Música

El martes, 18 de xineru, a les seis de la tarde, va presentase na Sala de Conferencies del Centru de Cultura Vieyu Institutu de Xixón el nuevu discu del grupu MyVestal “Electrovintage” y el conciertu que se celebrará na Sala Acapulco, el 21 de xineru. Va proyectase’l vidioclip “Fearless” y facese un conciertu acústicu.

www.myspace.com/myvestal

El coleutivu Muyeres, dedicáu a la música tradicional asturiana, entama esti martes 18 de xineru, un cursu de percusión tradicional centráu nes variedaes del oriente del país. V facese n’Uviéu, nel centru social de Santuyano, en diez xornaes cada quince díes, con horariu de 20:00 a 21:30 hores. El preciu de matrícula ye de 60 euros, y al acabar va entregase un diploma acreitativu a les persones participantes.

La profesora va ser Marta Elola, componente de Muyeres y directora del Muséu Etnográficu del Oriente d’Asturies.

El próximu 4 de marzu de 2011 va tener llugar la VI Gala d’entrega de los Premios AMAS nel Teatru Filarmónica d’Uviéu. El públicu puede votar a los sos favoritos d’esta edición na nueva páxina web www.premiosamas.com a partir del próximu 17 de xineru, quedando abiertu’l periodu de votación hasta’l 17 de febreru.

La entrada pa la gala pue consiguise na llibrería La Palma d’Uviéu a partir del día 10 de febreru al mercar l’Anuario de la Música en Asturias 2010 que va acompañáu d’un CD y DVD de regalu. Sicasí, la gala va emitise tamién al traviés de la TPA.

El yá hestóricu grupu folk Felpeyu cumple en 2011, venti años d’actividá musical. Pa celebralo estrenen páxina web, con galeríes de semeyes, blogue, páxines d’información hestórica del grupu, llistáu de los conciertos más importantes, etc. La web ábrese a la participación del públicu del grupu, y piden semeyes de conciertos del grupu asturianu p’añadiles a les galeríes creaes na web.

La páxina tien disponible la versión n’asturianu, pero va tener tamién, a non tardar, versión en castellán y n’inglés.

El grupu tuvo nestos venti años en cuatro de los cinco continentes, con conciertos na mayor parte de los festivales más importantes del mundu. El grupu quier facer d’esti añu “un tiempu productivu y de trabayu pa siguir ufiertándovos lo meyor que somos a dar de nosotros mesmos”.

Los miembros de Felpeyu afirmen que “la reellaboración de la música tradicional d’Asturies nuna llinia paralela a les tendencies que se dan anguaño nel folk européu sigue siendo l’oxetivu del trabayu de FELPEYU”. Teniendo como oxetivu cimeru “la divulgación de la nuestra música el de tola sociedá asturiana, pa la que va dirixíu’l nuestru trabayu y del que ye depositaria”.

Páxina web nueva de Felpeyu

El grupu de folk lletrónicu Xera acaba anunciar la xuba a la rede del vidiu col so conciertu de presentación del discu “Tierra”. El 23 de setiembre presentóse nel Teatru de La Llaboral de Xixón, un día que la banda tien como “mui especial dempués de dellos meses de trabayu”. El vidiu distribúyese, como tolos productos del grupu, en llicencia Creative Commons.

El grupu Xera fízose col tema que da nome a esti discu col Premiu al Meyor Cantar 2010, representando a Asturies nel Liet Internacional, festival de la canción en llingües minoritaries.

AICA lleva la so cita mensual cola tonada al Centru Municipal Integráu Atenéu La Calzada de Xixón, esti martes 11 de xineru, a les 19:30 hores, nel Salón d’Actos. Nel actu, organizáu pol Conceyu de Xixón y pola Asociación d’Intérpretes de la Canción Asturiana (AICA), cuenta nesta ocasión colos cantadores Carlos Alonso Peñayos, Águeda Riera González y Fernando González “Carlones”, acompañaos a la gaita pol conocíu instrumentista Vicente Prado “El Pravianu”. L’actu va presentalu Vital Noval Álvarez.

La Conseyería de Cultura y Turismu, aprobó la convocatoria del “Premiu al Meyor Cantar” en llingua asturiana o gallegu-asturianu. A esta convocatoria van poder presentase los músicos, a títulu individual o dientro de grupos, que comercializaren dalgún cantar orixinal de cualesquier xéneru a lo llargo del añu 2010, quedando escluyíes les pieces tradicionales yá esistentes, les versiones o adaptaciones d’obres de creación publicaes orixinalmente n’otra llingua, y los cantares que nun fueren editaos y grabaos per primer vegada nel periodu referíu.

