Mundu

La Rede de Museos Etnográficos d’Asturies ta acabante asoleyar nel so repositoriu dixital un nuevu trabayu del etnógrafu Daniel Cueli “Llavaderos. Censu del Conceyu Cabranes”. Na obra, l’autor fai estudiu de tolos llavaderos de Cabranes, apurriendo tolos datos posibles y semeya del so estáu actual. Daniel Cueli ye’l director de la revista “N’ast, cartafueyos d’ensayu” y autor de dellos trabayos nel campu de la etnografía, incluyendo unu asemeyáu a esti pero dedicáu a los llavaderos del conceyu de Sariegu. L’orixe d’esti censu ta nun estudiu que fizo nel añu 2011 y qu’apaeció asoleyáu na revista d’etnografía Asturies, memoria encesa d’un país: “Llavaderos na Comarca de la Sidra, Piloña y Siero”. Esti trabayu, xurdió del so interés “por poner en valor unes construcciones que nos sieglos XIX y XX xugaron un papel perimportante, meyorando enforma les condiciones de les muyeres na dura xera de llavar la ropa, pero poco reconocíu, polo menos dende’l puntu de vista académicu”.

Y ye que según esplica Cueli “hasta esi momentu malapenes esistía bibliografía específico sobre estes construcciones n’Asturies, namás que referencies que nun pasaben d’unes poques llinies n’obres xenériques sobre etnografía, arquiteutura popular o sol papel de la muyer na sociedá tradicional asturiana”.

L’estudiu inicial asoleyáu n’Asturies memoria encesa d’un país, fízose sobre la base d’un estensu trabayu de campu llevó al autor a visitar más de cien llavaderos nel ámbitu territorial acutáu pa facelu, pero nun incluyía un censu d’estes construcciones. “Esti fechu llevóme, precisamente pa completalu dafechu, a dir censando, pali que pali, toles construcciones esistentes y d’ehí esti documentu, que recueye’l censu llavaderos del Conceyu Cabranes y que vien a amestase al yá iguáu del Conceyu Sariegu”, esplica l’autor.

Cueli comenta nel entamu del estudiu que los llavaderos de Cabranes tienen un estáu de conservación “regular, llegando a alcontrase construcciones en mui bon estáu pero tamién exemplares fechos una llaceria”. En total, caltienense ventiséis, repartíos per toles parroquies cabraniegues, anque, esplica Cueli “la mayoría concéntrense, como ye lóxico, nes de más población, distribuyéndose de la manera que vien darréu: ocho en Torazu, siete en Fresnéu, cinco en Santolaya, trés en Pandenes, dos en Viñón y namás qu’ún na de Graméu”.

Descarga’l llibru de baldre

Esti 14 de xunuetu l’Asociación de Kiosqueros d’Asturies (KIASA) xunto con miembros de l’Academia de la Llingua Asturiana (ALLA) van organizar un Homenaxe a Pachín de Melás a les 17.45 hores y dientro del pabellón d’alcuentros de la XXVI Selmana Negra de Xixón. Dientro del actu va entregase’l pergamín onde s’afita’l nomamientu de Pachín de Melás como sociu d’honor de KIASA, a títulu póstumu, asina como la placa y el símbolu de KIASA, que va recoyer la so fía, Pilar Robles.

Amás, entregarán-y a la presidenta de l’Academia, Ana Cano, el retratu de Pachín de Melás fechu por Iván Quesada y que, xunto a Pilar Robles, entregará a la institución académica en calidá de donación pa que forme parte de la galería d’autores en llingua asturiana.

Darréu celebraráse una charra sobre Pachín de Melás, cronista de la emigración asturiana n’América, a cargu de Xosé Ramón Cuevas, académicu de númberu de l’ALLA.

L’actu va acabar col Himnu d’Asturies y cola representación d’una obra curtia de Pachín de Melás, titulada “Regalín d’Aldea”, que tará a cargu del grupu de teatru del Centru de persones mayores de la fastera centru de Xixón, asitiada nel Mercáu de San Agustín, dirixíu pol Eladio Sánchez, director de la compañía.

