Música

Esti miércoles 20 marzu a les 19:30 hores, l’Atenéu de Turón va acoyer un conciertu d’Imanol Nuñez, xunto a Michael Lee Wolfe. Nel mesmu van poder sentise cantares del so dicu “La güelga”. La entrada ye llibre.

Dixebra, ún de los grupos pioneros del rock n’asturianu cumple en 2012 venticinco años nos escenarios con Xune Elipe como llíder. El grupu acaba d’asoleyar un discu mui especial tornando a los ésitos de la so carrera y el vienres 30 de marzu van presentalu nun conciertu na Sala Quattro d’Avilés, de magar les 22:30 hores. Les entraes tán yá a la venta por 12 euros de forma anticipada en epticket.com y Llibrería Paradiso ( C/ Merced, 28), Baruku (C/ Almacenes e/n), Trisquel (C/ Marqués de San Esteban, 30) en Xixón, El Último Mono (C/ Rosal, 70), L’Esperteyu (Caleya de la Ciega, 2), EP Management (C/ Fray Ceferino, 51 baxu), n’Uviéu; El Cafetón (C/ Sol, 8), El Cabanón (C/ La Estación, 21), n’Avilés y L’Abellugu (C/ Ramón y Cajal, 13), en Mieres.

Dixebra tenía’l so primer ensayu un seis de xineru del añu 1987 nunes cocheres de Castañeda, en Corvera, dende esi momentu, esta banda formada por componentes d’esi conceyu y del d’Avilés, entamaron una carrera sele pero segura que los llevó a convertise nún de los grupos más importantes de la escena asturiana d’estos venticinco años. Nesi tiempu dieron infinidá de conciertos per toa Asturies, l’Estáu español y Europa, grabaron diez discos y foron incluíos n’abondos recopilatorios; foi’l primer grupu de rock asturianu qu’actuó nel Festival Intercélticu de Lorient y tamién el primeru que representó a la llingua asturiana nel festival de la canción en llingües minoritaries europees Liet International en Laponia (onde llogró’l segundu puestu) y tien recibío dellos premios tanto a nivel asturianu como estatal.

La que va ser la edición númberu 24 del Conciertu pola Oficialidá de la Xunta pola Defensa de la Llingua Asturiana va celebrase’l viniente 8 d’abril, sábadu, confirmando yá la presencia del grupu Dixebra, que cumple esti 2012 venticinco años nos escenarios. El llugar ta entá por cofirmar.

La organización de los Premios AMAS decidieron otorgar los Premios AMAS d’Honor 2012 al Festival Aquasella al cumplise 15 años d’esta cita de la música lletrónica, referente nel calendairu musical que cada branu axunta a miles d’aficionaos a veres del ríu Seya. Per otra parte, el grupu Dixebra con Xune Elipe a la cabeza, convirtióse tres 25 años d’esistencia nun grupu sólidu y con trayectoria. “Contestariu y siempres al llau de causes solidaries, les sos lletres nun dexen indiferente a naide”, espliquen dende la organización de los gallardones.

Xunto con estos dos premios d’honor apurriránse otros 20 gallardones, votaos polos internautes dende’l 16 de xineru. Tres la gala, la fiesta va siguir col grupu Helltrip na Sala Antigua Estación, con entrada gratuita. La gala, que va ser emitida en direuto por 40 principales, diferíu per TPA y Sol Música TV, va celebrase nel Teatru Filarmónica d’Uviéu’l próximu vienres 9 de marzu a les 20, 30 hores y p’asistir, inda pueden retirase invitaciones nes llibreríes La Palma (Uviéu), Paradiso (Xixón) y Discos Elepé (Avilés).

La gala celebrada esti sábadu en Xixón dio como ganadores del Premiu al Meyor Cantar 2012 al grupu llideráu por Michael Lee Wolfe. Asturiana Mining Company fundóse nel añu 1998 con músicos mui conocíos de la escena folk, rock y jazz n’Asturies. El tema ganador, que va representar al asturianu nel Festival Liet Internacional ye «Si nun conoces Val.louta».

La formación graba nel añu 2000 el so primer discu, col títulu Patrimoniu. A finales del 2011, Asturiana Mining Company edita un discu nuevu: Sones por Berto Velasco, un trabayu onde destaquen la voz y la gaita del maestru Alberto Varillas, los arreglos vocales de Silvia Fernández y l’acordión zydeco de María Álvarez. Depués de 14 años dende la so creación, l’Asturiana Mining Company esperimentó dellos cambios que van llevar a la próxima edición del Liet Internacional.

La Gala d’Entrega del Premiu al Meyor Cantar va celebrase esti sábadu 25 de febreru nel Teatru de La Llaboral en Xixón. La hora d’entamu ye les siete la tarde, pero pa favorecer el desenrrollu de la Gala nun se va permitir la entrada de públicu a partir de les 18.50 hores. La entrada ye llibre hasta completar l’aforu retresmitiéndose amás pela TPA. Nel trescursu de la Gala, los grupos finalistes van interpretar los cinco cantares qu’opten al premiu. Amás, el grupu Skama La Rede, como ganadores de la edición del Premiu al Meyor Cantar del añu pasáu, va dar un conciertín, dempués del que va dase a conocer el fallu del xuráu. El ganador representará a Asturies nel Eurovisión de les llingües minorizaes, el “Liet Internacional”.

Los finalistes d’esti añu son Alfredo González, Bacotexo, Mining Company, Macadamia y Xera.

El “Premiu al Meyor Cantar” ñació nel añu 2007 como reconocimientu del Gobiernu d’Asturies a la creación musical en llingua asturiana o gallego-asturianu, y llega esti añu a la so sesta edición. El gallardón ye nesta ocasión una escultura creada pola artista María Xesús Rodríguez, que lleva por títulu “El Pasco” (aluminiu, oleu y barniz. 18x18x4cm) y que tien un valor estimáu nel circuitu artísticu de más de dos mil euros.

