Lliteratura

La Xunta pola Defensa de la Llingua Asturiana (XDLA) anunció la convocatoria de los XIII Premios de la Crítica d’Asturies a los escritores en llingua asturiana, dempués de “llamentar fondamente la decisión final de l’Asociación d’Escritores d’Asturies (AEA) de nun incluyir a los escritores qu’escriben nesta llingua nos sos premios”. Esta asociación venía convocando dende l’añu 2003 delles categoríes pa les obres publicaes n’asturianu nel añu anterior a la convocatoria, pero esti añu namás se puen presentar a concursu les obres en castellán. Anque l’AEA pon la sida de les razones económiques, la Conseyería sigue apoyando estos premios con un ayuda económica.

L’Asociación d’Escritores d’Asturies argumenta, ente otres cuestiones, la falta d’obres en llingua asturiana concurrentes a concursu, lo que pa la XDLA “nun ye más qu’una demostración d’inorancia o despreciu al bon facer de los y les escritores porque a lo llargo del 2011 publicáronse 141 obres n’asturianu, númberu bultable qu’echa embaxo cualquier argumentación sobre la escasez de producción lliteraria nel idioma autóctonu”, espliquen.

Otru argumentu del que se val esta Asociación pa escluir la obra n’asturianu ye, según la XLDA “la yá tan masuñada cuestión de la crisis ecónomica, cuando persabemos que les editoriales, instituciones y persones interesaes collaboraben cola asociación de manera que’l costu económicu de les categoríes d’asturianu venía siendo prácticamente inesistente”. Dende la Xunta pola Defensa de la Llingua Asturiana paez-yos que “más bien lo qu’hai ye pocu o nengún interés en fomentar la lliteratura n’asturianu dende esta asociación: lo que s’escuende, daveres, ye una actitú prexuiciosa pa col idioma y qu’esti premiu valora más la forma (la llingua) que’l fondu (la calidá lliteraria)”.

La Xunta ve “especialmente grave que seya l’Asociación d’Escritores d’Asturies la que discrimine la llingua asturiana cuando son sabedores de que nun se pue falar de lliteratura n’Asturies ensin incluir a los y les escritores na llingua propia” y recuerden que “cuando la lliteratura fecha n’asturianu tien reconocimientu internacional y destaca pola so calidá dientro del espectru románicu, nun podemos tolerar qu’una asociación que se diz d’escritores y d’Asturies practique unes actitúes acomplexaes más propies d’otres époques predemocrátiques”.

Por too esto, dende la Xunta pola Defensa de la Llingua Asturiana, dicen “vese obligaos a convocar, de forma escepcional”, los Premios Críticos de les Lletres Asturianes, que van reconocer en cuatro categoríes –lliteratura infantil y xuvenil, narrativa, poesía y ensayu– les obres publicaes a lo llargo del 2011 n’asturianu y gallego-asturianu.

Un xuráu de persones espertes en caúna de les materies va ser l’encargáu d’otorgar estos Premios. La entrega de premios va facese’l vienres 30 de payares, a les 19:30 hores, na galería d’arte El Texu (cai El Postigo Baxo 13, d’Uviéu).

Los Premios de la Crítica convocaos pola Xunta pola Defensa de la Llingua Asturiana recibieron un sofitu de 608 euros na convocatoria de sovenciones pa la normalización del asturianu dedicáu a asociaciones de la Conseyería d’Educación, Cultura y Deporte.

Esther Prieto y Samuel Castro son, dende va pocos díes, los nuevos propietarios d’Ediciones Trabe. Depués de cinco años al frente, Inaciu Iglesias dexa la editorial en manes d’Esther y Samuel que, con bien d’años d’experiencia na empresa, empiecen una nueva etapa con un aquello de precupación pero con bien d’ilusión. La editorial fundada nel so momentu y dirixida hasta 2007 por Antón García, sigue agora con una tercer xeneración de propietarios.

