Música

Esti sábadu 17 d’abril, a partir de les siete y media la tarde, el Centru de Cultura Vieyu Institutu de Xixón va ser l’escenariu de la presentación del DVD “Os reises d’El Valledor”, asoleyáu pol colectivu Vezos Astures.

Esti documental ellaboróse col material recoyíu na recuperación fecha pol grupu en xineru del añu 2009 nos pueblos de Vilalaín, Fonteta y San Salvador del Valledor, dempués de más de 50 años ensin facese. Dellos vecinos collaboraron con nós dando’l so testimoniu y les sos vivencies pa iguar esti documental.

Esti dvd ye amás d’un testimoniu de la propia recuperación, el material audiovisual más importante y únicu sobre les mazcaraes d’iviernu n’Asturies que anguaño existe, que cuntó cola collaboración de xente cabezalera de la cultura asturiana como Xosé Ambás, Diego Pangua o Naciu i’Riguilón y ye de sorrayar l’iterés d’etnógrafos propios y ayenos qu’ellí taben pa rexistralo sobro manera’l portugués Helder Ferreira, responsable del Proyéutu Europeu pa la recuperación, promoción y mantenimientu de les mazcaraes que recoyó abondu material y yá ta asoleyáu nel volume II de la espublización hispano-portuguesa “La máscara ibérica” onde se fai un estudiu de les mazcaraes peninsulares y onde Asturies apaez representada con toles mazcaraes qu’anguaño se siguen faciendo.

L’Andecha folclor d’Uviéu organiza esti sábadu, 17 d’abril, nel auditoriu d’Uviéu, una amuesa de muñeira, a partir de les ocho la tarde. Na mesma va facese un “analís periguau sol nome muñeira” y va dase amuesa de los estreamos estilos según la fastera d’Asturies: Occidente (Llendada al este pela raya Navia -Villayón, Allande, Ibias y Degaña), Centruoccidental (Valdés, Tinéu, Cangas, Somiedo y Miranda), Central (De los d’enantes a Llanes y Onís) y Oriental (De Llanes y Onís a Cantabria).

L’Andecha ye un colectivu que xurde del rixu rescatar del escaezu les amueses d’identidá de la cultura asturiana, esa cultura que se vieno desendolcando como tradicional al sofitase na tremisión oral. D’esa miente, busquen “l’aniciar d’una cultura que foi el pilancu de la sociedá d’anguaño, pa detrás, asoleyar y adeprender de la nuesa sociedá les maneres de interautuar de la tradición, y caberamente, espardir dientro y fuera del nuesu espaciu xeográficu, la cultura asturiana”.

A finales de 2009 presentaron el segundu tomu del “Cancioneru l’Andecha”, dedicáu precisamente a la muñeira n’Asturies. El llibru sigue al espublizáu en 2004, “La Jota n’Asturies” y coordinólu Luciano Rodríguez “Chano”, col sofitu de Pedro Pangua Rivas, autor del analís musical na obra.

El llider de la banda Dixebra y productor discográficu, Xune Elipe, va participar en Zaragoza dientro de les XVII Chornadas das Luengas d’Aragón, entamaes pola Escuela d’Aragonés Nogará. Xune Elipe, que va facer una esposición sobre la música asturiana contemporánea y la so importancia nel procesu de normalización social y normativización del asturianu. El viaxe tamién va valir pa dar a conocer el fechu llingüísticu asturianu n’Aragón al traviés de la intervención d’Elipe en dellos medios de comunicación d’aquella comunidá, amás de pa facer una collaboración col grupu de rock n’aragonés Prau.

La XXII Edición del Conciertu pola Oficialidá va xuntar a lo meyor de la música n’asturianu. Estilos estremaos, dende los cantares pa neños al rock más combativu pasando pela música tradicional asturiana y la canción d’autor. Música de toa triba representada nos soníos de Xentiquina, DRD, La Curuxa, Toli Morilla, Misiva, Skama la Rede, Los Berrones y Dixebra.

Más d’ocho hores de música, reivindicación y folixa, en dos escenarios independientes que van alternar les actuaciones ensin tiempos muertos nin descansu. La xornada va celebrase’l próximu sábadu 24 d’abril, nes instalaciones de la Feria de Muestres de Xixón, y a partir de les siete la tarde.

