Música

Yá hai fecha pa la presentación del discu nuevu de Dixebra, el domingu que bien, 1 de payares pela nueche, nos actos de Llanes al cubo. Nel evento, el grupu va interpretar dellos de los temes del so repertoriu habitual y muchos de los cantares inxertaos nel nuevu trabayu discográficu. Pola mor de lo especial d’esti conciertu, el grupu va cuentar cola collaboración de dellos músicos convidaos como Lisardo Prieto al vigulín (Felpeyu), Toño Gómez al trombón (La Bandina) y DJ Pin colos platos (Campeón estatal d’Scratch).

Esa mesma nueche quién tea interesáu podrá mercar en primicia una copia d’”Amor incendiariu” asina como les nueves camisetes del grupu. D’otra miente, la data va ser tamién una perbona oportunidá pa escuchar al gran tocador de cora Toumani Diabaté.

El vienres 23 d’ochobre a les 20:15 hores el Nuevu Teatru La Felguera va acoyer la presentación del quintu discu de Toli Morilla, “Diez cantares de Bob Dylan n’asturianu”, un discu con versiones autorizaes personalmente por Bob Dylan. Toli Morilla ye pa la música asturiana d’anguaño la figura del cantautor na so más amplia espresión, l’estilu d’esti autor ye un cruce ente la música acústica de raigañu americanu, la canción d’autor, el folk y el llau intimista del rock.

Toli Morilla espublizó’l so primer discu en solitariu “Nunca des la espalda” en 1998, entamando’l so camín como ún de los meyores compositores asturianos. En 2003 edita’l so segundu discu en solitariu, “Entre el barro y las preguntas”. En 2004 publica “Nueche d’insomniu”, un discu que recibie les meyores crítiques y qu’usa testos de grandes poetes en llingua asturiana.

Col cantar “Azul y gris”, incluyíu nel álbum “Entropía” (2007), gana’l premiu al Meyor Cantar en Llingua Asturiana d’esi mesmu añu y ye nomináu pa los Premios de l’Academia de les Artes y Ciencies de la Música. El so nuevu discu Diez cantares de Bob Dylan n’asturianu fai honor al so títulu con diez magnífques versiones n’asturianu autorizaes personalmente por Bob Dylan. Contién canciones mítiques como Hurricane, Knockin’ On Heaven’s Door o Don’t Think Twice It’s All Right y ayalgues escondíes como The Man In Me o Sara, arropaes por una gran variedá de músicos y instrumentos.

Nel conciertu van participar Toli Morilla (voz, guitarres acústiques y armónica), Jorge Otero (guitarres, mandolines y coros), Pablo Bertrand (pianos, órganu y coros), Ángel Miguel (baxu y contrabaxu) y Alejandro Blanco (batería, caxón y percusiones).

El Conceyu d’Uviéu vieno acabante convocar otra vuelta’l premiu nacional de folclor Eduardo Martínez Torner, que se convoca dende 2005 en conmemoración del investigador nacíu n’Uviéu en 1888. El premiu distingue cada añu a “persones físiques, asociaciones o fundaciones que destacaren nel mundu de la música folclórica, danza tradicional, etnomusicoloxía, cultura tradicional y investigación del folclor, dientro del ámbitu nacional”.

Les candidatures tienen que presentales asociaciones de carácter folclóricu que tengan la sé social nel conceyu d’Uviéu, o miembros del xuráu o profesores de la Escuela de Musica Tradicional d’Uviéu. El plazu fina’l 6 de payares.

Llanes al cubo, “la folixa del tardíu”, regresa a la so cita de seronda con una prestosa propuesta festiva y cultural. La industria cultural asturiana sigue siendo la so base principal, pero, como cada añu, continua incorporando nuevos matices y señes d’identidá. Dientro del intensu programa d’actividaes, destaca na presente edición l’homenaxe al gaiteru llocal Ignacio Noriega, cola participación del gaiteru asturianu más internacional, Hevia.

L’actu va celebrase na xornada del vienres, 30 d’ochobre. El momentu culminante d’esti actu llegará cola interpretación del Pericote de Llanes a cargu de Hevia, amigu y discípulu de Noriega, que fadrá danciar de forma masiva a decenes de triaes (2 muyeres y 1 home).

Amás d’Hevia, nel programa del Festival tán confirmaos Despistaos, Macaco, Dixebra y Oysterband en más d’una decena de conciertos de los más estilos más estremaos, de lo llocal a lo universal ensin escaecer el folk como esencia de Llanes al cubo.

Llanes al cubo 2009 inclúi a Hevia, Dixebra y Macaco nel so programa

Llanes al cubo, “la folixa del tardíu”, regresa a la so cita de seronda con una prestosa propuesta festiva y cultural. La industria cultural asturiana sigue siendo la so base principal, pero, como cada añu, continua incorporando nuevos matices y señes d’identidá. Dientro del intensu programa d’actividaes, destaca na presente edición l’homenaxe al gaiteru llocal Ignacio Noriega, cola participación del gaiteru asturianu más internacional, Hevia.

L’actu va celebrase na xornada del vienres, 30 d’ochobre. El momentu culminante d’esti actu llegará cola interpretación del Pericote de Llanes a cargu de Hevia, amigu y discípulu de Noriega, que fadrá danciar de forma masiva a decenes de triaes (2 muyeres y 1 home).

