Música

El grupu Misiva va dar un conciertu’l vienres, 22 de febreru, a les 21 hores nel Centru Social Ocupáu Autoxestionáu La Madreña d’Uviéu. Esti conciertu qu’entama Xunta Moza, organización de mocedá en defensa del idioma asturianu y perteneciente a la Xunta pola Defensa de la Llingua Asturiana, en collaboración col CSOA La Madreña, forma parte del actu d’entrega de premios del IV concursu lliterariu «Amor pola llingua».

Nesti actu la xente que concursa declara’l so amor pol idioma nun formatu curtiu de 140 caracteres al traviés de les redes sociales (Facebook yTwitter col hashtag #amorpolallingua), el corréu electrónicu (amorpolallingua@gmail.com) o’l corréu postal.

Misiva naz nel 2007 en Grau y ta integrada por Humberto a la voz, Diego al baxu, David a la batería y Oscar a la guitarra. La formación de punk-rock asturiana caracterízase por unes lletres contundentes y reivindicatives que canten les miseries de l’Asturies del sieglu XXI.

Amás, nesta ocasión, van poder sentise les canciones nueves del grupu, por que ta acabante de salir el so últimu discu, Gran mentira.

La formación moscona collabora, otra vuelta, cola asociación de defensa de los derechos de los moces y mozos asturiano-falantes, Xunta Moza, nun actu folixeru y reivindicativu que quier poner de relieve les actitúes positives a favor del asturianu de la mocedá frente a una clas política prexuiciosa y acomplexada pa con esta realidá social y que nun acaba d’asumir con naturalidá lo que ye un fechu incontestable: la esistencia de la llingua asturiana y la necesidá de dotar a los sos falantes colos mesmos derechos civiles que tienen los falantes d’otros idiomes.

Xunta Moza quier agradecer la participación nesta cuarta edición del concursu «Amor pola llingua» y présta-y, non solo del éxitu nel númberu de participantes, sinón tamién la calidá lliteraria de los trabayos presentaos. La persona ganadora va dase a conocer nesti conciertu de Misiva y Xunta Moza va entregae un llote de llibros n’asturianu, amás de material de la organización (discos, camisetes, mochiles, material escolar, etc.).

Esti xueves, 7 de febreru a les 12 la mañana, presentaráse’l discu númberu 15 de la colección “Fontes sonores de la música tradicional asturiana”. Nel mesmu apaecen 37 temes grabaos en trabayu de campu, munchos d’ellos acompañaos cola pandereta. L’actu cuntará con representantes del Conveyu de Xixón y del propiu Muséu.

El músicu castrillonés Ernesto Paredano va llevar la so música al Café La Palma, de madrid, esti miércoles 30 de xineru, de magar les diez de la nueche. El llocal allúgase na cai La Palma, 62.

Paredano ta acabante llegar de Santu Domingu, onde tamién tuvo actuando. L’artista asturianu tien dos discos nel mercáu: “Alebrix”, con poemes n’asturianu de la so madre, la poeta Esther García y “Ensel” qu’asoleyó en 2012. Gaiteru y pianista, tien puesto música a munchos proyectos audiovisuales en Méxicu y nel estáu español.

Esti sábadu 2 de febreru la banda de rock asturiana Dixebra va actuar per primer vegada na so hestoria na ciudá de Lleón. Sedrá na Sala Studio 54, de magar les once la nueche. Nos sos más de venticinco años d’esistencia, la banda enxamás tuvieren oportunidá de tocar nel sur del dominiu llingüísticu asturianu. El grupu, que tien tocao en llugares de tol Estáu y d’Europa entá nun tuvo na capital lleonesa. Los sos siguidores pueden mercar les entraes na Cervecería “American Beer” y nel Music Center, al preciu de 10 euros, que sedrán 12 al mercala na puerta del eventu.

La formación alcuéntrase nesti momentu preparando’l so discu nuevu, del que yá tienen compuestos dellos temes y que tienen previsto asoleyar a lo llargo d’esti añu 2013, precisamente nesti conciertu van estrenar en primicia dalgunu de los cantares que van formar parte del repertoriu d’esi trabayu discográficu.

