Música

La banda de rock Dixebra celebra’l so 25 aniversariu cola edición d’un trabayu discográficu mui especial. Con un formatu de lluxu bien atractivu y orixinal (imitando un moleskine y a mou de diariu nel interior, amás d’un cedé que fai alcordanza del vinilo), la obra quier ser un repasu per dellos de los momentos y estilos que marcaron el devenir de la formación, nesti sen apaecen temes de calter punk, rock, reggae, ska, funk, folk o rap. El discu inclúi bien de versiones nueves de pieces que supunxeron un fitu na so trayectoria (casu de «Merucu Xusticieru», «Canciu d’amor», «Queda la rabia», «Xuacu xinta xorra»…) o otres menos conocíes pero que quixeron volver a grabar («Dacuando», «Si vienes», «Vaqueira»…), remezcles («Pal Caribe», «Wilma Loulé»…) y inclusu inéditos (por exemplu «Nun puxa» –versión de «God Save The Queen» de los Sex Pistols-, con arreglos y lletra nueves dafechu), tamién se fai una retrospectiva sonora de les sos grabaciones en toos estos años, conformando un repertoriu total de venti cortes; a too ello hai qu’añadir dellos samples que refuercen y complementen dalguna de les temátiques de les canciones. La producción tuvo a cargu de Sergio Rodríguez, collaborador avezáu del grupu y responsable de Tutu Estudios.

Amás de los músicos actuales collaboren na grabación excomponentes, amigos y intérpretes destacaos de la escena asturiana: Israel Sánchez (El Sueño de Morfeo), Rubén Bada, Pablo Carrera (Duerna), Lisardo Prieto (Felpeyu), José Manuel Tejedor, Daniel Álvarez (Corquiéu), Miguel Herrero, etc. Otra manera, el llibretu recueye testos firmaos por Beatriz Redondo Viado (periodista), Miguel Fernandi (músicu), Roberto González-Quevedo (escritor y académicu de la llingua asturiana), Xicu Ariza (músicu y periodista), Pablo Texón (ecritor) y David Artime (periodista), que reflexonen alredor de lo que significó y significa Dixebra pa la llingua asturiana o la escena musical del país en xeneral y pa ellos en particular; la parte lliteraria zárrase con un cuentu futurista que se desenvuelve nun conciertu de la banda.

Dixebra tenía’l so primer ensayu un seis de xineru del añu 1987 nunes cocheres de Castañeda, en Corvera, dende esi momentu, esta banda formada por componentes d’esi conceyu y del d’Avilés, entamaron una carrera sele pero segura que los llevó a convertise nún de los grupos más importantes de la escena asturiana d’estos venticinco años. Nesi tiempu dieron infinidá de conciertos per toa Asturies, l’Estáu español y Europa, grabaron diez discos y foron incluíos n’abondos recopilatorios; foi’l primer grupu de rock asturianu qu’actuó nel Festival Intercélticu de Lorient y tamién el primeru que representó a la llingua asturiana nel festival de la canción en llingües minoritaries europees Liet International en Laponia (onde llogró’l segundu puestu) y tien recibío dellos premios tanto a nivel asturianu como estatal.

Falar de Dixebra ye falar de la llingua asturiana, porque la so fidelidá a esti idioma ye una de les señes d’identidá de la banda, amás del so compromisu social, políticu y llaboral, que demostraron dende la so nacencia solidarizándose con munches de les lluches d’esi calter que se desenvolvieron nesta tierra. Ensin dulda Dixebra son ún de los referentes musicales d’Asturies, que festexa agora’l so venticinco aniversariu pero que sigue cola vista puesta nel futuru porque tovía tienen ganes y fuercia.

Esta edición de lluxu vien a face-yos xusticia y de xuru va prestar abondo a tolos sos siguidores. N’otru sen, ye la primer producción de Discos L’Aguañaz como división musical de Goxe Producciones, depués de la salida de la primera de Publicaciones Ámbitu, colo que recupera la so identidá y personalidá propia y entama un llabor que quier valir d’encontu a la música asturiana contemporánea.