El próximu miércoles 5 de xunu a les 7 la tarde nel Centru Sociocultural de Les Vegues, Berto García presenta “Inercia”, el so poemariu últimu. Tarán xunto al autor, Adolfo Camilo Díaz (Xerente de Cultura del Conceyu de Corvera), Rafael Valdés (Casa de la Llingua) y Esther Prieto, directora de Trabe, qu’asoleya’l volume.

“Mapa lliterariu” estrenóse por mor de la Selmana de les Lletres Asturianes, y quier convertise “nun puntu d’alcuentru de los llugares y les pallabres de los nuesos escritores”. Al traviés d’él pueden concoese les llocalizaciones de los sos llibros, los sitios que los vieron medrar y formase, no que los sos creadores definen como “un mapa de suaños y emociones; un percorríu al traviés de les sos pallabres que nos dexe conocer el vínculu del escritor cola so contorna”. Con esta iniciativa quieren convertir a Asturies “nun gran muséu de pallabres y sitios: el Muséu de los Escritores Asturianos”.

Entamen esta andadura de la mano de Nené Losada Rico, poeta valdesana “qu’espeya a la perfección la importancia que la so contorna tien a lo llargo de tola so obra”. Nel mapa pueden vese los puntos xeográficos qu’apaecen na so obra, incluyéndose amás grabaciones de la so obra, en boca de la propia poeta.

La páxina inclúi amás un pdf cola sienda lliteraria pela obra de Nené Losada.

Páxina web “Mapa lliterariu”

La Facultá de Filosofía y Lletres organiza la esposición «La Investigación n’Artes y Humanidaes na Universidá d’Uviéu», que se pue visitar hasta’l día 31 de mayu del 2013. La esposición tien llugar nel Campus del Milán d’Uviéu. Nel estragal del Edificiu Departamental, atópense los paneles de los diversos grupos d’investigación n’artes y humanidaes, y nel estragal del Aulariu «A» tán los paneles de los diversos proyectos d’investigación en marcha agora o nos últimos años.

El Seminariu de Filoloxía Asturiana (SFA) ye ún de los grupos d’investigación presentes na esposición, y, dientro la nuestra Universidá, l’únicu reconocíu nestes árees del saber que trabaya na Filoloxía Asturiana. Tamién tán presentes na esposición cinco proyectos d’investigación nel campu de la Filoloxía Asturiana, trés d’ellos adscritos al SFA: el proyectu «Estudiu de la Transición Llingüística na Zona Eo-Navia, Asturies (ETLEN)», dirixíu pol profesor Ramón d’Andrés Díaz; el proyectu «Observatoriu Asturianu de Neoloxía (AsturNeo)», cola mesma dirección; y el proyectu «Corpus Xeneral de la Llingua Asturiana», dirixíu pol profesor Xulio Viejo Fernández.

Con motivu d’esta esposición, la Universidá d’Uviéu edita un llibru electrónicu con tola información sobre investigadores, grupos d’investigación y proyectos.

Na inauguración del actu participaron el Rector de la Universidá d’Uviéu, la Vicerrectora d’Investigación y Campus d’Escelencia Internacional, la Decana de la Facultá de Filosofía y Lletres y la Directora Xeneral d’Universidaes del Gobiernu d’Asturies.

Llibru asoleyáu con motivu de la esposición

La Selmana de les Lletres Asturianes sigue dos selmanes dempués en Cangas del Narcea cola celebración de la Sumana de las L.letras Asturianas, na que dende’l 13 al 17 de mayu Cangas va homenaxar a les Lletres Asturianes na quinta edición d’esti eventu, entamáu pola Conceyalía de Cultura y el Serviciu de Normalización Llingüística municipal. Nesta ocasión los eventos van entamar cola apertura de les esposiciones “Chispina”, pal públicu infantil, y “L’asturianu na hestoria” na Casa de Cultura. Nesti primer día, a les 20:30, va proyectase tamién una película doblada al asturianu “El tercer home”, nel Auditoriu de la Casa de Cultura.

La música tradicional va ser la protagonista del martes 14 de mayu. Nel teatru Toreno, a les 20:30, va presentase la tesis de Llorián García “Gaiteres y panderetos. Xéneru y tresxéneru na música tradicional asturiana” y de siguío podrá esfrutase del conciertu de Cantaruxare.

