Música

El grupu Skontra ta acabante xubir a la rede dos temes del so discu nuevu, que tien por títulu “Mazcando miseries”. El grupu Skontra formóse en 2001 y usa tantu l’asturianu como’l castellán, con temes centraos en cuestiones sociales.

Páxina web del grupu

El grupu folk Tuenda actúa esti xueves, 18 de payares, de magar les ocho la tarde, nel Recintu Ferial Luis Adaro de Xixón. El conciertu enmárcase dientro del ciclu Música del Sieglu XX, qu’entama la Obra Social y Cultural de Caxastur. La entrada ye llibre y de baldre hasta que s’escose l’aforu.

Tuenda ta formáu por Elías García, Pepín de Muñalén y Xosé Antón «Ambás», perconocíu pola música y sobremanera por presentar el programa “Camín de cantares”, na TPA, que popularizó ente’l gran públicu los sones de Tuenda.

Esti xueves 18, el Tierra Astur de Cualloto va acoyer l’actuación del grupu folk Zapica, que trabaya los cantares de chigre. Los sones d’esta banda, formada por Juan Carlos Varela (gaita, percusión y voz), David Varela (curdión, percusión y voz), Ángel Redondo (percusión y voz), Pedro P. Sanjurjo (xiblates y gaita) y Dani G. de la Cuesta (vigulín y voz), van sentise de magar les nueve y media la nueche.

Nes sos actuaciones el públicu pue participar, pues reparten les lletres ente los asistentes nun karoke tradicional acompañáu de baille. L’ésitu de la so propuesta fai que seyan habituales de les nueches d’esta sidrería de Siero.

Esti vienres, 12 de payares, de magar les ocho la tarde, el Centru Cultural Jerónimo Ibrán 10 de Mieres, va acoyer l’actuación del grupu de folk Galandum Galandaina, que llega dende Miranda del Douro p’amosar el patrimoniu musical, les dances y la llingua de les tierres d’esta comarca portuguesa.

Galandum Galandaina ta compuestu por Paulo Preto (voz, zanfona, gaites, dulzaina y tamboril), Paulo Meirinhos (voz, rabel, bombu, harmónica, castañueles, pandereta, garrafa, pandero y triángulu), Alexandre Meirinhos (voz, bombu, bendir y cántaru) y Manuel Meirinhos (voz, flautes, tamboril, kaval, bombu, panderu, castañueles y charrasques).

El dúu formáu pola voz de Mapi Quintana y la guitarra de Marco Martínez va homenaxear a Homenaxe a Ella Fitzgerald y Joe Pass, al traviés de los cuatro grabaciones d’estudiu que dambos realizaron ente 1973 y 1986 pal sellu Pablo.

Les actuaciones-homenaxe van tener llugar el xueves 11 a les 22:30 y 23:30 nel Plaza’s, Avilés; el vienres y el sábadu, a les 23:30, nel Kindu d’Uviéu; y el 30 de payares, en L’Esperteyu d’Uviéu.

El calter íntimu y delicau d’esta formación, amás de les improvisaciones d’scat y el conceptu de guitarra a soles, destaquen al pie de la compenetración ente dambos artistes, tal que Mapi Quintana y Marco Martínez pretenden recordar a dos de los sos maestros.

L’auditoiu d’As Quintas na cabecera del conceyu d’El Franco, va acoyer esti sábadu 30 d’ochobre, de magar les ocho y media la tarde, la presentación del discu “Conceyo de Cantares”, editáu pola Oficina de Coordinación Cultural y Llingüística del Parque Hestóricu del Navia. Nel conciertu van presentase los temes qu’apaecen nel discu, toos en gallego-asturianu, na voz y nos instrumentos de Mestura, de Grandas de Salime; Cádaba, d’A Caridá; Bacotexo, de Tapia; Mezá, de Bual; y Tuenda, d’Uviéu; presentaos toos ellos por Xosé Antón Fernández, Ambás, y la periodista y presentadora de TPA Sonia Fidalgo.

La gala músical va emitise nel programa “Sones” na TPA a lo llargo de les selmanes próximes.