Dempués de trés años y dos discos con bien de premios, ente ellos, el Premiu al Meyor Cantar por “La nada y tu”, el cantautor Alfredo González torna a la escena discográfica con “Dobleces”, un discu doble con diez cantares en castellán y diez n’asturianu. El discu ta producíu por Sergio Rodríguez y cunta con convidaos del nivel de Quique González, voz en “Wikileaks”, cantando per primer vegada n’asturianu, o Fabián, voz en “Todos llevan disfraz”. L’artista de Turón ta presentando’l trabayu en dellos conciertos per Asturies.

La parte en castellán inclúi diez temes de composición propia, nos qu’Alfredo González se reafita na so llínea creativa y caltien los elementos básicos del so anterior trabayu: lletres certeres de temática esistencialista con una base rock, que nun arrenuncia a tocar otros estilos musicales. Sicasí, “Dobleces” ye daqué más qu’una conti-nuación d’aquel “Dudas y Precipicios” que asoleyaba allá pol 2008: la frialdá antemanada qu’esprenden dellos temes – Tu droga permitida – contrasta con una visión muncho más reposada, casi analxésica, de ciertes cuestiones antes tráxiques, vease’l desamor o la distancia– No era tan grave, Desordenados-, como amuesa d’una evolu-ción lóxica que dexa un pocu atrás a aquel “mozu malu” que convidaba a Nordic Mist, pa enfusase nuna reflexón sobre les mires y algamar – La vida que esperé-, dexando siempres un telón de fondu trescaláu en daqué agridulce, a mediu camín ente lo risondero y lo melodramático- – Hasta las manos-.

Los otros diez cortes, de los qu’Alfredo namá ye responsable en términos musicales, tán escritos n’asturianu pol poeta Pablo Texón, siguiendo’l camín trabayosu, yá empecipiáu por dalgunos otros artistes, de lliberar esta llingua d’un usu costumista, apostráu casi siempres al ámbitu del folk y otros estilos derivaos de la música tradicional. Los temes, eminentemente llétricos, siguen, en paralelu a los anteriores, una llínea trascendental pero polivalente, que combina un sentimentalismu pocu adulter-áu – La última fueya- con distintos graos d’escepticismu – Esperanza en formol- y el más ocurrente sarcasmu – Golpe/silenciu.

Venti temes, en total, que son, en pallabres del so autor : “resultancia de tres años de carretera secundaria y pensiones barates; un compendiu de fotografíes feches a mano y ensin encuadre fixu. Escrites nos dos idiomes nos que miento y feches música ensin pensar en quién va poneles na radio. Equí ta too lo que suena na mio ca-beza. Cenciellamente cantares”.

El discu presentóse esti sábadu pasáu n’Uviéu y va presentase’l 23 d’avientu en Madrid, na cai Libertad 8, de magar les 21:30 hores, y el 27 de xineru en Xixón, na Sala Acapulco, de magar les diez de la nueche, acompañáu nesti casu por Edu Vigil y Carás. Pal añu que vien va tocar en Valencia, será’l 3 de febreru, nel Deluxe Pop Club.

Esti vienres, 16 d’avientu, a les ocho la tarde nel Centru Valey de Piedrasblancas, Anabel Santiago va tocar cola so banda al complentu: Héctor Braga, Eduardo Salueña, Manuel Cordero y Borja García. La entrada ye de 5 euros.

El Festival de Gospel de Xixón aporta al Teatru Xovellanos los díes 15, 16 y 17 d’avientu con una esbilla del meyor gospel tradicional norteamericanu.

Robin Brown & Atlanta Gospel Chorale, The Late Show’s Gospel Choir y Joyful Gospel Singers son les trés formaciones que, llegaes d’Atlanta, Nueva York y Nueva Orleans, configuren el cartelu del Festival.

Algamar Producciones ta al cargu de la edición del discu nuevu d’Alfredo González. Dempués d’un primer discu en castellán y un segundu n’asturianu, nesta ocasión, Alfredo inclúi diez temes n’asturianu y diez en castellán. “Dobleces”, producíu por Sergio Rodríguez va presentase esti xueves a les 12:30 hores na sede de la Sociedá Xeneral d’Autores y Editores (Sgae) d’Uviéu, nel 15 de la cai la Lluna.