El cine vuelve a la Sumana de la L.letras Asturianas el miércoles 15 cola presentación de la obra cinematográfica de Pablo Quiroga, actu que se va desenvolver nel Auditoriu de la Casa de Cultura, a les 20:30 hores.

El xueves 16, los soníos tradicionales van envolubrar de nuevu’l teatru Toreno de la mano de los alumnos de quintu de la escuela de música Tradicional de Cangas, que van ufiertar un conciertu a les 20:30.

La Sumana de la L.letras Asturianas va pesllase col homenaxe a José María’i Cabral de Truenes pola so contribución a la tresmisión y pervivencia de la llingua asturiana. L’actu, que se va desenrrollar nel teatru Toreno, a les 20:30, va cuntar amás cola actuación teatral “La escuela”, representada pol alumnáu d’asturianu del colexu públicu Alejandro Casona, y nél fadráse entrega de los premios del X Concursu de cuentu curtios n’asturianu p’adultos y del V Concursu de cuentos n’asturianu infantil “Otilio Álvarez Rodríguez”.

David Melendi Palacio, profesor de la Universidá d’Uviéu, va ser nomáu miembru correspondiente de l’Academia de la Llingua Asturiana (ALLA) el vienres 3 de mayu y dientro del tradicional actu entamáu por esta institución nel Teatru Campoamor d’Uviéu. Melendi foi Decanu del Colexu Oficial d’Informáticos del Principáu d’Asturies y anguaño ye profesor titular de Universidá nel área de la inxenería telemática. Los sos trabayos alredor del asturianu lleváronlu a formar parte de proyectos d’investigación como’l Proyectu Eslema y la so posterior aplicación al traductor col mesmu nome.

Habitual ente’l profesoráu de los cursos de la Universidá Asturiana de Branu de l’ALLA, xunto a Xosé Antón González Riaño y a Xabiel García Pañeda asoleyó en Lletres Asturianes “Estudiu sobro l’emplegu del DALLA on-line. Un averamientu sociollingüísticu”. Amás, participó de la ellaboración de la “Terminoloxía d’Internet y d’interfaces pa programes informáticos en llingua asturiana” asoleyada pola institución.

Nel ámbitu universitariu ye Director del Área d’Aplicaciones de Xestión y miembru de la Comisión de Normalización Llingüística de la Universidá d’Uviéu.

Nel actu del Día de les Lletres que celebra l’Academia la selmana que vien, participará tamién el gaiteru Álvaro Cueto, abriendo la Xunta Estraordinaria, y Toli Morilla, pa poner el pieslle.

La película “Un contrato extraño” de la realizadora Teresa Marcos y el curtiumetraxe “La mujer del hatillo gris” del director Luis Trapiello fueron les obres ganadores de la 8ª edición del Festival de Cine Asturianu 2013 qu’entregó los sos Premios nuna Gala celebrada nel Teatru Filarmónica d’Uviéu. El Premiu al Meyor Documental recayó na obra titulada “Sombra” del realizador uvieín Juan Caunedo, un testimoniu gráficu de les muyeres socialistes militantes de la JSU que sufrieron la represión y tortura depués de la Guerra de 1936.

El Premiu a la Meyor Actriz foi pa Olga Montero pol papel de “Un contrato extraño” y el del Meyor Actor pa David S. Cabal pola so actuación na mesma película. Los sos personaxes consiguen tresmitir una sensación especial mui llograda a mediu camín ente la realidá y la ficción.

“Un contrato extraño” ye la primer película de la realizadora Teresa Marcos, nacida en Cangues d’Onís, premiada yá anteriormente nel Festival de Cine Asturianu por cutriumetraxes como “Llencería d’ocasión” y “Por tar contigo”. Nesta película la realizadora vuelve a inspirase en temes non mui gratos pa la sociedá conservadora, nesti casu la prostitución masculina, pa recrear unos personaxes que xueguen ente la realidá y la ficción a través d’unos diálogos mui creíbles, dientro tou ello d’una cierta escuela mui repetida en tol cine asturianu en xeneral que podemos clasificar como de realismu cinematográficu.

