Mocedá

Esta ye la selmana postrera pa ver la esposición con trabayos y murales fechos coles entrugues del concursu “Ruempi la mollera 2011-2012” organizáu pola Oficina deNormalización Llingüística de Xixón. El Vieyu Institutu Xovellanos acueye esta esposición hasta’l 20 de xunu n’horariu de 9 a 9, na sala 3, na segunda planta del centru cultural xixonés.

Más de 700 neños de 19 colexos ya institutos de la Comarca d’Avilés van participar esti miércoles y xueves, 2 y 3 de mayu, na edición nona de les Xuntes d’escolines y escolinos d’Avilés y Comarca, lo que supon un record de participación. Los actos van cuntar con alumnos d’asturianu de toles estayes educatives con actividaes que van celebrase na Casa Cultura d’Avilés, y en rellación cola Selmana de les Lletres Asturianes que se ta celebrando a lo llargo d’estos díes per toa asturies, dedicada a autores del sieglu XVIII, que los rapazos pudieron estudiar dende va selmanes nes aules d’asturianu.

Ente les actividaes programaes teatru, llectura de cuentos, recitales de poesía, música y baille, amás del VIII Concursu de mascotines.

L’Enxame Xuvenil Trisquel vuelve a trabayar pola defensa de la cultura tradicional asturiana depués de dellos años de parón y failo pa poner en marcha’l Rebolleres Rock, na nueche del viniente 28 de xunetu, n’El Prau Gervasia de Candás, cuntando yá cola confirmación de l’asistencia del Grupu de Baille Tradicional San Félix y los grupos Desakato, Skama la Rede y Dixebra.

La Tertulia Rita Caveda Solares entregó nel Teatru Riera de Villaviciosa los premios del V Concursu de Cuentos Ilustraos ‘Les Comadres’, Memorial Nieves Meana Gómez, al que nesta ocasión se presentaron 252 neños, de los que 35 presentaron el so trabayu n’asturianu.

Los premios por obres n’asturianu fueron pa Víctor Vega, Estrella Martínez y Lúa Woodward (categoría B) y pa Jimena Villazón, Laura Delgado y Diana Álvarez (categoría C), Carla Casielles tuvo premiu especial al quedar los sos cuentos finalistes nes categoríes d’asturianu y castellán.

Fueron xuráu Lluis Portal. Mely Suárez Pidal, Fernando Fernández ya Isolina Cueli.

“Trueque. La to firma por un llibru” ye una acción entamada pola Asociación Xuvenil Estudiantes Progresistas, l’Asociación Xuvenil y de Voluntariáu Esnala y el G.S. La Calzada, enmarcada na Selmana Europea de la Prevención de Residuos que n’Asturies coordina COGERSA. Ta dirixida, per un llau, a allongar la vida d’usu de los llibros, y por otru, a concenciar a los participantes de la importancia del cuidáu del mediu ambiente. La Plaza’l 6 d’agostu de Xixón ye’l llugar escoyíu pa la celebración d’esta actividá, el viniente sábadu, 26 de payares.

Por aciu esta actividá, la organización quier “promover la reutilización de llibros depositaos en COGERSA como resultáu de la recoyida selectiva del papel”, y, al empar, “movilizar a la población de Xixón alredor d’una demanda de los colectivos ecoloxistes del conceyu: la protección de la redolada del Banzáu de San Andrés de los Tacones”, qu’esplique, presenta una rica biodiversidá.

Al traviés d’una firma, los participantes van poder xunise a esta reivindicación al empar que van recibir de baldre un llibru usáu col fin d’allongar el so usu. Mientres la tarde, van entamase actividaes d’animación pa los más pequeños, rellacionaes cola llectura y el mediu ambiente.

