Música

Tán acabante dase a conocer los prefinalistes de toles categoríes establecíes na XIV Edición de los Premios de la Música, ente los qu’esiste dende 2004 una dedicada al meyor cantar en llingua asturiana.

Nesti momentu hai diez canciones nominaes, qu’habrán ser, pa la gala final, namás trés. Les esbillaes pa meyor cantar de 2009 son: «11 de mayu» (Mapi Quintana), «Cantar de la redención» (Dixebra), «El canciu’l mineru» (Spanta la Xente), «El mio sitiu» (Lafu&Rebeca), «La casa’l mieu» (Misiva), «La nada y tu» (Alfredo González, «Palombina blanca» (Laura Díaz), «Queimar el cielo» (Bacotexo), «Una de gallus» (Fe de Ratas) y «Ye lo que nos pasa» (Músicos pola Oficialidá). Los cantares escuéyense con un procesu de votaciones internu de l’Academia.

Los ganadores fueron hasta agora Pepín Robles con «Nunca máis» (2004), Chus Pedro con «Agora sal a bailar» (2005), Los Berrones con «Fai deporte» (2006), Rossaleda Jazz Quartet con «Na fonte» (2007), Tejedor con «Seique non» (2008) y Esther Fonseca con «Negra» (2009).

N’otres estayes de los premios tán nominaos tamién grupos asturianos, casu del Meyor Álbum de Música Tradicional, onde tán nominaos Fíos d’esta tierra de Spanta la Xente y El sonar de les semeyes de Mapi quintana, o del Meyor Álbum de Rock Alternativu, cola nominacion d’Amor incendiariu de Dixebra. La gala d’entrega d’esta XIV Edición de los Premios de la Música va facese, mui probablemente, nel mes de marzu.

El grupu de folk-fusión de Pola L.lena La Co COL.LÁ PROPINDE, espubliza “a teyavana”, el so tercer trabayu discográficu. Otra vuelta’l vientu sele vuelve a ruxir y otra vegada los sones y les lletres de La Col.lá Propinde vuelven a inundar l’espaciu musical n’Asturies, esta vez por mor de la teyavana: unes lletres y unos sones allugaos a los cuatro vientos, como si d’ una nueche de branu se tratara, componiendo idées al rellumu de les estrelles filtráes nel llar baxu les ripies y les teyes del cumal. Dormir, suañar a teyavana, col cielu rasu ente les teyes.

“A teyavana” grabóse nos estudios TUTU ente mayu y setiembre, cola producción de Sergio Rodríguez y Ánxel González. “A teyavana” ye un discu con 12 temes onde se combinen los de reellaboración tradicional y los de composición propia del grupu. A más, n’esta ocasión, cuenta cola collaboración de Esther Fonseca, que pon voz al cantar “2417”.

Ente la biografía de La Col.lá Propinde, destaca el premiu al meyor cantar n’asturianu nel añu 2003 por “l’emigrante”. Nel añu 2009 fueron banda sonora de la serie de Antena3 “Doctor Mateo”. El 29 de Xineru, presentarán el discu nun conciertu na Fnac de Parque Principáu (Siero).

El mediu d’información musical FNAST.NET celebra esti vienres 8 de xineru’l so aniversariu con un conciertu en Xixón con La Tarrancha, Black Panthys Party, La Patriband Folk Orl.lestra y 13 Palabras que van tocar nesta fiesta de cumpleaños.

El mediu d’información musical FNAST.NET cumple un añu y pa celebralo entama un coniertu aniversariu el prósimu vienres 8 de xineru. Les actuaciones de La Tarrancha, Black Panthys Party, La Patriband Folk Orl.lesta y 13 Palabras son les encargaes de poner son ska/reggae, hardcore/punk, folk y hiphop a la fiesta de cumpleaños. L’actu va ser nel Savoy de Xixón y xunto a los conciertos habrá sorteos, venta de material musical, una rifa la xata y música asturiana.

El pasáu 5 de xineru del 2009 FNAST.NET presentábase como “un mediu de comunicación dixital que tien l’enfotu de recoyer tolo relacionáu cola actualidá musical actualidá musical alternativa asturiana”. Asina ye como, con conteníos en llingua asturiana, defensa d’un modelu sociocultural xusto y usu y promoción de les llicencies Creative Commons; esti portal dixital entamaba a dar los sos primeros pasos, informando de tolos estilos musical fechos n’Asturies.

Yá va un añu d’aquello y por eso dende FNAST.NET y l’Ensame Cultural Sonastur, asociación que lo xestiona, entamen una folixa aniversariu el prósimu vienres 8 de xineru en Xixón. La Tarrancha col so ska/reggae, el hxc/punk comediante de Black Panthys Party, La Patriband Folk Orl.lestra amosando’l so folk amestáu y el hiphop Kuenka Maphia de 13 Palabras formen el cartelu. Amás les bandes aprovecharán pa presentar los trabayos asoleyaos nel 2009. L’actu va ser nel Savoy Drinks & Music de Xixón (cai Pelayo, 2), escomenzando con puntualidá a les 20.00 y nél tamién va haber sorteos y venta de material musical, va sonar música asturiana y hasta va facese una rifa la xata. P’autoxestionar esta folixa-aniversariu hai un preciu de 4 € la entrada y de 10 € incluyendo entrada y la camiseta de “Asturies tien son” de regalu.

Presentación del Anuariu Sonoru ‘09

Dende FNAST.NET anunciárase esti día qu’esta primer selmana de xineru diba presentase l’Anuariu Sonoru ’09, una recopilación de cantares y vidioclips fechos por grupos asturianos durante’l 2009. Sicasí, esta presentación nun va ser esti vienres 8 de xineru como teníen programáu los organizadores, si non que sedrá la última selmana de xineru o primera de febreru.

