Música

El cantautor catalán Guiu Cortés, conocíu como “El niño de la hipoteca” va amenizar la nueche xixonesa esti sábadu 31, a partir de les 22 hores. El ciclu “Nueches na Plaza Mayor” recibe a esti artista revelación, qu’usa l’humor y lo politicamente incorrecto como parte del so espectáculu.

Más información del artista catalán

Les “Nueches na Plaza Mayor” de Xixón recibe güei, xueves 29, a partir de les diez de la nueche, la música de Martha Reeves, considerada diva del Soul desque blancos y negros empezaben a baillar xuntos na América convulsa de mediaos de los 60 y alma del sellu Motown. Reeves trabayó y cantó en directu con James Brown o Bruce Springsteen y sigue editando y produciendo discos güei, en dexando les sos obligaciones polítiques na so Detroit natal.

Acompañándola, va tar una auténtica “all star band” con dalgunos de los meyores músicos de rhythm and blues, soul y de jazz d’Asturies. Una nueche inolvidable cola que va entamar una nueva edición d’unu de los festivales más importantes del branu xixonés, l’Euroyeyé.

El Festival vuelve a trayer a Xixón, un añu más, conciertos, esposiciones, cine, xuntances d’scooters y otres actividaes venceyaes cola cultura pop de los sesenta. Asturnews ufre’l programa completu d’actividaes.

Pograma completu del Euroyeyé

Dientro del ciclu de les “Nueches na Plaza Mayor”, de Xixón, güei miércoles a partir de les diez, van actuar los miembros de l’Agrupación Artística Xixonesa. Una actividá que nomen “Festival de variedaes” nel que participen Nerea Vázquez, José A. Ibáñez, Silvia García, Vanesa Llera, Víctor, A. Nosti, Susana Abarganes, Miriam López, Laura Fernández, Aquilino Carbayeda. Danza clásica española: Dirección de Paula Álvarez Cueto. Presenta, José Ramón Uría. L’actu ta al cargu, na dirección artística, de Fernando L. Menéndez.

Güei, miércoles 28 de xunetu, a partir de les diez y media la nuehce, Joaquín Sabina llega a Xixón. El Palaciu los Deportes de La Guía ye’l llugar escoyíu pa romper el silenciu del cantautor n’Asturies. “Vinagre y rosas”, el so discu nuevu, cunta con trece nuevos cantares del emblemáticu personaxe.

L’álbum con cantares producíos (sacante Tiramisú de limón y Embustera, con Galbana na producción) por Antonio Gª de Diego, Pancho Varona y José A. Romero, indixebrables colegues, compañeros y equipu músicu habitual de Joaquín Sabina. Viudita de Clicquot, Cristales de Bohemia, Parte metereológico, Ay! Carmela, Virgen de la Amargura, Agua pasada, Vinagre y rosas, Embustera, Nombres impropios, Menos dos alas, Crisis, Blues del alambique… Y como bonus track, Violetas para Violeta. Son los cantares de Vinagre y rosas, un álbum que se publica simultáneamente en dos formatos distintos: n’edición Llibru-CD con dibuxos y testos de Joaquín Sabina y n’edición CD estándar.

El conciertu entámalu Cadena 100 y tien un preciu d’entrada de 40 euros.

El ciclu de les Nueches na Plaza Mayor de Xixón recibe güei a les 22:00 hores a Martha Wainwright, cantanutora canao-estaoxunidense que trai a Xixón el so trabayu “je ne sais quoi”, calificáu como “una maraviyosa colección de cantares d’Edith Piaf, emotivamente cantaes y arelladamente interpretaes sol títulu de ‘Sans Fusils, Nin Souliers, A Paris”.

L’álbum grabóse demientres les trés íntimes velaes nel Dixon Presta Theatre, el pasáu xunu rexistrando’l repertoriu de la “chanteuse” cola increíble y característica voz de Martha que xenera tensiones y urxencies p’apurrir en paralelu dambes emociones y la mística vulnerabilidá d’Edith Piaf.

Les semifinales de la trixésima edición del Concursu del Canción Asturiana van celebrase los díes 27, 30 y 31 de xunetu na Plaza Mayor de Xixón, a les 18:45 hores.

Les finales van facese demientres los díes 2 y 3 d’agostu, a les 18:45 hores, y 4 d’agostu a les 19:30 hores na Plaza Mayor. Teniendo llugar la entrega de premios, nel mesmu llugar, el domingu 8 d’agostu a les 12:00 hores.

El Foru Estatal pola Memoria, la Federación Asturiana Memoria y República y El Subko Producciones acaben de sacar al mercáu un discu colos directos del II Republicastur, conciertu fechu en Mieres, en 2009, como homenaxe a la Revolución d’Asturies, d’ochobre de 1934. Nel discu participen, con cantares en castellán y n’asturianu, los grupos Boikot, Fe de ratas, Skontra, Desakato, Taranuss y Sambre. 18 temes que pueden mercase por seis euros.

Llistáu completu de cantares del discu

Güei, llunes 26 de xunetu, a partir de les 12:30 hores, la Banda de Música Municipal de Pinto (Madrid), dirixida por José Antonio Blasco Lambíes, va ufrir un conciertu de baldre nel Quioscu de Begoña, en Xixón, nel que van poder sentise temes d’autores como Roque Baños, José R. Pascual, Laredo, Hans Zimmer o J.L. Holsay, entr otros.

Güei, llunes 26 de xunetu, inaugúrense les Nueches na Plaza Mayor con un cartelu de luxu apináu de conciertos que van dar empiezu cada nueche a les 22:00 hores. Asina, dende’l día 26 y hasta el 5 d’agostu xixoneses y visitantes van poder esfrutar d’Eli “Paperboy” Reed, Martha Wainwright, Martha Reeves, Zenet, el Niño de la Hipoteca, Los Oricios, Nonno, amás de la programación de l’Agrupación Artística Xixonesa y el Festival Folclóricu Internacional.

L’actuación d’esta nueche ye la d’Eli “Paperboy” Reed, un rapaz americanu que dicen “paez llegar directamente dende 1960, glaya como Aretha Franklin, tien l’allegría de Cooke y l’enerxía de James Brown”. Voz potente, brutal sección de vientos pa temes bien baillables unos y otros de los de baillar pegaos.

Pa los amantes de la música negra, ye l’home del momentu. Tres el so magníficu “Roll with you”, el cantante acaba de publicar un nuevu discu, “Come and get it”, que vien cola promesa de ser igual o meyor que l’anterior. Reed axunta según los críticos “toles cualidaes d’un artista portentosu. Talentu. Mocedá. Pasión pol so trabayu. Respetu polos clásicos”. La Plaza Mayor de Xixón va recibilu de xuru ente aplausos.

La Ilesia de San Pedro, en Xixón, va acoyer un conciertu dedicáu a “La Integral d’Órganu” de J. S. Bach, güei, llunes 26 de xunetu, de magar les ocho la tarde. L’actividá encuádrase dientro del programa “Un alcuentru con Bach”, que se celebra nel 325 aniversariu del músicu.

El conciertu va tar al cargu del organista Adolfo Gutiérrez Viejo, que va tocar Los Cuatro Toccatas y Fugas (en Fa M. BWV 540, Do M. BWV 564, re m. (Dórica) BWV 538 y en re m. BWV 565).