Música

El Ciclu “Folclor na cai”, que se celebra n’Uviéu esti branu, va celebrar actuaciones nes cais del barriu vieyu. El sábadu dende les 11,30 a les 14,30 hores, van ser protagonistes la banda de gaites del Centru Asturianu d’Uviéu y el grupu de baille “Noceu” de Trubia.

El domingu, 15 d’agostu, col mesmu horariu, van actuar la banda de gaites “Xácara” d’Uviéu y el grupu folclóricu “San Antonio” de Fitoria.

Esta nueche, a les 22:30 hores, nel “Teatru Toreno” de Cangas del Narcea, va celebrase un recital a cargu de Chus Pedro, ex componente del grupu Nuberu, que va tar acompañáu por Gabino Antuña. El conciertu faise dientro de les Actividaes Abiertes, programaes na Universidá Asturiana de Branu (UABRA), qu’organiza l’Academia de la Llingua Asturiana.

Los XXVIII Cursos de Branu de l’ALLA, asitiada esti añu dientro de la Universidá Asturiana de Branu (UABRA), van pesllar mañana la primer selmana d’actividaes con un conciertu del grupu Falanoncaduca. L’actividá va celebrase na discoteca Zaycor de Cangas del Narcea de magar les siete la tarde y n’ella, el grupu va presentar el so repertoriu, qu’asitien no que llamen “Mecigayu sound”.

Formada en 2007, Falanoncaduca ye una banda nacida de la unión de dellos músicos mozos de L.lena, Uviéu y Xixón. Autodefinen el so estilu como “Mecigayu Son”, una mestura de soníos que van del rock a los ritmos llatinos, ensin escaecer el ska o’l folk astur. Cola reivindicación siempre presente nes sos lletres, editaron en 2009 la maqueta “En llingua afilada” y yá tienen pisao abondos escenarios de dientro y fuera d’Asturies.

El grupu va tar ceo tamién na “Nueche Astur-Romana” de Carabanzo, llevando’l so folixeru directu.

http://www.myspace.com/falanoncaduca

El grupu asturianu de folk-fusión La Col.lá Propinde, representará esta fin de selmana a Asturies na cuarenta edición del Festival Intercélticu de Lorient, qu’esti añu ta dedicáu a la Bretaña. El grupu dará a conocer énte’l públicu bretón y tolos visitantes que tien esti eventu, el más importante festival de música celta del mundu, el so tercer trabayu discográficu, “A Teyavana”, qu’acaba salir al mercáu col sellu Algamar Producciones.

Trés van ser les oportunidaes que van tenese pa poder sintir les músiques y cantares del grupu de La Pola L.lena, la primera d’elles el mesmu vienres 6 d’agostu, de magar le diez de la nueche, na inauguración del Festival, nel recintu de la “Quait de la Bretagne”, xunto colos grupos bretones Hitks y Pascal Lamour.

“A teyavana” ye un discu con 12 cantares onde se combinen los temes de reellaboración tradicional y los de composición propia del grupu. Amás, nesta ocasión, cunten cola collaboración d’Esther Fonseca, que pon voz al cantar “2417”. “A teyavana” foi grabáu nos estudios Tutu ente mayu y setiembre, cola producción de Sergio Rodríguez y Ánxel González.

La Plaza Mayor de Xixón acueye güei, xueves 5 d’agostu, la “Nueche de Grupos Asturianos”, cola participación de Los Oricios y Nonno. L’actuación va entamar a les diez de la nueche con Los Oricios, pa siguir, de magar les once, con Nonno, banda formada en 2006. Con estes actuaciones fina’l ciclu “Nueches na Plaza Mayor”, qu’entamara va dos selmanes cola música d’Eli Paperboy.

Los Oricios créanse como un xiru alternativu dientro de la banda Amores Perros, cola fin de diversificar estilos y crear daqué mas cenciello d’escuchar que’l tangu, una bona sida pa saltar nel escenariu, cosa que nun podíen facer n’Amores Perros. Formáu por cuatro de los sos componentes, Rafa, David, Leo y Adrián, a los que se xune como guitarrista Jairo, y que contien temes tan “pegañosos” como Cuenca Minera o Quiéreme.

Nonno fórmase pol alcuentru de músicos mientres trabayen xuntos como músicos de directu, estudiu y televisión, desenvolviendo asina un venceyu personal y musical bien sólidu, hasta que deciden xunir fuerces pa crear la so propia música. Asina, Nonno ñaz “de la ilusión qu’apurren l’autonomía y la llibertá d’a tar implicaos nun proyectu musical propiu”, según los propios miembros de la banda.

El ciclu Arte na cai cunta güei, 4 d’agostu, cola participación de “Canivolas”, a les siete la tarde, nel escenariu de Begoña. A la mesma hora, en La Plazuela, toca “Helios”. En Xixón-Sur toca “Aravan”. Y a les ocho, na Ciudadela, toca Rody Herrera.

El Festival Folclóricu Internacional de Xixón va recibir güei, 3 d’agostu, a partir de les 22:30 hores, l’actuación del grupu xixonés “Trebeyu”, el grupu de coros y dances “Rosa del Azafrán”, de Consuegra (Toledo). Amás, van participar los balés folclórico “Pom Kanel” d’Islla Martinica y “Magistral Hue Huecoyotl” de México.

L’escenariu de la Plaza Mayor de Xixón va acoyer del 2 al 4 d’agostu, el Festival Folclóricu Internacional, cola participación de grupos d’Asturies, Estremadura, Toledo, Caúscasu, Venezuela y otros llugares de tolos continentes.

Güei, llunes 2, a les 22:30 hores, van participar los grupos “Los collacios” de Xixón, el “Grupu de coros y dances Fuente de la Plata”, de Badayoz y el Balé Folclóricu Altan Burac, de la Repúbica de Buriatia.

La trixésima edición del Concursu del Canción Asturiana va celebrar la final na Plaza Mayor de Xixón, demientres los díes 2 y 3 d’agostu, a les 18:45 hores, y 4 d’agostu a les 19:30 hores na Plaza Mayor. Teniendo llugar la entrega de premios, nel mesmu llugar, el domingu 8 d’agostu a les 12:00 hores.

Xixón acueye güei dos conciertos dientro del ciclu Arte na cai. A les 19:00 nel escenariu de Begoña van tocar “Los 2 de Oceanic”, mientres qu’a les ocho, va ser “Música encantada” quien amenice a los presentes na Ciudadela de Capua.

Mañana, 3 d’agostu, a les siete, l’escenariu de Begoña acueye a Luggoni. A la mesma hora, en La Plazuela, va actuar el Ballet Folclóricu Magisterias Huahuacoyotl de Durango, México. La Plaza’l 6 d’agostu acueye a “Cuatro perros”, y a les ocho, “Zzaj duo” na Ciudadela.