Esti vienres 8 de xineru, el cantautor asturianu Toli Morilla va presentar los temes que componen el so últimu trabayu discoráficu, dedicáu a facer versión de “Diez canciones de Bob Dylan n’asturianu”. Sedrá a les 21 hores, na Sala Acapulco de Xixón.

Nel discu apaecen temes como «Sara» o «Knockin’ on heaven’s door», con dellos cambios autorizaos pola discográfica de Dylan.

Toli Morilla asoleyare hasta agora cinco discos, dellos en castellán, con temes n’asturianu, y otros defechu n’asturianu: “Entropía” (2006), “Nueche d’insomniu: L’espectáculu” (2005), “Nueche d’insomniu” (2004), “Entre el barro y las preguntas” (2003) y “Nunca des la espalda” (1998).

El grupu asturianu d’ska-fusión “Falanoncaduca” va ufrir trés conciertos n’homenaxe a Carlos “Gaites”, saxu del grupu emigráu a Polonia y que torna nestes feches a Asturies. El chigre El Teatrucu, de Ḷḷena, ye’l llugar escoyíu p’acoyer el 25 d’avientu a les 23.30 hores, esti conciertu, que va ser l’últimu que dea’l grupu hasta’l branu de 2010, yá que la formación ta componiendo’l so primer discu.

La conseyera d’Alministraciones Públiques y Vocera del Gobiernu d’Asturies, Ana Rosa Migoya, dixó esti miércoles que l’Executivu rexonal treslladó a la Universidá d’Uviéu la necesidá de facer un esfuerzu pa llograr contención nel gastu, na rueda prensa del Conseyu de Gobiernu.

La vocera del Gobiernu asturianu señaló que’l momentu actual requier que toos faigan esi esfuerzu y fizo alcordanza del “apoyu importantísimu” que siempre tuvo pa cola Universidá’l Gobiernu Asturianu, magar dende la Institución académica se camiente que nin siquier se cumplieron les xubes añales que cinquen a los drechos económicos de los trabayadores, recoyíos en conveniu.

Asina, la distancia ente les peticiones de la Universidá y lo que paez dispuestu’l Gobiernu a poner enrriba la mesa siguen enforma separtaes nun contestu difícil, como ye l’adaptación a Bolonia, que necesitá entá de más inyeiciones económiques.

Güei, martes 22 d’avientu, a les 20.30 hores nel avilesín parque de Les Meanes, les Pandereteres de Fitoria (Uviéu) van ufrir una amuesa de sones asturianos de Navidá. L’actuación ye de baldre y pa tolos públicos.

Xune Elipe, director del sellu discográficu L’Aguañaz, va presentar el miércoles 23 d’avientu, a les 12.30 hores, na sé asturiana de la Sociedá Xeneral d’Autores y Editores (SGAE), el décimu númberu del Anuariu de la Música Asturiana. Esta publicación, un clásicu d’estes feches pa tolos aficionaos a la música’l país, ta centrada na actualidá añal de la música que tien a los soníos de calter tradicional como elementu fundamental d’inspiración (bien seya recuperándolos o reellaborándolos) y a la que s’espresa en llingua asturiana, independientemente del estilu que seya (rock, pop, canción d’autor, jazz,reggae, etc.). L’Anuariu de la Música Asturiana del 2009 va repartise gratuitamente col periódicu Les Noticies el xueves que vien, 24 d’avientu. Los interesaos en consiguir un exemplar han facer la reserva nel quioscu.

Ya ta na cai el discu Ö-3-3 (Otres tres) de La Tarrancha. Anque ya teníen asoleyaos dellos trabayos como la maqueta Qlt? (culete?) y la participación en dellos compilatorios y tributos, ésti ye’l discu primeru de llarga duración de la banda. Autoproducíu pol grupu y el sellu Algamar Producciones, el discu foi grabáu en Tutu Estudiu por Sergio Rodriguez nel pasáu mes d’ochobre.

Trátase d’un discu orixinal, con un soniu totalmente personal, propiu, pero totalmente eclépticu. La base del soniu de La Tarrancha ye’l Ska y el Reggae, pero dando-y pincelaes que van dende’l funk al swing, dende’l ragga al folk, de la pachanga a la música tradicional de… Eso si too ello con un carcteristicu sonío llimpiu, enllenu de pequeños matices pero llimpiu y alloñau de distorsiones y dureces acustiques. Too ésto ye lo qu’ellos autodefinen al so propiu estilu como “Mecigayu Ska”. La temática de les lletres ye bariada; diendo dende l’amor, a la reivindicación; de la critica, al cachondeo; de la muerte, a la vida y del mundu, al chigre. Tolos cantares son n’asturianu, menos una d’elles que ta na fala del la zona Navia-Eo o gallegoasturianu.

Dempues d’estos años d’esistencia y de munchos cambios na formación, La Tarrancha muestrá n’esti discu el resultáu final y esperemos qu’estable de lo que va ser el so soníu apartir d’agora. Non mui distintu del d’enantes pero nel qu’a la escontra qu’antes, onde teníen un pesu importante los metales, agora, cobren un especial protagonismu l’acurdión diatonioca, el trombón y les flautes, acompañando a les guitarres, baxu, percusiones latines y africanes, bateria y voz.

El discu cuenta con delles colaboraciones, pero eses meyor descubriles escuchándolu. Anque tienen previstos dellos conciertos pa dientro poco, nun tienen entamanao ningún conciertu esclusivu pa presentar el discu, pero afirmen tar trabayando n’ello.