Música

Esti sábadu 28 d’abril El Parque Inglés de Xixón va acoyer la edición númberu 24 del Conciertu pola Oficialidá, entamáu pola Xunta pola Defensa de la Llingua Asturiana. Nel cartelu d’esti añu tán los grupos Dixebra, Fala non Caduca, Tuenda, Macadamia y La Bandina, xunto al cantautor Alfredo González y el tríu formáu por Michael Lee Wolfe, Mapi Quintana y Jacobo de Miguel. L’actu va celebrase nuna carpa xigante con dos escenarios, onde van poder sentise más d’8 hores de música ininterrumpida n’asturianu.

Amás, ente los asistentes va rifase una fin de selmana pa dos persones n’Asiegu (Cabrales) qu’inclúi la Ruta del Quesu y la Sidra (Premiu Andrés Solar 2009) y agospiu, amás d’una caxa de sidra de Pamirandi.

Les entraes son a 8 euros n’anticipao y 10 euros na puerta.

El conciertu pola Oficialidá qu’entama dende hai 24 años la Xunta pola Defensa de la Llingua Asturiana yá tien zarrada la llista d’artistes y tamién el sitiu y la hora: nel Parque Inglés de Xixón, al llau del recintu de la Feria de Muestres, a partir de les 19.30 hores del sábadu 28 d’abril.

Los puntos de venta anticipada son n’Uviéu (Malayerba, L’Esperteyu), Xixón (Café Trisquel, El Barucu), Avilés (El Cafetón), Candás (La Gueta), Tinéu (Mesón Cervantes), Cangas (El Azul), Mieres (L’Abellugu), La Pola L.lena (La Palmera), La Pola Siero (Abre César), Grau (Pub Piero’s), Nava (La Naveta) y L’Entregu (La Semiente).

Esti sábadu 14 d’abril, de magar les 12:30 hores, va presentase un llibru asoleyáu pola Editorial Canela y dedicáu al músicu Manuel Enrique Fernández, Nela de Bres. Esta obra colectiva xira alredor de la figura del gaiteru y n’ella participaron un importante númberu de persones. Contien interesantes datos sobre la música de tradición oral caltenida ya interpretada por esti músicu popular del conceyu asturianu de Taramundi, la so biografía, repertoriu y técnica, según les biografíes de les sos fontes y de los intérpretes que lu acompañaron na grabación del CD que s’inclúi, con 24 temes, dalgunos d’ellos inéditos hasta’l momentu.

La segunda parte de la obra ye un álbum fotográficu estremáu en trés separtaos. El primeru ye una serie de semeyes feches n’esclusiva pa esta ocasión pol fotógrafu cántabru Vicente Ansola, recién ganador del premiu Hasselblad Masters 2012. El segundu ta formáu por delles imáxenes de Nela en distintes situaciones y acompañáu de numberosos músicos amigos. L’últimu bloque contien delles imáxenes tomaes mientres la grabación del discu.

El llibru cunta con testos de Pablo Quintana, Juanjo Fernández, Xerardo F. Santomé, Xosé Ambás, Luis Prego y Xabier Díaz, amás de 125 semeyes de Vicente Ansola, Florencio Rodríguez, Edelmiro Fernández, Xosé Ambás, Eduardo Rivo, Juanjo Arroxo o Jacobo Quintana.

Dempués de la presentación va celebrase una espicha n’Os Teixóis.

Esta fin de selmana La Pola (L.lena) celebra’l so mercáu tradicional entamáu pola asociación Puxando pol carru. El sábadu a les 11 la nueche va abrise’l mercáu tradicional y media hora más tarde un pasacais de la Banda de Gaites “Güestia”, va percorrer la zona. Alex Boada, reporteru de la TPA va dar el pregón, y yá pela tarde, van facese actividaes pa neños, teatru costumista y un alcuentru folclóricu de bandes de gaites. A les ocho y media entamen los concierrtos, con Tríu Santos, Varela y Caleya, Duerna y Spanta la Xente. El domingu van siguir les actividaes a les once la mañana y yá de nueche va actuar Chus Pedro.

Dende les 11 y hasta les dos van actuar los miembros del grupu de baille “La Flor de Xanzaina”. De tarde, van celebrase actividaes infantiles, un festival de canción asturiana y yá a les 11 la nueche, una actuación de Chus Pedro, ex miembru de Nuberu.

Estos díes el cantautor Toli Morilla ta de conciertos. Güei, xueves 12, a les ocho la tarde, va tocar nel pabellón Caxastur del Recintu Luis Adaro de Xixón, y el sábadu 14, a la mesma hora, nel Teatru Nuevu de La Felguera. La entrada ye de baldre. Xunto a él va tocar Ángel Miguel.

Esti vienres, 13 d’abril, a les nueve la nueche, va presentase con un conciertu’l nuevu discu d’Edu Vázquez. Sedrá nel chigre La Antigua Estación. El discu, tituláu “Doce maneras de escapar descalzo” contién doce cantares que caminen pela meyor tradición de los cantautores folk anglosaxones y los sones del pop más clásicu.

Dempués d’años con distintos proyectos, collaboraciones y en grabando’l so primer trabayu en solitariu, l’EP debú, “Anque lluevan sombreros” (2009) Edu Vázquez zarróse mientres l’añu 2011 nos estudios Clise (Uviéu) pa grabar el so primer álbum “Doce maneras de escapar descalzo”( Algamar 2012).

El discu foi grabáu y producíu por Álvaro Bárcena, masterizáu por Daniel Sevillano y cuntó col trabayu de los músicos Ángel Miguel, Sergio García y Alejandro Blanco.

