Música

Los artistes que van competir por esti gallardón, convocáu pola Conseyería de Cultura d’Asturies, van ser Skama la Rede con «Condenáu», Falanoncaduca con «Sele sound system», Verdasca con «Entre ríos y entre soutos», Corquiéu con «Alma valera» y Blima con «Señaldá». La gala d’entrega va facese nel Auditoriu Teodoro Cuesta de la Casa la Cultura de Mieres el sábadu 19 de febreru. Unu d’ellos va representar a Asturies nel festival Liet Lavlut Internacional.

El Premiu al Meyor Cantar, pa obres n’asturianu y gallego-asturianu, instituyóse nel añu 2007 pola Conseyería de Cultura y Turismu col oxetivu de promocionar y favorecer la creación musical orixinal nos idiomes propios d’Asturies. Los ganadores de les ediciones anteriores fueron «Azul y gris» (Toli Morilla), «Nosh» (Herbamora), «La nada y tu» (Alfredo González) y «Tierra» (Xera).

Esti domingu 30 de xineru, a partir de les 20:00 hores, el Teatru Xovellanos, acueye la tercer gala Xixón fala n’asturianu, organizada pola Conceyalía de Cultura Tradicional y Llingua Asturiana del Conceyu, Nella van actuar el monologuista Cellero y los cantantes y grupos Anabel Santiago, Alfredo González, Tuenda y La Tarrancha.

L’añu pasáu la gala “Xixón fala n’Asturianu” algamó una perbona rempuesta d’un públicu que disfrutó de Dixebra, el cantar vaqueiru de Rafa Lorenzo y la promesa de Chus Pedro y Manolo Penayos de que Nuberu tornará a los escenarios el día que l’asturianu seya llingua oficial. Manolo Penayos adelantó temes del o nuvu proyeutu musical, con una versión mui personal de la Danza Prima como entamu.

Esti xueves, 27 de xineru, a partir de les 21:30 hores, el Tierra Astur de Cualloto acueye l’actuación de la bandina La Curuxa, d’Uviéu, formada polos músicos Iván, Nel, Arsenio y Queco.”La Bandina” ufren un repertoriu con pieces tradicionales asturianes, gallegues o bretones pero tratando d’adaptar esa tradición con instrumentos diferentes (caxon, djembe o daburka).

Pablo Moro pon fin a la so xira “Pequeños placeres domésticos” esti xueves, 27 de xineru, a les 20:30 hores nel Teatru Xovellanos de Xixón, acompañáu de la so banda. Gastelo, nomada nes categoríes Meyor artista femenina y Meyor Vidiu/Entevista nos Premios Music News Televisión 2010, va ser l’artista convidada.

En septiembre de 2005 Pablo Moro editaba’l so primer discu “Emepetreses” (Carlito Records); n’ochobre de 2007 salía a la lluz “Smoking point” (Carlito Records / EMI), que meses más tarde tamién s’editaría n’Arxentina (Tocka Discos / BMG Arxentina) y n’ochobre de 2009 pon a la venta’l so últimu trabayu “Pequeños placeres domésticos” (Boomerang Disco), grabáu prácticamente en directu en La Isla de Colunga (Asturies).

Dende 2004 nun paró d’actuar per tol estáu, con delles xires en distintos formatos (solo, a dúu, a tríu o al pie de la so banda), amás de cientos d’actuaciones en sales pequeñes y medianes. Participó n’ensame de ciclos, festivales y fiestes (Artistes en ruta 2006; Club 100 2006 y 2007; Distritu Arte 2007; Estivalia nel valle del Jerte 2006; Falles de Valencia 2006; Fiestes de San Xuan y San Pedro de Lleón; Música del sieglu XX 2005 y 2007; La Mar de ruiu n’Avilés 2008; Llanes al cubo 2006 y 2009; Festival Pepsi music de Bonos Aires 2008; La Nueche en blancu 2009; Festival Internacional del cantar itinerante de Bogotá 2009; Fiestes de San Mateo d’Uviéu 2005, 2006, 2008 y 2010; Día d’Asturies 2006, 2008 y 2010; V Festival de la palabra – Versatil.es en Valladolid 2010, ciclu GPS 2010…)

Crució’l charcu en trés causes, en dos d’elles pa visitar Arxentina en 2008, onde llegó a tocar nel festival Pepsi music xunto a Andrés Calamaro y na otra p’actuar en Colombia en 2009 p’actuar, ente otros sitios, nel Festival Internacional del cantar itinerante de Bogotá.

Dellos premios AMAS (Anuariu de la música asturiana), como meyor lletrista, meyor vidiu… el postreru, al meyor discu de 2009 por Pequeños placeres domésticos”. N’avientu de 2009 apúrren-y el “Premio rincón” que concede añalmente’l Rincón del arte nuevo de Madrid.

N’avientu de 2010, en siendo escoyíu pol Institutu Nacional de les Artes Escéniques y de la Música (INAEM), forma parte del ciclu GPS (Xirando per sales) actuando en ciudaes como Guadalaxara, Alicante, Teruel o Barcelona.

El grupu de folk fusión La Collá Propinde tien yá na rede’l so vidioclip nuevu. Trátase del tema “Llárimes”, estrayíu del so últimu trabayu discográficu “A Teyavana”. El vidioclip presentóse nel conciertu especial 10 aniversariu que tuvo llugar el sábadu pasáu en Xixón. Nel vidiu citáu apaecen llugares de L.lena y el Cabu Peñes.

La dirección y producción cuerren al cargu de Pablo A. Quiroga Prendes (Algamar Producciones) y de los consagraos Juán Tizón y Sofia F. Castañón (Sr. Paraguas).

