Lliteratura

Belén Rico Prieto ta acabantes asoleyar “Algunhas maos”, un poemariu que se presenta na colección Pontiga, de la editorial Trabe que califica como “unha obra de madurez e bon fer”.

Los poemes son curtios y contundentes, abriendo camín al son de los grandes temes de la poesía. El poemariu preséntase dixebráu en dos partes «El acabo» –con una única composición, dedicada a José Saramago– y «El empezo», onde la poeta d’A Veiga bríndanos los demás poemes.

El Club Xeitu ta acabante facer públicu’l fallu del xuráu del IV Certame Lliterariu en Pal.luezu ‘Guzmán Álvarez’, que recayó en Francisco González-Banfi, pol so relatu ‘Tsuna de xelu’.

Al certame presentáronse nesta ocasión siete obres, cuatro poesíes y tres rellatos. Unu d’estos postreros ye’l premiáu, presentáu col nomatu de Pixín del Navariegu, que va recibir 200 euros y un diploma acreditativu, que contien la imaxe del certame, realizada pol artista l.lacianiegu Manuel Sierra. El premiu va apurrise mientres el desenrrolu del Recital de Pal.luezu que, como n’años precedentes, va celebrar en La Casona de San Miguel dientro de los actos del Mercau L.lacianiegu na primer fin de selmana d’agostu.

Nél van tar presentes varios escritores y divulgadores del pal.luezu, que van lleer testos de creación propia, xunto l’autor premiáu, que va lleer la obra ganadora y va recoyer el so premiu.

Francisco González-Banfi, natural de Palacios del Sil y vecín de Madrid, ye autor de numberosos testos en na variedá pal.lueza del asturianu, afición que cultiva dende los años ochenta. Dalgunos de les sos creaciones más populares son obres de teatru, ente les que pueden citase ‘Caldu de berzas’ y ‘El filandón del madreñeiru’, representaes en diversos escenarios nos últimos años.

Tanto’l Club Xeitu como entidá organizadora del certame, como’l xuráu del mesmu, formáu por Severiano Álvarez, Guadalupe Lorenzana y Eduardo Carbajo, celebró “l’aceptable participación d’esta convocatoria”. Nella tuvieron una presencia destacada persones nueves, polo que la valoración ye más positiva si cabe, tamién pola calidá de les obres presentaes. Agradezse la so participación a tolos autores que presentaron les sos obres y anímase, tanto a ellos como a otros, a facelo en futures convocatories.

Dientro de los Alcuentros con autores del Atenéu de Turón l’escritor pixuetu Ignaciu Llope va falar del so llibru d’ensayos La casa gris (Ámbitu, 2011), esti vienres 18 de mayu, a les 19 hores.

Ignaciu Llope percuerre en “La casa gris” asuntos como’l cuadonguismu, la estroza del paisaxe tradicional o la identidá, que trescalen los artículos periodísticos axuntaos nesti volume. La poesía, la precisión y la pasión nel análisis en cada tema que se trata, faen de la llectura de caún de los artículos un exerciciu intensu abiertu al debate y a la reflexón. Y, siempre, cola raíz n’Asturies.

El Conceyu de Cangas del Narcea súmase a les celebraciones de la Selmana de les Lletres Asturianes unos díes dempués de los actos oficiales del Gobiernu d’Asturies. Baxo’l nome Sumana de las L.letras Asturianas, esti conceyu va organizar delles actividaes alredor de la lliteratura ente los díes 21 y 25 de mayu. El llunes 21 de mayu los actos entamen cola proyección de “Flandón”, de Naciu’i Riguilón, a les ocho y media de la tarde, nel auditoriu de la Casa Cultura.

El miércoles 23 dende les seis de la tarde, tamién na casa cultura, van celebrase les entregues de los premios del IV Concursu de cuentos n’asturianu pa nenos Otilio Álvarez Rodríguez y los del XI Concursu de marcapáxines Cuentos clásicos, xunto a la representación d’una obra de teatru infantil de Carlos Alba.

El Teatru Toreno va acoyer el xueves 24 un homenaxe a Irene’i Anxelu a partir de les ocho y media de la tarde, col conciertu del grupu cangués El Perendengue. Al otru día, na Casa Cultura, va presentase’l llibru de Naciu’i RiguilónQueixas, conxuros ya poemas gráficos d’un tiempu que foi, entregándose los premios del IX Concursu de cuentos p’adultos del Conceyu de Cangas.