Equí puedes sentir los cantares de los finalistes

El “Premiu al Meyor Cantar” nació nel añu 2007 como reconocimientu del Gobiernu d’Asturies a la creación musical en llingua asturiana o gallego-asturianu, y llega esti añu a la so sesta edición. Acordies coles bases, puen optar a esti gallardón les canciones con lletra n’asturianu o gallego-asturianu que se comercializaran ente’l 1 de xineru y el 31 d’avientu del 2011, una y buenes seyan obres musicales de creación orixinal. Los finalistes d’esti añu son Alfredo González, col tema «Felina bipolar»; Asturiana Mining Company, con «Si nun conoces Val.louta»; Bacotexo, col cantar en gallego-asturianu «Campos de meiz»; Xera, con «Yo quixera…»; y Macadamia, con «Altanera».

Un xuráu formáu por espertos en música y llingua asturiana escoyó a los cinco finalistes, que van actuar en directo’l próximu día 25 de febreru, con motivu del Día Internacional de la Llingua Materna, na Gala d’Entrega del Premiu, que va retresmitise en directo pela Televisión del Principáu d’Asturies (TPA). L’actu emprima a les 19.00 hores nel Teatru de la Llaboral (Xixón).

L’espectáculu va zarrase cola actuación de Skama la Rede, grupu ganador de la edición anterior. Nacíos nel añu 2003, acumulen yá más d’un centenar de conciertos y tienen publicaos tres discos: La nuesa hestoria, Echaos a la mar y Ye too mentira. Practiquen un estilu musical que se mueve mayormente ente’l ska y el punk, pero con pingarates de rock y folk, y componen les lletres siempre n’asturianu. La mayor parte de los sos cantares básense na reivindicación y la crítica social y política, anque’l tema col que ganaron la edición anterior del Premiu al meyor Cantar, “Condenáu”, ye’l primeru de desamor que componíen. Como ganadores d’esti certame, Skama la Rede representó a Asturies nel Festival Liet International que se celebró n’Udine (Friul, Italia) el 19 de payares del 2011.

El grupu o intérprete ganador va representar internacionalmente a Asturies nel Festival de la Canción en Llingües Minoritaries Liet International, organizáu col apoyu del Conseyu d’Europa.

Información sobre los finalistes

Dende va un par d’años l’Asociación La Veiga´l Cubia, que dirixe la banda de gaites del mesmu nome, en Grau, tien en marcha un grupu de baille, dando clases tolos vienres na capital moscona. Dende l’asociación comenten qu’agora “nun hai muncha xente” y el grupu de baille “cuerre peligru”, polo que conviden a los interesaos nel baille asturianu a ponese en contauto nel teléfonu 667315125 o al traviés del corréu conceyugrau@hotmail.com

La Gala d’Entrega del Premiu al Meyor Cantar va celebrase’l sábadu 25 de febreru nel Teatru de la Llaboral en Xixón. La hora pa empezar ye a les 19.00 hores pero pa favorecer el desenvolvimientu de la Gala nun se va permitir la entrada de públicu a partir de les 18.50 hores. La entrada ye llibre hasta completar un aforu. Nel trescursu de la Gala, los grupos finalistes van interpretar los cinco cantares qu’opten al premiu.

Una y bona terminen les interpretaciones en direuto, el xuráu va retiráse a deliberar. Nesi tiempu, va dar un conciertu el grupu Skama La Rede, como ganadores de la edición del Premiu al Meyor Cantar del añu pasáu. Dempués de l’actuación de Skama La Rede, va dase a conocer el fallu del xuráu y, en recoyendo’l gallardón, los ganadores van volver tocar el cantar premiáu.

Los finalistes van sabese nos próximos díes.

Páxina web del Premiu

L’Asociación Música Tradicional Muyeres y Factoría Norte ponen n’escena esti sábadu 21 de xineru’l so espectáculu “Inda suenen”. Sedrá de magar les ocho la tarde. “Inda suenen” ye un proyectu desenvueltu a partir de la idea orixinal de Marisa Luque, con dirección musical de Constantino Menéndez y dirección escénica de Borja Roces. Les 25 pieces escoyíes del ampliu repertoriu de Muyeres representen la diversidá y riqueza de la tradición musical asturiana, son interpretaes por 17 “muyeres”, destacando voces solistes como Mari Luz Cristóbal Caunedo, Mavisa Miravalles, Lucía G. Palomares, Leticia González y Mónica Menéndez.

Amás, tarán acompañaes en dellos momentos por David Varela al curdión, Llorián García cola gaita y vigulín, y Celia González a la zanfonía.

“Inda suenen” representa una rotura coles habituales formes de presentación de los grupos de música tradicional n’Asturies. Supón un apueste novedosu en cuanto al tratamientu de la lluz, el soníu, soporte audiovisual y movimientu escénicu. L’ausencia de presentaciones y la presencia na obra de l’actriz, Ana Morán, interpretando testos de Susana Sela y Borja Roces como filu conductor de la hestoria, crea’l calce necesariu pa llegar a los sentimientos de los espectadores y tresmitir les emociones presentes en caúna de les pieces.

Too ello ensin perder lo que supón l’oxetivu y razón de ser de Muyeres, reivindicar y poner en valor el papel de la muyer na sociedá tradicional como creadora y trasmisora de cultura, como guardiana d’un ampliu saber popular, intentando romper los acutaos espacios a los que se vio amenorgada en demasiaes ocasiones.

Celia González (Muyeres): “Más nos valdría fianos del nuesu propiu esfuerciu que depender tanto de les instituciones”