La banda de fusión La Tarrancha, anuncia que tien abiertu el periodu de contratación de cara a esta primavera y branu. La Tarrancha arranca así l’añu pa dir afitando les feches nes que llantará enriba l’escenariu el so particular son, lo qu’ellos va tiempu nomaron “Mecigayu Ska”, una mecigaya d’influyencies sonores que partiendo del los ritmos hamaiquinos del Ska y el reggae van pasándolo pela musica tradicional asturiana a la bretona o soníos mas folkis, a aires llatinos, ensi escaecer otros estilos.

Esi son particular y la so puesta n’escena convidando a la folixa, faen que yá seya nun festival grande a un conciertu pequeñu, yá seya n’Asturies o nos otros sitos onde tienen tocao, como Andalucia, Galicia, Lleón, Cantabria, Burgos… el publicu esfrute del primer minutu hasta l’ultimu.

La Tarrancha cunta con delles publicaciones, ente élles el single Exit-Encia, la maketa Qlt? y el discu Ö-3-3 (otrestres) aparte de la participación nel discu compartíu Rock’n’Lingua y dellos discos compilatorios ms.

´

Una constante na vida de La Tarrancha ye’l dir y venir de los sos componentes, y ye que les circustancies llaborales faen que too sea mas abegoso. La ultima ausencia del grupu ye la del baterista Ojeda (tamien bateria del grupu heavy Darksun) que tuvo qu’emigrar a Suiza. Esti contratiempu ye lo qu’impide que’l grupu grabe lo que diba ser el próximu discu de La Tarrancha y que tenien intención de materializar en primavera.

La so ausencia ta sustituyida por Simón, percusionista y luthier bien conocíu nel mundu de la música tradicional y les bandes de gaites, que tendrá la posivilidá de debutar cola banda el día 30 d’esti mesmu mes nel teatru Xovellanos de Xixón. Esta cita sedrá dientro de la gala “Xixón Fala n’Asturianu”, qu’esti añu aparte de cuntar con La Tarrancha, cunta tamien con Alfredo Gonzalez, Tuenda y Anabel Santiago no musical y Carlos Alba “Cellero” nel apartau teatral.

Una de les peculiaridáes de La Tarrancha ye que les sos composiciones tienen llicencia Creative Commons, y éllos nun pertenecen a la S.G.A.E., yá que nun comparten la so politica recaudatoria na xestión de drechos. Polo qu’amuesen como reclamu que les entidaes que los contraten tán esentes lo que denomen “dichosu tantu por cinetu a la S.G.A.E.”. N’esi aspeutu, tola so música ta disponible llibremente y de baldre na rede.

Esti sábadu, 22 de xineru, el conceyu de Cabrales acueye na so capital, los Alcuentros Tradicionales, onde la música y el baille d’Asturies s’amuesen cada añu. Na plaza d’Arangas, de magar les diez y media la nueche va poder esfrutase de la música d’Anabel Santiago, Xosé Ambás, los hermanos Marisa y Fernando Valle Roso, y los bailles de los grupos Xeitu y Principado.

El grupu de folk fusión La Collá Propinde cumple 10 años enriba los escenarios y va celebralo con un conciertu esclusivu esti sábadu 22 de xineru a partir de les 21.30 hores, na Sala Acapulco de Xixón, nel Casinu, con un preciu simbólicu d’entra de 3 euros. El conciertu va ser el puntu de partida de la xira especial “10 años de música dende L.lena”, que va llevar al grupu a distintos escenarios de la xeografía estatal.

Nel conciertu d’esti sábadu, el grupu va repasar los temes más importantes de tola so carreradiscográfica, incluyendo una escoyeta de veinte cantares de los sos trabayos discográficos LL, Güeria y A Teyavana. Amás, el grupu va tar arropáu po diverses collaboraciones y convidaos.

Estrenu de Vidioclip

La Collá Propinde va aprovechar l’eventu pa presentar el so nuevu vidioclip, “Llárimes”. Un trabayu empobináu por Pablo A. Quiroga Prendes, Juán Tizón y Sofia Castañón, no que supon un trabayu conxuntu ente Algamar Producciones y Sr. Paragües.

“Llárimes” foi rodáu n’El Cabu Peñes, Turón y Pola L.lena fai apenes un mes. Diez años de vida que los llevaron a afayar al públicu’l so repertoriu en numberosos escenarios a lo llargo de la xeografía europea.

Entrevista col grupu por mor del so décimu aniversariu

Esti miércoles, 18 de xineru, morría’l gaiteru popular de Cabreira, Moisé Liébana, que dende bien mozu foi convirtiéndose en tou un referente de la música tradicional na so fastera lleonesa. N’Asturies diolu a conocer Xosé Ambás, que fizo un episodiu del so programa Camín de Cantares dende Cabreira, sintiéndolu tocar la gaita y falar na variedá del asturianu de la so comarca.

Esti ye’l vidiu del programa:

El Derrame Rock cola d’Asturies y va celebrase esti añu n’Expourense, en Galicia, los 23, 24 y 25 de xunu. El grupu asturianu Dixebra va tocar ellí y los cincuenta primeros asturianos en mercar una entrada van poder dir y tornar n’autobús de baldre. Les entraes con autobús van tar disponibles el mesmu día que los abonos, na tienda de Santo Grial.

Ente los confirmaos, amás de la banda asturiana, tán Los Suaves, Ojos de brujo, Siniestro Total, Lamatumbá, Def Con Dos, Gatillazo, Berri Txarrak, O”funk”illo, Hamlet, Escuela de Odio y De Acero.