Música

Esti sábadu 28 de xunetu, la música va enllenar Candás col festival Rebolleres Rock IV, onde van participar Dixebra, Skama la Rede, Desakato y el Grupu de Baille San Félix. A les 10 de la nueche nel prau de Gervasia entamará la folixa.

Esti xueves 26 de xunetu a les ocho y media la tarde y dientro de les actividaes del Festival Arcu Atlánticu, el gaiteru asturianu Hevia va dar un conciertu de noventa minutos de duración nel que va cuntar con María José Hevia na percusión y Josué Santos al pianu clásicu. L’asturianu Hevia ye unu de los artistes asturianos más cosmopolites. Prueba d’ello ye l’ampliu espectru d’escenarios que lu recibieron: Festivales de música celta, como’l Intercéltique de Lorient en Francia o’l Celtic Connections n’Escocia; de Jazz, como’l Pori Jazz Festival en Finlandia o la Rede Sea Jazz Festival d’Eilat n’Israel; relixosos, como’l Otobutai en Kyoto; pop, como’l Festival de San Remu n’Italia, o de nueves músiques, como’l Womad d’Atenes. Les sos xires recalaron tamién n’Alemaña, Bélxica, Holanda, Polonia, Portugal, Arxentina, Méxicu, Chile, Xapón, Turquía o Israel.

Pero p’algamar eses metes, poco accesibles nel mundu artísticu, foi necesaria una vocación ferrial pola gaita y un inmensu trabayu de más de veinte año dedicáu a la investigación de la música tradicional asturiana, magar tien de precisase que la so música esquiza territorios más amplios. Too empezó nuna romería en Amandi. Con cuatro años quedó impresionáu pola maxa d’un gaiteru y dende esi momentu afayó un camín que yá nun abandonaría. Asina que decidió tomar clases d’Armando Fernández. L’alumnu llueu fízose profesor, fundando escueles de les que darréu saldríen bandes de gaites. De la mesma entamó a tocar nun grupu folk.

Na so carrera recibió numberosos premios, ente los que tán el 1er premiu “Amuesa Nacional de Música Folk pa Nuevos Intérpretes del Institutu de la Mocedá”; 1er premiu “Investigación Etnomusicológica Eduardo Martínez Torner”; 1er premiu “Troféu solistes de gaita, Memorial Remis Ovalle”; 1er premiu “Troféu solistes de gaita Festival Intercélticu de Lorient”. N’Uviéu recibió delles vegaes el 1er Premiu del Concursu y Amuesa de Folklore Ciudad d’Uviéu”, na modalidá de gaiteros solistes. Cola so hermana gana’l Concursu pa Dúos d’Instrumentistes Tradicionales nos Rencontres Internationales de Luthiers et Maîtres Sonneurs de St. Chartier”, La Chatre.

Ceador de la gaita midi, grabó en 1997 Tierra de naide, con dos millones de copies vendíes en tol mundu. A esi trabayu siguiéronlu otros ésitos como Al otru llau (2000), Étino ma non troppo (2003) y Obsesión (2007). Foi merecedor del premiu Multiplatinum por vender más d’un millón de discos nun añu n’Europa. Nesti conciertu’l repertoriu va incluyir temes del so últimu discu, de trabayos anteriores y dellos inéditos de recién composición.

L’Océanu como antepaís de toles costes qu’apaecen pel horizonte marítimu, como un mesmu puntu d’alcuentru de miraes y sentimientos, petites y esperences, retos y aventures, alcuentros y rellaciones, asina definen dende’l Conceyu de Xixón l’espíritu del Festival Arcu Atlánticu, col que pretenden que’l conceyu se torne exa d’un arcu atlánticu multicolor nel que los sos axentes camuden en puertu d’humanidá, n’invitación al alcuentru y la rellación al traviés del arte, la música, la lliteratura, los xuegos, la folixa…

Esti ye’l puntu de partida del Festival Arcu Atlánticu 2012, que va celebrase en Xixón dende’l sábadu 21 al domingu 29 de xunetu en distintos sitios y equipamientos de la ciudá. El Festival va axuntar un garapiellu d’actividaes nes que va haber manifestaciones culturales, musicales, artístiques, artesanales, lúdiques, deportives y tradicionales del Arcu Atlánticu Européu, amás d’alcuentros empresariales que van afalar el contautu ya intercambiu ente los emprendedores de les comunidaes y países atlánticos, camudando la ciudá esos díes en focu y faru atlánticu d’atraición turística. Esti añu 2012 Portugal va ser el país convidáu y protagonista principal.

