Música

La “Uviéu Filarmonía” va dar un conciertu dixebráu en dos partes: na primera, “Talita Kumi”, de Y. Wolf Ferrari, van actuar como solistes Joan Martín Ruco (Cristu), Martin Mitterutzner (Evanxelista) y (Jairo) por confirmar, y na segunda, “Lieder”, de R. Straus, van faer lo propio José Bros (tenor) y María Gallego (Soprano), toos ellos acompañaos pol coru “El León de Oro”, dirixíu ésti por Marco Antonio García de Paz. El conciertu va celebrase’l xueves 29 d’abril.

La escuela de Música de Grau ta acabante anunciar la estrena de páxina web nueva, onde pue atopase tola información sobre la mesma, incluyendo vidios ya imáxenes de les actuaciones organizaes pola mesma, amás de tolos horarios d’actividaes, principalmente cursinos, qu’organiza’l centru.

Páxina web nueva

El cantautor Alfredo González, ganador del Premiu al Meyor cantar n’asturianu 2009, entama una llarga xira ente’l mes de mayu y xunetu. El primer conciertu va celebrase’l 5 de mayu, a les ocho la tarde, nel Centru Cultural Caxastur d’Uviéu y con entrada llibre hasta completar aforu. Amás, el 7 de mayu va participar na celebración académica del Día de les Lletres, nel Teatru Campoamor d’Uviéu.

Darréu va desplazase a Madrid, onde va participar nun conciertu como artista convidáu de Kike Suárez y El Escorribanda, sedrá l’8 de mayu, a les 22:30, na Sala Sol. Les entraes véndense a ente 8 y 13 euros.

L’11 de mayu, Alfredo González llega a Euskal Herria, y esi mesmu día toca n’Iruña, a les ocho la tarde, y xunto con Daniel Merín, nel Onki-Xin. La entrada va ser llibre. Sigue per tierres vasques, el 13 de mayu, a les nueve la nueche, cuando va tocar nel Altexerri Club de Donosti, con Daniel Merín y Edu Vázquez. Entrada de 10 euros. Pieslla la mini xira vasca en Bilbo, colos mesmos artistes y preciu, pero na sala Cotton Club, el 14 de mayu, a les ocho la tarde.

El 17 de mayu torna a la capital del Estáu pa tocar na Uxu Real de Madrid, a les 21:30 hores, xunto a Los amantes de Jane, y con unos precios entá por determinar.

La xira sigue dempués pel Mediterráneu, el 16 de xunu en L’Astrolabi de Barcelona, a les 22:3 y con entrada llibre. El 19, en Castellón, na sala Tres Historias, y tamién de baldre. La hora d’esti últimu ta por confirmar.

El 20 de xunu, n’El Varadero de Gandía, va tocar. La taquilla y hora tán por determinar, como tamién lo tán nel conciertu que va dar el 3 de xunetu, nel Pussy Wagon d’Albacete xunto a otros artistes.

Los dos cabros conciertos de la xira van celebrase, el 15 de xunetu n’Alpedrete, Madrid; y el 16 a les 22:00 hores, en La Pequeña Bety de Madrid, por 6 euros.

Los Secretos preparen una gran sorpresa pal so públicu. Mientres la próxima primavera van ufiertar una serie de conciertos nos que podrá esfrutase d’un repertoriu inéditu, colos temes más brillosos y al empar menos conocíos de la so estensa obra.

Amás nesta ocasión quieren rindir homenaxe a los ídolos que marcaron la so carrera versionando dalgunos de los sos clásicos. Pa ello escoyeron cortiles de pequeñu aforu onde sentir la cercanía del so públicu y esfrutar con ellos d’estes rareces que’l grupu siempres quixo tocar en directu.

Una xira singular onde volver afayar cantares, y na que cada conciertu puede ser únicu, cargáu d’emotividá y sorpreses pa los más incondicionales del grupu.

El conciertu de Los Secretos va celebrase güei, sábadu 24, nel Teatru Xovellanos de Xixón, a les 21 hores.

