’ pertenecientes al eléctricu “Bringin’ it all back home” (1965), son otros de los cantares adautaos pa esti próximu trabayu de Toli Morilla.

Nun podía faltar ‘Knockin’ on heaven’s door’, una de les sos canciones más conocíes, compuesta pa la banda sonora de la película “Pat Garrett & Billy the Kid” y incluyía nel discu homónimu espublizáu en 1973.

Otru cantar, nun tan conocíu pol gran públicu ‘Queen Jane Approximately’ grabáu nun de los seis primeros míticos álbumes de Dylan, ‘Highway 61 Revisited’ (1965), cierra la llista de versiones preparaes por Morilla pa un proyeutu editorial, tan interesante como arriesgáu.

Va ser ésta la primer vegada na historia que se puedan sentir “Diez cantares de Bob Dylan n’asturianu” que ye’l títulu del álbum. Tien prevista la salida al mercáu pal mes de Xunu d’esti añu 2009.

P’abrir boca puede sentise na rede una “demo” de “Nun lo pienses más” la versión n’asturianu de “Don’t think twice, it’s all right” en www.myspace.com/tolimorilla o na seición www.myspace.com/dylancover de la mayor Web sobre versiones de Dylan, www.dylancover.com.

“Nun lo pienses más”, versión n’asturianu de “Don’t think twice, it’s all right”

El Teatru de La Llaboral acueye esti domingu, 31 de mayu, un conciertu de la Orquesta Sinfónica “Ciudad de Gijón”, que va facer un homenaxe musical a Asturies a partir de les ocho y media la tarde y embaxo’l preciu de 12 euros.

La primer parte va conformase pola obra Vaqueiros, de Juan Carlos Casimiro, cuntando cola sopranu Teresa Castal y el tenor José Alberto García.

La parte segunda, titulada “Asturianía en Fa”, ta compuesta por Juan Antonio Merino y la tercer parte, “Tres canciones asturianas” ta iguada por Daniel Sánchez Velasco, amosando los cantares “Sal a Bailar”, “Ayer vite en la fonte” y “Dime Paxarín Parleru” .

L’actividá organízala’l Teatru Xovellanos de Xixón, que tien la so sede habitual n’obres, en collaboración cola Sociedá Filarmónica de Xixón.

Esti vienres celebróse un nuevu Microconciertu del Aula tradicional Jorge Areces y Javier Tejedor de la Escuela de Música de Mieres del Camín nel que los escolinos de gaita, curdión y percusión de la Escuela interpretaron un repertoriu tradicional nel que s’incluyía esta pieza bretona, “Arin Arin”.

El Microconciertu ye una actividá que vien desendolcando esti añu la Escuela de Mieres y que va empobináu a los escolinos y pás de los estremaos cursos d’instrumentos de la escuela. El dedicau a la música tradicional yera’l númberu dolce ya incluyía la desplicación a los más pequeños de los instrumentos tradicionales por parte de Jorge Areces y Javier Tejedor.

Nel conciertu interpretóse tamién la Jota las Tabiernas, la Muñeira de Batribán, l’Añada pa Gael de Tejedor, el Son d’Arriba (polos escolinos de curdión Sergio y Pablo Zapico) y l’Asturias Patria Querida (col escolín Adrián Martínez a la gaita). Xunta estes pieces, el grupu del Aula tradicional interpretó “Cuquina”, “Jiga” y la pieza bretona “Arin Arin”.

Güei, vienres 29, dende les 4 la tarde, va facese un taller de baille tradicional asturianu impartíu por Paula Cristóbal Casu, venceyada al folclor dende bien neña, y miembru de dellos grupos de baille tradicional asturianos y del grupu de pandereteres Herbamora.

El taller va arrancar colos bailles más cenciellos como son les dances hasta llegar, adulces, a bailles a lo suelto. Trátase d’un taller d’una única sesión y pue participar d’él cualquier persona esmolecida pol baille ensin nengún tipu de conocencia previa.

El Conceyu Abiertu ta asitiáu n’Uviéu, na cai La Gascona 12.