Música

Güei, xueves 17 d’avientu va presentase’l segundu tomu del “Cancioneru l’Andecha”, dedicáu a la muñeira n’Asturies, na Biblioteca Ramón Pérez d’Ayala, d’Uviéu. El llibru sigue al espublizáu en 2004, “La Jota n’Asturies” y van presentalu Luciano Rodríguez “Chano”, director d’espardimientu de l’Andecha, y coordinadora del llibru, y de Pedro Pangua Rivas, Coordinador de la Escuela de Música de Llanera, y autor del analís musical del llibru.

Amás, van tar presentes los coordinadores del trabayu, Fernando de la Puente Hevia, folclorista, profesor de la Escuela de Música Tradicional “Manolo Quiros” d’Uviéu y Maribel Alvarez, Directora d’Archivu ya Investigacion de l’asociación.

El yá tradicional Festival de Gospel de Xixón arranca’l vienres que vien, 17 d’avientu, na Sala Acapulco del Casinu d’Asturies cola actuación de “The Bhotherhood Singers”.

La décima edición del Festival de Gospel de Xixón acoyerá les actuaciones de trés grandes formaciones internacionales, que van enllenar Xixón de la música espiritual con más calidá y sonadía mundial.

El Cafetón d’Avilés va acoyer esti miércoles, 16 d’avientu, a les nueve la nueche, un conciertu del flautista bretón Sylvain Barou (Comas, etc..) y de Ruben Bada (DRD, etc), que van ufrir un repertoriu a los veceros del llocal, asitiáu na cai del Sol.

El cantador a la gaita José Manuel Robledo, conocíu como Lolo de Cabranes, ta acabante asoleyar el so primer discu “Sabor Asturianu”, con Oscar Fernández, ganador del Troféu Macallan, a la gaita. El discu inclúi 17 cantares, en dos d’ellos, “Xunci les vaques, Ramona” y “Qué vivan los asturianos”, canta a dúu con Oscar Fernández.

Participa amás Almudena Robledo, nun cantar dialogáu col so padre “Esta noche fui de ronda”. Fernando Malva collabora nel discu coles igües y acompañamientu musical y la lletra de “Viva Asturies”, ye de Narciso Fernández Arduengo, que produz “Sabor Asturianu”, asoléyalu pola Fonografica Asturiana.

Lolo de Cabranes (Cabranes, 1954) entamó tarde nel mundu de la canción asturiana, ganado’l concursu conceyu Amieva en 1998 na modalidá d’aficionaos. D’entós p’aca entamo una carrera hasta convertise nuna de les meyores voces d’anguaño. Tien una importante trayectoría de premios en certámenes de música tradicional.

El gaiteru Xuacu Amieva toca esti sábadu, 12 d’avientu, a les 20:15 hores nel Nuevu Teatru de La Felguera. Amieva trabaya dende cuantayá pola divulgación de la música tradicional asturiana, collaborando con diferentes centros escolares y dando conciertos multiinstrumentistes (gaita, rabel, zanfona, xiblates, percusiones y voz) y Seminarios. El preciu del conciertu ye de 7 euros.

Esti gaiteru ye una de les figures reconocíes del panorama de la música tradicional asturiana. El so yá llarga carrera como gaiteru, maestru de gaiteros y multiinstrumentista n’estremaes formaciones folk, apurrió-y un gran prestixu dientro y fuera d’Asturies. Nel so repertoriu atopa una franca escoyeta de cantares y melodías de la tradición asturiana, non sólo del repertoriu de gaita, sinón de los otros instrumentos que domina.

“Voi pa la braña” ye’l trabayu nuevu del cantautor Rafa Lorenzo y va presentase esti vienres 11 d’avientu a les ocho de la tarde nel teatru del Institutu de Bachilleratu de L.luarca (Valdés), como homenaxe a la mayoraza d’Aristébanu, Rogelia Gayo “La vaquera”, que va tar presente gracies a les grabaciones feches nel so momentu pol americano Alan Lomax.

Un muyer a la que según Lorenzo “nun se sabe cuánto-y debemos los vaqueiros y los xaldos que sentimos la costume tradicional de lo nuestro”, y ye que según recuerda’l “Rogelia foi la primera muyer que fixo un llibru, de más de trescientes páxines, onde amosó tola sapienza vaqueiriza que guardaba na so cabeza”.

L’homeaxe coincide col cincuenta aniversariu de la so muerte, que se produció nel asilu de Vil.lar (L.luarca), el 17 de xineru de 1959. La obra recoyida d’esta autora ta según afrima Rafa Lorenzo “reteníu contra la voluntá familiar y popular, porque munchos creemos que nun ta desaparecíu como se diz”.