CSI Mocedá quixo tresmitir la so “fonda solidaridᔠcolos miembros de la organización política xuvenil Darréu con motivu de lo que denomaron “persecución que tán sufriendo por decisión del gobiernu municipal de Llangréu (PSOE)”. Una decisión que fizo que’l Día de la Mocedá Revolucionario, organizada por esti colectivu, nun pudiera incluyir el conciertu “Asturies nun escaez”, dempués de tener tolos permisos en regla, según esplicó Darréu.

CSI denuncia “presiones y chantaxes” a la directora del Colexu Públicu José Bernardo onde se diben a celebrar esos actos asina como l’acosu policial a militantes de Darréu y al so entornu familiar, ente otru tipu de presiones, que calificaron como “más propies de redes mafioses que d’instituciones supuestamente “democrátiques”.

Pa CSI Mocedá “nueamente’l PSOE (o meyor dicho, l’entramáu caciquil qu’usurpa eses sigles hestóriques) esplicita d’una manera más qu’evidente que nun tien más política pa la mocedá asturiana que la del palu y la cenahoria, esto ye, per un lláu abondoses subvenciones y privilexos p’aquellos seutores xuveniles que nutren les sos estructures clientelares, y per otru, represión y criminalización escontra los mozos y moces qu’apuesten pola construcción d’alternatives sociales al desaniciu estructural de la sociedá asturiana”.

El Día de la Mocedá Revolucionario 2011 va tener llugar los díes 21 y 22 d’ochobre nel Conceyu de Llangréu. Una vegada más, dende la organización Darréu quieren facer alcordanza de la Revolución Asturiana d’ochobre de 1934 y, al empar, “facer d’estes xornaes un marcu reivindicativu dende una perspectiva xuvenil, tresformadora y soberanista”. Ente les ac tivdaes un conciertu cola participación d’Skama la Rede o Taranus, ente otros.

Darréu enfótase un añu más en facer el so que camienten ye “l’actu más importante a nivel añal dientro de la mocedá d’izquierda soberanista d’esti país”. Asina, como ye vezu, Darréu ufre un programa d’actividaes de distintu calter: culturales, hestóriques, polítiques-reivindicatives o d’espardimientu, entamando’l vienres 21 d’ochobre na Casa de Los Alberti (Ciañu, Llangréu) cola presentación de les xornaes a les seis de la tarde. Dempués va proyectase un documental autoxestionáu y a les siete la tarde, va celebrase la charra-alderique con Candido Carnero, sindicalista de Naval Xixón “Reflexones sobre’l movimientu obreru asturianu d’ayeri y güei”.

A les ocho va celebrase un Alcuentru Internacionalista coles delegaciones internacionales desplazaes al DMR’11, y a les nueve, nel Colexu Públicu José Bernardo (Sama, Llangréu) habrá un amagüestu y una espicha con música del país.

Yá’l sábadu, nel mesmu llugar, y de magar les doce la mañana, van entamar los Xuegos Tradicionales pa neños y adultos. A les dos, xinta popular, y yá de tarde, va pintase’l mural conmemorativu del DMR 2011.

Darréu va celebrar tamién un Homenaxe a los/les Revolucionarios/es nel monolitu n’homenaxe a Belarmino Tomás en La Felguera.

A les seis y media tarde los participantes nesti DMR 11 van facer una marcha reivindicativa de mocedá hasta la Casa Conceyu de Llangréu, en Sama.

A les ocho la tarde ún de los momentos más esperaos, la celebración del X Conciertu “Asturies Nun Escaez”, nel que van participar Skama la Rede, Escuela de Odio, Skontra, Adizión Etílika, Taranus, I.R.A.y tamién una sesión reggae.

Les entraes pueden mercase a 10 l’anticipada y 12 na puerta. Pa más información visitar la páxina web de Darréu.

Más información sobre’l DMR

Una vegada más la organización xuvenil Darréu ta entamando’l Día de la Mocedá Revolucionario. L’eventu, qu’integra actividaes polítiques, reivindicatives, culturales y festives y qu’homenaxea a la Revolución Asturiana d’ochobre de 1934 va tornar a celebrase un añu más, esta vegada en Llangréu. Los díes que van comprender estes xornaes alredor de la memoria revolurionaria de 1934 y la reivindicación de la mocedá d’Asturies d’anguaño van ser el vienres 21 y el sábadu 22 d’ochobre.