Inaciu Iglesia camienta que «ye’l momentu de cerrar una etapa. Toi mui contentu y arguyosu de lo que fixe estos cinco años anque, la verdá, cola crisis, tocóme baillar cola más fea». Sobre lo fecho recuerda que «nesti tiempu correspondióme llevar alantre una auténtica reconversión y, en poques palabres, reducir el tamañu de la editorial pa adaptalu a les nueves circunstanfcies. Fíxilo lo meyor que supe y fui quien y tengo pa mi qu’agora soi a dexa-yos un negociu vidable y con futuru. Toi seguru qu’Esther y Samuel van facelo mui bien. Tienen experiencia, conocen el negociu y son abondo sensatos. Préstame qu’un proyectu como Trabe, que ya tenía una historia primero que yo aportara, tenga -agora que marcho- una continuidá d’equí pa en delantre».

Los nuevos propietarios, Esther Prieto y Samuel Castro espliquen «Con esti cambiu de propiedá garantizamos la continuidá de la editorial y de los compromisos colos autores, distribuidores, llibreríes y veceros, a quien agradecemos, esti añu qu’Ediciones Trabe cumple venti, l’enfotu que siempre tuvieron pa con Trabe… Otra manera, queremos agradece-y a Inaciu Iglesias los cinco años que trabayemos con él y les facilidaes que nos dio en tou momento pa l’alquisición de la empresa. Ensin la so xenerosidá nun diba ser posible. En cualquier casu, Ediciones Trabe va siguir al serviciu de la sociedá y la cultura asturianes y de tolos actores que les faen posible».

Páxina d’Ediciones Trabe

El chigre xixonés “IPA. La Cervecería del Millón d’Ibus” tien abiertu’l plazu pa entregar orixinales al concursu de dibuxos y rellatos curtios, que tarán basaos esclusivamente nesta cervecería, que podrá emplegase como base pa la hestoria o como protagonista, pero siempres alredor d’ella. Los organizadores del concursu espliquen que “nun se premiará tanto la calidá lliteraria o artística como la capacidá pa tresmitir lo que significa IPA, como somos, qué ye lo que pal escritor o artista tresmitimos”. Los orixinales van quedar en poder del chigre que podrá esponelos o espublizalos.

Pa los dibuxos podrá usase cualesquier soporte y teunica siempre que seyan dibuxos orixinales y que nun escedan del tamañu 210 mm X 297 mm. Los rellatos curtios podrán escribise n’asturianu, castellan, francés o inglés, podrán presentase escritos a mano, a maquina o impresos. La estensión nun podrá ser superior a 100 (cien) pallabres + títulu que tendrá que incluyir (IPA “La Cervecería del Millón d’Ibus), na llingua que seya escoyida.

Pa concursar nun hai llendes de edá y tolos participantes entrarán na mesma categoría. Los orixinales hai que presentalos n’Ipa “La Cervecería del Millón d’Ibús” allugada na Avenida Rufo García Rendueles, 7 esquines de Premiu Real y Emilio Tuya, 33203 Xixón Asturies – dende güei y enantes de les 22 hores del llunes 12 de payares de 2012, pela parte d’atrás tendrán que tener los datos del concursante (Nome y apellíos, señes, fecha nacimientu, DNI y corréu lleutrónicu o teléfonu, nel casu los menores de 18 años tendrán que figurar los datos del padre, madre o tutor, tamién). Nun sedrá almitíu dengún orixinal ensin estos datos.

Establécense los premios que vienen darreu: Pa los ganadores (Dibuxu y Rellatu si son mayores de 18 años – llibros, cerveces, material cerveceru, 1 plaza pal cursu-preba de cerveces próximu qu’entamemos y 1 caña del barril rotativu d’IPA que s’escueya nos próximos 60 dies de magar de la entrega de premios. Tolos participantes mayores de 18 años entrarán nel sorteu de 2 llotes de cerveces, 2 places pa un cursu-preba de cerveces y 5 cañes de cualesquiera de los barriles a escoyer de los que tengan pinchaos n’IPA “La Cervecería del Millón de Ibus” nos vinientres 60 díes de magar de la entrega de premios.

Los ganadores van dase a conocer nel actu d’entrega de los premios nuna folixa que vamos entamar el xueves 15 de payares a les 20 hores. Nel mesmu daráse llectura a los rellatos y espondránse los dibuxos. Pa recoyer el premiu sedrá imprescindible la presencia de los concursantes o persona que los represente. Nel casu los menores ye imprescindible que tean el padre, la madre o tutor. Los concursantes que nun tean presentes renuncien a los orixinales y al premiu que quedará en manes de la organización y decidirá si lu sortea o que fai. El sortéu va facese n’Ipa “La Cervecería del Millón d’Ibus” esi mesmu día y fadráse pel métodu tradicional de sacar los nomes de los concursantes d’una saca. Si dalgunu de los premiaos nel sortéu nun tuviera nel intre del mesmu, romperáse’l papel y sacaráse otru, hasta que s’entreguen tolos premios.