Yá nun queda nada pa la XXII Edición del Conciertu pola Oficialidá, que como cada añu va xuntar lo meyor de la música n’asturianu, representao nesti casu nos soníos de Xentiquina, DRD, La Curuxa, Toli Morilla, Misiva, Skama la Rede, Los Berrones y Dixebra. Más d’ocho hores de música, reivindicación y folixa, en dos escenarios independientes que van alternar les actuaciones ensin tiempos muertos nin descansu. La xornada va celebrase’l próximu sábadu 24 d’abril, nes instalaciones de la Feria de Muestres de Xixón, y a partir de les siete la tarde.

El preciu de la entrada ye d’ocho euros anticipada y de diez na puerta. Vendiéndose nesta ocasión en La Casa Posafuelles y Malayerba nunca muere, n’Uviéu; Café Trisquel, El Barucu y Llibrería Alborá, en Xixón; n’El Cafetón n’Avilés; en La Gueta de Candás; nel Mesón Cervantes de Tinéu; na Panadería Aldín de L.luarca; nel Bar Azul de Cangas; nel Café Centro de La Puela Allande; en L’Abellugu de Mieres; en La Palmera, en La Pola L.lena; nel Abre César de La Pola Siero; nel La Posta, de Nava, nel Bar Piero’s de Grau y nel Tom Mallory si se quier merca la entrada en L’Entregu.

L’Auditoriu y Palaciu de Congreso Príncipe Felipe va acoyer na so sala principal un conciertu d’una hora dirixíu por Carlos Miguel Prieto y con Alexandre da Mariña, como vigulín solista. L’entamu ta previstu pa les ocho la tarde del vienres 23 d’abril.

Programa: C. Chavez, Sinfonía númberu 2 “Sinfonía india”; M. Daugherty, Fire and blood pa vigulín y orquesta; y H. Berlioz, Sinfonía fantástica, op. 14.

Les entraes pueden mercase nes taquilles del Teatru Campoamor (12:00 a 13:30 h. y de 16:00 a 20:00), na rede de Caxeros Caxastur y al traviés del teléfonu y la rede, en 902 106 601 y www.cajastur.es Los precios son d’ente 24’50 y 29 euros.

El Pabellón Caxastur del Recintu Ferial Luis Adaro de Xixón, va acoyer un conciertu del intérprete Martin Taylor, que va ufiertar una sesión de jazz. L’artista ye ún de los guitarristes más célebres del mundu y tien tocao y grabao con autores como Stephane Grappelli, Chet Atkins, Bill Wyman & Rythm Kings, Dionne Warwick, Sacha Distel y Bryn Terfel.

La entrada al conciertu ye de baldre y hasta enllenar l’aforu.

El dúu de guitarres formáu por estos dos artistes va tocar güei, xueves 22 d’abril, a partir de les 22:30 hoes, nel llocal La Palmera, asitiáu na avda. de la Constitución 2, de La Pola L.lena.

Amás, esti vienres y el sábadu, a partir de les 24 hores, van tocar nel Swing Jazz Club d’Uvieu, na cai Canóniga 14, Corrada del Obispu, n’Uviéu.

La entrada a los trés conciertos ye de baldre.

El grupu folk llega esta tarde a les 20:30 hores al local Cá Beleño d’Uviéu. Esti tríu ta formáu Borja Baragaño, Dolfu Fernández y Rubén Bada y suel incluíse na etiqueta llamada folk de cámara. DRD tien grabaos hasta’l momentu dos trabayos discográficos, onde a les composiciones propies xunten otres basaes nos ritmos tradicionales.

El Conceyu de Corvera d’Asturies ufre places de baldre pa un cursu d’aniciu en llingua asturiana impartíu pola Casa de la Llingua y que va celebrase los martes y xueves de 17:00 a 19:00 hores con una duración de venti hores, a partie del 4 de mayu. Les inscripciones puen facese nos númberos 610 748 604 y 985 570 644, nel Centru Sociocultural de Les Vegues, o nel corréu elenarodriguez@ayto-corvera.es