Música

L’asociación Iniciativa pol Asturianu, que se presentó’l 17 del mes pasáu n’Uviéu acaba colgar na rede un vídeu del músicu asturianu Mario Fueyo, conocíu como “Dark la eMe”, nel “toma la iniciativa pol asturianu”, da’l sofitu a la organización y da cuenta de dalgunes de les sos idees al rodiu de la situación del asturianu nel campu de la educación y sobre manera nel de so, la música.

Dark la eMe ye un músicu con bien d’esperiencia al llombu, el so tema “Un asturiano en Madrid” diolu a conocer de forma masiva y dende entós vien teniendo una llarga y esitosa carrera nel ámbitu estatal, ensin escaecer Asturies, grabando yá dalgún tema n’asturianu. Ente los sos proyectos ta sacar al mercáu un discu dafechu n’asturianu.

Iniciativa pol Asturianu ye una organización que según los sos promotores “ñaz pa implicar a tola sociedá asturiana nel procesu de recuperación y normalización del asturianu”, y que trabaya tanto col sector públicu como col priváu a la busca de nuevos espacios de normalidá pal idioma asturianu.

Na nueche d’esti xueves, 26 de xineru, de magar les 22 hores, el chigre L’Esperteyu d’Uviéu, asitiáu en La Cuesta la Vega, va acoyer un conciertu de folk de cámara, con repertoriu folk asturianu, gallegu, escandinavu… nos instrumentos d’Andrea Joglar, Elías Garcia y Rodri Joglar. La entrada ye de baldre.

“Xota pa trés” ye’l títulu del trabayu discográficu nel que se xunieron los talentos de trés de les figures más representatives del folk y de la vanguardia jazzística d’Asturies: Jacobo de Miguel, Mapi Quintana y Michael Llee Wolfe. Trés trayectories asemeyaes, que conflúin nuna sola idea: inda queda enforma por facer col cancioneru tradicional, munchos cantares que texer y conceutos nos que la música improvisada, el folk, la tradición y la creación vanguardista van xunise creando soníos nuevos.

Esti trabayu, que va tener el so conciertu de presentación el vienres 20 de xineru a les 20:30 hores nel Teatru Xovellanos, foi editáu pol nuevu sellu discográficu independiente Every Good Song, que quier editar cantares d’Asturies y del restu del mundu, d’artistes que tienen daqué poderoso que cuntar y que nun atopen respuestes afeches a les sos necesidaes nes discográfiques tradicionales.

El próximu 9 de marzu de 2012 va tener llugar la VII Gala d’entrega de los Premios AMAS nel Teatru Filarmónica d’Uviéu. Dende esta selmana puede votase na páxina web de los premios, quedando abiertu’l periodu de votación hasta’l 20 de febreru. Pa dir a la gala ha mercase l’Anuario de la Música en Asturias 2011, que vien acompañáu d’un CD y DVD de regalu y puede consiguise n’Uviéu, na Llibrería La Palma, en Xixón, na Llibrería Paradiso y n’Avilés, en Discos Elepé.

Ente los nominaos esti añu n’estremaes categoríes, Mapi Quintana, Bacotexo, Chus Pedro, Alfredo González, Tejedor, Ta fechu, Marisa Valle Roso, Tuenda, etc.

Páxina de los AMAS, onde puede votase

El Festival de la Palabra llega de nuevu al Teatru Xovellanos con Música Callada, la vida rima, un espectáculu nel que Rosa Torres-Pardo y Ana Belén tomen los escenarios a golpe de música y pallabres de grandes nomes de la lliteratura y de la música.

Esta suxerente propuesta, que va poder vese nel Xovellanos el 13 de xineru a les 20:30 hores, ta dirixida pol veteranu director teatral José Carlos Plaza, y cuenta cola collaboración del poeta Luis García Montero. Los sos testos van sirvir de filu conductor a una xornada onde pallabra y música van entemecese a golpe de talentu creativu ya interpretativu.

La selección musical d’esta propuesta inclúi a Mozart, Chopin, Kurt Weill, Prokofiev, Stravinski, Antón García, Gershwin, Beethoven, Gabriel Fauré, o Béla Bartok, ente otros, afechos por Torres-Pardo. Y la parte lliteraria a nomes como Rafael Alberti, Jaime Gil de Biezma, Luis Cernuda, Jacques Prévert, José Fierro, Juan de la Cruz, Federico García Lorca, Ángel González o Luis García Montero, que de la mesma foi’l forxador d’un filu invisible conductor ente les obres escoyíes d’estos grandes maestros de la lliteratura.

El grupu Dixebra cumple esti vienres 6 de xineru 25 años como grupu. Va un cuartu de sieglu los miembros del grupu llideráu por Xune Elipe celebraben n’Avilés el so primer ensayu. Agora acaben d’espublizar un discu pa celebrar esti aniversariu. Esti vienres Asturnews súmase a la celebración y ufre una completa entrevista con Xune Elipe pa falar d’esti venticinco años de rock n’asturianu.

Tornen les “Folk Jam Sessions” al Cá Beleño d’Uviéu. Esti xueves a les diez y media la nueche, la música va tar al cargu d’Alberto Ablanedo, Borja Vázquez, Juanjo Marqués y Pepín de Muñalen.

Manolo Peñayos va tocar esti vienres 6 de xineru de magar les 23:30 nel chigre La Palmera, en La Pola L.lena, onde va presentar el so discu “Palabras de loco”, qu’inclúi dos temes n’asturianu del ex componente de Nuberu.

Según l’Anuariu de la Música Asturiana, asoleyáu por Publicaciones Ámbitu, les cases discográfiques asoleyaron a lo llargo del añu un total de 23 discos en llingua asturiana nel añu 2011, lo que supón una pequeña xuba con respectu a 2010, cuando salieron al mercáu 22.

La industria musical asturiana aguanta’l tipu dempués d’unos años nos que’l descensu llegó a ser del 50% añal.

El cantautor asturianu Toli Morilla va llevar les sos versiones de Bob Dylan al chigre Tierra Astur de Cualloto (Siero), nel que va ser el so primer conciertu del añu 2012. Sedrá esti xueves 5 de xineru, de magar les diez de la nueche. Toli Morilla asoleyare hasta agora cinco discos, dellos en castellán, con temes n’asturianu, y otros defechu n’asturianu: “Entropía” (2006), “Nueche d’insomniu: L’espectáculu” (2005), “Nueche d’insomniu” (2004), “Entre el barro y las preguntas” (2003) y “Nunca des la espalda” (1998).

Morilla va tocar los temes de “Diez cantares de Bob Dylan n’asturianu, un discu pa tolos públicos, que permite averase a la obra de Dylan dende la nuesa llingua.

Nel conciertu de Tierra Astur, va tar acompañáu por Ángel Miguel a la mandolina Bluegrass, el dobru National y la guitarra acústica Martín.