Música

El sábadu 20 de marzu a les 20:30 hores entama’l ciclu cola actuación de Verdasca, que presenta discu nuevu “D’abéu”. La primera de cuatro actuaciones que van conformar esti ciclu nel Teatru Filarmónica. El 3 d’abril sigue l’Uviéu Tierra Folk con Vallarna, que va presentar “Km. 90”. Los Ciquitrinos actúen el 10 d’abril, pesllando les xornaes musicales, Corquiéu, presentando “Suaña”. Tolos conciertos son a les ocho y media la tarde.

Les llocalidaes sueltes véndense a 7 euros: a partir del día 18 de marzu nes taquilles del Filarmónica y del Campoamor y na rede de Caxastur. El bonu pa los 4 conciertos del Ciclu véndese por 20 euros: del 8 al 17 de marzu. L’actu organízalu Producciones Tierra y la Sociedá Uviedina de Festexos, en collaboración con Les Noticies.

El Festival de la Pallabra organiza esti vienres 5 de marzu, nel Teatru Xovellanos, la presentacón del últimu trabayu discográficu de l’artista “A las buenas y a las malas”. El conciertu va entamar a les 20:30 hores y nél, la cantante canaria va dexar espaciu pa delles de los sos temes de siempres.

Güei, xueves 4 de marzu, celébrase una sesión folk especial en La Casa Posafuelles cola Sveriges Radio. A partir de les diez de la nueche les notes musicales de l’avezada sesión folk del chigre de la Xunta pola Defensa de la Llingua Asturiana van llegar bien lloñe. Ello ye qu’un equipu de la Sveriges Radio (Radio Pública de Suecia) va tar equí conociendo la música fecha n’asturianu, falando cola xente de los grupos y recopilando material pal programa Musihkka, que va emitise pel branu. Les responsables del espaciu, Petra Quiding y Helena Lopac, avérense a Asturies pa conocer de primer mano les creaciones musicales en llingua asturiana.

El grupu Duerna va presentar la so maqueta “Dende’l chigre” na sidrería Tierra Astur de Cualloto. La formación ta conformada por Pedrín, guitarra, armóniques y voz, Fani, percusiones y voz, Andrés, percusiones y voz, y Pablo Carrera a la gaita. L’actuación va ser esti xueves a les 21:30 hores.

MySpace del grupu

Güei, martes 2 de marzu, a partir de les siete y media la tarde, y dientro del ciclu “L’asturianada nos Centros Municipales”, qu’entama la Fundación Municipal de Cultura, Educación y Universidá Popular del Conceyu de Xixón, en collaboración cola Asociación d’Intérpretes de la Canción Asturiana (AICA), va poder sentise la voz de los cantantes de tonada María Sánchez Blanco y José Tronco Valle, acompañaos a la gaita por Pablo Carrera González.

Amás, can actuar los miembros del Grupu de Teatru Rosario Trabanco, que va representar una costumista.

El Festival de la Pallabra organiza esti vienres 5 de marzu, nel Teatru Xovellanos, la presentacón del últimu trabayu discográficu de l’artista “A las buenas y a las malas”. El conciertu va entamar a les 20:30 hores y nél, la cantante canaria va dexar espaciu pa delles de los sos temes de siempres.

Rosana ñació en Lanzarote, Islles Canaries, y ye la pequeña d’una familia d’ocho hermanos. A los venti años treslladóse a Madrid, onde estudió harmonía y guitarra. Anque Rosana lleva más de diez años xubida a los escenarios, con más d’ocho millones de discos vendíos en tol mundu, batiendo récords de vientes.

Nesti tiempu dio más de 500 conciertos n’Europa, América y Asia y recibió cientros de premios, siendo record de ventes en más de trenta países, y más de catorce selmanes consecutives nel estáu español.

Quentin Tarantino utilizó dos temes na película “Curled” y en 1998 compunxo y produció l’himnu oficial de la Selección pal mundial de Fútbol de Francia.

N’abril de 2009 Rosana edita’l so nuevu trabayu discográficu “A las buenas y a las malas”, el so quintu discu d’estudiu, producíu por ella mesma. Como n’anteriores trabayos Rosana ye la compositora de la lletra y la música de tolos sos cantares, Nesta ocasión participa entá más como músicu. Ye un discu con aires más roqueros que los primeros, tal que yá dexó ver nel so anterior trabayu d’estudiu “Magia” (2005). La presencia de les guitarres faise más evidente y tomen mayor protagonismu. Les lletres tienen un calter más comprometíu y una carga social importante.