Pel so llau, el curtiumetraxe ganador, “La mujer del hatillo gris” del director ovetense Luis Trapiello, y producida por BlasterTV vuelve afondar nesti realismu cinematográficu nesta ocasión de tipu hestóricu pa recrear un guion inspiráu na represión exercida pol franquismu nes cárceles durante la postguerra civil.

El Segundu Premiu al Meyor Curtiumetraxe foi pa “Módulu 10” de les realizadores Teresa Marcos y Ángeles Cachón, una orixinal visión de la convivencia d’un grupu de muyeres recluses na prisión de Villabona y el Tercer Premiu na categoría de curtiumetraxes foi pa “Machine wars” de Juan Caunedo, una inxeniosa parodia rodada en Cuba onde se mecen realidá, fantasía y una cuidada realización visual y actoral. En cuarta quedó “Lo estipulado” de Kiko y Javier Prada y en quinto lugar “Le futur” de Benjamín Villaverde.

El Premiu d’Honor d’esta edición foi pal actor allandés recientemente fallecíu Frank Braña (La Puela d’Allande 1934 – Collado Villalba 2012) actor de llarga trayectoria que dedicó tola so vida al cine y trabayó per tol mundu en más de 167 producciones, munches d’elles películes d’aventures, d’acción y del oeste. La repentina muerte de Frank Braña en febreru de 2012 impidió qu’acudiera en persona como ye vezu a entregar los premios principales del Festival y por ello decidióse aplazar la 8ª edición del Festival de Cine Asturianu pal añu siguiente. Por ello nesta 8ª edición de 2013 entrególos el director y cineasta Manuel Curiel (Fonsagrada, 1948), biógrafu de Frank Braña, que publicó un interesante llibru sobre la vida y filmografía del actor asturianu. Na Gala, Manuel Curiel fizo un repasu a la trayectoria cinematográfica de Frank Braña al que se-y dedicaron varios homenaxes en 2007 durante la 29 edición de la Semana de Cine de Lugo.

Los xuraos d’esta 8ª edición fueron los realizadores Juan José Bors y Moisés Tuñón y l’actriz Isabel Friera de la Unión d’Actores d’Asturies. El Festival de Cine Asturianu presentó tamién el 16 d’abril en Xixón el llibru de Miguel Losada “Vivir el cine: 120 películas que no podrás olvidar”. La Gala d’Entrega de Premios cuntó cola participación d’artistes y personalidaes del mundu del cine y del espectáculu como Pepa Martínez, Elena Martín, Miguel Losada, DiCarlo, Ángela Fernández, Moisés Tuñón, Isabel Friera, Adrián Zamanillo, el gaiteru Saúl Quiñones, amás del Grupín de Teatru SomosAsturies y el director y escritor de cine Manuel Curiel.

Reciella, colectivu de families pol asturianu, convoca delles actividaes pa neños nos meses vinientes. El so programa de primavera entama’l sábadu 13 d’abril con “Llibros pa la reciella”, una actividá na que delles editoriales van presentar los sos llibros pa neños, nel Conseyu de Mocedá de Xixón a les 11:30.

Les próximes actividaes van dedicase a un cuentacuentos, la so participación na manifestación de la oficialidá, una actividá sobre cuentos n’Avilés, un taller musical recordando a Seliquín en Candás, y una xornada na güerta n’El Rinconín, Xixón.

Porgrama completu d’actividaes de Reciella

Yá tán confirmaes presentaciones del númberu 11 de la revista de lliteratura moza Formientu en Xixón, Morcín, Corvera, Colunga, Bimenes y Madrid. La revista, que ta a la venta nes llibreríes Ojanguren (Uviéu) y Paradiso (Xixón), convica a participar de los actos, que van entamar en Xixón, na programación del Club de Prensa de La Nueva España, na Plaza del Monte Piedá, esti xueves 11 d’abril a les 8 la tarde.

En La Foz (Morcín) l’actu va tener llugar na “Escuela llar” del Colexu Horacio Fernandez Iguanzo de La Foz, el próximu miércoles 17 d’abril de 2013 a les 20 hores.

En mayu va presentase en Corvera y dientro de la Folixa del Llibru, el xueves 2, a les ocho la tarde.

Amás, nel mes de xunetu van facese presentaciones nel Centru Asturianu de Madrid y en Bimenes, na Romería de la Oficialidá, el 12 de xunetu.