El Nuevu Teatru La Felguera va acoyer, mañana sábadu 12 d’avientu, un conciertu del músicu asturianu Xuacu Amieva. Amás de pol so grupu (Paula Alonso al violín, Emilio Hidalgo a la guitarra, Luis Rodríguez al baxu y Rubén “Mol” Rodríguez a la batería) Xuacu Amieva va tar tamién acompangáu de dellos artistas convidaos como Daniel Pando a la trompa y la Banda Gaites Naranco.

XUACU AMIEVA ye una de les figures más reconocies del panorama de la música tradicional asturiana. La so llarga carrera como gaiteru, maestru de gaiteros y multiinstrumentista en delles formaciones folk, dio-y un gran prestixu dientro y fuera d´Asturies. Nel so repertoriu alcuentrase una amplia esbilla de cantares y sones de la tradición asturiana, non solo del repertoriu de gaita, sinon tamién de bandurria asturiana, zanfona, flauta o canciu.

Xuacu Amieva ye cofundador de los grupos folk Beleño (1983) y Ubiña (1985), del que formó parte hasta la so disolución en 1989. Con estos grupos y como solista tien participao en munchos festivales y alcuentros de música tradicional, tanto n´Asturies como nel restu España y Europa. Primero en solitariu y, dende 1990, col grupu folk que lleva’l so nome tien grabaos 11 discos: Método de gaita, Onde l´agua ñaz, Ubiña (col grupu Ubiña), Xostrando, Las cornamusas de Europa (con dellos artistes.), Lluna caldeá, La gaita asturiana, El Besu nel discu Santiago del grupu The Chieftains, Tiempo de Mitos, Al son del fueu, y 6.

Ente los premios llograos por esti gran músicu cabe la pena destacar: 1986 Troféu Macallan del Festival Intercélticu de Lorient, 1988 “Urogallo” del Centru Asturianu de Madrid, 1990 Dos Ventolines (Unu como meyor multiinstrumentista y otru como músicu con raíces n´Asturies), 1997 Grammy pol tema El Besu nel discu Santiago del grupu irlandés The Chieftains, 2006 Premiu honoríficu AMAS. El sábadu 12 d’avientu vamos poder disfrutar del potente directu d’esti gran músicu y la so banda, el conciertu va ponese nel Nuevu Teatru La Felguera y la hora empiezu ye la de les 20:15 hores.

Componentes del grupu que va actuar esti sábadu: Xuacu Amieva (gaita, flauta y voz), Paula Alonso (violín), Emilio Fidalgo (guitarra), Luis Rodríguez (baxu), Rubén “Mol”Rodríguez (batería) + Artistes convidaos: Daniel Pando (trompa) y la Banda Gaites Naranco

Güei, xueves 10 d’avientu, dende les 19:30 hores, el Salón d’actos del Centru Municipal Integráu de Pumarín-Xixón Sur, va acoyer la cita mensual de los Centros Municipales xixoneses cola tonada, que nesti casu va cuntar colos cantadores Jose Antonio González “Cantu la vara” y Jose Ramón Sierra Nieto, el monologuista, Jose Manuel Reguero “El maestru”, la gaitera Natalia Fernández Vázquez y el presentador Jose Luis Fernández “Trubia”. La entrad ye de baldre.

Mañana xueves 10 d’avientu, el Savoy de Xixón va acoyer dende les nueve y media la nueche un conciertu d’Alfredo González y Manolo Trancón. El preciu de la entrada ye d’8 euros.

El vienres, los dos artistes van treslladase a Uviéu, actuando en La Calleja la Ciega, a partir de les doce la nueche y al preciu anticipáu d’8 euros y de 10 na puerta del llocal.

El grupu Dixebra va presentar esti vienres “Amor incendiariu”. El llugar escoyíu ye’l llar del Conceyu Abiertu pola Oficialidá, asitiáu na cai Gascona, 12, baxu A, d’Uviéu. L’actu va entamar a les doce del meudía y va cuntar cola participación de Xune Elipe, xunto a otros miembros de la banda.

Amor incendiariu ye’l primer discu d’estudiu de Dixebra en cuatro años -el tiempu que pasó dende que llanzaran Ensin novedá- y llega depués de los trabayos colos que’l grupu -l’abanderáu del estilu que yá se conoz como Rock N’Ast- celebró los sos venti años de carrera (el cedé-DVD en directo N’Acción y Perversiones, un álbum onde dellos de los grupos más señalaos de la escena asturiana los homenaxaben versionando dellos de los sos cantares más emblemáticos). Nesti últimu trabayu, Dixebra vuelve de dalguna manera a les esencies punk-rock que marcaron los sos primeros pasos nel mundu de la música, anque nun escaecen la querencia por la fusión con otros ritmos como’l reggae o’lska que yá mostraran en composiciones más recientes.