Lliteratura

La Sociedá Cultural Xixonesa foi’l llugar escoyíu pa la presentación del númberu 10 de la revista lliteraria Formientu. L’escritor y hestoriador Javier Cubero de Vicente presentó l’actu, nel que’l director de Formientu, Inaciu Galán, faló de los cinco años de la revista, faciendo repás a l’activida de la mesma nos diez númberos que lleva espublizaos. Darréu lleeron los sos testos nesti númberu, Denis Soria, Blanca Fernández, Alejandra Sirvent, y el propiu Cubero. Amás, l’actu sirvió pa recaldar fondos pa l’asocación Iniciativa pol Asturianu cola venta de revistes.

El Serviciu de Normalización Llingüística del Conceyu de L.lena presenta esti xueves 19 d’abril a les 19:30 hores el llibru Calidoscopiu de la escritora Paula Pulgar Alves, publicáu pola Editorial Trabe. L’actu va celebrase nel Salón d’Actos de la Casa de Cultura de La Pola, y enmárcase dientro del programa “Abril con bones lletres” que se dedica a escritores locales y con actividaes relacionaes cola animación a la llectura.

Calidoscopiu ye una recopilación de diecisiete cuentos, onde destaca la dureza y crueldá de los personaxes, narrao too ello con una prosa llimpia y directa.

Paula Pulgar, ye llicenciada en Filoloxía hispánica y especialista en Filoloxía Asturiana pola Universidá d’Uvieo. La so trayectoria lliteraria entama cola publicación de Primeres aventures de Pulgu y Yolín nel 2007 y El mundu de Susana nel 2008 dambos dos de lliteratura infantil. Con Cuentos de metru y de centímetru nel 2008 afítase como una de les escritores con voz propia na lliteratura asturiana más moza. Collaboradora de delles publicaciones, tamién tien fecho un estudiu sobre la escanda na zona del Güerna. Actualmente’l so llabor profesional desenvuélvelu nel ámbitu educativu como profesora de Llingua Asturiana y Española, anque tamién participó nel ámbitu de la normalización llingüística como responsable del Serviciu de Normalización Llingüística nel Conceyu Mieres.

Dende’l Serviciu de Normalización Llingüística va facese compra de llibros de l’autora col fin de que toles biblioteques y centros educativos tengan un exemplar del mesmu y pa que’l propiu Conceyu pueda usalu como regalu institucional.

Paula Pulgar inaugura con “Calidoscopiu” la imaxe nueva de la colección Incla

Esti vienres 20 d’abril, a les ocho la tarde, va presentase “Teoría de la pertenencia”, de Ramón Lluís Bande na FNAC de Parque Principáu, en Siero. Un llibru integráu por una colección de proses autónomes que mui probablemente -queda a xuiciu del llector- conformen, con una serie d’enllaces visibles y otros invisibles, una narración unitaria: la d’un personaxe ensin nome en plena tresformación, que sigue buscando les característiques principales que puedan definir la so identidá nel momentu presente.

Un llibru que foi escribiéndose con voluntá de llibru, pero con una renuncia explícita a l’arquitectura habitual de les narraciones. Teoría de la pertenencia ye una colección de textos escritos nel actu y con fecha d’entrega, que se negaron a una reescritura y desarrollu posterior, alcontrando nes sos imperfecciones, nel so abandonu, la entidá d’obra acabada.

El llibru tien un protagonista, un yo -mui cercanu al narrador- que s’escuende tres múltiples nomes en diferentes momentos de la historia y en diferentes llugares del mundu pa poder acercase a entender el so presente. Un xuegu que descubre les múltiples voces necesaries pa poder intentar desarrollar una voz personal, a la vez qu’intenta construir y integrase nuna determinada tradición cultural o creativa na que se citen escritores, cineastes, pintores, músicos… Continuando’l camín narrativu empezáu pol autor en llibros anteriores, Teoría de la pertenencia tien muncho de diariu personal, de crónica d’actualidá (social y íntima), de recuentu de llectures. En fin, una formulación nueva de les preguntes vieyes: ¿quién soi? ¿quién soi en rellación a lo que somos?