Amás, tamién na Casa Cultura, ta espuesta hasta’l 31 de mayu la esposición de poemes gráficos de la obra de Naciu’i Riguilón “Queixas, conxuros ya poemas gráficos d’un tiempu que foi”.

La obra ganadora del IV Premiu d’ensayu Fierro Botas va presentase esti xueves, 17 de mayu, a les siete la tarde, nel salón de receiciones de la Casa Conceyu de Xixón. La obra “Mitoloxía de los santos n’Asturies”, ta escrita por Alberto Álvarez Peña (Xixón, 1966), perconocíu estudiosu de la cultura y la mitoloxía asturiana, escritor y dibuxante, creador de cómic y cartelista. Tien publicaos, ente más otros, los llibros “Asturias mágica” y “Cuélebres, culuobras, culiebres y culiebrones. La culiebra na mitoloxía asturiana”. La obra asoleyada agora por Trabe Ediciones rastrexa pente la cultura popular y les ilesies asturianes los raigaños paganos de los que bebió y s’alimentó’l cristianismu de los primeros años.

Si, como ta de moda dicir, Europa ye lo que ye pola influencia del cristianismu, nun ta demás alcordar qu’esti ye, tamién, lo que ye poles influencies paganes que, dilíes na corriente continua del so monoteísmu, son tovía reconocibles, na memoria colectiva de l’Asturies d’anguaño.

«Si nun yes a vencer al enemigu, únite a él». Esto paez ser que pensó’l cristianismu primitivu a la d’enfrentase a les creencies anteriores bien enraigonaes ente la xente del pueblu. Cristianizaes les fiestes paganes, hubo de buscar agospiu dientro’l monoteísmu a unos dioses que se calteníen vivos na creencia popular, que, polo normal, facíen referencia a la naturaleza y teníen el valir d’axudar a los humanos na comprensión de los sos fenómenos: d’esa manera los santos católicos nun son otro qu’aquellos dioses pequeñinos (afataos con ropa nuevo y con biografíes terroríficamente fantasioses), que garren pa sigo les cualidaes protectores y salvadores de los dioses antiguos.

El sábadu, 12 de mayu, a les 18:00 hores; Miguel Rojo va presentar en LlibrUviéu, el so últimu llibru editáu con Ediciones Seronda. ‘El Paséu – El Paseo’, un poemariu billingüe (asturianu-castellanu). Va introducir la presentación l’escritor y periodista Antón García. L’actu va tener llugar na carpa de la feria LlibrUviéu, nel Paséu de los Álamos d’Uviéu.

La editorial Suburbia ta acabante asoleyar “Aeropuertu”, escrita a cuatro manes por Xurde Fernández y Marián García. Na presentación van participar l’escritor David Fernández y la editoria Silvia Cosio. Sedrá a les 19.30 hores na FNAC de Parque Principáu (Siero).

Castrillón celebra estos díes el VI Festival Internacional de Poesía, Pallabra nel Mundu. La conceyalía de Cultura d’esti Conceyu súmase a esta VI edición del Festival con un programa qu’axunta poesía, música, escultura, y otros formatos audiovisuales. Los díes 11 y 12 de mayu, nel Valey Centru Cultural de Castrillón, van xuntase poetes de distintes procedencies pa celebrar un recital nel que va poder sentise al asturianu, el castellán y otres llingües.

Ente los díes 11 y 28 de mayu va tar abierta una esposiciones, “Muyeres atopaes”, na que se recueyen formes, “muyeres poema” recoyíes pol autor Fernando Beltrán.

L’11 de mayu va celebrase un alcuentru col poeta Fernando Beltrán, faciendo un percorríu comentáu pelos distintos poemarios del autor, presentáu por Leopoldo Sánchez Torres, director de l’Aula de les Metáfores de Grau.

Tamién va poder sentise la poesía de: Cristian David López, Sara Torres, José Luis Sevillano y Ana Vega, baxo la dirección del poeta estremeñu, críticu lliterariu, profesor de la Universidá d’Uviéu y director de la Revista Clarín, José Luís García Martín.

A les 11 va celebrase una velada nocherniega de llectures de poemes, nun chigre de Piedrasblancas.