Nel discu, amás, collaboren Alfredo González, Helena Gil (La M de Matilde), Daniel Merín, Héctor Braga, Pablo Bertrand y Mari Paz González.

Daneil García de la Cuesta va presentar “Les gaites”, güei, llunes 2 de marzu, a les 19 hores nel salón d’actos de la Biblioteca d’Asturies (Uviéu). Nel actu va tar José Antonio Gómez, profesor titular d’Hestoria del Arte y Etnomusicoloxía de la Universidá d’Uviéu, y Aurelio Argel, comentarista musical de los 40 Principales Asturies. L’autor va facer una presentación usando semeyes esplicatives.

Dixebra, ún de los grupos pioneros del rock n’asturianu cumplió en xineru venticinco años nos escenarios con Xune Elipe como llíder. El grupu acaba d’asoleyar un discu mui especial tornando a los ésitos de la so carrera y el vienres que vien, 30 de marzu, van presentalu nun conciertu na Sala Quattro d’Avilés, de magar les 22:30 hores. Les entraes tán yá a la venta por 12 euros de forma anticipada en epticket.com y Llibrería Paradiso ( C/ Merced, 28), Baruku (C/ Almacenes e/n), Trisquel (C/ Marqués de San Esteban, 30) en Xixón, El Último Mono (C/ Rosal, 70), L’Esperteyu (Caleya de la Ciega, 2), EP Management (C/ Fray Ceferino, 51 baxu), n’Uviéu; El Cafetón (C/ Sol, 8), El Cabanón (C/ La Estación, 21), n’Avilés y L’Abellugu (C/ Ramón y Cajal, 13), en Mieres.

Dixebra tenía’l so primer ensayu un seis de xineru del añu 1987 nunes cocheres de Castañeda, en Corvera, dende esi momentu, esta banda formada por componentes d’esi conceyu y del d’Avilés, entamaron una carrera sele pero segura que los llevó a convertise nún de los grupos más importantes de la escena asturiana d’estos venticinco años. Nesi tiempu dieron infinidá de conciertos per toa Asturies, l’Estáu español y Europa, grabaron diez discos y foron incluíos n’abondos recopilatorios; foi’l primer grupu de rock asturianu qu’actuó nel Festival Intercélticu de Lorient y tamién el primeru que representó a la llingua asturiana nel festival de la canción en llingües minoritaries europees Liet International en Laponia (onde llogró’l segundu puestu) y tien recibío dellos premios tanto a nivel asturianu como estatal.

El sábadu, 24 de marzu, a les 19,30 hores, nel salón d’actos del CCAI, na cai Institutu 21, de Xixón, celebraráse la presentación del llibru entituláu Les Gaites. Nesti llibru espéyase’l resultáu d’un trabayu d’investigación, fechu por Daniel García de la Cuesta, sobre un instrumentu tradicional usáu n’Asturies y n’otros munchos llugares, la gaita.

L’actu presentarálu Fonsu Fernández García, Director del Muséu de la Gaita de Xixón. Darréu l’autor del llibru falará del so trabayu acompangáu d’una amuesa d’imáxenes que valdrán pa ilustrar el desendolque del estudiu fechu. Amás d’afondar nel conocimientu y usu de la gaita, y d’otros instrumentos utilizaos ya dende la prehestoria astur, “trátase nesta xera de dir a la gueta del orixen y desendolque de los instrumentos que lleven el nome de gaita y d’otros colos que tán venceyaos a lo llargo de la hestoria musical, tantu de los que lleven fuelle como de los que non, como los auloi, launeddas, albokak, etc”, esplica l’autor.

Pa ello, nel llibru faise un estudiu sobre les sos etimoloxíes, oríxenes, posible espardimientu, el so usu antiguu y el d’anguaño, les sos formes, el so venceyamientu con otros instrumentos usaos en diferentes dómines y llugares del mundu, y tou ello ilustrao con más de cincocientes imáxenes.

Esti ye un trabayu que marca un puntu de referencia pa toes aquelles persones interesaes nel estudiu d’esti ámbitu musical, al identificar dalgunes iconografíes escaecíes, apurrir nuevos datos y facer nueves llectures de los antiguos testos griegos y llatinos n’onde se documenta l’usu d’instrumentos de vientu, como les tibiae, litus, salpinx, cornu, tuba, etc. Compleméntase’l trabayu con un llistáu de bibliografía y señes de páxines d’internet pa que cualaquier persona pueda averase a la información consultada.

L’ésitu internacional de la banda asturiana Stormy Mondays, que los llevó a sonar nun tresborador, escoyíos pola NASA y al traviés d’una votación en tol mundu, nun fai qu’escaezan los sos oríxines y per primer vegada acaben de grabar un tema cantáu n’asturianu y tituláu “Dormi yá”.

El cantar, una traducción del so tema “Folk Lullaby”, puede sentise yá na so páxina web y en YouTube y tien un vídeuclip fechu gracies a imáxenes cedíes pola NASA. Los miembros del grupu espliquen na so páxina web l’orixe del asturianu “un idioma que tuvo la desgracia d’asemeyase demasiao al castellán”, espliquen. Stormy Mondays defende al asturianu como “una llingua qu’esite, ye real, ye viable y tien falantes de toles edaes, que la sienten la viven, anque pa los que somos d’Uviéu mos paeza imposible”.

Col cantar esperen “poner un granín d’arena” pa evitar el desaniciu “d’una llingua en peligru d’estinción”.