Ramón Lluís Bande (Xixón, 1972) ta consideráu como una de les voces más personales de la lliteratura asturiana. Escritor y cineasta, ente los sos títulos destaquen noveles como Les habitaciones vacies (2009), llibros infantiles comoHistoria d’un árbol (2010) o películes como Estratexa, El fulgor o Sangre. Anguaño dirixe na televisión pública asturiana, TPA, la revista audiovisual de cultura,Pieces, y la serie documental, Camín.

Suburbia Ediciones asoleya’l segundu volume de De les coses del mundu, la colección definitiva d’ensayos d’Ignaciu Llope. Nesti volume, el poeta y ensayista Ignaciu Llope, inclúi dalgunos de los los sos artículos sobre cuestiones polítiques y antropolóxiques. Esti ye un llibru con hestoria, una y bones l’autor yá usó d’esi títulu hai más de dos décades pa recoyer parte de la so obra.

Ignaciu Llope siempre pensó que De les coses del mundu yera un proyectu en marcha, y nesta edición recueye non sólo aquellos artículos inaugurales, sinón tamién tolos que, dende la década de 1980 hasta l’actualidá, foi asoleyando en mui diversos medios. El primer volume, que vio la lluz hai un añu, recoyía tolos escritos sobre celtismu y música folk, amás de los ensayos y artículos publicaos sobre’l paisaxe y la historia del conceyu de Cuideiru. Esti segundu volume ta dedicáu a los ensayos sobre política y lliteratura, con un llugar mui destacáu nél pal análisis de los problemes d’identidá cultural na zona Navia-Eo.

Esti llunes 16 d’abril de 2012, a les ocho la tarde, Formientu, revista lliteraria qu’axunta la obra d’autores mozos n’asturianu, va presentar el so númberu diez en Xixón, dempués de cinco años de camín andáu. El primer númberu de Formientu presentóse nel añu 2006 tamién en Xixón, dende entós vienen participando na revista más de 60 autores, menores de 30 años y qu’usen l’asturianu nos sos testos.

L’actu va celebrase na sede de la Sociedad Cultural Gijonesa, asitiada nel númberu 4 de la Cai Balmonte de Miranda, en Xixón. Nel actu van intervenir, el director de la revista, Inaciu Galán, miembros del conseyu de redacción de la revista, y los autores qu’apaecen nesti númberu, dando llectura a los sos testos.

La revista ta abierta a autores mozos de tol dominiu llingüísticu asturlleonés, y yá espublizaron testos autores de Lleón o Zamora, amás de dalgunos descendientes d’asturianos n’otros estaos d’Europa y América.

Nesti númberu apaecen poemes de Cristina Menéndez Martín (Mieres, 1984), Frantxu Melero (Avilés, 1987), Inaciu Galán y González (Xixón, 1986), Abel Aparicio González (Lleón, 1980), Alejandra Sirvent (Pravia, 1980), Fonsu Suárez Román (Xixón, 1991), Javier Cubero de Vicente (Xixón, 1986), Vítor Suárez Piñero (Uviéu, 1986) y rellatos de Suárez Piñero y Blanca Fernández Quintana (Bimenes, 1994), amás d’una crítica lliteraria de Denis Soria Fernández (Xixón, 1989).

Esti númberu de la revista, que sal agora al mercáu, ta a la venta na páxina web de l’asociación Xareos!, que la edita, www.xareos.com

Formientu aprovecha pa convidar a los autores mozos a unviar los sos testos al conseyu de redacción de la revista, col envís d’espublizalos. Pueden facelo nel corréu lletrónicu formientu@xareos.com

El colectivu Hesperya va espublizar na rede la colección E-sguil, un espaciu pa llibros dixitales n’asturianu. Les primeres obres en salir van ser “Dende tan lloñe”, d’Héctor Pérez Iglesias; “La solombra del flacu”, de Rubén d’Areñes, y “Destruimientu del xardín”, de Sofía Castañón.

Esti llunes 16 d’abril de 2012, a les ocho la tarde, Formientu, revista lliteraria qu’axunta la obra d’autores mozos n’asturianu, va presentar el so númberu diez, dempués de cinco años de camín andáu. L’actu va celebrase na sede de la Sociedad Cultural Gijonesa, asitiada nel númberu 4 de la Cai Balmonte de Miranda, en Xixón. Nel actu van intervenir, el director de la revista, Inaciu Galán, miembros del conseyu de redacción de la revista, y los autores qu’apaecen nesti númberu, dando llectura a los sos testos.