Esti 8 payares, “El Príncipe Derviche” visita Xixón, la recepción va ser na llibrería La buena letra. L’autor d’esti llibru, ganador del Premiu Xosefa Xovellanos de novela 2011, Xandru Fernández, va cuntar cola presencia d’Enrique del Teso. La llibrería ta asitiada nel 12 de la cai Casimiro Velasco.

La hestoria d’El Príncipe Derviche trespórtanos a los años caberos del sieglu XIX y a diversos llugares del mapa del Imperiu Austro-Húngaru, nun contestu de conspiraciones, intrigues polítiques y persecuciones. Otra manera, ye tamién la hestoria de la bomba qu’acabó con Antonio Udina Burbur, l’últimu falante en mundu de la llingua dálmata.

El Príncipe Derviche supón el regresu de Xandru Fernández a la narrativa llarga, desque publicara en 2006 La banda sonora del paraísu. Autor d’obres como Los homes de bronce (2001), Les ruines(2004; reeditada por Suburbia Ediciones en 2011) y Entierros de xente famoso (Suburbia Ediciones, 2008), Xandru Fernández yá ganara’l premiu Xosefa Xovellanos n’otres dos ocasiones, en 1993 con El club de los inocentes y en 1999 con El suañu de los páxaros de sable.

La Conceyalía de Cultura, Educación, Deporte organiza les XI Xornaes de Lliteratura Infantil y Xuvenil que se van a celebrar a lo llargo d’esti mes. El programa d’esta edición ye heteroxéneu en cuantes a que contién cine, teatru, esposiciones y lliteratura, pero toos estos xéneros xiren alredor del terror que fai de filu conductor d’estos alcuentros lliterarios. Güei a les 18:30 de la tarde ábrense cola inauguración de la esposición del llibru MIEU, escritu por Milio’l del Nido y con ilustraciones d’Alberto Sastre. Na inauguración van tar presentes Ángela Sánchez, de la Editorial Pintar-Pintar y Gema Suárez Torre, conceyala de Cultura de Samartín del Rei Aurelio.

L’envís d’estes xornaes pasar por impulsar vezos de llectura y creativos ente’l públicu infantil y xuvenil pente medies de el so aproximamientu al mundu de les lletres, les arte escénicas o’l cine dende una perspectiva recreativa y coles mesmes educativa.

Les xornaes son tamién una escelente oportunidá pa conocer novedaes en lliteratura infantil y xuvenil y facer un repás a los trabayos que nos últimos años tán produciendo nel xéneru del terror, en medios como la radio, el cine, el teatru o’l cómic.

El programa va rematar el 28 de payares, con conteníos en llingua asturiana y castellán.

El martes 13 tendrá llugar la proyección de la película “La nueche de los muertos viviente”, un clásicu del géneru de terror del añu 1968 y que se puede revisar agora n’asturianu gracies al doblaxe de Gonzali Producciones. La proyección fadráse na Casona del Bravial a les siete de la tarde. La entrada ye llibre y gratuita.

La viniente selmana, el miércoles 21 de payares tendrá llugar una charra a cargu del escritor Chechu García titulada “Terror n’asturianu” y na que se llevará a cabu un repás de tolo que se fizo y se ta faciendo col xéneru de terror en llingua asturiana, tanto nel ámbitu lliterariu como n’otros como’l cómic, la radio, la televisión o’l cine. Esta actividá celebraráse tamién na Casona del Bravial.

El día 28 la Casona del Bravial acueye un alcuentru con Milio’l del Nido, autor de los testos del llibru infantil Mieu, que cunta la hestoria de dos hermanos que se treslladen colos sos padres a una casona antigua al pie d’un faru nel que comiencen a asoceder fechos estraños. Na presentación l’autor tará acompañáu por Ángela Sánchez, de la Editorial Pintar-Pintar.