El sábadu 19 de xineru pesllóse’l plazu pa solicitar la participación na sétima edición del «Premiu al Meyor Cantar» en llingua asturiana o gallego-asturianu. El Gobiernu d’Asturies instituyó esti Premiu nel añu 2007 col oxetivu de consolidar, arriquecer y prestixar la creación musical asturiana. Dende entós, y con calter añal, a esta convocatoria pueden presentase los músicos, a títulu individual o dientro de grupos, que comercializaran dalguna canción orixinal de cualesquier xéneru demientres l’añu anterior a la convocatoria. La Conseyería de Cultura acaba d’anunciar los finalistes.

Esti añu tán como candidatos “Os Folkgazáis”, con ‘Flor de Toxo’; el cantante de tonada Fernando Valle Roso, con ‘Qué tengo que pagar’, de Macu González; que tamién tien un tema nomináu na voz d’Imanol Núñez, ‘Al puebliquín de La Frecha’; Xera, con ‘Espertar’, de Vérval Díaz; Fala Non Caduca, con ‘Escoyer el camín’, d’Adrián González; Sambre, col cantar d’Hugo Fuente ‘La mio Ciudá’ y los grupos Taranus, Aire, ACD y Petit Pop.

N’otres ediciones resultaron ganadores Toli Morilla, col cantar Azul y gris; Dulcamara (grupu actualmente nomáu Herbamora), col cantar Nosh, Alfredo González, col cantar La nada y tu, Xera, col cantar Tierra, Skama la Rede, col cantar Condenáu y na edición del 2012, Asturiana Mining Company, col cantar Si nun conoces Val.louta.

El grupu o intérprete ganador na presente edición representará internacionalmente a Asturies nel Festival de la Canción en Llingües Minoritaries (Liet International), organizáu col apoyu del Conseyu d’Europa.

L’Auditoriu Teodoro Cuesta de Mieres del Camín acueye la presentación del discu “La güelga”, d’Imanol Nuñez, esti xueves 24 xineru a les 20:00 hores y con entrada llibre.

Nel conciertu van participar, amás de Nuñez, Miguel Herrero (batería), Silvia Fernández (baxu), Michael Lee Wolfe (guitarra) y José Ramón Feito (teclaos).

Sentir temes del discu

La Casa Cultura de Santuyanu (Bimenes) acoyerá esti prósimu vienres, 25 de xineru, la presentación del llibru “Diamantina Rodríguez. Memoria de un tiempo de la canción asturiana”, escritu pol músicu Xaime Arias. L’actu, que tendrá llugar de magar les 20’00 hores, cuntará coles intervenciones del autor, de César García Santiago (de la editorial La Cruz de Grado, qu’asoleya’l llibru), d’Orfelina Suárez Pandiella (de l’Asociación Folklórica y Cultural Los Yerbatos) y de la protagonista de la obra, la gran cantante de tonada Diamantina Rodríguez.

La presentación ta entamada pola Asociación Folklórica y Cultural Los Yerbatos y Ediciones La Cruz de Grau y cuenta cola collaboración del Conceyu Bimenes.

La mala situación económica de la única emisora dafechu n’asturianu, Radio Sele, fai necesario recaldar fondos. Por ello, los grupos Skama la Rede, La Tarrancha y La Curuxa van dar un conciertu’l sábadu 26 de xineru a les ocho la tarde. Les actuaciones sedrán n’Antigua Estación d’Uviéu con un bonu d’ayuda de 6 euros como entrada destinada a atropar fondos económicos.

Radio Sele informó que pa caltener esta radio comunitaria ye necesario cuntar con fondos por 6.000 euros al añu, de los que lleven atropaos dalgo más de 1.500. Tamién piden donaciones na cuenta de l’Asociación Cultural Secha na Caxa Rural 3059 0001 18 2366328629.

El Muséu del Pueblu d’Asturies editó’l Cancioneru de la Gaita asturiana, d’eugenio Otero Vega, Fonsu Fernández García y Gausón Fernande Gutierri; con diseñu gráficu d’Ástur Paredes. La obra inclúi dos tomos. El primeru, con abondoses ilustraciones, percuerre la hestoria del preséu, el so usu na sociedá tradicional y les innovaciones qu’esperimentó nes últimes décades. El segundu tomu inclúi 334 partitures de gaita.

Na sociedá tradicional asturiana, la gaita foi’l preséu encargáu de poner música a la vida comuñal, acompañando’l cantar, el baille y les procesiones cíviques —pasacais, xigantes, desfiles— y relixoses —procesiones y ramos—. El preséu, d’orixe medieval, empieza a documentase en monumentos relixosos, códices y escritos alministrativos dende’l sieglu XIII, calteniéndose hasta los nuesos díes nuna tradición viva que puede rastrexase al traviés de dómines socesives.