Los interesaos han presentar o unviar hasta’l 21 de xineru del 2011 la documentación que s’indica de siguío: Solicitú en modelu normalizáu, Declaraciones responsables, CD onde se recueya el cantar escoyíu pol grupu o intérprete pa presentase al premiu, Currículu del solista o grupu, incluyendo rellación nominal de componentes ya instrumentos que toquen, amás de la lletra del cantar escoyíu, mecanografiada.

Acabáu’l plazu de presentación de solicitúes, éstes van ser valoraes por un Xuráu que va presidir quien seya titular de la dirección Xeneral de Política Llingüística (o persona en quien delegue). El Xuráu va ser nomáu por resolución de la Conseyera de Cultura y Turismu y va tar formáu por un máximu de nueve y un mínimu de cinco persones rellacionaes col ámbitu de la música asturiana.

La selección va tener dos fases. La primer fase va consistir nun llabor de preselección onde los miembros del xuráu van puntuar a caún de los concursantes que s’axusten a lo estipulao nes bases; les canciones, nun númberu non inferior a cinco, que llogren la puntuación global más alta van ser consideraes finalistes.

Na segunda fase va escoyese al ganador/a d’ente la rellación de finalistes. Pa ello los finalistes tienen qu’actuar en directo defendiendo’l tema seleccionáu na Gala musical del “Premiu al meyor Cantar” y, tres de les actuaciones, va facese público –nel trescursu de dicha Gala– el fallu del xuráu. Nesti sentíu, los finalistes clasificaos pa la segunda fase tienen qu’asumir la obligación d’actuar en directo na referida Gala, que se celebrará en fecha coincidente o aproximada al día 21 de febreru de cada año (Día de la Llingua Materna). En casu de que dalgún de los finalistes seleccionaos na primer fase nun pudiera asumir esta obligación, va seleccionase al siguiente de los concursantes por orde de puntuación de mayor a menor, hasta completar el númberu de finalistes.

L’intérprete o grupu ganador va recibir como galardón una escultura orixinal y esclusiva d’un o una artista asturiana de prestixu reconocíu. Amás, el Gobiernu d’Asturies va mirar pola promoción y difusión de la canción nos medios de comunicación y nos eventos organizaos o promovíos pol propiu Gobiernu. El grupo o intérprete ganador va representar oficialmente a Asturies nel Festival Européu de la Canción en Llingües Minoritaries, Liet Internacional, organizáu col apoyu del Conseyu d’europa.

Bases completes del concursu

Esti miércoles 5 de xineru, de magar les once la nueche, la Sala Acapulco de Xixón acueye’l conciertu del grupu pop-rock The Meeting Point. El preciu de les entraes ye de 10 euros pa les anticipaes y 11 na puerta.

Esti xueves 30, a les diez de la nueche, La Casa Posafuelles, chigre de la XPDLLA, va celebrar la última xuntanza de músicos del 2010 na que van tar como músicos invitaos componentes y excomponentes de “bagads” bretones como la Bagad Kemper, Bagad Lann Bihoué, etc, xunto a músicos asturianos.

El grupu de folk fusión La Collá Propinde ta grabando estos díes el que va ser el so nuevu vidioclip. Trátase del tema “Llárimes”, estrayíu del so últimu trabayu discográficu “A Teyavana”. El vidioclip va ser presentáu nel conciertu especial 10 aniversariu que va tener llugar el sábadu 22 de Xineru a les diez de la nueche na Sala Acapulco del Casino d’Asturies, en Xixón. El videoclip “Llárimes”, ta ambientau en paraxes de la mariña asturiana, concretamente n’El Cabu Peñes.

Amás, apaez, como nun podía ser d’otra manera, La Pola Llena. La dirección y producción cuerren al cargu de Pablo A. Quiroga Prendes (Algamar Producciones) y de los consagraos Juán Tizón y Sofia F. Castañón (Sr. Paraguas). El rodaxe va terminar antes d’acabar esta mesma selmana pa ponese darréu col procesu de postproducción, col fin de tener a tiempu pal conciertu que’l grupu tien na Sala Acapulco.

Conciertu 10u aniversariu

La Col.lá Propinde cumple 10 años enriba de los escenarios y celebrálo realizando una xira bien especial a lo llargo de tol 2011, pero’l so puntu de partida va ser esti Conciertu Especial 10 aniversariu, nel que’l grupu va repasar les temes más importantes de tola so carrera discográfica y que va cuntar con numberoses collaboraciones y convidaos.