El sábadu 11 van celebrase dellos talleres poéticos pela mañana, de la mano de Leopoldo Sánchez Torres y Olga Cuervo.

abier

A les seis de la tarde nel Teatru Valey va celebrase l’actu central d’esti festival, un recital presentáu con autores escoyíos dempués d’una convocatoria ta. Mientres el recital va haber actuaciones musicales, y va dase a conocer el fallu del Concursu Infantil Pinta un Poema y del Concursu de Poesía Esperimental dirixíu a Moces. D’ésti proyectaránse los trabayos, rematando cola entrega de premios.

Nel recital, “Poetes nel mundu”, inauguráu pola alcaldesa de Castrillón, Ángela Vallina de la Noval, y la Conceyala d’Educación y Cultura, Mª Esther García López, y presentáu pol escritor y periodista Manolo Abad, van participar Xuanxo Ashraf Bardibia Garcçelya, María Avello Martínez, Raúl Campoy Guillén, José María Castrillón, Víctor Corcoba Herrero, Daniel de Culla, Juan José Domínguez Piris, David Fueyo Fernández, Inaciu Galán y González, Laura García Calvo, Esther García López, Virginia Gil Torrijos, Iris Girón Riveros, Luis Pablo Gómez Vidales, Xosé Anxelu Gutiérrez Morán, Marisa López Diz, Esperanza Medina, Natalia Menéndez Rodríguez,Cristian Mínguez, Ana Amélia Passos Dos Santos, Teodoro Revilla Bravo, Carlos Rubio Rivera, Ivonne Sánchez Barea, Sonia Segarra, Myriam Solar y Nieves Viesca, acompañaos pol cuartetu Nicandair, del Conservatoriu “Julián Orbón” d’Avilés.

Porgrama completu d’actividaes

La editorial Trabe acaba d’asoleyar, a comuña col Conceyu de Xixón, “Mitoloxía de los santos n’Asturies”, l’ensayu ganador del Premiu «Fierro Botas» d’Ensayu 2011. La obra, d’Alberto Álvarez Peña, rastrexa pente la cultura popular y les ilesies asturianes los raigaños paganos de los que bebió y s’alimentó’l cristianismu de los primeros años. Si, como ta de moda dicir, Europa ye lo que ye pola influencia del cristianismu, nun ta demás alcordar qu’esti ye, tamién, lo que ye poles influencies paganes que, dilíes na corriente continua del so monoteísmu, son tovía reconocibles, na memoria colectiva de l’Asturies d’anguaño.

«Si nun yes a vencer al enemigu, únite a él». Esto paez ser que pensó’l cristianismu primitivu a la d’enfrentase a les creencies anteriores bien enraigonaes ente la xente del pueblu. Cristianizaes les fiestes paganes, hubo de buscar agospiu dientro’l monoteísmu a unos dioses que se calteníen vivos na creencia popular, que, polo normal, facíen referencia a la naturaleza y teníen el valir d’axudar a los humanos na comprensión de los sos fenómenos: d’esa manera los santos católicos nun son otro qu’aquellos dioses pequeñinos (afataos con ropa nuevo y con biografíes terroríficamente fantasioses), que garren pa sigo les cualidaes protectores y salvadores de los dioses antiguos.

Alberto Álvarez Peña (Xixón, 1966) ye un perconocíu estudiosu de la cultura y la mitoloxía asturiana, escritor y dibuxante, creador de cómic y cartelista. Tien publicaos, ente más otros, los llibros Asturias mágica y Cuélebres, culuobras, culiebres y culiebrones. La culiebra na mitoloxía asturiana.

La nueva propuesta terminolóxica en TermAst, entidá dependiente de l’Academia de la Llingua Asturiana dedicada a trabayar el campu de la terminoloxía técnica n’asturianu, ye la dedicada a la Terminoloxía de Teoría de la Lliteratura. El trabayu ye obra del músicu, profesor y doctor en Filoloxía Española, Ricardo Saavedra. Ente los términos, acrósticu, asocedíu, cronotopu, dialoxismu, plaxu o zéxel.

TERMAST ye’l centru encargáu de la coordinación xeneral de les xeres terminolóxiques venceyaes a la llingua asturiana y surde en xineru de 2009 per aciu del pautu robláu ente tres entidaes asturianes: el coleutivu Softastur, el Colexu d’Inxenieros n’Informática del Principáu d’Asturies y l’Academia de la Llingua Asturiana. Ente los trabayos asoleyaos hasta agora los dedicaos a terminoloxía educativa, física, matemática o médica.

Terminoloxía de Teoría de la Lliteratura