El primer tomu del Cancioneru de la Gaita asturiana revisa les fontes calteníes y, sofitándose nelles, propón una hestoria d’esti preséu, na que son protagonistes los mesmos gaiteros, los artesanos constructores y la xente asturiano que, magar tolos cambeos sociales ya influencies estétiques y culturales qu’hubo, conservó la gaita xeneración tres xeneración, llegando a da-y un valor patrimonial y a convertila en símbolu musical del país.

La selección del Cancioneru de la Gaita asturiana entiende 334 melodíes tradicionalmente tocaes con esti preséu. Les partitures fueron ordenaes pola so función na fiesta: 1) pieces de marcha, 2) cantares, 3) dances y bailles, 4) repertoriu relixosu, incluyendo la trescripción d’una misa de gaita completa.

Dedícase amás un estensu apartáu a la renovación del repertoriu de gaita que tuvo llugar dende los años ochenta, momentu en que, gracies al perfeccionamiento técnicu del punteru, melodíes procedentes d’otros preseos tradicionales ya inclusive de la música vocal y coral incorporáronse al repertoriu habitual de la gaita, ocupando un llugar destacáu n’amueses de música tradicional y concursos.

Cada partitura complementar con una ficha informativa na que s’ufierta al llector cuanta documentación pudo arrexuntase alredor de la melodía correspondiente, incluyendo un siguimientu discográficu d’aquelles pieces que, pol so mayor popularidá, fueron grabaes dende empiezos del sieglu XX y entá güei pertenecen al mancomún común de cantares asturianos.

Los autores

Eugenio Otero Vega. Maestru gaiteru. Empezó los sos estudios de gaita con Luis de Arnizo, completando la so formación con Vicente Prado Suárez y Xuacu Amieva. Como solista y como acompañante, trabayó con distintos grupos de baille y bandes de gaites, actuando per España, Europa, Canadá, Estaos Xuníos y Cuba. Foi fundador y director de la Banda de Gaites Llariegu (Sariegu), cola que ganó en 2001 y 2002 el Campeonatu Nacional de Bandes de Gaites Asturianes. Dende 2003 ye profesor de gaita na Fundación Municipal de Cultura de Siero.

Fonsu Fernández García. Llicenciáu en Filoloxía Hispánica. Director del Muséu de la Gaita de Xixón. Dedícase al espardimientu de la música tradicional asturiana, sobre la qu’espublizó diversos artículos. Grabó’l discu Hala, señores usías (Fonoastur, 1999) y collaboró con distintes agrupaciones en discos como La martaleña (L’Aguañaz, 1991), Camín de Bres (El Cohete, 1992), Tamos fartos (Bunker, 1997), Cancios del gochu xabaz (Fonomusic, 1999), El son nel romanceru tradicional (Fonoastur, 1996 y 1998) y La zanfonía (Tecnosaga, 2003).

Gausón Fernande Gutierri. Investigador del heriedu cultural asturiana. Autor d’El paxellu asturianu o traxe’l país (CaxAstur, 2007). Collaboró n’otros llibros y publicó diversos trabayos na revista Asturies, Memoria Encesa d’un País, ente ellos «Panchu Galán, el gaiteru de Llonín» (1999), «El gaiteru y la gaita asturiana nos conceyos de L.lena, Ayeri y Mieres» (2005) y «La gaita y los gaiteros nel conceyu d’Onís» (2008).

Esti sábadu 19 de xineru, a les 20:30 hores, va celebrase un conciertu de presentación del primer trabayu discográficu de Fernando Valle Roso, tituláu “Camín d’ayures”. El conciertu va facese nel Teatru Filarmónica d’Uviéu y va cuntar con Xaime Arias, al pianu; Michael Lee Wolfe, nes guitarres; Oscar Santos, al baxu; Fernando Arias, nes percusiones; Pablo Carrera, a la gaita; Carlos Antuña, Carla Isidra y Silvia Moreno, nos coros; y la collaboración especial de Marisa Valle Roso.

La entrada ye de diez euros, ocho pa los socios de la SOF. Les entraes pueden mercase en Tiquexpress de CaxAstur.

Venta d’entraes