A toes estes actividaes que se celebrarán na Casona del Bravial hai qu’añedir tamién les representaciones teatrales que tendrán llugar nes escueles d’escolinos. El martes 6 de payares Carlos Alba representará la obra “Un cuentu, un arrullu, un cantar”, a les 10:30 na escuela infantil de L’Entregu y a les 11:30 na de Sotrondio.

Tamién habrá representaciones pa los centros escolares nel Teatru Municipal de Samartín. El martes 13 Con Alevosía Teatruo representará “Tristán y Pauletta”. Tomen el relevu Tras la Puerta Títeres, que representarán el xueves 15 “Malas Palabras”. P’acabar, el miércoles 21 de noviembre Callejón del Gato representará “Semillas de Cardamomo”. Toles representaciones serán a les 11:30 de la mañana.

Porgrama completu d’actividaes de les Xornaes

Esti vienres 2 de payares, a les ocho la tarde, Xosé Lluis Campal va tar na sala de conferencies del Vieyu Institutu de Xixón presentando en recital una esbilla de la so poesía.

Campal ñació n’Uviéu en 1965, llicencióse en Lliteratura Española en 1989 ya ingresó como miembru nel RIDEA en 1998. Dedicóse a la docencia, el periodismu cultural, la bibliografía, la esperimentación visual, la impartición de conferencies y ponencies congresuales, amás d’a la confección d’artículos d’investigación, siempres cola irrenunciable collaboración de la so muyer, Aurora Sánchez Fernández (1964-2012), finada apocayá.

Tien editaos, ente otros, los llibos «La sidra na poesía» (2012) y las plaquettes en castellá, asturianu y portugués: «A tientas» (1983), «Catálogo de infiernos» (1991), «Crónica de la grieta» (1993), «Ángulos» (1996), «Bastilla del inútil» (1997), «Les güelgues» (2007), «A paixão» (2008), «Llibretina de tornes» (2009), «Algunos microrrelatos» (2010). Asoleyó na rede’l minipoemariu «El tiempu la felicidá» (2012), y tien inéditu’l llibru «Aurora de fulgor», trabayando anguaño en «Corazón de mi vida (Poemas del tiempo sufriente)».

Esti 8 payares, “El Príncipe Derviche” visita Xixón, la recepción va ser na llibrería La buena letra. L’autor d’esti llibru, ganador del Premiu Xosefa Xovellanos de novela 2011, Xandru Fernández, va cuntar cola presencia d’Enrique del Teso. La llibrería ta asitiada nel 12 de la cai Casimiro Velasco.

La hestoria d’El Príncipe Derviche trespórtanos a los años caberos del sieglu XIX y a diversos llugares del mapa del Imperiu Austro-Húngaru, nun contestu de conspiraciones, intrigues polítiques y persecuciones. Otra manera, ye tamién la hestoria de la bomba qu’acabó con Antonio Udina Burbur, l’últimu falante en mundu de la llingua dálmata.

El Príncipe Derviche supón el regresu de Xandru Fernández a la narrativa llarga, desque publicara en 2006 La banda sonora del paraísu. Autor d’obres como Los homes de bronce (2001), Les ruines(2004; reeditada por Suburbia Ediciones en 2011) y Entierros de xente famoso (Suburbia Ediciones, 2008), Xandru Fernández yá ganara’l premiu Xosefa Xovellanos n’otres dos ocasiones, en 1993 con El club de los inocentes y en 1999 con El suañu de los páxaros de sable.

Pola mor del centenariu del ñacimientu de la filóloga y escritora María Xosefa Canellada, el Conceyu de Cabranes, en collaboración col Seminariu de Filoloxía Asturiana de la Universidá d’Uviéu, vien celebrando unes conferencies na Casa la Cultura de Santolaya.

Les xornaes van rematar esti miércoles 31 d’ochobre a les 19,30 hores con “Obra lliteraria de María Xosefa Canellada: la ética nel canon lliterariu”, por Pilar Fernández, profesora del Institutu “Pérez de Ayala” d’Uviéu.

La entrada ye llibre.

