Música

El grupu Spanta la Xente va tocar esti vienres, 15 de xunu, en Caborana (Ayer) como sofitu a les movilizaciones de los mineros asturianos y lleoneses. El conciertu tendrá llugar nes fiestes de Caborana de magar les once y media la nueche.

Esti xueves 14, va celebrase’l conciertu de presentación del EP ‘Al altu la lleva’ de Fala non Caduca con una espicha-conciertu en Tierra Astur Águila (Cualloto). Sedrá nesti establecimientu de magar les nueve y media la nueche y por 16’5 euros, espicha incluyida.

Los asistentes van poder mercar l’EP ‘Al altu la lleva’ por 5 euros.

Esti xueves, 14 de xunu, Marisa Valle Roso, va actuar a les 20.30 hores nel Teatru L’Entregu. La entrada ye de cinco euros.

Nel conciertu van participar, amás de la cantadora Valle Roso, Pablo Carrera a la gaita, Xaime Arias al pianu y Rodrigo Sturm , cola guitarra. Les entraes van costar cinco euros en tolos casos.

El primer discu de Vinagre de Sidra va llegar al mercáu en pocu tiempu y el grupu adelantó estos díes el primer tema, “Raigañu”, que según espliquen “fala de la nuesa Tierra, Asturies”, a la que califiquen como “un país que ta condergáu a lluchar escontra les represiones esteriores que quieren echanos abaxo… y de la guapura de la nuesa tierra”. La banda formóse en 2006 y dende entós vien camudando delles vegaes de miembros y faciendo conciertos per Asturies, Castiella o’l País Vascu, agora graben el so primer discu, dempués d’una demo titulada “Avinagraos” que nun llega a distribuyise.

Una nueva productora ta acabante ñacer. Producciones A Mansalva va dedicase a la producción y promoción d’eventos y festivales musicales del ámbitu tradicional asturianu, con roster propiu d’artistes en Management y booking. Asitiaos n’Asturies con un ampliu catálogu de servicios como la creación y producción d’eventos, conciertos, festivales y xires.

La productora tien una cartera d’artistes en contratación esclusiva, amás d’otros artistes colos que trabayen en booking.

Inclúin nos sos servicios, la promoción con anuncios en prensa, cuñes de radiu, foros y xestión de redes sociales.

Amás cuenten con departamentu de diseñu, pa cartelería, lones, entraes, merchandising.

Páxina de la productora

Producciones A Mansalva, de recién creación, entama nesti mes de xunu una xira cola cantante llangreana Marisa Valle Roso faciendo un percorríu per diferentes puntos d’Asturies. Nesti camín va presentar el so primer trabayu discográficu en solitario “De lo fondero l’alma”. Llanes, L’Entregu, Cangas del Narcea y Mieres del Camín son les primeres paraes d’esta xira.

Los conciertos sedrán a les ocho y media la tarde en tolos casos. Los espacios escoyíos son, el sábadu 9 de xunu, el I.E.S de Llanes; el xueves 14, el Teatru L’Entregu, en Samartín del Rei Aurelio; el vienres 22, el Teatru Toreno, en Cangas, y el llunes 25 de xunu, l’Auditoriu Teodoro Cuesta, en Mieres del Camín.

Nos conciertos van participar, amás de la cantadora Valle Roso, Pablo Carrera a la gaita, Xaime Arias al pianu y Rodrigo Sturm , cola guitarra. Les entraes van costar cinco euros en tolos casos.

Esti sábadu 2 de xunu a les 20:30 hores nel Teatru de la Llaboral el grupu xixonés Nosoträsh toca en casa. Tres más de venti años nel panorama musical, hai unos cuantos discos publicaos por Elefant que quedaron yá pa la hestoria del pop estatal, como “especiales”, “únicos” ya “irrepetibles”. Unu d’estos discos ye “Popemas”, el tercer discu de les asturianes Nosoträsh, del que van poder sentise temes nesti conciertu pal que les entraes tán entá a la venta al preciu de diez euros.

