Música

El viniente 8 de marzu va celebrase la VIII Gala d’entrega de los Premios AMAS y yá ta abierta la votación populares pa les venticuatro categoríes que componen estos premios de la música asturiana. Hasta’l 25 de febreru pue votase na páxina web de los AMAS. Amás, yá t a la venta l’Anuario de la Música en Asturias 2012, acompañáu d’un cd y dvd, nes principales llibreríes.

Ente los nominaos la Banda Gaites Xácara, Stormy Mondays pol so clip de Dormi yá, Imanol Nuñez, Anabel Santiago o Mariluz Cristobal Caunedo, amás del discu Revolusón, de Soncai System.

Vota a los nominaos

El miércoles día 2 de xineru publicóse nel Boletín Oficial del Principáu d’Asturies (BOPA) la convocatoria del “Premiu al Meyor Cantar” en llingua asturiana o gallego-asturianu, un galardón qu’algama nel presente añu 2013 la so sétima edición. El Gobiernu d’Asturies instituyó esti Premiu nel añu 2007 col oxetivu de consolidar, arriquecer y prestixar la creación musical asturiana. A esta convocatoria van poder presentase los músicos, a títulu individual o dientro de grupos, que comercializaran dalgún cantar orixinal de cualesquier xéneru demientres l’añu 2012, quedando escluyíes les pieces tradicionales yá esistentes, les versiones o adaptaciones d’obres de creación publicaes orixinalmente n’otra llingua, y les canciones que nun fueran editaes y grabaes la primer vez nel periodu referíu.

Hasta’l día 19 de xineru ta abiertu’l plazu pa que los interpretes o grupos interesaos soliciten la so participación, indicando’l cantar qu’escueyen pa concurrir al premiu. Un xuráu formáu por espertos en música y llingua asturiana escoyerá d’ente los presentaos a los finalistes, qu’actuarán en directo na Gala d’Entrega del Premiu, en fecha aproximada al día 21 de febreru (Día de la Llingua Materna).

El grupu o intérprete ganador na presente edición representará internacionalmente a Asturies nel Festival de la Canción en Llingues Minoritaries (Liet International), organizáu col apoyu del Conseyu d’Europa.

Bases completes

Ernesto Paredano, músicu de Castrillón, ta de xira estos díes. Esti xueves 3 de xineru va tocar en Santu Domingu nun llocal llamáu La Alparagatería, llevando la so música a esti país caribeñu. El día 30 d’esti mes tara en Madrid, tocando nel Café La Palma.

Ernesto Paredano tien dos discos nel mercáu: “Alebrix”, con poemes n’asturianu de la so madre, la poeta Esther García y “Ensel” qu’asoleyó en 2012. Gaiteru y pianista, tien puesto música a munchos proyectos audiovisuales en México y nel estáu español.

Soncai System ye’l proyectu onde trabayen a comuña dos nomes perbién conocíos de la escena sonora asturiana, Xune Elipe y Sergio Rodríguez, al que se xunten otros tamién importantes como Vito Álvarez, Aique García, Delfín Valdés, Miguel Herrero, Fran Carrio, Eladio Díaz, Fabián Zapico o Jacobo de Miguel, ente otros. Seis años depués del so primer discu publiquen agora Revolusón, aventura musical que ye una mecigaya axeitada d’estilos y soníos mui abierta y heteroxénea, onde tan presentes ritmos electrónicos, ska, reggae, funk, hip-hop, latin-jazz…nuna mezclienda que bien podría llevar l’axetivu de mestiza, incorporando la llingua asturiana a un contestu musical non mui avezáu.

D’esta manera Soncai System abre víes nueves pa la espresión musical n’asturianu, posibilitando la so entrada n’estayes de les qu’hasta esi momentu taba alloñáu, tapando un furacu nel nuesu panorama musical. Los integrantes de Soncai System afronten el so segundu discu cola mesma filosofía y métodu de trabayu que los caracteriza, asina sobre una base de soníos más o menos baillables, d’aniciu negru, xamaicanu o llatinu, constrúin una propuesta dafechamente actual. Yá nel nome de la banda pueden aldovinase per ónde van, ésti remembra les típiques discoteques ambulantes que percorren les cais de les ciudaes de Xamaica y que reciben el nome de sounds system; xuégase nelli cola sonoridá que da l’axuntar dos palabres como «son» (soníu) y «cai».

La discográfica L’Aguañaz, integrada agora en Goxe Producciones, ta acabante de facer llegar al mercáu ésta y otres dos referencies nueves del so yá ampliu catálogu, colos que quier enllenar de sones n’asturianu esti iviernu.

Depués de munchu tiempu de trabayu, el grupu de folk-metal con lletres n’asturianu, Taranus, asoleyó va unes selmanes el so primer discu, tituláu col nome del propiu grupu. Pa la ellaboración d’esti trabayu musical, Taranus emplegó fondos propios, depués del so refugu a solicitar les ayudes qu’ufre’l gobiernu asturianu pa la producción discográfica en llingua asturiana. El discu presentóse con un conciertu na Sala The Class de Xixón.

Nel discu, editáu por Santo Grial Records, la banda de folk-metal inclúi cantares como “Requiem”, “Fame, murnia y miéu”, “Les puertes del infiernu”, “Taranus”, “Cunta la lleenda”, “Siñor de la guerra”, y munchos otros hasta completar les once pieces musicales.

Estándar & Probes. 15 Años de Folk, Rock y Poesía n’Asturianu ye’l discu recopilatoriu col que’l cantautor Toli Morilla fai un repasu al conxuntu de la so obra nesti tiempu. El so oxetivu ye facer memoria del trabayu y la bayura del repertoriu asoleyáu en seis discos dende 1997 a 2012 onde apaecen, en formatu de canción, una perbona riestra de testos de los meyores autores de la lliteratura poética n’asturianu de finales del sieglu XX; anque tamién alcontramos traducciones, del inglés a la llingua asturiana, del más que conocíu intérprete norteamericanu Bob Dylan.