El preciu de la entrada ye d’ocho euros anticipada y de diez na puerta. Vendiéndose nesta ocasión en La Casa Posafuelles y Malayerba nunca muere, n’Uviéu; Café Trisquel, El Barucu y Llibrería Alborá, en Xixón; n’El Cafetón n’Avilés; en La Gueta de Candás; nel Mesón Cervantes de Tinéu; na Panadería Aldín de L.luarca; nel Bar Azul de Cangas; nel Café Centro de La Puela Allande; en L’Abellugu de Mieres; en La Palmera, en La Pola L.lena; nel Abre César de La Pola Siero; nel La Posta, de Nava, nel Bar Piero’s de Grau y nel Tom Mallory si se quier merca la entrada en L’Entregu.

Mañana, día 8, el Teatru Xovellanos de Xixón va ser el puntu de partida del Festival Coral Internacional Asturies Xoven 2010. Entamáu pola Asociación Cultural “Avilés Joven” añu tres d’añu convirtióse nun referente de la música coral. Mozos d’estremaos puntos del mundu, Rusia, Letonia, Israel o Tailandia, ente otros países, comparten la so cultura al traviés de los cantares y coreografíes.

El festival nun ye competitivu, sinón una amuesa de lo que los xóvenes pueden llegar a realizar na música coral y les distintes formes de facela. Nesta nueva edición van participar el Harmony Ensemble (Inglaterra), Colegium Musicum de Belgráu (Serbia), Detska Kitka (Bulgaria) Cor de Noies del Palau (Cataluña), Coru Mozu Fundación Príncipe d’Asturies (Asturies) y Los Péques del León de Oro (Asturies).

Los escenarios que’l Festival va visitar mientres el mes d’abril van ser los del Teatru Xovellanos de Xixón (8 d’abril), la Casa Municipal de Cultura d’Avilés (díes 10 y 17). Amás de Castrillón, Llanes, Navia y Mieres.

Nel añu 2009 l’Asociación instauró’l Premiu “Ciudá d’Avilés” que nesta ocación reacaerá na persona de Don José Manuel Feito.

Programa completu

El vienres, 9 d’abril nel Filarmónica d’Uviéu y a partir de les siete la tarde, va tener llugar un conciertu de los cinco grupos finalistes del I Concursu de Maquetas Musicales, entamáu pola Universidá, cola participación de Plan B, Verde Cannaia, F. Side, The Paperbacks y Sono Dementia.

El grupu ganador va participar na Final de Maquetas Musicales del G9, que se va celebrar en Cuenca nel mes d’ochobre.

El xueves 6 mayu, na Casa de los Alberti de Llangréu, va inaugurase a partir de les siete y media la tarde, el festival Tolo d’Asturies10 cola presentación de cursos d’acurdión y el conciertu d’Ignacio Alfayé , Cyrille Brotto y Xuan Nel Expósito. Al día viniente, vienres 7 de mayu, y nesti casu nel Nuevu Teatru La Felguera, tendrá llugar el conciertu “La muyer tien la voz”, con Espido y Mapi Quintana, de magar les ocho y media la tarde.

Yá’l sábadu, nel Recintu ferial Estación d’autobuses de Llangréu y a partir de les 12 hores, va abrise la Feria d’artesanía y gastronomía y la tercer Feria del discu y el llibru n’asturianu, incluyendo na inauguración, la presencia de la Banda de Gaites Conceyu de Llangréu.

A les 12:30 sedrá’l turnu de la Banda de Música Conceyu de Llangréu, y a les 13:15, el de la cantante Tina Gutiérrez. La xornada va pesllase a partir de les nueve lam nueche con un conciertu de Duerna, Felpeyu y Frigg nun espectáculu especial, Dixebra ya IMG.

Tolo d’Asturies10 va terminar el domingu 9 mayu, nel Recintu ferial Estación d’autobuses de Llangréu, con una xornada que va entamar a les 12:30 y onde va poder cuntase cola presencia de la Banda de Gaites La Salle, y colos cantadores de tonada Marisa Valle Roso, Fernando Valle Roso, Raúl Díaz García, Francisco José Fernández Fernández y Mari Celi Fernández Palicio.