Nel conciertu presenten una oportunidá inigualable pa recordar cantares como “Gloria”, “Corazón Colilla” o aquel “Tres tristes tigres” cantada xunto a Nacho Vegas, y volver a ver sobre l’escenariu a Cova, Bea y Natalia, arropaes per Mar Álvarezs, de Pauline en la playa, Pedro Vigil, de Penelope Trop, y Eva Díaz.

Les entraes pueden mercase en Tiquexpress, nel teléfonu 902 106 601, na Recepción de La Llaboral Ciudá de la Cultura, na Recepción del Centru Cultural Internacional Avilés, na rede de caxeros Caxastur y en www.cajastur.es

Sol lema “El que come, bebe y canta la crisis espanta”, Anabel Santiago y David Varelaserán los encargaos d’animar esti v “Vienres Distintu” de Tierra Ástur Poniente, convidando a cantar a los presentes y onde amás va tener llugar una preba gratuita de picadiellu.

Continuan los Vienres Distintos” de Tierra Ástur Poniente, en Xixón. La impresionante voz d’Anabel Santiago y la maña de David Varela col acordión, col únicu oxetivu de que tolos veceros esfruten cantando con estos artistes asturianos.

El Conceyu Bimenes ta acabante de convocar una nueva edición del so Concursu de Gaiteros y Gaiteres Mozos. El requisitu imprescindible pa poder participar nel mesmu ye ser menor de 21 años a fecha 31 de mayu de 2012. El plazu p’apuntase, apurriendo la documentación afayadiza al Ayuntamientu Bimenes, acaba’l 6 de xunu a les 12’00 hores. El concursu tendrá, si el númberu de participantes ye mayor de catorce y asina lo decide’l xuráu, una fase semifinal que se cellebrará na Casa la Cultura de Santuyano’l sábadu 9 de xunu.

La final tendrá llugar nel Palaciu del Marqués de Casa Estrada una selmana dempués, sábadu 16 de xunu, nel marcu de la Romería de la Oficialidá. Repartiránse 600 € en premios, pa los tres primeros clasificaos, asina como dellos trofeos. Tola información necesaria pa poder participar nel certame recuéyese nes bases del concursu, que pueden consultase na web del Conceyu de Bimenes.

La Conseyería d’Educación y Universidaes d’Asturies, al traviés de l’Asesoría d’Enseñances de Llingua Asturiana, entama per primer vegada, y por cuenta de la celebración de la 33 Selmana de Les Lletres Asturianes, un ‘Conciertu Didácticu’ pensáu especialmente pa los escolinos asturianos.

El recital, que nesta primer edición va tar dedicáu al director y compositor xixonés Enrique Truan, va celebrase esti miércoles, 2 de mayu a les 18.00 hores, na Casa de la Cultura Marta Portal de Nava.

Esta iniciativa ñaz de la collaboración de la Conseyería, el Conservatorio Cimeru de Música ‘Eduardo Martínez Torner’ d’Uviéu y el Colexu Públicu ‘San Bartolomé’ de Nava, que reconocen la necesidá d’averar al alumnáu asturiano estilos musicales más desconocíos que complementen la formación artística recibida nos sos centros educativos.

L’asturianu va ser la llingua vehicular d’esti conciertu que va tar conducíu por Kala y Tal, dos personaxes infantiles creaos pa la ocasión que, ente actuación y actuación, van interactuar con otru personaxe, Enrique Truan, y van esplicar a los escolares les característiques de cada interpretación.

Los alumnos de Pianu Complementariu del Conservatorio Cimeru de Música d’Uviéu, dirixíos pola profesora Inés Estrada, van ser los encargaos d’interpretar les composiciones d’Enrique Truan, que van sirvir, amás, de complementu a les actividaes desenvueltes nes aules en redol a la figura del compositor asturianu.