El festival cultural Llanes al Cubo, conocíu tamién como “la folixa del tardíu” llega a la so edición noveda esta fin de selmana. Del vienres 29 al domingu 31 d’ochobre, el conceyu oriental va cuntar con proyecciones de curtiumetraxes d’animación, actividaes pa los neños y neñes y una esposición fotográfica, amás de les tradicionales actuaciones musicales, que van entamar el vienres, a les 20:45 hores nel Casinu, con Héctor Braga, que va presentar los temes del so dicu nuevu, y que va tar siguíu d’Anabel Santiago, cantadora de tonada, que presenta’l discu “Agora”.

El sábadu van celebrase conciertos nel recintu de La Bombilla. Willy Naves, Ojos de Brujo y Celtas Cortos van amenizar la nueche con estremaos estilos musicales.

Na xornada cabera, el domingu, los andaluces Efecto Mariposa, los cubano-xamaicanos Ska Cubano y a los llaniscos Arrankadera van poner el ramu a un Llanes al Cubo marcáu pola austeridá de los sos presupuestos.

Programa completu d’actividaes

La Casa Natal de Xovellanos acueye esti vienres 29 d’ochobre, de magar les 19:30 hores, un conciertu gratuitu a cargu del dúu formáu pola xiblata de Mariano Bas y l’harpa de Jose Antonio Domene. El conciertu suspendióse n’abril pola mor de la ñube de ceniza del volcán islandés, que paralizó’l tráficu aeréu n’Europa.

Nel programa del conciertu va tar presenta la obra d’autores como G. Rossini (1792-1868), L. Spohr (1784-1859), G. Donizetti (1797-1848), F. Burgmüller (1806-1874) o J. Ibert (1890-1962), ente otros.

La ilesia de Santu Tomás de Canterbury, asitiada nel avilesín barriu de Sabugo, va acoyer el próximu vienres el terceru de los conciertos de música relixosa programaos pola Conseyería de Cultura y Turismu nos templos asturianos que cunten con órganos. Dichu conciertu enmárcase nes actividaes diseñaes pol Gobiernu del Principáu por cuenta de la celebración del Añu Xacobéu 2010. El conciertu avilesín va correr al cargu de la organista xaponesa Izum Kando, que va interpretar siete pieces, ente elles dos de Manuel de Falla y de Johann Sebastian Bach.

Según declaró’l Director Xeneral de Turismu y Patrimoniu Cultural del Principáu, José Luis Vega, mientres la presentación del conciertu, esti tipu de recitales constitúin una bona oportunidá pa promocionar la ruta xacobea al so pasu pel Principáu y dar a conocer l’importante llabor de restauración y caltenimientu de los órganos qu’hai n’Asturies. El ciclu empezó’l pasáu mes de xunetu na Ilesia de La Corte d’Uviéu.

La ilesia de Santu Tomás de Canterbury construyóse ente 1895 y 1903, sustituyendo nes funciones parroquiales al vieyu templu románicu. Ye un edificiu monumental de notables dimensiones, exentu, asitiáu nel centru d’una plaza y con una perspectiva privilexada dende la cai La Cámara. Tien planta cruciforme, con triple nave na exa mayor y una sola nel transeptu, tramu previu al ábside poligonal y dos tales sacristíes más baxes flanqueándolu. L’arquiteutu Luis Bellido González foi l’autor de proyectu de construcción d’esti edificiu relixosu, de los más destacaos de los entamos del sieglu XX asturianu.

L’Alianza Francesa de Xixón entama güei miércoles, a les ocho la tarde, y en xunto col Taller de Músicos, un conciertu del grupu Zoréol nel Vieyu Institutu Xovellanos. El proyectu musical d’esti grupu articúlase alredor de la música tradicional de la islla de la Xunta, nel Océanu Indicu, anque incorporando soníos de la vieya metrópoli, como’l curdión o un ciertu toque swing.

El so repertoriu ta formáu por composiciones populares de les islles. Esta banda ñacida en Monpellier en 2003 tien una carrera sólida ganada cola esperiencia de cientos de conciertos per Europa, Africa y América.