Les actividaes van tar dientro de 9 exes temátiques: la mar, la lliteratura, la danza, el teatru, les artes audiovisuales, la cultura tradicional, el comerciu, la música y la naturaleza. Y dientro d’eses exes, bien de propuestes: 7 esposiciones ya instalaciones, xornaes lliteraries, certame gastronómicu, xuegos tradicionales, xornaes y espectáculos de danza, conciertos, regates y exhibición d’embarcaciones, talleres de construcción naval…

El Teatru Xovellanos, el Xardín Botánicu, el Centru de Cultura Vieyu Institutu, el Muséu Barjola, la Plaza Mayor, El Campu Valdés, L’Atalaya, la Playa Poniente, el Paséu Begoña, el Puertu Deportivu…., van ser los sitios d’alcuentru d’esti Festival que van facer posible l’intercambiu y la participación de tola ciudá.

Porgrama completu d’actividaes

El grupu Xera va tocar el sábadu 21 de xunetu nel Centru Niemeyes d’Avilés col so espectáculu basáu nos temes del so dicu nuevu “Llume”. Esti sedrá’l primer espectáculu fechu n’Asturies en 5.1 en surround, una modalidá de soníu 3D qu’emplega l’asitiamientu estratéxicu de dellos altavoces pa crear un efectu d’envolvencia acústica real. Los soníos lletrónicos de Xera van entamar a sentise a les ocho la tarde nel auditoriu del complexu cultural avilesín. El grupu fórmenlu Vérval, Flavia, Xuan Naveiras a les gaites; Jesús Fernández Porrúa, a la percusión llétrica, coros y guitarra acústica; y con Gema Palacio Esteban, a los teclaos, theremín y voces.

Les entraes pal conciertu pueden consiguise por diez euros na Recepción del Centru Niemeyer, na Recepción de La Llaboral Ciudá de la Cultura en Xixón, en www.cajastur.es, nel teléfonu 902 106 601 y nos caxeros caxAstur Tiquexpress.

Por cuenta del décimu aniversariu de la revista Rock Estatal (una de les más importantes dedicada a la escena rockera del Estáu español), nel so últimu númberu, correspondiente a esti mes de xunetu, la publicación inclúi un reportaxe especial tituláu “Las 100 bandas más destacadas de la última década”, fechu a partir de les opiniones de periodistes especializaos y llectores. Nél apaez un llistáu colos grupos más representativos, influyentes o importantes de los últimos diez años nel rock fechu nel Estáu; ente elles figura reseñada la formación avilesina Dixebra, que respuende a un cuestionariu pequeñu. El grupu asturianu apaez al llau d’otros como Barricada, Barón Rojo, Burning, Celtas Cortos, Fito & Fitipaldis, Héroes del Silencio, Loquillo, Los Enemigos, M Clan, Marea, Pereza, Rosendo, Siniestro Total o Soziedad Alkohólica.

Na selección ta presente tamién la llingua vasca (con Berri Txarrak, Betagarri, Skalariak y Su Ta Gar) y la catalana (con Albert Pla y Obrint Pas), dándose la circunstancia de que nenguna banda qu’utilice’l gallegu o l’aragonés formen parte del llistáu.

Pero nun ye esta la única presencia de Dixebra na revista, asina na sección de crítica de discos coméntase la so última entrega, el trabayu tituláu XXV. 1987-2012, y nel apartáu dedicáu a los conciertos reséñase’l que dieron na Sala Quattro d’Avilés, nel mes de marzu, pa conmemorar los sos venticinco años d’actividá.

Daniel García de la Cuesta va presentar en Llastres (Colunga) el so llibru nuevu, dedicáu a ‘Les Gaites’. Un trabayu nel que, al traviés d’imáxenes y testos, fai un percorríu peles característiques d’esti instrumentu. L’actu sedrá a les seis de la tarde nel salón d’actos d’El Piqueru.

El Festival Intercélticu d’Avilés y Comarca celébrase cada branu n’Avilés dende 1997. Ta dedicáu a les tradiciones culturales de los llamaos países celtes, con especial pesu de la música y de la danza, anque tamién recueye otres formes d’arte como la pintura, la fotografía, el teatru, la escultura, l’artesanía según deportes, gastronomía, etc. Entamáu pola Asociación Cultural Esbardu esti añu va llenar un añu más les cais de la villa del adelantáu y otros llugares de la comarca de música, baille, monólogos, talleres y otres actividaes.