El primer númberu de Formientu presentóse nel añu 2006 tamién en Xixón, dende entós vienen participando na revista más de 60 autores, menores de 30 años y qu’usen l’asturianu nos sos testos. La revista ta abierta a autores mozos de tol dominiu llingüísticu asturlleonés, y yá espublizaron testos autores de Lleón o Zamora, amás de dalgunos descendientes d’asturianos n’otros estaos d’Europa y América.

Nesti númberu apaecen poemes de Cristina Menéndez Martín (Mieres, 1984), Frantxu Melero (Avilés, 1987), Inaciu Galán y González (Xixón, 1986), Abel Aparicio González (Lleón, 1980), Alejandra Sirvent (Pravia, 1980), Fonsu Suárez Román (Xixón, 1991), Javier Cubero de Vicente (Xixón, 1986), Vítor Suárez Piñero (Uviéu, 1986) y rellatos de Suárez Piñero y Blanca Fernández Quintana (Bimenes, 1994), amás d’una crítica lliteraria de Denis Soria Fernández (Xixón, 1989).

Esti númberu de la revista, que sal agora al mercáu, ta a la venta na páxina web de l’asociación Xareos!, que la edita, www.xareos.com

Formientu aprovecha pa convidar a los autores mozos a unviar los sos testos al conseyu de redacción de la revista, col envís d’espublizalos. Pueden facelo nel corréu lletrónicu formientu@xareos.com

“Queixas, conxuros ya poemas gráficos d´un tiempu que foi” ye un volume qu’atropa tola poesía de Naciu ‘i Riguilón (Mual, Cangas del Narcea, 1962), poesía que la nota editorial califica de “pura, cenciella y enforma personal”. El llibru, asoleyáu por Trabe, ta dixebráu en trés partes, que se correspuenden colos dos poemarios yá va tiempu espublizaos (Queixas ya conxuros, 2001, ya D’un tiempu que foi, 2005) amás del inéditu conxuntu de dibuxos, «Poemas gráficos».

En versión billingüe asturianu-castellán, nesti poemariu puede rastrexase l’universu personal, míticu ya intimista del autor. Si en «Queixas ya conxuros» predomina’l versu enraigonáu nel sentimientu míticu d’Asturies, col bardu Xalabam cumo protagonista central, en «D’un tiempo que foi» l’autor preséntanos unos poemes más intimistes y desnudos de retórica, na mesma llínia minimalista que les guapes y cencielles ilustraciones que coformen la parte gráfica d’esta triloxía.

La Sala de Cámara del Auditoriu de La Pola Siero va acoyer el prósimu xueves, 12 d’abril, de magar les 20’00 hores, la presentación del últimu llibru del escritor Daniel García Granda (La Pola Siero, 1972). Trátase d’un poemariu n’asturianu tituláu“Poemes del últimu salvaxe”, asoleyáu por Ediciones La Baragaña y prologáu pol músicu Nacho Vegas. El poemariu ta ambientáu nel pueblu yerbatu de Viñái, onde l’autor tien los sos raigaños. Daniel García Granda ye Llicenciáu en Filoloxía Inglesa, cursando estudios nes universidaes d’Uviéu y del Ulster, ye collaborador del diariu El Comercio y tien yá espublizaos otros cuatro poemarios en castellán.

El Serviciu de Normalización Llingüística de la Comarca de la Sidra, en collaboración coles árees de cultura de los conceyos de Nava y Villaviciosa, entama pa esta primavera unos nuevos talleres de llectura n’asturianu, empobinaos a crear grupos activos de llectores y fomentar el conocimientu de la última lliteratura fecha na nuestra llingua.

El costu d’estos talleres ye totalmente gratuitu y incluyirán sesiones mensuales y alcuentros colos autores de les obres propuestes. El plazu d’inscripción ta abiertu hasta’l día 17 d’abril, nes biblioteques de los conceyos de Nava y Villaviciosa y nel Serviciu de Normalización Llingüística de la Comarca de la Sidra, en Paraes (Nava), nel teléfonu 985718413.