Piésllase l’eventu con un conciertu de Jerónimo Granda a les 17:30 y un Espectáculu diseñáu a costa fecha pa Tolo d’Asturies10, tituláu “Homenaxe a la gaita”, que coordina Xuan Nel Expósito y nel que van participar Ramón García Morán (teclaos), Rubén Álvarez (guitarra), Horacio García (baxu y contrabaxu), Chus Castro (batería), Andrés Fernández (gaita), Pablo Carrera (gaita), Chus Solís (gaita), Dani García Argüelles (gaita), Nacho Cuetos (gaita), Adrián Muñiz (gaita) y Andrea F. Joglar (gaita).

La primer edición del ‘Primer sidre l’añu’, festival sidreru qu’acoyó’l Muséu del Pueblu d’Asturies los díes 2, 3 y 4 d’abril que tenía como oxetivu recuperar la tradición de les espiches de Selmana Santa qu’inda se caltien en munchos puntos d’Asturies, foi según los participante “tou un ésitu de participación, superando toles mires”.

Más de 5.000 persones averáronse pol recintu museísticu, magar l’agua que se dexó cayer en Xixón estos díes, pa prebar la sidre nuevo de los sesenta llagares que participaron nesti eventu y, coles mesmes, esfrutar de la gran cantidá d’actividaes programaes estos trés díes alredior de la sidre, la cultura, y la música asturiana.

La entrada pa esfrutar de los conciertos, la exhibición d’esportes tradicionales, les esposiciones y los puestos asitiaos alredior del festival yera dafechu gratuita, teniendo solo qu’abonar cinco euros aquellos interesaos en prebar la sidre. En recibiendo una pulsera, solo facía falta averase a la barra y solicitar tolos culinos que se quinxera y del llagar deseyáu ente la llarga llista de productores de sidre que participaron nesta primer edición del ‘Primer sidre l’añu’. Pa ello, tamién podría faese con un vasu de cristal comemorativu, con un costu de 1,5 euros, o con xarres de sidre tradicionales de cerámica feches en L.lamas del Mouro (Cangas del Narcea), por 10 euros.

Los amantes de la sidre tamién pudieron esfrutar coles tasties o prebes de sidre dirixíes por Manuel Busto, dedicaes cada xornada a un productu. Asina la sidre brut foi protagonista’l vienres; la sidre de xelu, el sábadu; y l’auguardiente de sidre, el domingu. Tamién d’una esposición de la colección récord Guinness de corchos de sidre y otra d’etiquetes al cargu de la asociación ‘Sidrastur’.

Nel ámbitu musical, destacó la cellebración del certemante ‘I Asturianada y sidre’, entamáu por Xosé María García ‘Llábana’ y pol musicólogu Llorián García, nel que participaron el presente y el futuru del cantar asturianu. Asina, pudieron trate a xente tan oldeada comu Carlos Rubiera, Mari Luz Cristóbal o Anabel Santiago, y nuevos valores comu Raúl Díaz, Noemí Torrado o los hermanos Marisa y Fernando Valle que, inclusive, llegaron a componer dalgún tema dedicáu al festival. Tamién aidaron a animar el festival los componentes de la’Andecha de Folklore Tradicional La Deva’ colos sos bailles y la so música los trés díes del certame.

Toes estes actividaes tuvieron una gran repercusión nos medios de comunicación de Asturies y de fora de les nueses fronteres, con presencia d’un equipu de televisión d’una cadena d’ámbitu estatal, comu La Sesta, o de la televisión pública británica BBC pa tomar imaxes pa un episodiu de la serie documental ‘Hidden Spain’, especializada en gastronomía, que ta asesoráu pola Sociedá Rexonal de Turismu.

Dende la Fundación Asturies XXI y la revista La Sidra –publicación líder del sector sidreru con una tirada mensual de 3.000 exemplares–, organizadores de ‘Primer sidre l’añu’, namá podemos calificar esta primer edición del festival comu un ésitu y yá atopamos buscando nueves idees p’ameyorar en tolos sentíos esti eventu que pretendemos consolidar comu un referente nel mundu de la sidre. Pa ello esperamos siguir cuntando col sofitu de la Conceyalía de Cultura Tradicional y el Muséu del Pueblu d’Asturies, al que namá podemos da-y les gracies pol esfuerciu que fixeron pa espublizar l’eventu y faelo posible. Tamién a tolos colleutivos participantes, comu Sidrastur, El Garrapiellu y l’Andecha de Folklore Tradicional La Deva’, y a toles presones que fixeron posible col so trabayu’l bon desendolcu del festival.