La idea de facer un festival d’esti tipu n’Avilés surde, según cuntaron en bastantes ocasiones los responsables de l’asociación, na primer participación de Esbardu nel reconocíu Festival Intercélticu de Lorient en 1993, onde quedaron ablucaos pola magnitú del mesmu y entamaron a preparar la idea de facer daqué asemeyao n’Asturies, y más concretamente na so ciudá. D’esta manera, nel branu de 1997 el proyectu FIA llogra una de los trés sovenciones aprobaes pol Gobiernu del Principáu d’Asturies, la de menor cuantía, amás d’otra otorgada pol Conceyu d’Avilés. L’ésitu y la bona acoyida d’esta primer edición sirvió por que la organización decidir a siguir col festival, a pesar del déficit económicu.

Na edición de 2006 el festival cuntó con 1.175 participantes directos, partíos en 150 actos programaos nos 11 díes que duró’l mesmu, xuntando a 800 músicos, baillarinos y actores nun mesmu defile.

En 2008 foi estremáu como Fiesta d’Interés Turísticu Rexonal, lo que consolidó esti festival dientro del panorama de la música celta.

Porgrama completu d’actividaes

Dientro de la programación de la Selmana Negra, que se celebra estos díes en Xixón, van celebrase dellos conciertos. Esti llunes a les 22:30 va actuar el cantautor Pablo Moro.

El martes 10 a la mesma hora ye’l turu pal grupu Dr. Explosion, mientres que’l miércoles van tocar los Flying Padres.

El xueves celebraráse’l Conciertou Coca-Cola, con The Pinker Tones. La fin de selmana va cuntar con Niños Mutantes el vienres, y Pantano pal sábadu.

El grupu Dixebra, qu’anguaño cumple venticinco años d’actividá ininterumpida, recibía esta selmana dos gallardones por cuenta de la so llarga trayectoria. El primeru recoyíalu’l llunes pasáu en Piedrasblancas, capital del conceyu de Castrillón, onde la Banda de Gaites L’Alborecer facía entrega del so máximu gallardón a la formación decana del rock asturianu. La Gaita d’Oru recibíenla nel marcu del Día de Castrillón nes fiestes llocales, de manes de l’alcaldesa, Ángela Vallina, pola so xera en defensa de la llingua asturiana y la incorporación de la música asturiana a contestos sonoros contemporáneos.

El segundu reconocimientu llegó-yos en casa, asina na novena edición de los premios qu’añalmente concede’l periódicu La Voz de Avilés, foron merecedores del gallardón nel apartáu d’Acción Cultural. Na gala d’entrega, que se facía esti xueves, y a la qu’asistíen bien de representantes políticos del país, ente ellos tolos alcaldes d’Avilés y comarca, diputaos na Xunta Xeneral (como Ignacio Prendes d’UpyD o Jesús Gutiérrez del PSOE –amás de secretariu xeneral de la FSA-), senadores (como l’expresidente asturianu Álvarez Areces), conseyeros (Presidencia y Educación y Cultura) y otros cargos de l’alministración, Dixebra fizo alcordanza de tolos músicos que trabayen cola llingua asturiana como ferramienta de creación, pidió “dende la humildá, pero tamién dende la convicción nes nuestres razones, que los representantes políticos asuman con naturalidá, respetu y llibertá’l fechu llinguísticu asturianu”, desixeron que s’acabe col “apartheid llingüísticu que sufre esti país llamáu Asturies” y acabaron la so intervención comentando que’l “meyor premiu que nos pueden dar a la xente que trabayamos, nos comunicamos o creamos na llingua asturiana ye’l de la so oficialidá”.

Otra manera, Dixebra sigue cola so xira braniega, que los va llevar a tocar nes próximes selmanes en llugares como Candás, Carabanzo o Avilés, amás de delles cites fuera del país. A la vuelta del branu van enzarrase nel llocal d’ensayu pa preparar los temes que van formar parte del so discu nuevu, pal que baraxen la so salida a la cai nos primeros meses del añu qu’entra.

El restorán Tierra Astur de Cualloto recibe güei la música del grupu folk Duerna, que va llevar los sos sones a la espicha que celebra esti establecimientu cada xueves. Duerna ñació en 2008 y ta conformáu por Andrés Martínez, Estefanía Moro, Pedrín y Pablo Carrera.