Música

Como cada xornada sigue’l mercáu y les esposiciones n’estramaos puntos del conceyu. A partir de les doce, la Banda de gaites do concello de Verea anima’l parque tapiegu. Darréu, la banda escocesa Willwood anima’l puertu de la villa. Y yá a les cinco la tarde, y énte l’ésitu del añu pasáu, recupérase l’actividá ‘Llavando en Represas’. Una curiosa iniciativa na que los neños van aprender a llavar como se facía antaño. El puntu d’alcuentru va ser nel parque de Tapia, al par de la caseta de FIDO. Los neños tienen de traer ropa vieyo, un calderu de playa y una pieza de xabón.

A les seis van poder esfrutar d’una chicolatada, con un cuentacuentos al cargu d’Alba Cascudo y Verónica Rei. A les ocho, celébrase un alderique. Los prestixosos músicos John Joe Kelly y Brian Finnegan van participar pa disertar sobre la so trayectoria musical. Va ser nel auditoriu de la casa de cultura.

A les diez y media celébrase’l Muralón Folk atúa na sablera’l grupu Brian Finnegan Trio y el gallegu Chirlo Merlo.

La Sociedá Uvieina de Fiestes organiza esti sábadu nel Cascu Antiguu del conceyu, y de magar les 11:30 hores, l’actuación de la banda de gaites “La llaguna del Torollu” de San Cloyo y del grupu folclóricu “La Inmaculada” d’Uviéu.

El domingu, dende les 11,30 a les 14,30 hores actúen, la banda de gaites del Centru Asturianu” d’Uviéu y el grupu de baille, coros y dancies “Ciudá d’Uviéu”, nel mesmu espaciu.

El gaiteru asturianu Hevia va ser l’encargáu de dar entamu a esti festival folk estremeñu que va pesllar la banda escocesa Wolfstone. La cita cola música d’Hevia va ser güei, 19 d’agostu. Nel restu de les xornaes va cuntase cola música tradicional estremeña, nos instrumentos de los grupos y artistes del llugar, rematando les xornaes, el 21 d’agostu.

Hevia va tocar temes del so discu últimu “Obsesión” y ésito de la trayectoria, con siete discos al llombu y dellos millones de copies vendíes en tol mundu. El gaiteru asturianu ye amás un importante fabricante de gaites y dende l’añu pasáu, miembru d’honor de l’Academia de la Llingua Asturiana.

El Xixón 5º40’ entama les sos xornaes más importantes de magar esti xueves. Sigue’l I Alcuentru de Cerveces del Mundu na playa de Poniente, y los conciertos escomencipien a repartise per estremaos llugares del conceyu, entamando n’El Campu Valdés y Cimavilla un Mercáu Tradicional Asturianu, de 11 a 21 hores.

A les siete y media nel Paséu de Begoña va actuar la Banda de Gaites Noega, y una hora más tarde, en La Plazuela San Miguel va tar el Grupu folclóricu Xiringüelu. L’escenariu de la Plaza Mayor acueye a les 22:30 al grupu irlandés Lunasa.

Lunasa

Lúnasa ye un grupu irlandés de música internacionalmente aclamáu. Son reconocíos polos sos emocionantes melodíes y tonaes, amás de pola so habilidá pa combinar los soníos del vigulín, la xiblata, la gaita irlandesa, la guitarra y el baxu. Los sos álbumes son superventes nel so xéneru. Dos de los miembros orixinales (Seán Smyth y Trevor Hutchinson) entá formen parte del grupu.Otros como Michael McGoldrick, Donogh Hennessy o John McSherry abandonáronlo, pero collaboren dacuando.

El Xixón 5º40’ sigue güei col so programa de conciertos y dende doce la mañana y hasta la una y media de la nueche, col I Alcuentru de Cerveces del Mundu na playa de Poniente.

A les ocho y mediu, l’Escenariu de la Plaza Mayor va recibir al grupu asturianu Skanda, y a les diez y media, sedrán los componentes de Xera, tamién d’Asturies, los encargaos de pesllar la xornada.

Skanda

Skanda ye un grupu mierense que cunta con casi 15 años de trayectoria y cinco disco orixinales, amás de participar en dellos recompilatorios nel so haber. El postreru, Folk & Roll Circus, acaba de salir al mercáu. El so estilu amiesta los sones del rock, el soul, jazz o ska cola música tradicional desenvolviendo’l denomináu folk mestizu o industrial.

Xera

Lleven seis año trabayando nel so proyectu, naciendo como grupu musical nel Valle del Trubia. Verval, Flavia, Anibal, Míguel y Ana dan llugar a un directu con personalidá propia onde s’entemez música electrónica con preseos acústicos de la música folk, como’l bouzouki, violín, gaita o zanfonía. La densidá ye una característica básica de la so música. Podemos atopar dende reminiscencies del rock sinfónicu de los setenta, a soníos envolventes propios del boom sintéticu de los ochenta.