L’Asociación de Sidreríes de la Cai la Gascona d’Uviéu asoleyó apocayá un “Cancioneru de Chigre” nel que recueyen 55 cantares pa cantar nes barres de los sos llocales. Amás, asoleyáronse unos cartelos col lema “Nesta sidrería pue cantase”, p’animar a la xente a entamar cantarinos, anque eso sí, non más allá de les once la nueche.

El Nuevu Teatru de La Felguera va acoyer esti vienres, 9 d’avientu, a les ocho la tarde, la presentación del discu nuevu de Duerna, “¡A mansalva!”. Nel actu van participar la Banda gaites “Conceyu Llangréu”, la Banda gaites “Conceyu Siero”, el Coro Padre coll, Tomás Fernández, al Saxu, Rubén Menéndez, a la Trompeta, Marisa Valle, como cantante, Orestes Barbachan, na percusión llatina, la pareya de baille formada por Joaquín y Cintya, el Grupo Reija de Llangréu y Tante Blanco, a la guitarra llétrica.

Les entraes anticipaes tán a la venta na Casa la cultura Escueles Dorado de Sama (3 euros), nel teatru nos díes de función. (3 euros) y nos Caxeros Tiquexpress de Caxastur) (3,50 euros)

Hasta’l día 12 de marzu de 2012 podrán presentase los trabayos al II Concursu “Qué suene la llingua”, un premiu que convoca la Oficina Municipal de la Llingua de Xixón. Trátase d’un concursu de grupos musicales de xente mozo qu’usen l’asturianu pa crear un himnu pa los Alcuentros de la Mocedá cola Llingua, que se celebren cada añu nel conceyu.

El premiu va consistir na edición del cantar y l’actuación del grupu na celebración de la IX Edición de los Alcuentros “Saca la llingua”, que se van celebrar nel mes d’abril de 2012.

Van poder presentase grupos de cualesquier estilu de música, de xente mozo d’hasta 20 años empadronao nel conceyu de Xixón. L’oxetivu d’esti concursu ye axuntar la llingua asturiana y la música pa crear un cantar que sirva d’himnu pa los futuros Alcuentros de la Mocedá cola Llingua.

L’IES Xovellanos de Xixón, y dientro de los actos del Bicentenariu de la muerte de Xovellanos tien abierta la esposición “Ilustración y romanceru. Instrumentos musicales nel sieglu 18 n’Asturies”, que tará abierta hasta’l 22 d’avientu n’horariu escolar y los miércoles de tarde.

La esposición ta a cargu del investigador y músicu asturianu Dani García de la Cuesta. Pa facer visites a la esposición, contautar con esti corréu: dagarcues@yahoo.es

Poniéndo-y el ramu a les xornaes culturales De Castilletes y Carbón y pa festexar Sta. Bárbara, Nuberu vuelve a xubir a los escenarios. El Nuevu Teatru La Felguera va acoyer esti domingu 4 d’avientu a les 20:15 hores un conciertu d’esti míticu grupu asturianu encabezáu por Chus Pedro y Manolo Peñayos. D’esta forma, vamos poder disfrutar otra vuelta del históricu grupu enriba l’escenariu dempués d’una despidida que los llevo per tola xeografía nacional.

Ye esta l’actividá final de la segunda edición de De Castilletes y Carbón, unes xornaes culturales que ponen en marcha la Fundación Nuberu y l’Ayuntamientu de Llangréu y que vienen desenvolviéndose dende’l mes de payares con una serie conferencies na Casa los Alberti de Ciañu. Estes xornaes xiraron alredor de les interrellaciones ente mina, música, lliteratura, toponimia, sociedá… y contaron cola presencia d’especialistes nestos temes como: Ana Vanessa Gutiérrez, Pablo Rodríguez Medina, Xulio Arbesú, Benigno Delmiro Coto, Xose Lluis García Arias, Rubén Vega, Heri Gutiérrez García, García Manuel Asur o Chechu García. Compañeru dame tira ye’l títulu d’esti conciertu de Nuberu que va tener llugar nel Nuevu Teatru La Felguera’l próximu domingu 4 d’avientu a les 20.15 hores, la entrada va valir la voluntá.