El chigre xixonés “IPA. La Cervecería del Millón d’Ibus” organiza un concursu de dibuxos y rellatos curtios que tarán basaos esclusivamente nesta cervecería, que podrá emplegase como base pa la hestoria o como protagonista, pero siempres alredor d’ella. Los organizadores del concursu espliquen que “nun se premiará tanto la calidá lliteraria o artística como la capacidá pa tresmitir lo que significa IPA, como somos, qué ye lo que pal escritor o artista tresmitimos”. Los orixinales van quedar en poder del chigre que podrá esponelos o espublizalos.

Pa los dibuxos podrá usase cualesquier soporte y teunica siempre que seyan dibuxos orixinales y que nun escedan del tamañu 210 mm X 297 mm. Los rellatos curtios podrán escribise n’asturianu, castellan, francés o inglés, podrán presentase escritos a mano, a maquina o impresos. La estensión nun podrá ser superior a 100 (cien) pallabres + títulu que tendrá que incluyir (IPA “La Cervecería del Millón d’Ibus), na llingua que seya escoyida.

Pa concursar nun hai llendes de edá y tolos participantes entrarán na mesma categoría. Los orixinales hai que presentalos n’Ipa “La Cervecería del Millón d’Ibús” allugada na Avenida Rufo García Rendueles, 7 esquines de Premiu Real y Emilio Tuya, 33203 Xixón Asturies – dende güei y enantes de les 22 hores del llunes 12 de payares de 2012, pela parte d’atrás tendrán que tener los datos del concursante (Nome y apellíos, señes, fecha nacimientu, DNI y corréu lleutrónicu o teléfonu, nel casu los menores de 18 años tendrán que figurar los datos del padre, madre o tutor, tamién). Nun sedrá almitíu dengún orixinal ensin estos datos.

Establécense los premios que vienen darreu: Pa los ganaores (Dibuxu y Rellatu si son mayores de 18 años – llibros, cerveces, material cerveceru, 1 plaza pal cursu-preba de cerveces próximu qu’entamemos y 1 caña del barril rotativu d’IPA que s’escueya nos próximos 60 dies de magar de la entrega de premios. Tolos participantes mayores de 18 años entrarán nel sorteu de 2 llotes de cerveces, 2 places pa un cursu-preba de cerveces y 5 cañes de cualesquiera de los barriles a escoyer de los que tengan pinchaos n’IPA “La Cervecería del Millón de Ibus” nos vinientres 60 díes de magar de la entrega de premios.

Los ganadores van dase a conocer nel actu d’entrega de los premios nuna folixa que vamos entamar el xueves 15 de payares a les 20 hores. Nel mesmu daráse llectura a los rellatos y espondránse los dibuxos. Pa recoyer el premiu sedrá imprescindible la presencia de los concursantes o persona que los represente. Nel casu los menores ye imprescindible que tean el padre, la madre o tutor. Los concursantes que nun tean presentes renuncien a los orixinales y al premiu que quedará en manes de la organización y decidirá si lu sortea o que fai. El sortéu va facese n’Ipa “La Cervecería del Millón d’Ibus” esi mesmu día y fadráse pel métodu tradicional de sacar los nomes de los concursantes d’una saca. Si dalgunu de los premiaos nel sortéu nun tuviera nel intre del mesmu, romperáse’l papel y sacaráse otru, hasta que s’entreguen tolos premios.

Bases completes del concursu

Tolos mayores de 16 años pueden participar nesti concursu y presentar una obra namás, n’asturianu estándar o na so variedá occidental. Va premiase aquella obra inédita qu’a xuiciu del xuráu seya d’un valir lliterariu mayor. La temática ye llibre y el rellatu ha tener una estensión de cinco fueyes como mínimu y venti a lo máximo, con una presentación en DIN A4 a espaciu doble y con cuatro copies.

Les obres nun se van volver a los autores, y el ganador va premiase con 400 euros pa cada categoría, la escrita colos rasgos de la variedá llocal y la escrita al mou estándar.

Los trabayos han presentase nel Serviciu de Normalización L.lingüística (La Plaza la Oliva, e/n, 33800, Cangas de Narcea), yá seya presencialmente o per corréu certificáu na mesma dirección, nun sobre ensin remite o embaxo nomatu, qu’axunte dientro la plica na que se dean a conocer los datos reales del autor, too ello enantes del 10 d’avientu.

El xuráu tará formáu por representantes de la Conceyalía de Cultura, un representante de la Rede de Normalización Llingüística nos Conceyos, maestros y escritores en llingua asturiana.