Música

El Conciertu pola Oficialidá va abrir les puertes a les 19:00 hores, el sábadu 16 d’abril, nes instalaciones de la Feria de Muestres de Xixón. Nesti recintu van instalase dos escenarios independientes que van dir alternando les actuaciones de los grupos, pa evitar tiempos muertos.

Esti añu cuéntase cola participación d’ocho bandes, que son estes: Blima, Llangres, La Bandina, Toli Morilla, Misiva, K-Nalón, La Col.lá Propinde y La Tarrancha.

El conciertu va presentase esti llunes 4 d’abril nuna rueda de prensa que na va cuntase cola presencia de dellos músicos que participen nesta XXIII edición del Conciertu y que yá confirmaron la presencia: Toli Morilla, Santi Caleya y Merce Santos de La Bandina.

El Conciertu pola Oficialidá ye una iniciativa de la Xunta pola Defensa de la Llingua Asturiana que yá cumple la XXIII edición. Ye un referente claru de la música fecha n’asturianu que cuenta siempre cola participación solidaria de los grupos y artistes asturianos con más sonadía y que davezu val tamién como plataforma pa echar a andar propuestes nueves. L’ésitu de públicu de les ediciones pasaes y l’abondancia y calidá de los grupos valen pa facer rescamplar un panorama musical n’asturianu mui dinámicu onde tán presentes estilos musicales bien estremaos, dende la canción asturiana más tradicional a les nueves tendencies na música electrónica,ska, rock, etc.

Esti vienres 25 de marzu celébrase en Noreña’l III Certame de Cantares de Chigre “Prohibido Cantar… desentonáu” de Noreña qu’entama l’asociación folclórico-musical Villa y Condáu de Noreña. La inauguación va celebrase na Casa de Cultura, el vienres de magar les 19:30 hores cola presentación de Manuel Rosete y l’homenaxe al músicu llocal Tino Fombona. Amás, va facese un conciertu cola participación de la Banda Gaites de Noreña, Anabel Santiago y Hector Braga y de Tino Fombona y Macu.

Tres inaugurar el certame va haber pasacais de gaita y tambor, amás del llanzamientu de voladores pa, a partir de les 21:30 hores, empicipiar les actuaciones de les distintes rondes en les sidreríes Villa Condal, La Cuadra, La Sala, Fermín, Casa Paco, El Güelu, La Tenería y Casa Manolo, coles actuciones especiales d’Anabel Santiago y Hector Braga nos propios llocales.

A les 23:00 hores va haber una sospresa musical que pasará per tolos chigres que van disponer de concioneros de mano pa regalar a los sos veceros y que sigan asina los cantares.

Esti vienres 25, demagar les ocho la tarde y de baldre, va poder sentise la música del discu nuevu d’Skontra “Mazcando miseries”, que va presentase nun conciertu nel Teatru Vital Aza de La Pola L.lena.

El trabayu discográficu que presenten inclúi 11 temes, recuperando dalgún clásicu de la primer maqueta del grupu y foi grabáu en Corvera nos estudios TUTU, cola producción musical de Sergio Rodríguez, y nél collaboraron diversos músicos de la escena asturiana.

El grupu de música tradicional Tuenda toca esta miércoles, 23 de marzu, nel El Cafetón d’Avilés (asitiáu na cai El Sol, detrás de la Casa Conceyu-), de magar les diez de la nueche. El grupu, formáu por Pepín de Muñalén, Elías García y Xosé Ambás, tien dos discos nel mercáu, Tuenda y Tuenda 2, y otru a piques de salir, basaos toos ellos nel repertoriu del Archivu de Tradición Oral d’Ambás.

El cantautor Toli Morilla va tocar los temes de Bob Dylan n’asturianu qu’apaecen nel so discu últimu. Sedrá esti sábadu, 19 de marzu, nel Savoy de Xixón, de magar les 23.30 hores.

Nel discu apaecen temes como «Sara» o «Knockin’ on heaven’s door», con dellos cambios autorizaos pola discográfica de Dylan.

Toli Morilla asoleyare hasta agora cinco discos, dellos en castellán, con temes n’asturianu, y otros defechu n’asturianu: “Entropía” (2006), “Nueche d’insomniu: L’espectáculu” (2005), “Nueche d’insomniu” (2004), “Entre el barro y las preguntas” (2003) y “Nunca des la espalda” (1998).

El Restorán El Risón y el Conceyu de Castropol entamen esti certame a desenvolver los díes 9, 16, 23 y 30 de xunetu. Pueden tomar parte grupos, bandes y solistes amateur de cualesquier estilu o xenero jazzísticu procedentes de cualesquier territoriu d’ámbitu estatal. Pa participar, los grupos tienen d’unviar una sola grabación del grupu en soporte CD cola inclusión d’un máximu de trés pieces, teniendo de figurar el nome artísticu del grupu/banda/solista xunto al hestorial y otros datos del grupu.

Hai ocho premios, el primeru de 1.000 euros y el postreru de 300 euros. El plazu pa la inscripción nesti concursu de maquetes remata’l 14 de mayu. Los participantes tendrán d’unviar la solicitú xuntu cola documentación a “I Concursu de Jazz Amateur Castropol 2011” Conceyu de Castropol, Plaza del Conceyu e/n, 33760, Castropol, Asturies. Los ocho meyores escoyíos van participar nel festival de Jazz que va tener llugar nel mes de xunetu en Castropol.

Bases completes del concursu

Dende esti llunes 7 y hasta’l domingu 20 de marzu, na Casa la Cultura de Riañu (Llangréu), alcuéntrase abierta al públicu la esposición “L’asturianada. Alma d’un pueblu”. Un percorríu pela música vocal asturiana más característica, allugáda nun contestu internacional y qu’afonda nos sos aspectos más destacaos.

La banda “La Patrulla Dixie”, presenta la so música, basada na tradicional de Nueva Orleans, nel Savoy Drinks & Music de Xixón, esti llunes 7, de magar les doce la nueche. L’actuación va facer un repás a los temes que componen el jazz d’entamos del sieglu XX. La entrada al conciertu ye de baldre.

Esti sábadu, 5 de marzu, Skontra va presentar el so discu últimu, “Mazcando miseries”, a partir de les 20:30 hores, nel Savoy de Xixón, momentu que va sirvir tamién pa celebrar los primeros diez años de la banda. Pola mor d’esta celebración van participar nel conciertu dellos collaboradores y ex miembros d’Skontra. Nel descansu, Txema Selektah va pinchar temes clásicos del punk-rock y otros estilos. La entrada val 5 euros o 10 col cedé.

La xiblatera irlandesa llega a Xixón dientro del ciclu de conciertos Músiques del Sieglu XX entamaos por Caxastur. A les ocho la ta tarde del xueves, 3 de marzu, Kennedy va actuar nel pabellón Luis Adaro del recintu la Feria Muestres d’Astuoes, xunto a Myke Bryan a la guitarra y Iain MacLeoda a la mandolina. La entrada ye de baldre.