Amás d’Hevia, nel programa del Festival tán confirmaos Despistaos, Macaco, Dixebra y Oysterband en más d’una decena de conciertos de los más estilos más estremaos, de lo llocal a lo universal ensin escaecer el folk como esencia de Llanes al cubo.

El Festival Llanes al Cubo, que va celebrase esti añu del 30 d’ochobre al 1 de payares en na villa oriental asturiana tien como actu cimeru nel so programa un homenaxea al gaiteru Ignacio Noriega con un conciertu conxuntu d’Hevia y la Banda de Gaites Llacín, onde van danzar amás vecinos de de pueblos del conceyu y representantes de los tres bandos de la Villa.

Dientru del completu programa d’actividaes del Llanes al Cubu d’esti añu, destaca esti homenaxe al gaiteru local Ignacio Noriega, que va desendolcase na xornada del vienres, 30 d’ochobre.

El momentu culminante d’esti actu que va inxeríu nel conciertu d’Hevia, nelq ue tamién va participar la Banda de Gaites Llacín, va llegar cola interpretación del Pericote de Llanes a cargu del propiu Hevia, amigu y discípulu de Noriega, que va danzase de forma masiva por decenas de tríades (2 muyeres y 1 home) compuestes por vecinos de pueblos del conceyu y representantes de los tres bandos de la Villa (La Magdalena, San Roque y la Guía). Por mor d’esto y col objetivu de poer axuntar al mayor númberu de participantes posibles, faise un llamamientu pa que toos aquellos a los que-yos pruya, independientemente de la modalidá de Pericote que conozan, puena danzar en homenaxe a Ignacio Noriega. Nun va facese necesario vestir el traxe de porruano y llanisca, bastará con dir con ropa de cai.

A lo llargo los tres los díes de conciertos, van tocar más d’una decena de grupos ente les carpes de La Bombilla y el Muelle. Xunta hevia y dellos grupos locales esti añu van tar en Llanes Frigg, Dixebra, Despistaos, Macaco, Oysterband, Toumane Diabaté y Tush.

Namái que van ser de pagu los tres conciertos de La Bombilla y a un preciu simbólicu de 5 euros. La reserva d’entraes pue facese na Oficina de Turismu: 985 40 01 64.

Web oficial de Llanes al Cubo

Güei xueves, 15 d’ochobre, dende les nueve y media la tarde, el restorán temáticu Tierra Astur, de Cualloto, va acoyer una actuación de La Bandina La Curuxa, d’Uviéu, que ta formada por Iván, Nel, Arsenio y Queco, qu’en 2008 espublizaron el so primer discu, “toi de camín”.

El cantautor Toli Morilla va tocar esta nueche de magar les 23 hores nel llocal “La Calleja”, asitiáu nel númberu 4 de la cai Martinez Vigil. Nel mesmu va repasar los sos temes habituales.

Esti miércoles 21 d’ochobre, a les 20,30 hores, va tener llugar l’ensayu xeneral del Conciertu de Pieslle de los Premios Príncipe d’Asturies, que por primer vegada va tar dafechamiente abiertu al públicu.

El repartu de les entraes pa asistir al ensayu fadrase nes taquilles del Auditoriu Príncipe Felipe’l llunes 19 d’ochobre, ufriéndose dos entraes por persona.

El Club Xuvenil de Villa (Llangréu) entama güei, vienres 9 d’ochobre, de magar les ocho la tarde un conciertu de música punk-rock cola participación de les bandes “Dentellada”, “K.P.E.” y “Brigada”. La entrada ta al preciu de 4 euros.

Güei, miércoles 7 d’ochobre va tener llugar la inauguración oficial de la esposición “Nuberu, yá llovió: 30 años d’Historia”, que va poder vese en Ciañu, na Casa los Alberti, dende güei y hasta l’11 de payares. La inauguración oficial d’esta esposición va tener llugar a les 13:30 hores y al mesmu van asisitir l’Alcaldesa de Llangréu Esther Díaz García, la Directora Xeneral de Política Llingüística Consuelo Vega amás de los miembros d’esti míticu grupu asturianu, Chus Pedro Suárez y Manolo B. Peñayos.

Dempués de trenta años enriba los escenarios, Nuberu despidióse de los escenarios en 2008. A lo llargo del añu, un númberu cada vegada mayor de siguidores del grupu contribuyeron colos sos personales tributos pa facer a Chus Pedro y Manolo una despidida a lo grande. Nuberiegos d’enantes y d’agora xuntáronse pa compartir alcordances, idees, canciones ya imáxenes, nun se perdieron conciertu nengún y ficieron de la despidida de Nuberu una fiesta compartida que continúa en 2009 cola esposición “Ya llovió. Trenta años de Nuberu”.

Por muncho que lloviera dende 1978, bien xuntos, trenta años caben nuna esposición. Esti ye l’enfotu de Yá llovió. Trenta años de Nuberu: un repasu n’imáxenes y soníos pela trayectoria del grupu musical Nuberu. Pero l’amuesa tamién ye un percorríu per trenta años esenciales de la historia d’Asturies, nos que les canciones de Chus Pedro y Manolo pasaron de ser la banda sonora de la transición a convertise nun patrimoniu cultural. Una historia nel tiempu y más p’allá.