La Dirección Xeneral de Política Llingüística vieno acabante zarrar un alcuerdu de collaboración col Festival Européu de la Canción en Llingües Minoritaries, que va facer qu’Asturies seya en 2012 la sede d’esti alcuentru musical. El Festival celebraráse’l 20 de payares d’esti añu n’Inverness (Escocia); nel 2011 será n’Udine (Friul, Italia), y n seronda de 2012 n’Asturies, que va ser la primer comunidá española onde se celebre la gala europea.

La Directora Xeneral de Política Llingüística, Consuelo Vega Díaz, aconceyó ayeri col coordinador de la Fundación Liet, Onno Falkena, pa tratar les posibilidaes de desarrollu y collaboración del Festival Européu de la Canción en Llingües Minoritaries y la participación asturiana.

Según la nota de prensa qu’asoleyó esti martes la Conseyería de Cultura y Turismu l’alcuerdu cola Fundación Liet, que cuenta col apoyu del Conseyu d’Europa, considera a Asturies como sociu estratéxicu del Festival Européu y garantiza tamién la participación d’un representante asturianu nel Festival.

La gala celebrada esti sábadu en Mieres convirtió al grupu Xera nel cuartu ganador na hestoria de los premios al Meyor Cantar, que convoca la Conseyería de Cultura y Turismu y que teníen ente los finalistes a músicos del prestixu de Brandal, Dixebra, Lafu & Rebeca y Misiva. El tema ganador, “Tierra”, va participar en representación d’Asturies nel ‘Festival Liet International’, un certame conocíu como la ‘eurovisión’ de les llingües minorizaes, qu’esti añu va celebrase n’Escocia.

Con unos cuantos años yá como formación estable, la propuesta del grupu Xera –onde folky electrónicavan a la par–ye una de les más orixinales y novedoses del panorama musical asturianu. El so estilu surde, precisamente, de la combinación d’elementos electrónicos con instrumentos acústicos como’l buzuqui, el violín o la gaita. El so oxetivu final ye intentar fusionar estes dos corrientes aparentemente distintes. Tienen publicaos dos discos onde desenvuelven el so discursu musical. Nel últimu, tituláu Tierra, ufierten una evolución na so llinia, cola ampliación de los cantares con voz y la incorporación d’instrumentos nuevos como la gaita rabil.

Esta ye la lletra del cantar ganador:

Había un llugar del qu’un vieyu faló enllenu de viesques, de verde pación.

D’altes montañes que críen la flor, d’un pueblu que-y reza a a la lluna y non al sol.

¿Ónde tas, tierra? ¿Ónde tas, flor? ¿Ónde ta’l gritu que me despertó? Que despierte la xente y devuelvan so voz. Y devuelvan so voz.

Munchu camín tuvo que recorrer buscando aquel sitiu que siempre suañó. Buscando la xana qu’un día besó. Embaxo d’un texu la besó.

¿Ónde tas, madre? Acuéyeme vós. ¿Ónde tas, casta del mio corazón? Que despierte la xente y garremos la flor. Y garremos la flor.

Que retorne l’orbayu esi que mos moyó. Que retorne aquel llantu en qu’un pueblu ñació. Que güeyemos al cielu y garremos la flor. Y garremos la flor.

«Anque teas lloñe, escúchote. Sé que tas ehí, onde siempre tuvisti. Esperándome. Onde siempre tuvisti. Llorándome. Para ver cómo yera enantes, para ver otra vez.»

Los aficionaos a la música que nun pudieren acudir ayeri sábadu a la gala celebrada en Mieres tienen güei una oportunidá nueva de vela, nesti casu pela televisión, va ser güei domingu, 21 de xineru, a partir de les 21:30 hores.

Na gala, que cunta con una duración de 90 minutos, va poder vese l’actuación de los finalistes del premiu y del ganador del añu pasáu, Alfredo González.

Esti sábadu dende les 7 de la tarde, na Casa de la Cultura Teodoro Cuesta de Mieres, va desenolcase la gala d’entrega del Premiu al Meyor Cantar en Llingua Asturiana, gallardón que ñaciera en 2007 como reconocimientu a la creación musical n’asturianu o gallego-asturianu. Acordies coles bases, presentense les obres musicales de creación orixinal con lletra n’asturianu o gallego-asturianu que se comercializaren ente’l primeru de xineru y el 31 d’avientu de 2009 nesta cuarta edición.

Nesti 2010, foron un total de 106 temes interpretaos por 21 grupos o artistes los participantes d’ente los que s’escoyeren los cinco cantares qu’opten finalmente al premiu: Brandal con “Chueve”, Dixebra con “El dinamiteru”, Lafu&Rebeca con “El mio sitiu”, Misiva con “La casa’l mieu” y Xera con “Tierra”.

La Gala entama a les 7 pero nun se va permitir la entrada de públicu a partir de les 18:50 hores. La entrada ye llibre hasta completar l’aforu.