Tampoco podíamos escaecer de los llagareros, que nun duldaron en dengún momentu en collaborar con esta ‘Primer sidre l’añu’ dende’l primer momentu nel que se-yos comentó la posibilidá de participar nel festival. El próximu añu esperamos que’l númberu de 60 llagares d’esta edición sía superáu y consolidar la ‘Primer sidre l’añu’ comu un festival sidreru de referencia mundial.

El conciertu qu’esti xueves 8 d’abril va ufrir dende les 21,30 hores DRD nel local L’Esperteyu d’Uviéu completa la minixira qu’esti grupu faciendo per dellos llugares d’Asturies y que ya los llevare a Avilés, La Pola y Xixón. Nel conciertu van tocar un repertoriu basáu nos sos dos discos publicaos.

Esti tríu ta formáu por músicos pernomaos de la escena folk asturiana con Borja Baragaño a les flautes, Dolfu Fernández col violín, componentes de Llangres, y el músicu de Dixebra Rubén Bada col buzuki, la guitarra y el violín.

DRD tien grabaos hasta’l momentu dos discos de composiciones propies y delles otres basaes nos ritmos tradicionales de la música asturiana.

El próximu fin de selmana del 17 y 18 d’abril celebraráse en Xixón un CURSÍN d’harpa céltica a cargu del harpista francés Fred Bougouin-Kramer.Les persones interesaes en dir al cursín, que tien un coste de 30 EUROS, tienen de ponese en contautu cola organización nes señes que vienen darréu, onde facilitaráse tola información complementaria sobre esti eventu:dagarcuesarrobayahoo.es.

El cursín, que tá despieslláu a tolos niveles, nun fai falta tener conocimientos previos, desendolcaráse nes dependencies del Muséu Pueblu d’Asturies allugáu na ería del ríu Piles, cabu l’estadiu fútbol de El Molinón.

El cursín tendrá esti horariu, sábadu día 17, de 15 a 20 hores, y domingu 18, de 11 a 15.Esta actividá complementaráse con un CONCIERTU de Fred Bougouin na nueche del sábadu día 17 d’abril, sobre les 21,30 hores, na tabierna Cuévano, en La Pola Siero, allugada na plaza Les Campes, na salía pela antigua carretera a Xixón, que tará despieslláu a tolos públicos y nel que collaborarán los músicos asturianos Dani García de la Cuesta y Pedro P. Sanjurjo, miembros del grupu Zapica.

Tamién se fará una visita guiá pel Muséu Etnográficu Pueblu d’Asturies y el Muséu la gaita, allugáu nel mesmu llugar.

Fred Bougouin ñació en Poitiers en 1967 y entama los sos estudios d’harpa a los 6 años, averándose bien ceo al usu de l’harpa céltica, y al gustu pola composición, les igües y la música electroacústica. Dende entós, trabaya en delles formaciones y collaboró con otros harpistes n’actividaes como los Rencontres Internationales de Harpe Celtique de Dinan, xuntu a Janet Harbison, Katrien Delavier o Myrdhin. Nestos alcuentros, gana’l primer premiu d’improvisación nel añu 1993, y el segundu de composición nel 1994.

El so pruyimientu llévalu a desendolcar una nueva téunica na qu’interpreta nel instrumentu tocando con uñes llargues na mandrecha y curties na manzorga. Participa en diferentes grupos y estilos musicales, medieval, renacentista, reggae, pop-rock, suramericano, y sobre tou, célticu, con más de 1000 conciertos n’Europa, dándo-y una nueva visión al usu del instrumentu.

Frédéric Bougouin-Kramer, toca con harpes céltiques de la casa musical CAMAC, con cuerdes metáliques y de nailon. Fue cofundador de l’asociación L’Herbe D’Or, compositor miembru de la SACEM, participó na produción de 11 cds y en munches grabaciones como invitáu, como col grupu Solstice, con Chris Dawson y el grupu Keltiac, y la participación con Mike Mac Goldrick, Sylvain Barou, Alain genty, Annie Ebrel y Dan ar Braz, y equí n’Asturies, nel trabayu caberu del grupu La Bandina.

Más información del Cursín d’harpa céltica.