Esta edición val p’acercar al públicu una esbilla de los cantares con más sonadía, bien dellos en versiones nueves de calter acústicu, y festexar estos quince años de trabayu continuu d’esti músicu, que quier volver a poner d’actualidá y d’un xeitu renováu delles de les sos interpretaciones que más éxitu-y dieron. Pente’l repertoriu incluyíu nesti trabayu atopamos a autores como Xulio Vixil, Mª Teresa González, Antón García, Mánfer de la Llera, Marta Mori, Aurora García Rivas o Pablo Texón, amás de Bob Dylan en versión asturiana.

La discográfica L’Aguañaz, integrada agora en Goxe Producciones, ta acabante de facer llegar al mercáu ésta y otres dos referencies nueves del so yá ampliu catálogu, colos que quier enllenar de sones n’asturianu esti iviernu.

Trescurríos siete años dende la so última grabación, Mariluz Cristóbal Caunedo vuelve a l’actualidá con puxu renováu y ufierta’l so tercer trabayu discográficu de la mano de L’Aguañaz, tituláu Cancios y asturianaes, con un repertoriu variáu onde entren tonaes, cantares, añaes o villancicos, con pieces axeitaes pa les sos característiques vocales y estilu, que van de la cenciellez a la complexidá instrumental, col aquello de mostrar les posibilidaes d’esti xéneru y siempre buscando una contemporaneidá que nun resulte forzada o artificial.

El procesu de grabación d’una obra d’estes característiques foi bien llaboriosu, al tener qu’adaptar un cantu llibre como la tonada a unes estructures rítmiques que precisen d’un tiempu determináu y una interacción ente los instrumentos y la voz. Con ella collaboren nomes perbién conocíos del panorama musical del país (Rubén Bada, Daniel Álvarez, Sergio Rodríguez, Lisardo Prieto, Borja Baragaño, Dolfu R. Fernández, Elías García, etc.); la idea principal ye la d’amosar la calidá y guapura de la so voz, ufiertando un productu atractivu pa un públicu variáu, que va dende los siguidores tradicionales a les xeneraciones más nueves.

Otru aspectu importante ye’l tema de les lletres de los cantares, asina trabayóse fundamentalmente con testos del llibru tituláu Cancios y asturianaes de Llorienzu Novo Mier, publicáu orixinariamente nel añu 1980 y reeditáu nesti 2012. Nél l’autor compón una serie de versos pensaos precisamente pa ser cantaos como lletres de tonada. Dalgunos d’ellos yá tán musicaos y mesmamente convertíos en pieces mui conocíes del repertoriu del xéneru, pero otros tovía nun foron interpretaos por naide, nesti sen el discu axunta estes dos vertientes y conviértese nuna obra monográfica.

La discográfica L’Aguañaz, integrada agora en Goxe Producciones, ta acabante de facer llegar al mercáu ésta y otres dos referencies nueves del so yá ampliu catálogu, colos que quier enllenar de sones n’asturianu esti iviernu.

Los conceyos del Parque Históricu del Navia, en collaboración cola Oficina de Coordinación Cultural y Llingüística de la Fundación Parque Histórico del Navia, preparen una serie de conciertos con grupos musicales del Navia-Eo qu’ufierten el so repertoriu cantáu en gallego-asturianu.

Les actuaciones, cofinanciaes pola Conseyería d’Educación, Cultura y Deporte del Principáu d’Asturies y los conceyos de la rodiada, ufierten la posibilidá de ver actuar a grupos como Tuenda, Mestura o’l conxuntu Os Folkgazáis.

Esti martes 25 d’avientu, a les 20:30 hores, l’auditoriu As Quintas d’A Caridá (El Franco), va acoyer al grupu veigueño “Os Folkgazáis”. Esti grupu va ufiertar en primicia l’estrenu del videoclip d’un tema recoyíu nel so últimu trabayu discográficu “Haiga”.

Amás, podrá esfrutase del conciertu d’esti singular grupu veigueño, que va facer un repás pel repertoriu recoyíu nos sos dos discos puestos nel mercáu.

Daniel García de la Cuesta presenta’l so llibru “Les gaites”, n’Avilés. Sedrá esti vienres 21, a les 19.30 hores nel Palaciu Valdecarzana.

Un llibru que reflexa’l resultáu d’un trabayu d’investigación, realizáu por Daniel García de la Cuesta, sobre un preséu tradicional usáu n’Asturies y otros munchos llugares, la gaita. Amás d’afondar na conocencia y usu d’esti preséu, y d’otros utilizaos yá dende la prehistoria ástur, nesta obra, d’edición billingüe asturianu y castellán, d’esquizar nel orixe y desenvolvimientu de los preseos que lleven el nome de gaita, y d’otros colos que tán venceyaos a lo llargo de la hestoria musical, tantu de los que lleven un fuelle como de los que non, como los auloi, launeddas, albokak, etc.

Ediciones Seronda y la Estaya de la Llingua del Conceyu d’Avilés organicen la presentación del llibru “Un país llamáu Dixebra. La historia y les lletres de la banda decana del rock n’asturianu (1987-2012)”, que va tener llugar el xueves, 20 d’avientu, a les 20 hores, nel Palaciu de Valdecarzana, asitiáu na cai’l Sol. Nel actu van intervenir Román Álvarez, conceyal de Cultura d’Avilés; Francisco Álvarez, autor del llibru, y los miembros de la banda Dixebra, qu’al acabar la presentación van protagonizar una firma de llibros.