Esti añu ye especial yá que’l yá tradicional Conciertu “Asturies nun escaez” va cumplir la so décima edición. Pa esti añu búscase potenciar la escena musical asturiana, polo que’l cartelu del conciertu va ser dafechu alredor d’esta escena, con dellos grupos asturianos. Hasta’l momentu tan confirmaos los grupos IRA Hardcore, dende Noreña y Llangréu, y los tamién llangreanos y yá míticos Escuela de Odio.

Vidéu promocional

El Conseyu de la Mocedá del Principáu d’Asturies pon en marcha un ciclu de cursos, talleres y xornaes formatives embaxo’l títulu ‘Educación Sexual con Arte’ que quier trabayar con asociaciones xuveniles y mozos en xeneral estremaos aspeutos y ferramientes sobre educación sexual.

Los cursos van facese n’Uviéu y Xixón los meses d’ochobre, payares y avientu, siendo de baldre y dando un diploma acreitativu. Pa más información ha llamase al teléfonu 985 250 065 ó escribir al corréu salud@cmpa.es

La mocedá de la XPDLLA, Xunta Moza, tuvo representando a los xóvenes falantes asturianos nel Alcuentru Internacional de Mocedá Europeo Falante de Llingües Minoritaries/Minorizaes, celebráu na ciudá vasca de Gasteiz. Amás de los representantes asturianos, tuvieron mozos falantes de vascu, bretón, corsu, gallegu y catalán.

Los representantes de Xunta Moza pudieron certificar nesti actu que “mientres que la mocedá d’otres comunidaes peninsulares tienen garantizada, por exemplu, la educación de y na so propia llingua, n’Asturies siguen ensin respetase nin garantizase unos derechos mínimos que permitan la supervivencia del idioma y que protexan a los falantes de la llingua minorizada”. Una situación que dexa a los asturianos como “ciudadanos de segunda”, afirmen.

Nel Alcuentru ellaboróse y firmóse un manifiestu robláu por tolos participantes:

Manifiestu de la mocedá poles llingües – Vitoria-Gasteiz 2011

Mocedá falante de llingües minoritaries y minorizaes d’Europa aconceyámonos en Vitoria-Gasteiz ente los díes 19 y 22 de xunetu del 2011, y alcordamos:

1) Toles llingües son iguales por naturaleza y, por ende, toes deben tener los mesmos derechos y deberes, y les mesmes oportunidaes d’usu.

2) Les nuestres llingües conformen la nuestra identidá y, por ello, nun vamos renunciar a elles y adoptar formes de pensamientu únicu. La nuestra riqueza ye la nuestra identidá.

Les nuestres mas y pás dexáronnos la meyor de les herencies, un patrimoniu cultural y llingüísticu al que nun vamos a arrenunciar, per contra, va ser la riqueza que dexemos a xeneraciones futures.

3) Comprometémonos a utilizar, defender y potenciar les nuestres llingües en tolos ámbitos de la vida. Amás, comprometémonos a allegar los nuestros idiomes a aquelles persones que nun los conocen y xenerar actitúes positives p’hacia ellos.

4) Demandamos a les autoridaes el reconocimientu llegal de toles llingües en condiciones d’igualdá. De la mesma manera, la defensa y promoción de tolos idiomes, el derechu a una Educación íntegra nes nuestres llingües y la esistencia d’unes polítiques llingüístiques qu’aseguren l’usu en tolos ámbitos.

Defendemos l’intercambiu llingüísticu y cultural porque les nuestres llingües contribúin a la sostenibilidá y a la bayura mundial, sumen y non resten.

Somos el futuru.

Les nuestres llingües son el futuru.

El futuru escomienza güei.