Sigue la celebración del Festival Intercélticu d’Occidente en Tapia, onde güei, miércoles 18, va poder visitase’l mercáu medieval con ambientación musical nes cais a partir de les cinco. Media hora más tarde, va celebrase un taller, dientro de la programación de la Escuela Internacional de Música Folk, que pon en marcha una serie de talleres d’iniciación a distintos instrumentos. El primeru va ser un taller de tambor asturianu que se va desenvolver na Escuela de Música de Tapia.

A les seis celébrase un taller de gaites, que va ufiertase a los visitantes interesaos na Escuela de Música, nel barriu de San Martín. Dos hores más tarde y dintro del programa Culturalingua, la santirseña Aurora García Rivas va presentar la so novela “As razóis d´Anxélica”, celebrándose darréu un alderique al rodiu del momentu que vive la creación lliteraria femenina en gallego-asturianu.

A les diez, van actuar los miembros del grupu Martínez & Expósito, nel auditoriu

Al igual que n’años anteriores, el festival va estender los sos conciertos a toa Asturies. Mientres catorce díes Xixón va acoyer siete conciertos gratuitos, nel Centru Municipal Integráu de Pumarín Xixón-Sur y nel auditoriu del IES Fernández Vallín. Tamién va haber una collaboración especial col Conservatoriu Superior Música “Eduardo Martínez Torner” d’Uviéu, onde se va celebrar un conciertu.

L’auditoriu del IES Fernández Vallín de Xixón va acoyer dos recitales, los díes 18 y 19 d’agostu, protagonizaos polos pianistes norteamericanos Amy Gustafson y Gregory De Turck respectivamente. Los recitales nel Fernández Vallín van ufiertase a les 20:00 hores.

Especial interés revisten les cuatro exhibiciones pianístiques que, sol títulu de “Ciclu de Nuevos Solistes Internacionales”, van celebrase nel Centru Integráu de Pumarín Xixón-Sur los díes 24, 25, 26 y 27 d’agostu, n’horariu de 19:30 hores.

El Conceyu de Xixón repite y vuelve a celebrar el Festival Xixón 5º40’. Esti martes, 17 d’agostu, entamen les actividaes con una novedá, la celebración dende les doce la mañana y hasta la una y media de la nueche, del I Alcuentru de Cerveces del Mundu na playa de Poniente, que va durar, como’l Festival, hasta’l domingu 22.

A les ocho y media, l’Escenariu de la Plaza Mayor va abrir el programa de conciertos con Corquiéu, grupu del oriente d’Asturies. Dos hores más tarde, y llegaos dende Irlanda, van tocar Comas.

Corquiéu

El grupu entama l’andar musical nel añu 1997 en Ribeseya, d’aquella la formación taba formada por cinco miembros que xuncieron los sos estremaos gustos musicales. Iván Vega, Pablo Valdés, Roberto Suárez y David Mateos entamen a montar un repertoriu sofitáu en tarreces tradicionales asturianos y composiciones propies.

Comas

Esta ye una banda firmemente basada nos raigaños de la música irlandesa, pero cola habilidá d’ufiertar composiciones orixinales. Siempres abiertos a les nueves influencies amuésense respetuosos col pasáu tradicional que-y da a Comas un sitiu merecíu ente los grandes grupos folk de l’actualidá.

La presentación oficial del Festival Internacional de Pianu de Xixón va facase’l martes, 17 d’agostu, a les 13:00 hores, na Casa de la Palmera de Xixón. Van Participar na presentación Carmen Veiga, directora xerente del Teatru Xovellanos de Xixón, Julián Martin y José Ramón Méndez, directores del Festival Internacional de Pianu de Xixón y Óliver Díaz, fundador del Festival y director de la Orquesta Sinfónica Ciudá de Xixón.

L’apertura del festival empieza con un maratón de pianu sol lema “11 años, 11 hores” que va tener llugar tamién el martes, a les 11 de la mañana, y a lo llargo de tol día ininterrumpidamente nel quioscu del paséu de Begoña.

El ciclu, qu’algama’l so 11ª edición so la dirección de Julian Martin, de la Juilliard School de Nueva York y el pianista asturianu José Ramón Méndez, de la Universidá de Nueva York va averar a la ciudá asturiana a munchos de los más prometedores nuevos pianistes del momentu.

El Festival axunta a 60 alumnos de tol mundu, que van poder asistir a seis clases maxistrales, impartíes por dalgunos de los más destacaos maestros. Un total de siete estudiantes del Conservatorio de Xixón van asistir al Festival en calidá d’alumnos, gracies al marcu de collaboración que tanto’l festival como’l conservatoriu caltienen dende va años.

Güei, llunes 16 d’agostu, dende les 11,30 a les 14,30 hores, van producise les actuaciones de la banda de gaites “Naranco” d’Uviéu y l’asociación folclórica “La Hedra” de San Esteban de la Cruz.